Ekut Seki Lespri Pe Dir!

“Les sa kikenn ki ena enn zorey la tann seki lespri pe dir bann kongregasyon.”—REVELASYON 3:22.

1, 2. Ki konsey ki repete sak fwa dan bann mesaz ki Zezi ti adres set kongregasyon ki mansyone dan Revelasyon?

PAR direksyon lespri sin, Zezi Kris ti koz avek set kongregasyon ki mansyone dan liv Labib Revelasyon. Bann serviter Zeova bizin pran kont sa bann parol la. Wi, dan sak mesaz Zezi, ena sa konsey la: “Les sa kikenn ki ena enn zorey la tann seki lespri pe dir bann kongregasyon.”—Revelasyon 2:7, 11, 17, 29; 3:6, 13, 22.

² Nu finn fini egzaminn bann mesaz ki Zezi ti adres bann anz, uswa bann sirveyan dan Efez, Smirn, ek Pergam. Ki profi nu kapav tire ar seki li finn dir sa kat lezot kongregasyon la, par direksyon lespri sin?

Pu Anz Ki dan Tyatir

3. Ki kote Tyatir ti truve, ek pu ki prodwi li ti sirtu renome?

³ “Sa Garson ki’nn ne kuma enn imin lor later la” felisit kongregasyon Tyatir, me an mem tan li repran li. (Lir Revelasyon 2:18-29.) Lavil Tyatir (zordi Akhisar) ti konstrir tutlong enn ti larivyer ki al fini dan Larivyer Gediz (ansyin Hermus) dan lwes Lazi Miner. Tyatir ti renome pu bann diferan metye artizanal ki so bann abitan ti pe fer. Se apartir enn rasinn (racine de garance) ki bann fabrikan tintir ti tir zot seleb kuler ruz vif uswa vyole (mov fonse). Dayer, Lidi ki ti vinn Kretyin pandan vizit Pol dan Filip an Gres, ti “enn marsan ki ti sorti dan lavil Tyatir ek ki ti pe vann (tintir uswa linz) kuler vyole.”—Akt 16:12-15.

4. Pu ki kitsoz kongregasyon Tyatir ti gayn felisitasyon?

⁴ Zezi felisit kongregasyon Tyatir pu so bann bon aksyon, so lamur, so lafwa, so landirans ek so travay dan minister. Avredir, ‘zot bann aksyon resan pli buku ki zot bann aksyon avan.’ Mem si nu finn akonpli buku bon kitsoz dan lepase, fode zame nu negliz nu bann valer moral.

5-7. (a) Kisannla “sa fam Zezabel la,” ek ki ti bizin fer konsernan so linflyans? (b) Kuma eski mesaz ki Zezi ti donn kongregasyon Tyatir ed bann fam ki kontan Bondye?

⁵ Kongregasyon Tyatir ti pe toler ladorasyon bann zidol, fos lanseynman ek bann move kondwit sexyel. Li ti toler prezans “sa fam Zezabel la”—reprezante kitfwa par enn grup fam ki ti ena bann mem tandans ki Zezabel, move larenn Rwayom dis-tribi Izrael. Dapre sertin biblis, sa bann ‘profetes’ dan Tyatir la ti pe sey pus bann Kretyin pu ador bann bondye ek bann dees ki ti patron bann artizan ki ti fer mem metye. Zot ti anvi usi fer zot partisip dan bann fet kot ti usi ofer manze bann zidol. Fode ki zordi dan kongregasyon Kretyin personn pa nom limem profetes ek sey manipil lezot!

