Kuma U Pu Ranforsi U Maryaz

MAZINN enn lakaz ki dan enn move leta akoz neglizans. Lapintir pe dekloke, twa finn kumans andomaze, ek gazon finn vinn long. Li kler ki sa lakaz-la finn andomaze par bann siklonn byin-byin for pandan plizir lane, ek ki bann dimunn ki res ladan finn negliz li. Me eski bizin kraz lakaz-la? Pa neseserman. Si fondasyon-la ankor solid ek lakaz-la pe tini debut, ankor kapav repar li.

Eski kondisyon sa lakaz-la fer u mazinn u maryaz? Avek letan, komdikoze, kitfwa bann siklonn finn byin afekte u maryaz. U uswa u konzwin, uswa mem zot tulede kitfwa finn negliz zot maryaz dan enn sertin fason. Kitfwa u ena mem santiman ki Sandy. Apre 15 an maryaz li dir: “Sel kitsoz ki nu ti ena an komin se nu maryaz, apart sa nu pa ti ena nanyin. Ek sa li pa ti ase.”

Mem si u maryaz finn ariv ziska sa pwin-la, pa prese pu deside ki u bizin kas li. Kitfwa, u ankor kapav repar li. Sa depann buku lor ki kantite u ek u konzwin, zot santi zot angaze anver zot kamarad. Sa kapav ed enn maryaz pu res stab dan bann sityasyon difisil. Me kuma eski Labib kapav ed u pu ranforsi sa langazman-la?

Langazman Inplik enn Obligasyon

Dapre enn diksyoner, enn langazman inplik enn obligasyon, enn devwar moral. Defwa, servi mo langazman pu enn kitsoz, kuma par egzanp enn kontra komersyal. Par egzanp, enn kontrakter kapav santi li oblize pu fer bann kitsoz ki ena lor kontra ki li finn siyne pu ranz enn lakaz. Kitfwa personelman, li pa konn sa dimunn ki’nn donn li sa travay-la. Me, kan mem sa, li oblize pu gard promes ki li’nn fer dan sa kontra-la.

Mem si maryaz pa enn sinp tranzaksyon komersyal kot pena okenn santiman, sa langazman ki u’nn pran-la inplik enn obligasyon. U ek u konzwin sirman finn promet devan Bondye ek devan bann dimunn ki zot pu res ansam, mem ki arive. Zezi ti dir: “Okumansman Bondye ti kre zom ek fam. Lerla li ti dir, ‘Akoz samem, enn zom pu kit so papa ek so mama ek li pu atas li avek so fam.’ ” Zezi azute: “Seki Bondye finn atas ansam, zom bizin pa large.” (Matye 19:4-6) Donk, kan bann problem leve, u ek u konzwin bizin byin deside pu gard promes ki zot finn fer ar zot kamarad.a Enn madam dir: “Se selman apre ki nu finn aret konsider divors kuma enn swa, ki bann kitsoz finn kumans amelyore.”

Me, sa langazman-la li plis ki enn sinp obligasyon. Ki sa inplike ankor?

Korperasyon Ranforsi Sa Langazman-La

Langazman dan maryaz pa vedir ki tuletan bann konzwin pu tom dakor. Kan enn dispit eklate, sakenn bizin fer tu pu rezud sa problem-la. Me zot pa pu fer sa zis parski zot santi ki zot oblize tini enn promes. Non, me se usi parski zot ena enn latasman afektif pu zot kamarad. Kan Zezi ti koz lor bann mari ek bann fam li ti dir: “Asterla zot nepli de, me enn sel.”

Kan Labib dir ki u ek u konzwin zot “enn sel,” ki li pe rod dir? Lapot Pol ti ekrir ki “bann mari bizin kontan zot fam kuma zot prop lekor.” (Efezyin 5:28, 29) Donk, kan Labib dir ki u ek u konzwin zot “enn sel,” sa vedir an parti ki u interese ar byinet u konzwin parey kuma u interese ar u byinet. Bann dimunn ki marye bizin sanz zot fason panse. Zot bizin aret pans zis pu “mwa,” me pans pu “nu.” Enn konseye ti ekrir: “Tulede konzwin bizin aret panse dan zot leker ki zot selibater, ek zot bizin arive pans kuma enn kup marye dan zot leker.”

