Konsol Bann Dimunn Ki dan Lapenn

“Zeova finn swazir mwa . . . pu konsol tu bann ki andey.” —IZAI 61:1, 2.

1, 2. Kisannla nu bizin konsole, ek kifer?

ZEOVA, Bondye ki donn vre konsolasyon, anseyn nu ki nu bizin pran kont kan lezot dimunn dan maler. Li anseyn nu pu ena bann parol ki pu “konsol bann ki deprime” ek tu bann ki andey. (1 Tesalonisyin 5:14) Nu donn sa kalite led la nu bann frer ek ser kan sa neseser. Nu usi montre lamur anver bann dimunn ki andeor kongregasyon, mem anver bann dimunn ki petet pa’nn montre okenn lamur pu nu dan lepase.—Matye 5:43-48; Galat 6:10.

² Zezi Kris ti lir enn lord ki ti ena dan enn profesi ek li ti aplik sa ar limem. Sa profesi la dir: “Lespri Suverin Senyer Zeova lor mwa, parski Zeova finn swazir mwa pu anons labonn nuvel ar bann dimunn ki ena limilite. Li finn avoy mwa pu sulaz bann dimunn ki ena enn gran sagrin dan zot leker, . . . pu konsol tu bann ki andey.” (Izai 61:1, 2; Lik 4:16-19) Bann Kretyin dan nu lepok ki finn swazire pu al dan lesyel, kone depi lontan ki sa lord la aplik ar zot usi, ek bann “lezot muton” kontan pu partisip ansam avek zot dan sa travay la.—Zan 10:16.

3. Kan bann dimunn demande: “Kifer eski Bondye permet ki ena maler?,” kuma eski nu kapav ed zot?

³ Kan ena bann katastrof ki fer bann dimunn ena enn gran sagrin dan zot leker, suvan sa bann dimunn la demande: ‘Kifer eski Bondye permet ki ena maler ?’ Labib donn enn repons kler lor sa kestyon la. Me selman, sa pu demann inpe letan pu ki enn dimunn ki pa’nn etidye Labib konpran sa repons la byin. Kapav gayn led dan piblikasyon ki bann Temwin Zeova pibliye.a Me, pu kumanse, ena sertin dimunn ki’nn gayn enn konsolasyon, zis kan zot inn lir dan Labib enn tex kuma Izai 61:1, 2, parski sa tex la montre ki Bondye anvi ki bann dimunn gayn enn konsolasyon.

4. Kuma eski enn Temwin Zeova an Pologne ti kapav ed enn zennfi ki ti lekol ek ki ti dezespere? Kuma sa lexperyans la kapav ed u pu ed lezot?

⁴ Bann dimunn aze ek bann zenn, tulede bizin konsolasyon. Enn zennfi ki res Pologne, ti gayn depresyon. Li ti demann konsey enn kamarad ki ti Temwin Zeova. Avek bonte, Temwin la ti demann li plis ranseynman. Li ti aprann ki sa tifi la ti ena buku kestyon ek li ti ena usi bann dut. Par egzanp, li ti pe demann limem: “Kifer ena sa kantite mesanste la? Kifer eski dimunn sufer? Kifer mo ser ki ena setan ek ki paralize, pe sufer? Kifer eski mo ena malad leker? Legliz dir ki se Bondye ki anvi sa kumsa. Me si sa vre, mo pu arete krwar dan Bondye!” Temwin la ti priye Zeova an silans ek ti dir tifi la: “Mo kontan ki to finn poz mwa sa bann kestyon la. Mo pu esey ed twa.” Temwin la ti dir ki li usi li ti ena bann dut kan li ti ankor pli zenn ek bann Temwin Zeova ti ed li. Li ti explik li: “Mo’nn aprann ki Bondye pa fer dimunn sufer. Li kontan zot, ek Li anvi seki meyer pu zot. Li pu byinto amenn bann gran sanzman lor later. Maladi, problem ki vinn avek laz, ek lamor pu disparet. Bann dimunn obeisan pu viv pu tuletan isi mem lor sa later la.” Li ti montre sa tifi la tex Revelasyon 21:3, 4; Zob 33:25; Izai 35:5-7 ek 65:21-25. Apre enn long diskisyon, tifi la ti dir avek enn sulazman: “Asterla mo kone ki mo bi dan lavi. Eski mo kapav vinn get twa ankor?” Temwin la ti kumans enn letid Labib ar li ek zot ti fer letid de fwa par semenn.

