Enn Sel Vre Relizyon Kretyin—Enn Realite

ZEZI KRIS ti etabli enn sel relizyon, uswa enn sel kongregasyon. Sa kongregasyon la ti enn lekor spirityel uswa enn fami spirityel. Par la nu pe rod dir ki li ti enn rasanbleman tu bann dimunn ki Bondye ti swazire par so lespri sin. Tu sa bann dimunn la ti bann dimunn ki Bondye ti aksepte kuma so “bann zanfan.”—Romin 8:16, 17; Galat 3:26.

Zezi ti anseyne ki se sel mwayin ki Bondye servi pu diriz so pep ver laverite ek lavi. Pu montre byin sa laverite inportan la, Zezi ti konpar semin ki al ver lavi pu tuletan ar enn larut. Li ti dir: “Rant par laport sere; parski sa semin ki gran ek larz la, li al ver destriksyon, ek buku dimunn pe pas par sa semin la, me sa laport tipti ek sa semin ki al ver lavi la, li sere, ek enn tigit dimunn ki truv li.”—Matye 7:13, 14; Zan 14:6; Akt 4:11, 12.

Enn Kongregasyon Ini

Fode pa nu panse ki sa kongregasyon dan premye syek la ‘ti enn sosyete mondyal, iniversel, ek organize, parey ar seki nu rod dir kan nu koz lor legliz katolik.’ Se seki The New Dictionary of Theology dir. Me kifer sa? Sa diksyoner la dir: “Pu sinp rezon ki enn sosyete iniversel organize kumsa zame ti egziste.”

Tu dimunn bizin dakor ki premye kongregasyon Kretyin pa ti resanble ditu bann sistem relizye ki’nn vinn bann institisyon parey kuma nu truve zordi. Me kan mem sa, premye kongregasyon Kretyin ti byin organize. Bann kongregasyon individyel pa ti fonksyone san ki zot depann lor lezot kongregasyon. Zot tu ti rekonet lotorite enn kolez santral dan Zerizalem. Dan sa grup la ti ena bann zapot ek bann ansyin ki ti dan kongregasyon Zerizalem. Sa kolez santral la ti ede pu gard kongregasyon ini parey kuma “enn sel lekor” Kris.—Efezyin 4:4, 11-16; Akt 15:22-31; 16:4, 5.

Ki’nn ariv sa sel vre kongregasyon la? Eski li’nn vinn pwisan Legliz Katolik? Eski li’nn devlope ek li’nn divize pu form tu sa bann diferan relizyon ki nu truve zordi dan legliz Protestan la? Uswa eski enn lot kitsoz finn arive?

“Dible” ek “Move Lerb”

Pu nu gayn sa bann repons la, anu egzaminn byin seki Zezi Kris limem ti dir pu arive. Kitfwa u pu soke pu aprann ki Zezi ti atann ki so kongregasyon pu disparet, ek li ti pu permet ki sa sityasyon tris la kontiyne pandan plizir syek.

Li ti etabli enn lyin ant so kongregasyon ek “rwayom dan lesyel” ek li ti dir: “Rwayom ki dan lesyel finn vinn parey kuma enn zom ki’nn sem bon lagrin dan so karo. Alor ki bann zom ti pe dormi, so lennmi finn vini ek finn sem move lerb dan so karo dible ek li’nn ale. Kan bann plant la finn zerme ek finn prodir bann frwi, move lerb la usi finn aparet. Bann serviter sa propriyeter la finn vinn ver li ek zot finn dir: ‘Met, eski to pa ti sem bon lagrin dan to karo? Abe kot sa bann move lerb la sorti?’ Li dir zot: ‘Enn lennmi, enn zom ki’nn fer sa.’ Bann serviter la dir li: ‘Eski to ule ki nu sorti ek nu al ramas sa bann move lerb la?’ Li dir zot: ‘Non. Si zot aras sa bann move lerb la zot riske derasinn dible an mem tan. Les zot pus ansam ziska rekolt, lerla mo pu dir bann ki fer rekolt: Ramas dabor move lerb la ek atas zot ek fer bann pake pu al brile, apre sa kumans ramas dible ek met zot dan mo stor.’ ”—Matye 13:24-30.

Zezi ti explike ki li ti sa “planter” la. “Bon lagrin” la ti reprezant so bann vre disip. So “lennmi” ti Satan. “Bann move lerb” ti reprezant bann swadizan Kretyin ki dusma-dusma finn form parti dan premye kongregasyon Kretyin. Zezi ti dir ki li pu les “dible” ek “bann move lerb” la puse ansam ziska ki “rekolt” vini. Sa pu arive pandan lepok lafin. (Matye 13:37-43) Ki tusala ti vedir?

Kongregasyon Kretyin Finn Koronpi

Zis apre lamor bann zapot, bann anseynan aposta ki ti dan kongregasyon finn kumans pran kontrol kongregasyon. Zot ti dir “bann kitsoz traver pu deturn bann krwayan ek fer bannla swiv zot.” (Akt 20:29, 30) Rezilta: Buku Kretyin ‘finn abandonn lafwa.’ Zot finn “ turn zot ver bann zistwar fos.”—1 Timote 4:1-3; 2 Timote 4:3, 4.

