Bann Zenn Ki Fer Leker Zeova Kontan

Sa bann lartik letid la finn prepare spesyalman pu bann zenn Temwin Zeova. Akoz sa, nu ankuraz bann zenn pu etidye sa lartik la avek buku latansyon ek pu byin partisipe pandan Letid Latur Degard dan zot kongregasyon.

“Azir avek sazes mo garson, ek fer mo leker kontan, pu ki mo kapav reponn sa kikenn ki pe provok mwa la.” —PROVERB 27:11.

1, 2. (a) Explike kifer mem si to atire par bann kitsoz lemond, sa pa vedir ki to pa diyn pu enn Kretyin. (Romin 7:21) (b) Ki to aprann ar legzanp Azaf ? (Get lankadre, paz 7.)

FER kumadir to’nn al aste linz magazin. Parmi enn varyete model linz ki to pe gete, to truv enn ki deswit atir twa. So kuler ek so stil paret egzakteman zis pu twa ek kan to get so pri, to truve ki li pa ser. Me, kan to egzaminn linz la depre, to gayn sirpriz. To remarke ki dan so bann but, latwal la ize ek linz la mal kud. Mem si linz la atiran, li pa enn bon kalite. Eski to pu dispoze depans to larzan lor enn kitsoz ki fay kalite kumsa?

² Konpar sa sityasyon la avek sityasyon ki enn zenn Kretyin kuma twa kapav zwenn. Kan nu get bann kitsoz ki dan lemond, kumansman nu kapav truv zot paret byin atiran, parey kuma sa linz la. Par egzanp, to bann kamarad lekol al dan bann fet kot ena bel lanbyans, zot droge, zot bwar, zot ena ti kopin, ti kopinn, ek zot gayn relasyon sexyel avan maryaz. Eski parfwa sa manyer viv la atir twa? Eski to anvi gut enn tigit sa swadizan liberte ki zot ena la? Si wi, fode pa ki deswit to dir ki to leker move ek ki to pa diyn pu enn Kretyin. Avredir, Labib rekonet ki lemond kapav byin atiran—mem pu enn dimunn ki anvi fer Bondye plezir.—2 Timote 4:10.

3. (a) Kifer eski li initil galup deryer bann kitsoz lemond? (b) Kuma eski enn Kretyenn finn montre ki bann kitsoz ki lemond ofer, zot dan vid?

³ Asterla, egzaminn byin seki sa lemond la pe ofer, parey kuma to ti pu fer pu enn linz ki to interese pu aste. Demann tomem, ‘Eski bann kitsoz dan lemond zot bon kalite uswa fay kalite?’ Labib dir ki “lemond pe al fini.” (1 Zan 2:17) Ninport ki pli bon plezir lemond kapav ofer, li zis pu enn tigit letan. Anplis, enn kondwit ki pa fer Bondye plezir, kut byin ser. Wi, komdikoze, bomarse kut ser! Enn Kretyenn finn bizin siport seki li apel “bann sufrans ki rekolte parski li’nn mal servi so zenes.” Li dir: “Lemond kapav paret byin atiran ek li kapav tant nu. Ek li anvi fer twa krwar ki to kapav profit bann lamizman ki li ofer san konn okenn duler. Me, anverite sa li inposib. Lemond pu profit lor to ledo, ek kan li’nn fini ar twa, li pu zet twa dan enn kwin.”a Kifer eski to bizin gaspiy to zenes avek sa fay kalite lavi la?

Proteksyon Kont “Sa Kikenn Ki Move La”

4, 5. (a) Ki Zezi ti demann Zeova dan so lapriyer enn tipe avan ki li mor? (b) Kifer eski Zezi ti ena enn bon rezon pu demann sa?

⁴ Bann zenn Temwin Zeova fer zefor pu pa fer kamarad ar lemond parski zot konsyan ki li pena nanyin ki bon pu ofer. (Zak 4:4) Eski to enn parmi sa bann zenn ki fidel la? Si wi, nu felisit twa. Li vre ki li pa fasil pu reziste presyon bann kamarad ek pu montre twa diferan. Me, to ena enn kikenn ki kapav ed twa.

