Zenn, Mars enn fason Ki Zeova apruve

SERTIN zenn Kretyin inn bizin tanporerman al res lwin ar zot fami ek zot kongregasyon. Alor ki sertin finn fer sa pu fer plis dan zot minister, lezot finn fer sa pu gard zot netralite an rapor avek bann aktivite sa lemond-la. (Izai 2:4; Zan 17:16) Dan sertin peyi, parski bann zenn gard zot fidelite anver Zeova, “Sezar” finn met zot dan prizon uswa finn obliz zot fer bann travay ki rann servis la kominote.a—Mark 12:17; Tit 3:1, 2.

Kan bann zenn al fer prizon akoz zot netralite, suvan zot al ferme ansam avek bann vakabon pu enn long peryod letan. Pareyman, bann zenn ki bizin kit zot fami pu lezot rezon, zot usi zot oblize travay dan enn lanvironnman imoral. Alor, dan enn lanvironnman kumsa, kuma sa bann zenn Kretyin-la pu kapav afront presyon ek tantasyon ki zot gayne dan zot zefor pu “mars enn fason ki Zeova apruve?” (1 Tesalonisyin 2:12) Kuma zot paran kapav ed zot pu afront ninport ki sityasyon dezagreab ki kapav arive?—Proverb 22:3.

Problem Presi Ki Bann Zenn Gayne

Takis, ki ena 21 an, ti oblize res 37 mwa lwin ar so fami.b Li rakonte: “Mo pa ti ena proteksyon mo paran, ni latansyon bann ansyin mo kongregasyon ki ti byin konn mwa. Alor, sa ti byin difisil pu mwa; mo ti mank konfyans an momem.” Li azute: “Parfwa mo ti santi mwa san defans.” Pétros ena 21 an, ek pandan dezan, li ti bizin res lwin ar so fami. Li dir: “Premye fwa dan mo lavi, mo finn bizin desid par momem lor swa mo divertisman ek mo frekantasyon. Ek pa tuletan ki mo ti fer bon swa.” Li kontiyne dir: “Parfwa mo ti per pu afront bann bel responsabilite ki akonpayn enn pli gran liberte.” Enn ansyin ki apel Tássos ek ki suvan gayn kontak avek bann zenn Kretyin ki dan sa sityasyon-la, fer sa remark-la: “Langaz sal, rebelyon, ek kondwit vyolan bann zenn ki pa Temwin, tusala kapav detin lor bann zenn ki insusyan ek san defans.”

Kan zot viv ek zot travay parmi bann dimunn ki pena okenn respe pu bann prinsip Labib, bann zenn Kretyin bizin fer atansyon pu pa les zot tante par kondwit imoral bann zenn ki pa respekte bann prinsip Biblik. (Psom 1:1; 26:4; 119:9) Dan enn sityasyon parey, kitfwa li vinn difisil pu gard enn bon program letid individyel, pu asiste reynion, ek pu sorti an predikasyon. (Filipyin 3:16) Ek li pa fasil usi pu realiz bann lobzektif spirityel.

Pena dut ki bann zenn Kretyin ki fidel, anvi fer Zeova plezir par zot kondwit ek zot parol. Avek fidelite, zot esey reponn linvitasyon ki Zeova pe fer zot: “Azir avek sazes mo garson, ek fer mo leker kontan, pu ki mo kapav reponn sa kikenn ki pe provok mwa-la.” (Proverb 27:11) Zot rekonet ki zot konportman ek zot kondwit inflyans seki lezot dimunn panse lor Zeova ek so bann serviter.—1 Pyer 2:12.

