Done dan enn Fason Ki Fer Bondye Plezir

ZEZI ek so bann disip ti pe apresye enn bon ti manze dan Betani ansam avek sertin bon kamarad. Parmi ti ena Mari, Mart ek Lazar ki ti’nn fek resisite. Enn moman, Mari finn tir enn liv delwil ki ti kut byin-byin ser ek li finn kumans pas sa lor lipye Zezi. Kan Zida Iskaryot finn truv sa, li finn ankoler ek li pa finn res trankil. Li finn dir: “Kifer eski pa finn vann sa delwil parfime la pu trwa san denye ek donn sa bann pov?” Byin vit bann lezot usi finn kumans fer bann mem kalite konplint.—Zan 12:1-6; Mark 14:3-5.

Me, Zezi finn reponn: “Les li trankil. . . . Dayer, tuletan pu ena bann pov parmi zot, ek kan zot ule, zot tuzur kapav fer seki bon anver bannla, me mwa, pa tuletan ki mo pu avek zot.” (Mark 14:6-9) Bann sef relizye Zwif ti anseyne ki lasarite pa ti zis enn kitsoz ki ekselan lor plan moral, me ki li kapav mem efas bann pese. Zezi li, li ti montre klerman ki si nu’le done dan enn fason ki fer Bondye plezir, ek nu zis donn lasarite bann pov, sa li pa ase.

Anu gete dan ki fason, premye kongregasyon Kretyin ti fer bann don. Sa pu ed nu pu truv bann fason pratik pu montre ki nu interese ar lezot ek lerla fer Bondye plezir par seki nu done. Nu pu truv usi enn fason done ki spesyal ek ki fer buku dibyin.

“Fer Bann Don Mizerikord”

Dan plizir lokazyon, Zezi ti ankuraz so bann disip pu “fer bann don mizerikord,” uswa kuma lezot tradiksyon dir “donn an sarite.” (Lik 12:33; New English Bible) Zezi ti met so bann disip an gard kont tandans pu fer letalaz dan sel lintansyon pu donn laglwar sa kikenn ki’nn fer bann don la, olye ki donn Bondye laglwar. Li dir: ‘Kan to pe fer bann don mizerikord, pa bizin sufle tronpet devan twa, parey kuma bann ipokrit fer dan bann sinagog ek dan lari, pu ki dimunn donn zot glwar.’ (Matye 6:1-4) Bann premye Kretyin ti aplik sa konsey la. Zot ti evit fer letalaz parey kuma bann sef relizye ipokrit dan zot lepok ki ti fer krwar ki zot pli sin ki lezot. Bann premye Kretyin ti swazir pu ed bann ki ti bizin led par bann servis ki zot rann bannla personelman uswa par bann kado ki zot done an prive.

Par egzanp, dan Lik 8:1-3, nu aprann ki Mari Magdalenn, Zann, Sizann, ek lezot ankor ti servi “zot dibyin” san fer letalaz, pu ed Zezi ek so bann zapot. Sa bann zom la, pa ti bann dimunn pov. Me zot ti abandonn tu bann mwayin ki ti permet zot gayn kas pu viv pu konsantre tu zot zefor dan laktivite predikasyon. (Matye 4:18-22; Lik 5:27, 28) Avredir, kan zot finn ed bannla pu fer travay ki Bondye ti donn zot, sa bann fam la ti donn Bondye laglwar. Ek Bondye ti montre ki Li apresye zot. Kuma? Se kan Li finn prezerv dan Labib legzanp gran zenerozite ki zot finn lese, pu ki tu bann zenerasyon fitir kapav lir.—Proverb 19:17; Ebre 6:10.

Dorkas ti enn lot bon madam ki ti “fer buku bon aksyon ek bann don mizerikord.” Dan Zope, so lavil ki ti truv dan bor lamer, li ti kud bann linz pu bann vev ki pa ti ena mwayin. Nu pa kone si li ti aste latwal ek tu bann furnitir ar so kas pu kud sa bann linz la, uswa li ti selman kud bann linz san li pran kas. Me, akoz so bon travay, bann ki li ti ede ti byin kontan li. Bondye usi ti byin kontan li ek Li finn rekonpans li pu so bonte.—Akt 9:36-41.