⁶ Kris ‘ti pre pu avoy fam Zezabel lor enn lili dimunn malad, pu li sufer.’ Ek li ti pre pu lans ‘tu bann ki ti pe komet ladilter avek li, dan gran detres, amwin ki zot ti repanti pu bann move aksyon fam Zezabel.’ Fode ki zame bann ansyin toler sa kalite move lanseynman ek linflyans la. Li pa neseser ki enn Kretyin komet ladilter lor plan spirityel ek komet bann vis sexyel pu li kone ki “bann kitsoz profon Satan” zot konpletman move. Si nu pran byin kont warning Zezi, ‘nu pu tini ferm seki nu ena’ ek pese pa pu dominn nu. Bann manb 144,000 ki lor later finn rezet bann move dezir, bann move lintansyon ek bann pratik ki pa fer Bondye plezir. Ala kifer, kan zot resisite, zot gayn “lotorite lor bann nasyon” ek ansam avek Kris zot pu kraz bann nasyon but-but. Zordi zur, bann kongregasyon ena bann zetwal sinbolik. Me, apre zot rezireksyon dan lesyel, bann manb 144,000 pu gayn “zetwal briyan ki leve boner gramatin,” setadir Zezi Kris.—Revelasyon 22:16.

⁷ Kongregasyon Tyatir ti gayn warning pu pa toler move linflyans bann fam aposta. Mesaz ki Kris pe adres sa kongregasyon la par mwayin lespri sin, ed bann fam ki kontan Bondye pu res dan plas kot Bondye finn met zot zordi. Zot pa rod gayn lotorite lor bann zom. Zot pa rod sedwir okenn frer pu komet ladilter lor plan spirityel uswa bann vis sexyel. (1 Timote 2:12) Me plito, zot donn bon legzanp par zot bann bon aksyon ek par zot servis ki donn Zeova luanz. (Psom 68:11; 1 Pyer 3:1-6) Si kongregasyon prezerv seki li ena—setadir lanseynman ek kondwit pir ek travay predikasyon ki ena buku valer—lerla Kris pu vini, non pa pu amenn destriksyon, me pu amenn bann rekonpans extraordiner.

Pu Anz Ki dan Sard

8. (a) Ki kote Sard ti truve, ek ki sertin detay nu ena lor sa lavil la? (b) Kifer eski kongregasyon Sard ti bizin led?

⁸ Kongregasyon Sard ti bizin led san tarde parski li ti mor lor plan spirityel. (Lir Revelasyon 3:1-6.) Sard ti truv 50 km dan sid Tyatir. Li ti enn lavil ki ti prospere, avek anviron 50,000 abitan. So komers ti mars byin, li ti ena bon later pu plante ek li ti prodir bann linz ek tapi an lalenn. Tusala ti fer Sard enn lavil ris. Dapre istoryin Zozef, dan premye syek A.N.L., Sard ti ena enn gran kominote Zwif. Dan so bann rwinn, ena enn sinagog ek enn tanp pu Artemis, dees bann Efezyin.

9. Ki nu bizin fer si nu servis pu Bondye finn vinn enn rutinn?

⁹ Zezi ti dir anz kongregasyon Sard: “Mo konn to bann aksyon. Devan lezot to vivan, me to’nn mor.” Nu’si kitfwa, lezot konn nu kuma enn kikenn ki spirityel. Me, an seki konsern bann privilez servis, nu dan enn gran somey lor plan spirityel. Nu servis pu Zeova finn vinn enn rutinn, ek nu “pre pu mor” lor plan spirityel. Ki nu bizin fer dan enn ka parey? Ebyin, nu bizin ‘kontiyn rapel kuma nu ti resevwar mesaz Rwayom ek kuma nu ti port atansyon.’ Lerla, nu bizin remet lavi dan nu servis sakre. Byinsir, nu bizin kumans partisip dan bann reynion Kretyin avek tu nu leker. (Ebre 10:24, 25) Kris ti donn kongregasyon Sard sa warning la: “Amwin to leve, mo pu vinn kuma enn voler, ek to pa pu kone ditu ki ler mo pu vinn lor twa.” Eski sa warning la konsern nu’si? Wi, byinto, nu pu ena pu rann enn kont.