Konsol Lezot Avek Konsolasyon Ki Bondye Done

5. Ki pu permet nu donn enn vre konsolasyon kan nu dir enn dimunn ki nu pran par dan so lapenn?

⁵ Kan nu rod konsol lezot, li bon ki nu truv bann parol ki bizin pu ankuraz zot. Par nu parol ek ton nu lavwa, nu montre sa dimunn ki dan lapenn la, ki nu santi nu sinserman konserne par so sityasyon. Nu pa pu kapav fer sa si nu dir bann parol banal ki pena sans. Labib dir nu ki “par nu landirans ek par konsolasyon ki bann Lekritir done, nu kapav ena lesperans.” (Romin 15:4) Si nu pran an konsiderasyon seki sa verse la dir, nu kapav swazir enn bon moman pu explike ki ete Rwayom Bondye. Nu kapav montre dan Labib kuma li pu regle bann problem ki ena zordi. Lerla nu kapav rezonn avek dimunn la ek montre li kifer nu kapav kont lor sa lesperans la. Se dan sa fason la ki nu pu donn enn konsolasyon.

6. Pu bann dimunn kapav profit byin konsolasyon ki Labib done, ki nu bizin ed zot pu konpran?

⁶ Pu enn dimunn profit byin konsolasyon ki nu pe donn li, li bizin konn vre Bondye. Li bizin kone ki kalite Bondye Li ete, ek ki so bann promes zot sir. Kan nu rod ed enn dimunn ki pankor vinn enn Temwin Zeova, li bon nu explik li sa bann pwin la. (1) Konsolasyon ki ena dan Labib sorti kot Zeova, vre Bondye. (2) Zeova enn Bondye Tu-pwisan, Li Kreater lesyel ek later. Li enn Bondye ki ena enn gran lamur fidel ek Li lasurs laverite. (3) Nu kapav gayn lafors pu fer fas ar bann difikilte si nu vinn pros ar Bondye kan nu gayn enn konesans egzak lor so Parol. (4) Dan Labib ena bann pasaz ki ena enn rapor avek bann problem byin presi ar ki diferan dimunn bizin fer fas.

7. (a) Ki rezilta nu kapav gayne kan nu montre ki Bondye donn nu “buku konsolasyon atraver Kris”? (b) Kuma u kapav konsol enn dimunn ki realize ki li’nn ena enn move kondwit?

⁷ Sertin inn lir tex 2 Korintyin 1:3-7, ar bann dimunn ki dan lapenn ek ki deza konn Labib. Sa inn donn sa bann dimunn la enn gran konsolasyon lor plan spirityel. Kan zot inn lir sa tex la, zot inn met lanfaz lor sa bann mo la: “nu gayn usi buku konsolasyon atraver Kris.” Sa tex la kapav ed enn dimunn pu realize ki Labib se enn liv ki donn enn gran konsolasyon ek ki li bizin pran Labib plis kont. Sa kapav donn usi lokazyon pu kontiyn konversasyon ar dimunn la, petet dan bann lezot lokazyon. Si enn dimunn panse ki li pe gayn problem akoz bann move kitsoz ki li’nn fer, ki nu pu dir li? San ki nu ziz li, nu kapav dir ki se enn konsolasyon pu kone ki tex 1 Zan 2:1, 2 ek Psom 103:11-14 dir. Dan sa fason la, nu pu vremem konsol bann dimunn avek konsolasyon ki Bondye done.

Kan Lavi Afekte par Vyolans ek Problem Ekonomik

8, 9. Kan nu konsol bann dimunn ki’nn sufer akoz vyolans, kuma nu kapav fer sa enn fason ki adapte ar zot sityasyon?

⁸ Lavi bann milyon dimunn inn byin afekte akoz vyolans—swa bann krim ki ena dan landrwa swa vyolans ki ena akoz lager. Kuma eski nu kapav konsol sa bann dimunn la?

⁹ Bann Kretyin fer byin atansyon pu pa dir uswa fer nanyin ki pu fer zot sutenir sertenn parti dan bann lager ki ena dan lemond. (Zan 17:16) Me zot servi bann tex Labib ki adapte pu montre ki sa bann kondisyon difisil la pa pu kontiyne pu tuletan. Zot kapav lir tex Psom 11:5 pu montre ki Zeova panse lor bann dimunn ki kontan lavyolans. Zot kapav servi usi tex Psom 37:1-4 pu montre lankurazman ki Bondye done pu pa rod tir vanzans par numem me pu fer Li konfyans. Bann parol ki ena dan Psom 72:12-14 montre ki Zezi Kris, Gran Salomon ki pe reyne dan lesyel, panse lor bann dimunn inosan ki pe sufer akoz vyolans.