⁵ Dan enn lapriyer ki Zezi ti fer enn tipe avan so lamor, li ti demann Zeova pu “vey” lor so bann disip “akoz sa kikenn ki move la.” (Zan 17:15) Zezi ti kone kifer li ti demann sa. Li ti kone ki li pa ti pu fasil pu so bann disip res fidel, malgre ki laz zot ena. Kifer? Enn rezon se parski, kuma Zezi finn rekonet, so bann disip ti pu fer fas ar enn lennmi invizib ki byin for—“sa kikenn ki move la,” Satan ki apel usi Dyab. Labib dir ki sa demon la “pe sirkile kuma enn lyon ki pe kriye, ek li pe rod enn kikenn pu devore.”—1 Pyer 5:8.

6. Kuma eski nu kone ki Satan pena okenn pitye pu bann zenn?

⁶ Tutlong listwar, san okenn pitye, Satan finn pran plezir, pu fer bann dimunn konn bann pli pir sufrans ki kapav ena. Get bann maler byin trazik ki Satan ti avoy lor Zob ek so fami. (Zob 1:13-19; 2:7) Sirman to rapel usi sertin evennman to lepok ki to’nn tande dan linformasyon ek ki reflet lespri vyolan Satan. Parey kuma enn lyon, Satan pe vey so bann viktim an kasyet. Telman li anvi devor enn kikenn, ki li pa montre okenn pitye pu bann zenn. Par egzanp, dan kumansman premye syek N.L., Erod ti fer enn plan pu tuy tu bann garson dan Zerizalem ki ti ena dezan uswa mwins ki dezan. (Matye 2:16) Li for posib ki se Satan ki ti motiv Erod pu fer sa. Erod ti anvi tuy sa zanfan ki enn zur ti pu vinn Mesi ki Bondye ti promet ek ki ti pu amenn zizman Bondye lor Satan. (Zenez 3:15) Wi, li kler ki Satan pena okenn santiman pu bann zenn. So sel lintansyon se devor enn maximem dimunn posib. Se seki li pe rod fer sirtu dan nu lepok, parski li finn gayn puse dan lesyel. Asterla, Li dan vwazinaz later, avek “enn gran koler parski li kone ki li ena enn tigit letan mem.”—Revelasyon 12:9, 12.

7. (a) Kuma eski Zeova byin diferan ar Satan? (b) Eski Zeova pa’le ki to profit lavi? Explike.

⁷ Ena enn gran diferans ant Satan ek Zeova. Satan ena “enn gran koler,” alor ki Zeova Li, Li ena “buku pitye.” (Lik 1:78) Zeova Li reprezantasyon lamur. Avredir, telman Li manifeste sa kalite la, ki Labib dir: “Bondye Li lamur.” (1 Zan 4:8) Wi, bondye sa lemond la li diferan ar Bondye ki twa, to ena privilez pu adore! Alor ki Satan rod devore, Zeova Li, Li “pa anvi ki personn mor.” (2 Pyer 3:9) Lavi enn dimunn—to lavi usi—ena buku valer devan so lizye. Kan, dan so Parol, Zeova dir twa pa fer parti dan lemond, Li pa pe rod anpes twa profit lavi. Ni Li pe rod diminye to liberte. (Zan 15:19) Okontrer, Li pe vey lor twa akoz sa kikenn ki move la. To Papa ki dan lesyel anvi ki to konn enn kitsoz pli meyer ki bann plezir tanporer sa lemond la. Li anvi ki to gayn “vre lavi”—lavi pu tultan dan enn paradi lor later. (1 Timote 6:17-19) Zeova anvi ki to reysi, ek Li deryer twa pu pus twa pu realiz sa lobzektif la. (1 Timote 2:4) Pa fini, Zeova donn twa enn invitasyon spesyal. Ki invitasyon sa?

“Fer Mo Leker Kontan”

8, 9. (a) Ki kado to kapav donn Zeova? (b) Parey kuma legzanp Zob demontre, kuma eski Satan provok Zeova?