10. Mem si zot dan enn sityasyon ki parey kuma seki kongregasyon Sard ti kone, ki kapav dir lor detrwa Kretyin?

¹⁰ Me mem si zot dan enn sityasyon ki parey kuma seki kongregasyon Sard ti kone, detrwa kitfwa ‘pa sali zot linz. Zot pe kapav mars avek Kris avek bann linz blan parski zot diyn pu fer sa.’ Zot finn prezerv zot lidantite Kretyin. Zot pa les okenn inpirte sali zot. Lor plan moral ek relizye, zot res san tas ar lemond. (Zak 1:27) Donk, ‘pena semin ki Zezi efas zot non dan liv lavi, me li pu rekonet zot devan so Papa ek devan bann anz.’ Sa grup Kretyin ki’nn swazire la zot diyn pu mars avek Kris. Kuma enn lamarye pu Kris, zot inn met lor zot enn linz ki an lin fin, ki pir ek ki pe briye. Sa reprezant zot bann aksyon drwat. (Revelasyon 19:8) Bann privilez extraordiner ki pe atann zot dan lesyel, motiv zot pu sorti vinker dan sa lemond la. Bann benediksyon pe atann usi bann ki ena lesperans pu viv pu tultan lor later. Zot usi, zot non finn ekrir dan liv lavi.

11. Ki nu bizin fer si nu pe gayn somey lor plan spirityel?

¹¹ Personn parmi nu pa ti pu kontan konn sa tris kondisyon spirityel ki kongregasyon Sard ti kone la. Me, ki nu bizin fer si nu santi ki nu pe kumans gayn somey lor plan spirityel? Nu bizin azir san tarde pu nu prop dibyin. Sipoze, nu pe kumans atire par bann manyer azir ki pa fer Bondye plezir! Ubyin nu kumans rat bann reynion uswa predikasyon! Anu priye Zeova avek tu nu leker pu gayn so led. (Filipyin 4:6, 7, 13) Ki pu ed nu pu pa dormi lor plan spirityel? Lir Labib tulezur ek etidye bann piblikasyon ki “serviter ansarz ki fidel” pe donn nu. (Lik 12:42-44) Lerla, nu pu parey kuma sertin dan kongregasyon Sard, ki ti gayn faver Kris. Nu pu enn benediksyon pu bann lezot Kretyin.

Pu Anz Ki dan Filadelfi

12. Kuma eski u pu dekrir sityasyon relizye ki ti egziste dan ansyin lavil Filadelfi?

¹² Zezi ti felisit kongregasyon Filadelfi. (Lir Revelasyon 3:7-13.) Filadelfi (zordi Alasehir) ki ti truv dan lwes Lazi Miner, ti sant enn rezyon kot ti prodir divin ek li ti pe byin prospere. Avredir, so bondye prinsipal ti apel Dyonizos, bondye divin. Li paret ki bann Zwif dan Filadelfi ti rod konvink bann Kretyin Zwif pu gard sertenn pratik Lalwa Moiz uswa pu return ar sa. Me, zot pa ti reysi.

13. Kuma eski Kris finn servi “lakle David”?

¹³ Kris “ena lakle David.” Bondye finn konfye li bann lintere Rwayom ek li ena responsabilite pu pran swin sa grup Kretyin ki ena lafwa la. (Izai 22:22; Lik 1:32) Zezi ti servi sa lakle la pu donn bann Kretyin dan ansyin lavil Filadelfi ek dan lezot kongregasyon, bann privilez ek bann posibilite pu fer plis an rapor avek Rwayom Bondye. Depi 1919, li finn uver “enn gran laport” devan “serviter ansarz ki fidel.” Sa laport la donn lakse ar travay predikasyon ek personn pa kapav ferm sa laport la. (1 Korintyin 16:9; Kolosyin 4:2-4) Byinsir, sa laport la li ferme pu bann ki dan “sinagog Satan,” parski zot pa bann Izraelit spirityel.