10. Si pandan plizir lane, u’nn bizin siport lager, kuma eski bann tex Labib ki’nn site kapav konsol u?

¹⁰ Sertin dimunn inn viv dan bann peyi kot ena lager enn apre lot, kot bann parti rival lager pu gayn puvwar. Asterla, sa bann dimunn la finn aksepte ki lager ek bann konsekans ki sa amene, fer parti dan lavi. Sel lespwar ki zot ena, se ki zot lavi kapav amelyore si zot sove ek al res dan enn lot peyi. Me laplipar zame pa reysi fer sa. Buku ki finn eseye, finn perdi zot lavi. Suvan, bann seki finn reysi rant dan enn lot peyi, truve ki asterla zot nepli ena problem ki zot ti ena avan, me zot finn gayn bann lezot problem. Nu kapav servi tex Psom 146:3-6 pu ed sa bann dimunn la pu met zot konfyans dan enn kitsoz pli sir ki al res dan enn lot peyi. Profesi ki ena dan Matye 24:3, 7, 14 uswa 2 Timote 3:1-5, kapav ed zot pu konpran pli byin sityasyon ki egziste. Zot pu konpran usi pu ki rezon ena sa bann kondisyon ki zot pe siporte la, ki se parski nu pe viv dan lepok lafin. Bann tex kuma Psom 46:1-3, 8, 9 ek Izai 2:2-4 kapav ed zot pu konpran ki ena vremem enn lespwar ki pu ena lape dan lavenir.

11. Ki tex inn konsol enn madam ki res dan lwes Lafrik, ek kifer?

¹¹ Dan lwes Lafrik, pandan enn peryod kot ti tuletan ena lager, enn madam ek so fami ti kit lakaz ek ti sove, alor ki ti pe tir kut bal enn deryer lot. Avek letan, li fi’nn viv dan laper ek dan latristes ek tu so lespwar fi’nn tom dan delo. Plitar kan sa fami la ti pe res dan enn lot peyi, mari la ti deside pu bril zot sertifika maryaz. Mem si madam la ti ansint, so mari ti deside pu met li ek zot garson ki ti ena dizan deor, ek li ti deside pu vinn enn pret. Finalman kan finn lir tex Filipyin 4:6, 7 ek Psom 55:22 avek sa madam la, ek usi bann lartik ki baze lor Labib ki sorti dan Latur Degard ek Réveillez-vous !, sa finn ed li pu truv enn konsolasyon ek enn bi dan so lavi.

12. (a) Ki sulazman eski Labib donn bann dimunn ki gayn bann gran problem ekonomik? (b) Kuma eski enn Temwin Zeova an Asie inn kapav ed enn kliyan?

¹² Buku dimunn zot lavi inn byin afekte akoz problem ekonomik. Suvan, se lager ek so bann konsekans ki kre sa kalite problem la. Dan sertin ka, sa arive parski guvernman pa diriz peyi kuma bizin. Uswa parski bann dimunn ki pe dirize, zot gurman larzan, ek zot malonet. Tusala finn fer dimunn perdi tu kas ki zot finn ramase ek usi tu zot dibyin. Ena lezot dimunn ki zame mem zot finn ena bann kitsoz ki neseser pu viv. Tu sa bann dimunn la kapav gayn enn konsolasyon kan zot konn bann promess ki Bondye inn fer. Bondye inn promet pu sulaz bann dimunn ki ena konfyans an Li. Bondye donn garanti ki Li pu amenn enn lemond kot pu ena lazistis ek kot bann dimunn pu profit travay ki zot fer avek zot lamin. (Psom 146:6, 7; Izai 65:17, 21-23; 2 Pyer 3:13) An Asie, enn Temwin Zeova ti tann enn kliyan dir aki pwin li ti trakase akoz sityasyon ekonomik ki ti ena dan so peyi. Lerla Temwin la ti explik li ki, seki ti pe arive dan sa peyi la, anrealite sa ti form parti dan enn seri levennman ki pe arive dan lemond antye. Apre ki zot inn gayn enn konversasyon lor Matye 24:3-14 ek Psom 37:9-11, sa dimunn la inn kumans etidye Labib regilyerman.

13. (a) Kuma nu kapav servi Labib pu ed bann dimunn ki finn fatige tann bann fos promes? (b) Kuma u pu rezonn avek bann dimunn ki panse ki Bondye pa egziste akoz bann move kondisyon ki ena lor later?