Laplipar bann zenn ena buku merit; zot pe fer tu seki zot kapav pu imit legzanp zot bann frer dan premye syek. Avredir, se pu sa bann frer-la ki lapot Pol ti priye kan li ti dir: “Mars enn fason ki Zeova apruve pu fer Li antyerman plezir. Ek ki zot kontiyne raport bann bon frwi par zot bon travay . . . pu ki zot kapav siport tu bann difikilte avek pasyans ek lazwa.” (Kolosyin 1:9-11) Labib sit legzanp plizir zenn ki ti ena la krint pu Bondye. Zot ti reysi mars enn fason ki Zeova apruve mem si zot ti viv dan enn lanvironnman ki ti etranz pu zot, kot bann dimunn ti kont zot ek ti pratik lidolatri.—Filipyin 2:15.

“Zeova Ti Avek Zozef”

Alor ki li ti ankor byin zenn, Zozef, garson byineme Zakob ek Rasel, ti retruv li tusel. Li ti lwin ar proteksyon so papa, enn zom ki ti ena la krint pu Bondye. So bann frer ti vann li ek li ti vinn esklav dan Lezip. Me selman, Zozef inn les enn bon legzanp: li ti enn bon travayer, lezot ti kapav fer li konfyans ek li ti ena bann bon prinsip moral. Malgre ki li ti esklav Potifar—enn zom ki pa ti ador Zeova—Zozef ti fer so travay byin ek li ti serye. Se pu sa ki so met ti fer li ansarz tu seki ti konsern so lakaz. (Zenez 39:2-6) Parski Zozef ti tuletan gard so fidelite anver Zeova, li ti mem al fer prizon pu sa. Me, zame li pa ti dir: “Ki serti res fidel?” Mem dan prizon, li ti manifeste bann bon kalite, ek byin vit, li ti ansarz buku kitsoz an rapor avek fonksyonnman prizon. (Zenez 39:17-22) Bondye ti beni li, ek kuma Zenez 39:23 dir, “Zeova ti avek Zozef.”

Zozef ti lwin ar so fami ki ti ena la krint pu Bondye. Donk, li ti kapav fasilman amenn enn lavi imoral parey kuma bann Ezipsyin! Me, li finn prefer tini ferm bann prinsip Bondye ek gard enn kondwit prop malgre pli gran tantasyon ki li’nn kone. Avredir, fam Potifar pa ti aret sipliy li pu gayn relasyon sexyel avek li. Me, avek determinasyon Zozef ti reponn: “Kuma eski mo kapav komet sa move kitsoz-la ek vremem fer pese kont Bondye?”—Zenez 39:7-9.

Zordi, bann zenn Temwin bizin pran byin kont lavertisman ki Labib done an rapor avek move frekantasyon, divertisman imoral, pornografi ek lamizik malsin. Zot kone ki “lizye Zeova li partu, Li pe vey bann ki move ek bann ki bon.”—Proverb 15:3.

Moiz Ti Rezet “Plezir Ki Gayne kan Fer Pese”

Moiz ti grandi dan lakur Faraon, kot bann dimunn ti ador zidol ek ti rod lamizman. Labib dir lor Moiz: “Par lafwa, Moiz . . ti refize ki apel li garson tifi Faraon. Li ti swazir pu gayn maltrete avek lepep Bondye plito ki profit plezir tanporer ki gayne kan fer pese.”—Ebre 11:24, 25.

Lamitye avek lemond kapav fer nu gayn sertin lavantaz, me sa li tanporer. Forse, sa kapav dire pandan sa tigit letan ki reste pu sa lemond-la. (1 Zan 2:15-17) Alor, eski li pa preferab nu swiv legzanp Moiz? Labib dir ki li “ti tini ferm, kumadir li ti pe truv sa Kikenn ki invizib-la.” (Ebre 11:27) Moiz ti gard so lespri fixe lor leritaz spirityel ki so bann anset ti gayne. Li ti fer ansort ki proze Bondye vinn so bi dan lavi, ek fer volonte Zeova, se sa ki ti so lobzektif.—Egzod 2:11; Akt 7:23, 25.