The New Dictionary of Theology dir ki ver katriyem syek N.L. ‘Relizyon Kretyin Katolik ti’nn vinn relizyon ofisyel Lanpir Romin. Legliz ek lasosyete profann ti’nn zwenn ansam.’ Lerla sa finn kre enn melanz ant Legliz ek Guvernman ki ti konpletman kontrer avek krwayans bann premye Kretyin. (Zan 17:16; Zak 4:4) Sa diksyoner la dir ki avek letan legliz an limem ek fason ki li ti organize ek tu so bann krwayans debaz finn sanze net. Sa finn arive ‘par linflyans enn drol ek move melanz Ansyin Testaman ek bann filozofi Grek.’ Parey kuma Zezi Kris ti anonse, pa ti truv so bann vre disip amezir ki bann swadizan Kretyin finn ogmante.

Bann ki ti pe ekut Zezi ti kone ki li difisil pu rekonet dible ek move lerb. Par egzanp ti ena enn move lerb anpwazone ki ti ena bann zepi ek ki ti apel ‘l’ivraie’. Li ti byin resanble dible amezir ki li grandi. Donk, Zezi ti pe montre ki pandan enn lepok, li ti pu byin difisil fer diferans ant bann vre Kretyin ek bann swadizan Kretyin. Me sa pa vedir ki kongregasyon Kretyin ti aret egziste. Kifer? Parski Zezi ti promet ki li ti pu kontiyn gid so bann frer spirityel “tulezur ziska lafin sa lemond la.” (Matye 28:20) Zezi ti dir ki dible pu kontiyn grandi. Pena dut ki atraver bann syek, ki li lor plan individyel uswa an grup, bann vre Kretyin finn fer tu pu res atase ar bann lanseynman Kris. Me zot ti nepli enn lorganizasyon byin vizib ki ti kapav rekonet fasilman. Antuka, zot pa ti parey kuma sistem relizye aposta ki ti byin vizib ek ki tutlong listwar finn zis abes ek dezonor non Zezi Kris.—2 Pyer 2:1, 2.

“Idantifye Sa Kikenn Ki Rebel Kont Lalwa La”

Lapot Pol ti anonse ki pu ena enn lot kitsoz ki pu fer nu rekonet sa fos sistem relizye la. Li ti ekrir: “Pa les personn tronp zot dan okenn fason, parski [zur Zeova] pa pu vini avan ki lapostazi vini ek fer nu idantifye sa kikenn ki rebel kont lalwa la.” (2 Tesalonisyin 2:2-4) Sa “kikenn ki rebel kont lalwa la” se grup bann pret ki elev zotmem dan enn pozisyon pu diriz lor kongregasyon “Kretyin.”a

Lapostazi finn kumanse dan lepok lapot Pol. Kan bann zapot ti ankor vivan zot ti anpes lezot pu tom dan lapostazi. Me enn fwa ki zot finn mor, zot bon linflyans finn disparet ek lapostazi finn ogmante byin-byin vit. Lapot Pol ti dir ki nu pu kapav byin remark sa par ‘seki Satan pu fer, avek tut sort kalite mirak ek bann siyn ek lezot mwayin ankor pu anbet bann dimunn.’ (2 Tesalonisyin 2:6-12) Sa dekrir byin seki buku bann sef relizye finn fer atraver listwar!

Pu sutenir ki swadizan Katolik Romin samem vre legliz, bann sef Katolik dir ki bann levek finn erit zot pozisyon ar bann premye zapot Zezi. Zot dir ki zot finn erit sa par enn siksesyon apostolik ki ti egziste depi ki Vre Relizyon Kretyin finn kumanse. Avredir, seki zot dir pena okenn fondman istorik uswa Biblik. Pena okenn prev valab ki sistem relizye ki finn leve apre lamor bann zapot Zezi ti dirize par lespri sin Bondye.—Romin 8:9; Galat 5:19-21.

Ek ki nu kapav dir konsernan bann lezot relizyon ki finn etabli vit-vit apre seki nu apel peryod Reform? Eski zot ti swiv mem model ki premye kongregasyon Kretyin? Eski zot finn retabli sa vre premye kongregasyon Kretyin la? Li vre ki apre peryod Reform, buku dimunn finn kapav gayn Labib dan zot prop lang. Me, listwar montre ki sa bann legliz la ti kontiyn anseyn bann fos lanseynman.b—Matye 15:7-9.

Me, remarke ki Zezi Kris ti dir ki so sel vre kongregasyon pu retabli pandan seki li ti apel lepok lafin. (Matye 13:30, 39) Bann profesi Labib ki finn realize montre ki zordi nu pe viv sa lepok la. (Matye 24:3-35) Pwiski sa li enn realite, sakenn parmi nu bizin demann numem, ‘Kot sa vre relizyon la ete?’ Li bizin vinn deplizanpli fasil pu idantifye li.

Kitfwa u panse ki u finn deza fini truv sa relizyon la uswa sa kongregasyon la. Li byin inportan ki u asir u ki vremem u finn truv li. Kifer? Parski kuma dan premye syek, zordi usi ena zis enn sel vre relizyon. Eski u’nn pran letan pu asir u ki u relizyon pe swiv byin model ki kongregasyon Kretyin premye syek finn lese, ek ki li pe res byin atase ar bann lanseynman Zezi Kris? Kifer u pa egzaminn sa asterla mem? Bann Temwin Zeova pu byin kontan pu ed u fer sa.—Akt 17:11.

[Notes]

[Zimage page 5]

Eski u relizyon pe swiv mem model ki bann Kretyin premye syek finn lese an seki konsern predikasyon ek letid?