Bann Bon Mobil Byin Inportan

Ki ti pus sa bann dimunn la pu done? Se pa zis enn santiman pitye provoke par enn lapel sekur ki’nn tus zot. Personelman zot ti santi ki zot ti ena responsabilite pu fer seki zot kapav tulezur pu ed bann ki mizer, dan difikilte, malad ek dan bann lezot problem ankor. (Proverb 3:27, 28; Zak 2:15, 16) Se sa fason done la ki fer Bondye plezir. Se enn profon lamur pu Bondye ek enn profon dezir pu imit so bann kalite kuma so mizerikord ek so zenerozite ki sirtu pus bann dimunn pu done dan sa fason la.—Matye 5:44, 45; Zak 1:17.

Lapot Zan ti met laksan lor sa fason done ki byin inportan la, kan li ti demande: “Si enn kikenn ki ena mwayin dan sa lemond la pu gayn tu seki li bizin pu viv, li truv so frer ki bizin led, me purtan li ferm laport so leker, be kuma eski lamur Bondye kapav res dan so leker?” (1 Zan 3:17) Repons la kler. Lamur pu Bondye pus bann dimunn pu done. Bondye byin apresye ek Li rekonpans bann ki parey kuma Li kontan done. (Proverb 22:9; 2 Korintyin 9:6-11) Eski nu truv bann dimunn zenere kumsa zordi? Get seki ti pase fek la dan enn kongregasyon bann Temwin Zeova.

Lakaz enn ser aze ti dan enn move leta ek ti byin bizin reparasyon. Ser la ti pe res tusel ek li pa ti ena okenn fami pu ed li. Pandan buku letan, so lakaz ti tuletan disponib pu fer bann reynion. Ek byin suvan li ti kontan partaz enn repa avek ninport kisannla ki aksepte so linvitasyon. (Akt 16:14, 15, 40) Kan bann manb dan kongregasyon finn truv so sityasyon, zot finn zwenn ansam pu ed li. Ena finn fer bann kontribisyon, lezot finn ofer zotmem pu fer bann travay. Pandan detrwa wikenn, bann volonter finn ranz enn nuvo twa, instal enn nuvo saldebin, krepi ek penn so lakaz anba, ek instal bann nuvo bife dan lakwizinn. Seki zot finn fer, pa finn zis donn Madam la seki li ti bizin, me sa finn usi fer bann manb dan kongregasyon vinn pli pros. Sa bon legzanp ki sa bann vre Kretyin la finn lese par fason zot done, finn inpresyonn bann vwazin.

Ena telman enn kantite fason kot nu kapav ed lezot personelman. Eski nu kapav pas inpe letan avek enn garson uswa enn tifi ki pena papa? Eski nu kapav aste komisyon pu enn vev aze ki nu kone uswa fer inpe kutir pu li? Eski nu kapav prepar enn repa uswa donn enn ti kas enn kikenn ki dan pins? Pa neseserman nu bizin ris pu nu kapav ed lezot. Lapot Pol ti ekrir: “Parski si bon volonte li la an premye, li pu sirtu akseptab dapre seki enn kikenn ena, me pa dapre seki li pena.” (2 Korintyin 8:12) Eski sa fason done la, setadir done personelman, direkteman, eski se sel fason done ki Bondye beni? Non.

Ki Nu Kapav Dir lor Sekur Organize?

Defwa bann zefor personel pa ase. Dayer, Zezi ek so bann zapot ti ena enn fon pu ed bann pov. Ek zot ti aksepte kontribisyon bann dimunn ki ti anvi ede ki zot ti zwenn kan zot ti prese. (Zan 12:6; 13:29) Bann kongregasyon dan premye syek usi parey. Zot ti fer bann kolek kan ti bizin ek zot ti organiz bann gran sekur.—Akt 2:44, 45; 6:1-3; 1 Timote 5:9, 10.

Se seki ti pase ver 55 N.L. Bann kongregasyon dan Zida ti’nn tom dan lamizer. Kitfwa sa ti arive akoz enn gran lafaminn ki ti fek pase. (Akt 11:27-30) Lapot Pol, ki ti tuletan byin trakase pu bann pov, ti demann bann kongregasyon osi lwin ki kongregasyon Masedwann, pu ede. Personelman li finn organiz enn kolek ek li finn servi bann zom ki ti apruve pu partaz sa bann don la. (1 Korintyin 16:1-4; Galat 2:10) Ni li ni lezot, pa ti gayn enn lapey pu sa.—2 Korintyin 8:20, 21.