Kan bann zenn ki ena la krint pu Bondye, retruv zot parmi bann dimunn ki pena respe pu Li ek ki kont zot, ki zot kapav fer? Zot kapav fortifye zot relasyon personel avek Zeova atraver enn letid personel, kot zot kapav aprann konn pli byin “sa Kikenn ki invizib-la.” Si zot ena enn program byin ranpli ar bann laktivite spirityel, kuma par egzanp asiste reynion ek sorti predikasyon regilyerman, sa pu ed zot gard zot lespri fixe lor bann kitsoz spirityel. (Psom 63:6; 77:12) Zot bizin fer tu seki zot kapav pu devlop enn lafwa ek enn lespwar solid kuma Moiz. Zot pu fer byin si zot fer zefor pu santre zot panse ek zot bann aksyon lor Zeova, ek kontan ki Li zot kamarad.

Enn Tifi Ki Ti Donn Bondye Luanz par So Parol

Enn lot zenn ki’nn les enn bon legzanp pandan ki li ti lwin ar so fami, se sa tifi Izraelit ki bann Siryin ti kaptire dan lepok profet Elisa. Li ti vinn servant madam Naamann, sef larme Siryin. Naamann ti ena lalep. Donk, tifi-la ti dir so metres: “Si selman mo met ti al devan profet ki res Samari! Profet-la ti pu geri so lalep.” Grasa temwaynaz sa tifi-la, Naamann ti al get Elisa an Izrael, ek li ti geri ar so lalep. Anplis, li ti vinn enn adorater Zeova.—2 Lerwa 5:1-3, 13-19.

Legzanp sa tifi-la anseyn bann zenn linportans pu onor Bondye par zot parol, mem si zot lwin ar zot paran. Me mazine si sa tifi-la ti abitye dir bann “betiz” uswa fer bann “plezantri sal”! Eski li ti pu santi li alez pu byin servi so lalang parey kuma li’nn fer kan lokazyon finn prezante? (Efezyin 5:4; Proverb 15:2) Níkos ki ena inpe plis ki 20 an, ti al fer prizon akoz so netralite. Li rapel enn kitsoz ki ti ariv li: “Kan mo ti avek lezot zenn frer dan enn prizon lagrikiltir, lwin ar nu paran ek kongregasyon, nu langaz ti kumans deteryore. Pena dut, sa pa ti donn Zeova la glwar ditu.” Me erezman, Níkos ek sa bann lezot frer-la, finn gayn led pu aplik konsey ki Pol ti done lor sa size-la: “Fode ki okenn form fornikasyon ek linpirte uswa gurmandiz, pa mansyone parmi zot, kuma sa bizin ete pu bann sin.”—Efezyin 5:3.

Zeova Ti Reel pu Zot

Zezi ti dir ki enn kikenn ki fidel dan bann ti kitsoz, li pu fidel usi dan bann gran kitsoz. (Lik 16:10) Sa prinsip-la finn verifye dan ka sa trwa zenn Ebre ki ti bann konpaynon Danyel, dan ansyin lavil Babilonn. Kan ti ofer zot bann manze ki ti interdi par Lalwa Moiz, zot ti byin kapav manze ek pretann ki zot pa ti ena swa parski zot ti kaptif dan enn peyi etranze. Me, zot inn res fidel, mem dan enn domenn ki pa ti paret tro inportan. Zeova ti byin beni zot pu sa; zot ti ena pli bon la sante ek zot ti pli saz ki tu lezot kaptif ki ti kontiyn manz bann bon manze ki Lerwa ti ofer zot. San okenn dut, zot fidelite dan bann ti kitsoz finn fortifye zot, sibyin ki apre, zot finn kapav afront enn pli gran leprev. Kan ti obliz zot pu ador enn gran zimaz, zot ti refiz pu dezobeir Bondye.—Danyel 1:3-21; 3:1-30.

Zeova ti byin reel pu sa trwa zenn-la. Mem si zot ti lwin ar zot paran ek ar sant ladorasyon Bondye, zot ti determine pu res san tas vizavi lemond. (2 Pyer 3:14) Zot relasyon avek Zeova ti telman ena valer, ki zot ti pre pu sakrifye zot lavi pu sa.