⁸ Eski to’nn deza aste enn kado pu enn kamarad pros ek get so figir kan to’nn ofer li sa? Pa bizin dir, sirman li’nn fer enn gran surir ranpli ar sirpriz ek rekonesans! Kitfwa, to’nn bizin byin reflesi ki kalite kado ki ti pu bon pu sa dimunn la. Asterla, get sa kestyon la: Ki kalite kado to kapav ofer to Kreater, Bondye Zeova? Kitfwa premye ku, sa kestyon la paret pena sans. Ki nu Bondye Tu-Pwisan bizin avek enn sinp dimunn kuma nu? Ki kitsoz ki Li pena deza, to kapav donn Li? Labib reponn dan Proverb 27:11: “Azir avek sazes mo garson, ek fer mo leker kontan, pu ki mo kapav reponn sa kikenn ki pe provok mwa la.”

⁹ Kuma to devet finn aprann dan to letid Labib, se Satan ki pe provok Zeova. Li pretann ki swadizan bann dimunn pa servi Bondye par lamur, me pu bann rezon egois. Alor, dapre li, si zot konn bann problem grav, deswit zot pu abandonn vre ladorasyon. Get par egzanp, seki Satan ti dir Zeova konsernan Zob, enn zom ki ti drwat: “Eski to pa finn mont enn baraz otur li, otur so lakaz ek otur tu seki li ena? Tu seki li fer, to beni ek grasa twa, limem ena pli gran trupo dan peyi. Me, pu sanze, nek avoy to lamin enn kut lor li ek tus tu seki Li ena, ek gete si li pa modi twa dan to figir.”—Zob 1:10, 11.

10. (a) Kuma eski nu kone ki Satan finn met an dut fidelite tu dimunn, pa zis fidelite Zob? (b) Ki rol to ena dan sa kestyon suverennte Bondye la?

¹⁰ Kuma Labib montre, Satan pa finn met an dut selman fidelite Zob, me usi fidelite tu bann lezot serviter Bondye—to fidelite usi. Avredir, se konsernan limanite an zeneral ki Satan ti dir Zeova: “Tu seki enn zom [pa zis Zob, me tu dimunn] ena, li pu donn sa pu so lavi.” (Zob 2:4) Eski to truv to rol dan sa kestyon byin inportan la? Kuma Proverb 27:11 indike, Zeova pe dir ki ena enn kitsoz ki to kapav donn Li. To kapav donn Li enn rezon pu reponn Satan, ki pe provok Li. Sey pans sa enn ku! Suverin Liniver pe invit twa pu donn to repons personel lor sa pli gran kestyon ki’nn kapav suleve la. To ena vremem enn gran responsabilite ek privilez, pa vre? Eski to kapav fer seki Zeova pe demann twa? Zob ti reysi fer li. (Zob 2:9, 10) Zezi usi ti reysi ek kuma li, enn gran kantite lezot dimunn finn res fidel pandan tutlong listwar—parmi ti ena plizir zenn. (Filipyin 2:8; Revelasyon 6:9) Twa usi, to kapav fer parey. Mazinn sa byin, ena zis de posibilite lor sa kestyon la: swa to dan kote Zeova, swa to dan kote Satan. To pa kapav omilye. Se par to kondwit ki to pu montre kisannla to pe sutenir. Dan kote kisannla to pu swazir pu ete?

Zeova Pran Twa Kont!

11, 12. Ki to swazir pu servi Zeova uswa non, eski sa fer enn diferans pu Li? Explike.

¹¹ Eski sa swa ki to pu fer la, li vremem inportan pu Zeova? Plizir dimunn finn res fidel ar Bondye. Eski sa pa ase pu Li reponn Satan? Li vre ki Satan ti pretann ki personn pa servi Bondye par lamur. Me, nu kone ki buku prev finn montre ki sa akizasyon la li fos. Kan mem sa, Zeova anvi ki to pran so par lor sa kestyon suverennte la. Kifer? Parski Li pran twa kont personelman. Zezi ti dir: “Li pa enn plezir pu mo Papa ki dan lesyel, ki enn parmi sa bann tipti la mor.”—Matye 18:14.