¹³ Ena dimunn ki’nn sufer pandan plizir lane ek ki finn fatige tann bann fos promes. Dan sa sityasyon la, li posib ki zot resanble bann Izraelit an Ezip ki pa ti le ekute “parski zot ti dekuraze.” (Egzod 6:9) Lerla, li pu bon si nu atir zot latansyon lor fason ki Labib kapav ed zot pu fer fas ar bann problem ki zot pe gayne zordi. Nu kapav montre zot usi kuma Labib kapav ed zot pu evit bann pyez ki gat lavi buku dimunn pu nanyin. (1 Timote 4:8b) Sertin panse ki sa bann move kondisyon ki zot pe kone la, se enn prev ki Bondye pa egziste, uswa si Li egziste, Li pa pran kont bann dimunn. U kapav rezonn avek sa bann dimunn la lor bann tex Labib ki adapte ek ed zot pu konpran ki Bondye inn donn so led me ki buku dimunn inn refiz sa led la.—Izai 48:17, 18.

Konsol Bann Ki Afekte par Tanpet ek Tranblemandeter

14, 15. Kan enn maler ti les buku dimunn dan sok, kuma eski bann Temwin Zeova ti montre ki zot pran kont bann dimunn?

¹⁴ Maler kapav arive akoz enn tanpet, enn tranblemandeter, enn dife uswa enn explozyon. Partu sa kapav kre enn gran sagrin. Ki kapav fer pu konsol bann sirvivan?

¹⁵ Bann dimunn bizin kone ki ena enn kikenn ki pran zot kont. Apre ki ti ena enn latak teroris dan enn peyi, buku dimunn ti gayn sok. Buku parmi zot finn perdi bann manb zot fami, enn kikenn dan lakaz ki travay pu nuri lafami, ek bann kamarad. Sertin finn perdi zot travay ek buku finn perdi enn santiman sekirite ki zot ti krwar zot ti ena. Bann Temwin Zeova finn al ver bann dimunn dan zot landrwa ek finn fer bannla kone ki zot pran par dan sa bann gran maler ki’nn ariv zot la. Zot inn usi ena bann parol ankurazan ki sorti dan Labib, pu konsol sa bann dimunn la. Buku dimunn ti byin apresye lintere ki bann Temwin ti manifeste.

16. Kan ti ena enn katastrof dan enn landrwa an Salvador, kifer bann Temwin Zeova ki res laba, ti gayn bann bon rezilta dan zot predikasyon?

¹⁶ Dan Salvador, ti ena enn gran tranblemandeter an 2001. Zis apre sa, ti ena enn gran kantite labu ki’nn desann ek ki finn tuy buku dimunn. Enn ser ti perdi so garson ki ti ena 25 an. De ti ser fiyanse sa garson la usi ti truv lamor. Mama garson la ek fiyanse la, finn tutswit okip zot avek predikasyon. Buku dimunn ti dir zot ki se Bondye ki finn pran bann dimunn ki’nn mor. Zot ti dir usi ki se akoz volonte Bondye ki sa inn arive. Sa de Temwin la ti sit Proverb 10:22 pu montre ki Bondye pa kontan ki nu sufer. Zot ti lir Romin 5:12 pu montre ki lamor egziste akoz pese Adan, ek pa parski se volonte Bondye. Zot ti usi montre mesaz konsolasyon ki truv dan bann tex kuma Psom 34:18, Psom 37:29, Izai 25:8, ek Revelasyon 21:3, 4. Bann dimunn ti ekute fasilman, sirtu ki sa de madam la zotmem, zot ti’nn perdi bann manb zot fami dan sa maler la. Zot ti kumans plizir letid Labib.

17. Kan ena enn katastrof, ki kalite led nu kapav done?

¹⁷ Kan enn katastrof arive, u kapav zwenn enn dimunn ki deswit bizin led. Li posib ki u pu bizin apel enn dokter, ed sa dimunn la pu al lopital, uswa fer seki u kapav pu donn li manze ek enn plas pu li reste. An 1998, kan ti ariv enn katastrof kumsa an Italie, enn zurnalis finn dir ki bann Temwin Zeova “azir dan enn fason pratik, zot ed bann dimunn ki sufer san gete ki relizyon sa bann dimunn la ete.” Dan sertin landrwa, bann levennman ki ti anonse pu arive dan dernye zur pe realize ek sa amenn buku sufrans. Dan sa bann landrwa la, bann Temwin Zeova montre dimunn bann profesi ki’nn ekrir dan Labib. Zot konsol bann dimunn avek lasirans ki Labib done ki Rwayom Bondye pu amenn enn vre sekirite pu limanite.—Proverb 1:33; Mika 4:4.

Kan enn Fami Inn Mor

18-20. Kan finn ena enn lamor dan enn fami, ki u kapav fer uswa dir pu donn enn konsolasyon?