Zordi, bann Temwin Zeova usi fer parey. Byin-byin vit zot ede kan ena bann katastrof. Par egzanp, pandan lete 2001, bann gran siklonn ti fer enn gran inondasyon dan Houston, Texas, U.S.A. Antu, 723 lakaz bann Temwin ti andomaze, buku ladan ti byin kase. Enn komite sekur pu bann katastrof finn etabli tutswit ek ti ena bann ansyin kalifye ki ti form parti ladan. Zot finn kalkil bezwin sak dimunn ek zot finn distribye bann fon pu ed bann Temwin lokal pu fer fas ar sa sityasyon la, ek repar zot lakaz. Bann volonter dan bann kongregasyon akote finn fer tu sa travay la. Telman enn Temwin ti rekonesan pu led ki li finn gayne ki, kan li finn gayn ranbursman ar so lasirans pu reparasyon so lakaz, tutswit li finn donn sa kas la fon sekur. Kumsa bann lezot ki bizin led ti kapav gayn sa.

Me, nu bizin fer atansyon an seki konsern bann lorganizasyon saritab. Nu bizin reflesi byin kan nu tann bann lapel ki zot fer nu pu fer bann don. Sertin lorganizasyon saritab depans enn kantite kas pu pey zot staf uswa pu fer bann gran piblisite pu ankuraz bann dimunn pu fer bann don. Lerla, zot res zis enn tigit kas pu ed bann dimunn. Proverb 14:15 dir: “Enn kikenn ki pena lexperyans, li pu krwar tu seki dimunn dir li, me enn kikenn ki malin, li pu vey byin so bann pa.” Donk, li bon ki nu byin egzaminn tu bann fe.

Enn Fason Done Ki Amenn Buku Byinfe

Ena enn fason done ki buku pli inportan ki lasarite. Zezi ti mansyonn sa kan enn zenn sef ki ti ris ti demann li ki li bizin fer pu gayn lavi eternel. Zezi ti dir li: “Ale, vann seki to ena ek donn bann pov ek to pu ena enn trezor dan lesyel, ek vini, swiv mwa.” (Matye 19:16-22) Remarke ki Zezi pa finn zis dir ‘Donn bann pov ek to pu gayn lavi.’ Okontrer, li finn azute, “Vini, swiv mwa.” Dan enn sans, li vre ki kan nu donn lasarite se enn kitsoz ki merit felisitasyon ek li benefik, me vinn enn disip Kris vedir plis ki sa.

Premye kitsoz ki ti interes Zezi se ed bann dimunn lor plan spirityel. Enn tipe avan li mor, li ti dir Pilat: “Pu sa ki mo finn ne, ek pu sa ki mo finn vinn dan lemond, pu mo donn temwanyaz lor laverite.” (Zan 18:37) Li vre ki Zezi ti premye pu ed bann pov, geri bann malad ek nuri bann ki ti fin. Me li ti sirtu form so bann disip pu prese. (Matye 10:7, 8) Dayer, dan bann dernye linstriksyon ki li finn donn zot, li ti donn sa lord la: “Ale ek fer bann dimunn dan tu bann nasyon vinn bann disip.”—Matye 28:19, 20.

Byinsir, predikasyon pa pu rezud tu bann problem ki ena dan lemond. Me kan nu partaz sa bon nuvel lor Rwayom Bondye la avek tu kalite dimunn, sa donn Bondye laglwar. Kifer? Parski predikasyon pe akonpli volonte Bondye ek li uver semin pu permet bann dimunn ki aksepte sa mesaz la, gayn bann byinfe pu tuletan. (Zan 17:3; 1 Timote 2:3, 4) Kifer eski u pa ekut seki bann Temwin Zeova ena pu dir prosenn fwa ki zot vizit u? Zot amenn avek zot enn kado spirityel. Ek zot kone ki se meyer fason ki zot kapav donn u kitsoz.

[Zimage page 6]

Ena buku fason pu montre ki nu interese ar lezot

[Zimage page 7]

Kan nu pres bon nuvel sa fer Bondye plezir ek sa permet bann dimunn gayn bann byinfe pu tuletan