¹² Li kler ki Zeova interese ar semin ki to swazir pu pran. Pli inportan ankor, to swa ena enn lefe lor Li. Labib montre klerman ki Zeova ena bann santiman profon. Ek bann bon ek bann move aksyon ki bann dimunn fer, tus so santiman. Par egzanp, kan bann Izraelit ti rebele plizir fwa, sa ‘ti fer Li lapenn.’ (Psom 78:40, 41) Avan deliz lepok Noe, Zeova “ti santi so leker fermal” kan bann ‘dimunn ti’nn vinn byin move.’ (Zenez 6:5, 6) Reflesi seki sa vedir. Si to pran enn move semin, to pu fer to Kreater resanti lapenn. Sa pa vedir ki Bondye feb, uswa Li les li kontrole par bann lemosyon. Sa montre plito ki Li kontan twa ek Li pran kont to byinet. Asterla, si to fer seki bon, to pu fer leker Zeova kontan. Li kontan, pa zis parski Li’nn gayn enn lot repons pu reponn Satan. Me, Li kontan ki Li kapav asterla rekonpans twa. Wi, li anvi rekonpans so bann serviter fidel! (Ebre 11:6) Bondye Zeova, Li vremem enn Papa ki ena lamur!

Enn Kantite Benediksyon Asterla

13. Kuma eski kan nu servi Zeova, nu konn bann benediksyon depi asterla mem?

¹³ Kan nu servi Zeova, nu pa pu gayn bann benediksyon zis dan lavenir. Buku zenn parmi bann Temwin Zeova pe konn lazwa ek satisfaksyon depi asterla mem. Ek sa li pa etonan parski enn ekrivin Psom ti ekrir: “Bann lord ki Zeova done zot drwat, zot fer leker kontan.” (Psom 19:8) Zeova pli kone ki ninport ki dimunn seki bon pu nu. Atraver profet Izai, Zeova ti dir: “Mwa Zeova, mo to Bondye, sa Kikenn ki pe anseyn twa pu to tir profi la, sa Kikenn ki pe fer twa mars lor semin kot to bizin marse. A si selman to ti pran kont mo bann komannman! Lerla, to lape ti pu vinn parey kuma enn larivyer, ek to lazistis parey kuma bann vag lamer.”—Izai 48:17, 18.

14. Kuma eski bann prinsip Labib kapav ed twa pu evit duler ki gayne kan enn kikenn fer det?

¹⁴ Si to swiv bann prinsip Labib, sa pu evit twa buku duler ek sagrin. Par egzanp, Labib dir ki bann ki finn devlop lamur pu larzan, “finn fer zotmem buku ditor.” (1 Timote 6:9, 10) Eski ena sertin parmi to bann kamarad ki pe fer sa move lexperyans ki sa verse la mansyone? Ena zennzan ek zennfi ki fer buku det parski zot rod aste bann linz gran-gran mark uswa bann dernye gajet. Kan to aste bann kitsoz tro ser pu twa kredi, to bizin pey buku lintere pandan enn long peryod. Alor, sa vinn enn form esklavaz ki kapav rann to lavi difisil!—Proverb 22:7.

15. Dan ki bann fason bann prinsip Labib kapav protez twa kont duler ki gayne kan enn kikenn ena bann move kondwit sexyel?

¹⁵ Get usi problem ki leve an rapor avek bann move kondwit sexyel. Atraver later, tulelane enn gran kantite zennfi adolesan tom ansint san ki zot marye. Sertin donn nesans enn zanfan ki zot ti ni anvi gayne ek ki zot ni kapav elve. Lezot fer lavortman ek zot sufer parski zot konsyans pa aret repros zot. Pa fini, ena bann zennzan ek zennfi ki trap enn maladi ki transmet par relasyon sexyel, kuma SIDA. Byinsir, pu enn kikenn ki konn Zeova, pli gran domaz ki sa fer, se ki li perdi so relasyon avek Zeova.b (Galat 5:19-21) Ala kifer, Labib dir: “Sove devan bann vis sexyel.”—1 Korintyin 6:18.

Servi enn “Bondye Ki Ere”

16. (a) Kuma eski nu kone ki Zeova anvi ki to profit to zenes? (b) Kifer eski Zeova donn bann instriksyon pu to swiv?