¹⁸ Tulezur buku dimunn dan lapenn akoz lamor enn dimunn ki zot kontan. Kan u pe prese, uswa kan u pe fer u bann aktivite tulezur, u kapav zwenn bann dimunn ki pe plor lamor enn fami. Ki u kapav dir ubyin fer pu konsol zot?

¹⁹ Eski u truve ki dimunn la byin afekte? Eski so lakaz ranpli avek bann fami ki dan lapenn zot usi? Ena buku kitsoz ki u ti pu anvi dir, me li inportan ki u azir avek bon zizman. (Eklezyast 3:1, 7) Petet li pu bon ki u prezant u kondoleans. U kapav les enn piblikasyon ki adapte ar sa sityasyon la (enn brosir, enn peryodik uswa enn trak). Answit, u kapav pase apre detrwa zur pu gete si u kapav ed lafami plis. Dan enn moman ki adapte, propoz dimunn la pu partaz bann panse ankurazan ki sorti dan Labib avek li. Sa kapav ede pu kalme ek geri so sufrans. (Proverb 16:24; 25:11) U pa kapav lev bann dimunn mor parey kuma Zezi ti fer. Me u kapav partaz seki Labib dir konsernan kondisyon bann dimunn mor. Selman, li pa pu enn bon moman pu dir li seki li krwar fos. (Psom 146:4; Eklezyast 9:5, 10; Ezekyel 18:4) U kapav lir ansam avek li dan Labib bann promes ki koz lor rezireksyon. (Zan 5:28, 29; Akt 24:15) U kapav servi legzanp enn rezireksyon ki’nn rakonte dan Labib pu montre ki sa bann promes la vedir. (Lik 8:49-56; Zan 11:39-44) Seki u kapav fer usi, se atir latansyon lor bann kalite Bondye, ki ranpli ar lamur ek ki donn nu enn lesperans kumsa. (Zob 14:14, 15; Zan 3:16) Explike kuma umem u’nn tir profi ar sa bann lanseyman la ek kifer u fer zot konfyans.

²⁰ Invit dimunn la pu vinn Lasal DiRwayom. Sa kapav ed li pu fer konesans bann dimunn ki vremem kontan zot prosin ek ki kone kuma pu ankuraz sakenn zot kamarad. Enn madam an Suède, ti’nn truve ki se sa mem ki li ti pe rode tutlong so lavi.—Zan 13:35; 1 Tesalonisyin 5:11.

21, 22. (a) Ki nu bizin fer pu konsol enn dimunn? (b) Kuma u pu konsol enn kikenn ki konn byin Labib?

²¹ Kan u kone ki enn dimunn dan lapenn, ki li dan kongregasyon, uswa andeor kongregasyon, eski parfwa li arive ki u pa tro kone ki u pu dir uswa ki u pu fer? An grek, mo ki servi pu “konsolasyon” dan Labib vedir “apel enn kikenn pu vinn pre kot u.” Pu u vinn enn vre konsolater, u bizin disponib pu ed bann dimunn ki dan lapenn.—Proverb 17:17.

²² Me si sa dimunn ki u anvi konsole la, deza kone ki Labib dir lor lamor, ranson, ek rezireksyon, ki u pu fer? Prezans enn kamarad ki ena mem krwayans, sa se deza enn gran konsolasyon. Si dimunn la anvi koze, ekut li avek atansyon. Pa panse ki u bizin fer enn diskur. Si zot lir bann pasaz Labib, konsider sa kuma bann mwayin ki Bondye pe servi pu donn zot tulede lafors. Exprim konfyans ki zot tulede ena dan seki Labib promet, ki zot sir sa pu arive. Montre ki u imit Bondye ek ki u ena pitye pu bann dimunn ki dan lapenn. Partaz usi bann verite byin inportan ki sorti dan Labib avek sa bann dimunn la. Kan u fer tusala, u pu kapav ed zot pu gayn konsolasyon ek lafors ar Zeova, “Bondye ki donn konsolasyon.”—2 Korintyin 1:3.

[Not anba paz]

Ki U Pu Dir?

• Kisannla buku dimunn akize kan ena bann maler, ek kuma eski nu kapav ed zot?

• Ki nu kapav fer pu ed lezot pu profit byin konsolasyon ki Labib done?

• Ki sityasyon ki ena dan u landrwa ki pe fer buku dimunn sufer, ek kuma eski u kapav konsol zot?

[Bann zimaz lor paz 31]

Partaz enn mesaz ki donn enn vre konsolasyon, dan bann moman difisil

[Bann Foto]

Kan refizye: FOTO ONU 186811/J. Isaac

[Zimaz lor paz 32]

Prezans enn kamarad, sa kapav enn konsolasyon