Eski u ek u konzwin zot pans kuma enn kup marye dan zot leker? Li kapav arive ki de dimunn res ansam pandan plizir lane san ki zot vinn “enn sel” dan sa sans-la. Wi, sa kapav arive. Me liv Giving Time a Chance (Les Letan Rezud Bann Problem) dir: “Lavi maryaz se enn lavi partaz, ek plis de dimunn fer bann kitsoz ansam, plis zot lavi maryaz pu prospere.”

Sertin kup ki pa ere dan zot maryaz, res ansam akoz zot bann zanfan uswa, pu ki zot gayn enn sekirite lor plan finansye. Ena lezot ki siport sa sityasyon-la parski zot kont divors uswa parski zot per ki lezot pu panse si zot divorse. Li byin ki bann kup ki dan sa sityasyon-la pa divorse. Me, rapel ki zot lobzektif se pa selman pu ena enn maryaz ki dire, me pu ena enn maryaz kot ena lamur.

Kan Nu Pa Get Zis pu Nu, Sa Ranforsi Nu Langazman

Labib ti anonse ki dan “dernye zur,” bann dimunn pu “kontan zotmem.” (2 Timote 3:1, 2) Parey kuma sa profesi-la finn dir, li paret ki bann dimunn zordi met laksan lor zot prop ladorasyon. Dan buku maryaz, si enn konzwin done san ki li atann kitsoz an retur, lezot kapav konsider li kuma enn dimunn feb. Me, dan enn maryaz ki solid, tulede konzwin manifeste enn lespri sakrifis. Kuma u kapav manifeste sa kalite latitid-la?

Olye ki u zis demann u, ‘Ki mo pe gayne dan sa relasyon-la?’ demann u plito ‘Ki mo pe fer personelman pu fortifye mo maryaz?’ Labib dir ki bann Kretyin bizin “pa get zis zot prop lintere, me pran kont lintere lezot usi.” (Filipyin 2:4) Reflesi lor sa prinsip Labib-la, ek an mem tan analiz bann kitsoz ki u’nn fer semenn dernye. Komye fwa eski u finn azir avek bonte zis dan lintere u konzwin? Kan u konzwin ti anvi koze, eski u ti ekute, mem si dan sa moman-la kitfwa u pa ti tro anvi ekut li? Komye laktivite ki interes u konzwin plis ki u, eski u finn fer?

Amezir ki u analiz sa bann kestyon-la, pa panse ki u konzwin pa pu remark u bann bon aksyon, ek ki li pa pu rekonpans u pu sa. Enn liv dir: “Dan laplipar relasyon, kan enn kikenn azir dan enn fason pozitif, sa fer lezot usi reazir parey. Donk, fer tu pu ankuraz u konzwin pu azir dan enn fason pozitif. Kuma u kapav fer sa? Se kan umem u azir dan sa fason-la.” Kan u fer bann sakrifis pu u konzwin sa fortifye u maryaz. Kifer? Parski sa montre ki u maryaz ena valer devan u lizye ek ki u anvi prezerv li.

Li Inportan ki U Konsider Maryaz Kuma enn Kitsoz Ki Pu Dire

Fidelite ena buku valer devan lizye Bondye. Dayer, Labib dir: “Avek enn kikenn ki fidel, twa [Zeova] to pu montre twa fidel.” (2 Samyel 22:26) Res fidel anver Bondye, vedir usi res fidel anver maryaz ki Li finn etabli.—Zenez 2:24.

Si u ek u konzwin zot fidel anver zot kamarad, zot pu ena santiman ki zot maryaz li enn kitsoz ki dirab. Kan u pans pu lavenir, u truv u ek u konzwin tuzur ansam. U pa kapav panse ki u nepli ansam. Ek sa fason pu truv bann kitsoz-la li protez u maryaz. Enn madam dir: “Mem si mo byin ankoler avek mo mari ek ki mo byin bulverse lor seki pe ariv nu, mo pa trakase atansyon mo maryaz kase. Seki fatig mwa se kuma nu pu fer pu nu retabli nu relasyon. Me, mo sir ki nu pu reysi retabli bann relasyon, mem si pu linstan mo pa pe truve kuma nu kapav fer sa.”