14. (a) Ki promes Zezi ti fer kongregasyon Filadelfi? (b) Ki nu kapav fer pu nu pa tonbe dan “ler leprev”?

¹⁴ Ar bann Kretyin dan ansyin lavil Filadelfi, Zezi ti fer sa promes la: “Parski to finn gard parol konsernan mo landirans, mwa usi mo pu prezerv twa dan ler leprev, ki pe vinn lor tu seki lor later.” Pu fer travay predikasyon, nu bizin ena sa kalite landirans ki Zezi ti manifeste la. Zame li pa ti sede devan lennmi, me li ti kontiyn fer volonte so Papa. Akoz sa, Kris ti’nn resisite ek li ti gayn lavi imortel dan lesyel. Nu’si nu bizin tini ferm nu desizyon pu ador Zeova. Nu bizin pres labonn nuvel pu montre ki nu sutenir Rwayom Bondye. Lerla, sa pu anpes nu tonbe pandan “ler leprev,” peryod kot nu lafwa li teste. Nu pu ‘kontiyn trap for seki Kris finn donn nu’ kan nu fer zefor pu ogmant bann lintere Rwayom. Enn rekonpans extraordiner pe atann bann ki fer sa: bann manb 144,000 pu gayn enn kuronn ki ena gran valer dan lesyel, ek zot bann konpaynon fidel pu gayn lavi eternel lor later.

15. Ki bann kondisyon, bann ki pu ‘kolonn dan tanp Bondye,’ zot bizin ranpli?

¹⁵ Zezi azute: “Seki sorti vinker, mo pu fer li vinn enn kolonn dan tanp mo Bondye, . . . ek lor li mo pu ekrir non mo Bondye ek non lavil mo Bondye, setadir nuvo Zerizalem ki pe sorti kot Bondye ek ki pe desann depi dan lesyel. Ek mo pu ekrir usi mo nuvo non.” Bann sirveyan ki fer parti dan bann manb 144,000 ki lor later, bizin sutenir vre ladorasyon. Zot bizin kalifye zot pu kontiyn res bann manb “nuvo Zerizalem.” Pu sa, zot bizin pres Rwayom Bondye ek gard zot prop lor plan spirityel. Sa li neseser si zot anvi vinn bann kolonn dan tanp spirityel ki dan lesyel ek ki dan laglwar. Sa li neseser usi si zot anvi port non lavil Bondye kuma bann sitwayin sa lavil la dan lesyel, ek port non Kris antan ki so madam. Byinsir, zot bizin ena zorey pu “ekut seki lespri pe dir bann kongregasyon.”

Pu Anz Ki dan Laodise

16. Ki nu kapav dir lor lavil Laodise?

¹⁶ Kris ti koriz kongregasyon Laodise ki ti tom dan satisfaksyon personel lor plan spirityel. (Lir Revelasyon 3:14-22.) Laodise ti truv anviron 150 km dan les Efez. Li ti truv dan vale fertil larivyer Likis, kot plizir larut komersyal ti krwaze. Donk, se enn lavil ki ti an plin devlopman. Li ti enn peyi indistryel ek li ti enn sant finansye. Bann linz ki ti fer avek lalenn nwar sa rezyon la, ti byin repite. Dan sa lavil la ti ena usi enn lekol medsinn byin renome, ki ti prodir lapud Frizyenn pu lizye. Zisteman, enn parmi bann prinsipal bondye sa lavil la ti Esculape, enn bondye medsinn. Li paret ki dan Laodise ti ena enn gran popilasyon Zwif. Sertin parmi zot ti aparaman byin ris.