¹⁶ Labib dekrir Zeova kuma enn “Bondye ki ere.” (1 Timote 1:11) Li anvi ki twa usi to ere. Dayer, so Parol dir: “Profit to zenes. Res dan lazwa pandan sa peryod la.” (Eklezyast 11:9, La Bible en français courant) Me, Zeova pa truv zis seki ena asterla. Li truv pli lwin; Li truv bann konsekans ki enn bon ek enn move kondwit pu ena dan lavenir. Akoz sa, Li donn twa sa konsey la: “Rapel to Gran Kreater, asterla, dan bann zur to adolesans, avan ki bann zur difisil vini, uswa bann lane kot to pu dir: ‘Mo pa truv okenn plezir dan sa lavi la.’ ”—Eklezyast 12:1.

17, 18. Kuma enn zenn Kretyin finn exprim so lazwa ki li ena dan servis Zeova, ek kuma eski to kapav konn sa mem lazwa la?

¹⁷ Zordi, buku zenn finn truv enn gran lazwa pu servi Zeova. Par egzanp Lina, ki ena 15 an, dir: “Mo kapav mars latet ot. Mo ena enn bon lasante parski mo pa fime ek mo pa droge. Mo gayn enn bon direksyon dan kongregasyon ki ed mwa pu reziste presyon intans ki Satan pe fer. Mo figir ge parski mo ena bann frekantasyon ankurazan dan Lasal DiRwayom. Me pli gran byinfe ki tusala, se lespwar ki mo ena pu viv enn zur pu tultan lor later.”

¹⁸ Parey kuma Lina, buku zenn Kretyin pe amenn enn konba byin dir pu zot lafwa, ek sa donn zot lazwa. Zot konsyan ki zot lavi—mem si defwa li ranpli ar presyon ek problem—ena enn vre sans ek enn vre lavenir. Alor, kontiyn servi Zeova; Li interese sinserman ar to byinet. Fer so leker kontan, ek Li pu fer twa rezwir asterla ek pu tultan!—Psom 5:11.

[Not anba paz]

Eski To Rapel?

• Ki danze Satan, “sa kikenn ki move la” met devan twa?

• Kuma eski to kapav fer leker Zeova kontan?

• Kuma eski Labib montre ki Zeova pran twa kont?

• Ki bann benediksyon enn kikenn gayne kan li servi Zeova?

[Lankadre/Zimaz lor paz 13]

Enn Zom Drwat Ti’nn Preske Tonbe

Azaf ti enn Levit ek enn mizisyin renome dan tanp Zeova an Izrael. Li ti mem konpoz bann ­sante ki ti servi pu ladorasyon Bondye an piblik. Me, malgre so bann privilez servis, enn tan Azaf ti santi li ­atire par move kondwit bann dimunn ki ti antur li. Li ti gayn linpresyon ki sa bann dimunn la ti pe dezobeir lalwa Zeova san konn okenn move konsekans. Plitar, Azaf finn avwe: “Mo lipye ti’nn preske vire, mo ti pre pu tonbe. Mo ti anvye bann ki ti pe fer vantar, kan mo ti truv lape bann move dimunn.”—Psom 73:2, 3.

Plitar, Azaf finn al dan tanp Bondye ek li finn priye lor sa size la. Apre ki so vizyon spirityel finn vinn pli kler, Azaf finn konpran ki Zeova ayir seki move. Li finn konpran usi ki, avek letan, bann move dimunn ek dimunn drwat tulede pu rekolte seki zot seme. (Psom 73:17-20; Galat 6:7, 8) Wi, bann move pe mars lor enn terin ki glise. Alafin, zot pu tonbe kan Zeova pu detrir sa lemond ki pa fer li plezir la.—Revelasyon 21:8.

[Bann zimaz lor paz 15]

Zeova interese sinserman ar to byinet, tandiki Satan li, li anvi devor twa

[Zimaz lor paz 10]

Buku zenn pe konn pli gran boner ki kapav ena kan zot pe servi Zeova ansam avek zot bann frer ek ser