Zeova Pa Pu Abandonn Zot

Kan bann zenn lwin ar bann dimunn ki zot kontan ek ki zot fer konfyans, li normal ki zot pa santi zot an sekirite ek ki zot mank lasirans ek konfyans an zotmem. Me, zot kapav afront bann leprev ek difikilte avek ful konfyans ki “Zeova pa pu abandonn” zot. (Psom 94:14) Si sa bann zenn-la “sufer parski zot pe fer seki drwat,” Zeova lamem pu ed zot kontiyn mars dan “semin la zistis.”—1 Pyer 3:14; Proverb 8:20.

Zeova ti tuletan fortifye Zozef, Moiz, sa zenn tifi Izraelit-la ek sa trwa zenn fidel Ebre-la. Ek li finn donn zot bann gran rekonpans. Zordi, Zeova pe servi so lespri sin, so Parol, ek so lorganizasyon pu sutenir bann ki pe “konbat bon lager pu lafwa.” Ek devan zot, Li’nn plas enn rekonpans: “Lavi eternel.” (1 Timote 6:11, 12) Wi vremem, li posib pu mars enn fason ki Zeova apruve, ek li saz pu azir kumsa.—Proverb 23:15, 19.

[Notes]

[L’encadré page 11]

PARAN—PREPAR U ZANFAN!

“Kuma bann fles dan lamin enn gerye, kumsa mem bann zenn garson ete.” (Psom 127:4) Se pa par azar ki enn fles reysi tus so lobzektif. Bizin byin konn vize! Pareyman, san bon direksyon bann paran, bann zanfan pa pu kapav prepar zotmem pu afront bann sityasyon ki leve kan res lwin ar la fami.—Proverb 22:6.

Bann zenn ena tandans azir lor enn kut-tet, uswa zot inflyanse par “bann dezir la zenes.” (2 Timote 2:22) Labib donn sa lavertisman-la: “Rotin ek koreksyon, sa mem ki donn la sazes; me kan les enn garson fer seki li anvi, li pu fer so mama onte.” (Proverb 29:15) Kan bann paran pa fixe okenn limit pu zot zanfan, sa pa pu prepar zot pu afront bann presyon ek tantasyon ki zot pu gayne kan zot bizin viv lwin ar so fami.

Dan enn fason responsab, bann paran bizin explik zot zanfan klerman bann difikilte, bann presyon ek bann kitsoz ki arive dan sa lemond-la. San ki zot negatif uswa dekurazan, zot kapav dekrir bann kondisyon difisil ki enn zenn kapav kone si li desid al res lwin ar so fami. Sa formasyon-la, ansam avek la sazes ki Bondye done, pu “donn lintelizans enn kikenn ki pena lexperyans, [ek li pu donn] enn zennzan la konesans ek kapasite reflexyon.”—Proverb 1:4.

Bann paran ki grav dan leker zot zanfan bann prinsip Biblik ek bann valer moral ki Bondye demande, pe prepar zot zanfan pu afront bann problem ki zot pu gayne dan lavi. Reysit bann zanfan pu depann lor enn letid familyal regilye, enn kominikasyon fran ek enn lintere sinser ki bann paran ena pu byinet zot zanfan. Bann paran bizin form zot zanfan lor plan spirityel dan enn fason ekilibre me ki an mem tan pozitif ek rezonab, pu ki plitar zot zanfan kapav debut lor zot prop lipye. Par zot legzanp, bann paran kapav anseyn zot zanfan ki li posib pu viv dan sa lemond-la, san fer parti ladan.—Zan 17:15, 16.

[Zimage page 8]

Sertin zenn Kretyin finn bizin kit zot fami, ale

[Zimage page 9]

Kan bann zenn reziste kont tantasyon, zot kapav imit legzanp Zozef ek res prop lor plan moral

[Zimage page 10]

Imit sa zenn tifi Izraelit ki ti esklav-la ek ki ti donn la glwar Zeova par so parol