Kapav Fer Konfyans?
ZIS apre ki Miray Berlin ti tonbe an 1989, enn kantite sekre ki ti byin garde, finn devwale. Par egzanp, Lydiaa ti dekuver ki pandan reyn guvernman Sosyalis dan l’Allemagne de l’Est, Stasi, uswa Servis Sekirite Guvernman, ti fer enn dosye lor so lavi prive. Lydia ti byin etone kan li ti aprann sa. Me li ti gayn move sok kan li’nn aprann ki se so mari ki ti donn Stasi sa bann linformasyon-la! Li finn trayi par enn kikenn ki li ti bizin kapav fer ful konfyans.
Robert ti enn vye misye. Dapre The Times, enn magazinn dan Londres, Robert ti ena “enn gran respe, ladmirasyon ek konfyans” pu so dokter. Li ti dir ki sa dokter-la, li enn dimunn ki “bon ek byin zanti.” Me, enn kut, san atann Robert finn mor. Eski li finn gayn enn kriz kardyak, uswa enn atak? Non. Bann lotorite finn tir konklizyon ki sa dokter-la ti vizit Robert kot li, ek san ki Robert ek so fami kone, li finn fer li enn pikir mortel. Robert finn asasine par enn kikenn ki li ti fer ful konfyans.
Lydia ek Robert finn sufer. Zot finn gayn enn ku parski enn kikenn finn trayi zot konfyans, ek sa finn amenn bann konsekans byin grav. Dan lezot ka, bann rezilta pa sa kantite grav-la. Me, li pa rar zordi ki bann dimunn trayi par enn kikenn ki zot ti fer konfyans. Enn rapor pibliye par enn gran Institi Allemand ki fer bann sondaz, Allensbacher Jahrbuch der Demoskopie 1998-2002, finn revele ki 86 pursan bann dimunn ki ti partisip dan sa sondaz-la ti trayi par enn kikenn ki zot ti fer konfyans. Sirman u’si u finn fer sa lexperyans-la. Donk, nu bizin pa gayn sok kan nu aprann ki enn lagazet Suisse, Neue Zürcher Zeitung, finn raporte an 2002 ki “dan bann gran peyi, bann relasyon ki baze lor konfyans finn diminye amezir ki bann lane pase.”
Konfyans Pran Letan pu Devlope, me Li Kapav Kase enn Sel Kut
Ki ete konfyans? Dapre enn diksyoner, fer lezot konfyans vedir “krwar ki zot onet ek sinser ek ki zot pa pu fer nanyin par expre pu fer u ditor.” Konfyans pran letan pu devlope, me enn sel kut li kapav kase. Zordi enn kantite dimunn ena santiman ki lezot finn trayi zot konfyans. Donk, eski li drol si zot per pu fer lezot konfyans? Dapre enn sondaz pibliye an 2002 dan l’Allemagne, “ena mwins ki 1 zenn lor 3 ki fer lezot dimunn konfyans.”
Donk, nu kapav demann numem: ‘Eski mo kapav fer kikenn konfyans? Eski li vo lapenn mo fer enn kikenn konfyans alor ki mo kone ki ena enn posibilite ki li les mwa tonbe?’
[Notes]
a Finn sanz bann non.
[Zimage page 3]
Enn sondaz finn revele ki 86 pursan bann dimunn ki ti partisip dan sa sondaz-la finn trayi par enn kikenn ki zot ti fer konfyans