17. Kifer eski bann Laodisein ti gayn bann repros?

¹⁷ Zezi koz avek kongregasyon Laodise atraver “anz” sa kongregasyon la. Li koz ar zot avek lotorite kuma “temwin fidel ek vre, ek kuma kumansman kreasyon Bondye.” (Kolosyin 1:13-16) Bann Laodisein ti gayn bann repros parski zot ti “ni fre ni so” lor plan spirityel. Parski zot ti tyed, Kris ti pu vomi zot. Li pa ti difisil pu zot konpran sa konparezon ki Zezi ti servi la. Dan Yerapolis, ki pa ti tro lwin, ti ena bann lasurs delo so. Ek dan Kolos, ti ena delo fre. Pu gayn delo dan Laodise, ti bizin ponp delo depi enn ase bon distans. Alor, kan delo ti ariv dan lavil, li posib ki li ti tyed. Lor so traze ziska Laodise, delo la ti pas par enn kanal. Kan li ti ariv pre ar lavil la, li ti pas atraver bann tru ki ti’nn fuye dan bann blok ros ki ti’nn asanble ansam.

18, 19. Ki led bann Kretyin ki zordi resanble bann Kretyin dan Laodise, kapav gayne?

¹⁸ Bann dimunn ki resanble bann Laodisein zordi, zot ni so ni fre. Zot ni enn motivasyon, ni enn rekonfor pu lezot! Res zis pu kras zot, parey kuma delo tyed. Zezi pa’le servi zot kuma so bann port-parol, kuma “bann anbasader pu Kris” ki’nn swazire par lespri sin. (2 Korintyin 5:20) Si zot pa repanti, zot pu perdi zot privilez antan ki proklamater Rwayom. Bann Laodisein ti pe galup deryer bann rises materyel, ek zot pa ti kone ki ‘zot ti pov, mizerab, aveg ek tuni.’ Zordi ena sertin ki kuma zot. Me, zot kapav sorti dan zot mizer spirityel ek zot kapav retruv kler ek reabiy zot lor plan spirityel. Me pu sa, zot pu bizin aste ar Kris ‘lor rafine’ ki lafwa prodir kan li pas dan leprev. Zot pu bizin usi aste ar Kris “bann linz blan” ki reprezant zot pozisyon drwat devan Bondye, ek usi “medsinn lizye” pu ed zot truv kler lor plan spirityel. Bann sirveyan Kretyin kontan pu ede pu fer zot konsyan zot bann bezwin spirityel, pu ki zot “ranpli ar lafwa.” (Zak 2:5; Matye 5:3) Bann sirveyan bizin usi ed zot pu met “medsinn” dan zot lizye spirityel. Sa vedir ki zot pu bizin led pu aksepte ek viv dapre lanseynman, konsey, legzanp, ek latitid Zezi. Sa se enn remed efikas kont “dezir laser, dezir lizye, ek letalaz bann kitsoz ki [enn kikenn] ena.”—1 Zan 2:15-17.

¹⁹ Zezi repran ek disiplinn tu bann dimunn pu ki li ena lafeksyon. Bann sirveyan ki travay anba so direksyon, zot usi zot bizin fer parey avek tandres. (Akt 20:28, 29) Bann Laodisein ti bizin “zele” ek zot ti bizin “repanti.” Zot ti bizin sanz zot manyer panse ek zot fason viv. Ek nu, ki fason nu pe viv? Eski servis sakre Bondye finn perdi so linportans pu sertin parmi nu? Si wi, anu aste ‘medsinn lizye ar Zezi’ pu ki nu kapav truv klerman linportans pu kontiyn avek zel rod Rwayom avan tu.—Matye 6:33.

20, 21. Zordi, ki bann ki pe uver laport pu Zezi kan li “tape,” ek ki pe atann zot devan?