Konsider maryaz kuma enn kitsoz dirab, sa li byin inportan dan nu langazman ki nu’nn pran anver nu konzwin. Me li tris ki dan buku fami pena sa. Kan latmosfer pe sofe, enn konzwin kapav dir: “Mo pe kit twa!” uswa “Mo pe al rod enn lot ki vremem pu apresye mwa!” Li vre ki lapliparditan, bann konzwin pa pe rod dir sa vremem. Me, Labib fer remarke ki lalang kapav “ranpli avek enn pwazon ki tuye.” (Zak 3:8) Kan bann konzwin menas zot kamarad uswa fixe bann dele, dan enn sans se kumadir zot pe dir: ‘Mo pa konsider mo maryaz kuma enn kitsoz ki dirab. Mo kapav kit twa ninport kan.’ Sa bann kalite parol indirek-la kapav detrir enn maryaz.

Kan u konsider maryaz kuma enn kitsoz ki dirab, u kone ki u pu res avek u konzwin mem si siklonn tape. Sa latitid-la fer u gayn ankor enn lot byinfe. Li pu pli fasil pu u ek u konzwin aksepte bann febles ek erer zot kamarad, ek kontiyne siport ek pardonn volonterman zot kamarad. (Kolosyin 3:13) Enn liv dir: “Dan enn bon maryaz, tulede bizin kapav fer erer, me malgre sa zot maryaz tini.”

Zur u maryaz u ti fer enn promes. U pa ti fer promes ar maryaz limem me ar enn dimunn, setadir u konzwin. Sa bizin ena gran linflyans lor fason ki u panse ek azir asterla antan ki enn kikenn ki marye. Eski u pa dakor ki u bizin res avek u konzwin, pa selman parski u sir ki maryaz ena enn gran valer, me sirtu parski u kontan sa dimunn avek ki u’nn marye la?

[Notes]

[L’encadré page 5]

Ki U Kapav Fer Asterla

Ki kantite determine u determine pu prezerv ek ranforsi u maryaz? Kitfwa u truve ki u bizin amelyor sertin kitsoz. Pu ranforsi sa langazman-la, sey sa bann kitsoz-la:

● Egzaminn umem. Demann umem: ‘Eski mo panse ek mo azir kuma enn dimunn marye uswa kuma enn selibater?’ Sey gete ki u konzwin panse lor u fason panse ek u fason azir.

● Lir sa lartik-la avek u konzwin. Apre sa, dan enn fason kalm, diskite ansam pu gete kuma u ek u konzwin kapav ranforsi sa determinasyon pu gard sa langazman-la.

● Ansam avek u konzwin, fer bann laktivite ki fortifye zot dezir pu gard zot langazman. Par egzanp: Get zot foto maryaz ek bann lezot levennman memorab. Fer bann kitsoz ki zot ti kontan fer kan zot ti pe frekante uswa kan zot ti fek marye. Etidye bann lartik Latur Degard ek Réveillez-vous ! an rapor avek maryaz.

[L’encadré page 6]

Dan Maryaz, Langazman, Inplik . . .

● Obligasyon “Respekte langazman ki to pran. Plito to pa pran okenn langazman, ki to pran ek apre to pa respekte li.”—Eklezyast 5:4, 5.

● Korperasyon “De pli bon ki enn . . . Parski si enn parmi zot tonbe, lot-la kapav lev so kamarad.”—Eklezyast 4:9, 10.

● Lespri Sakrifis “Ena buku plis boner kan done ki kan gayne.”—Akt 20:35.

● Ki U Konsider Maryaz Kuma enn Kitsoz Ki Dirab “Lamur . . . andir tu kitsoz.”—1 Korintyin 13:4, 7.

[Zimage page 7]

Kan u konzwin anvi koze, eski u ekut li?