²⁰ “Gete!” ala seki Kris pe dir, “Mo pe debut devan laport ek mo pe tape. Si kikenn tann mo lavwa ek li uver laport, mo pu rant kot li ek mo pu pran repa diswar ansam avek li ek li avek mwa.” Suvan, Zezi ti anseyn lezot lor plan spirityel pandan bann repa ki li ti pran avek zot. (Lik 5:29-39; 7:36-50; 14:1-24) Asterla, li pe tap laport bann kongregasyon ki dan nu lepok resanble kongregasyon Laodise. Eski bann manb sa bann kongregasyon la pu uver laport? Eski zot pu fer reviv zot lafeksyon pu li? Eski zot pu akeyir li parmi zot ek les li anseyn zot? Si zot fer sa, Kris pu manze ek bwar avek zot ek sa pu benefisye zot buku lor plan spirityel.

²¹ Zordi, dan enn sans sinbolik, bann “lezot muton” pe akeyir Zezi kot zot. Sa aksyon la pu amenn zot ver lavi pu tultan. (Zan 10:16; Matye 25:34-40, 46) Pu sak manb 144,000 ki sorti vinker, Kris pu donn li enn privilez. Li pu gayn enn gran loner pu ‘asiz ansam avek li lor so tronn, parey kuma li, li ti sorti vinker ek li finn asiz avek so Papa lor So tronn.’ Wi, pu bann manb 144,000 ki sorti vinker, Zezi promet zot an rekonpans enn tronn ansam avek li, dan kote drwat so Papa dan lesyel. Ek bann lezot muton ki sorti vinker zot, zot atann enn zoli plas lor later kan Rwayom Bondye pu reyne.

Bann Leson pu Nu Tu

22, 23. (a) Kuma eski tu bann Kretyin kapav tir profi ar bann parol ki Zezi ti dir sa set kongregasyon la? (b) Ki nu bizin determine pu fer?

²² Pena dut ki tu bann Kretyin kapav tir buku profi ar bann parol ki Zezi ti dir sa set kongregasyon dan Lazi Miner la. Zezi ti felisit sa bann kongregasyon la, kan sa ti apropriye. Alor, sa li enn legzanp pu bann ansyin ki kontan zot bann frer ek ser. Wi, legzanp Zezi pus zot pu felisit sak manb dan kongregasyon personelman ek usi bann kongregasyon ki pe fer byin lor plan spirityel. Kot ena bann febles, bann ansyin pu ed zot bann frer pu aplik bann remed ki Labib ofer. Nu tu, nu kapav kontiyn tir profi ar bann diferan pwin dan konsey ki Zezi ti donn sa set kongregasyon la. Byinsir, sa pu benefisye nu, osi lontan ki nu aplik sa bann konsey la avek led lapriyer ek san tarde.a

²³ Dan sa bann dernye zur kot nu pe viv la, se pa enn ler pu nu tom dan satisfaksyon personel lor plan spirityel. Se pa enn ler usi pu galup deryer bann kitsoz materyel uswa pu servi Zeova zis pu lizye dimunn. Donk, tu bann kongregasyon bizin plito kontiyn briye kuma bann portlanp ki Zezi finn gard dan zot plas. Antan ki bann Kretyin fidel, anu tultan determine pu pran kont kan Kris koze ek pu ekut seki lespri dir. Lerla, nu pu konn enn lazwa dirab parski nu pe reflet lalimyer pu laglwar Zeova.

[Notes]

Ki U Pu Reponn?

• Kisannla ti “sa fam Zezabel la,” ek kifer bann fam ki kontan Bondye bizin pa imit li?

• Ki kondisyon ti egziste dan kongregasyon Sard, ek ki nu kapav fer pu evit resanble buku Kretyin ki ti viv laba?

• Ki bann promes Zezi ti fer kongregasyon Filadelfi, ek kuma sa aplike zordi?

• Kifer eski bann Laodisein ti gayn bann repros, me ki lespwar bann Kretyin zele ena pu lavenir?

[Zimage page 14]

Nu bizin evit bann move tandans “fam Zezabel”

[Zimage page 16]

Zezi finn uver devan so bann disip “enn gran laport” ki donn bann privilez an rapor avek Rwayom Bondye

[Zimage page 18]

Eski u akeyir Zezi ek eski u ekut li?