Ki Nu Tu Proklam la Glwar Jéhovah

“Anu rekonet la glwar ek lafors Jéhovah. Anu rekonet la glwar ki non Jéhovah merite.”—PSAUMES 96:7, 8.

1, 2. Ki kitsoz pe donn Jéhovah la glwar, ek kisannla ankuraze pu zwenn zot lavwa ansam avek sa?

DAVID, garson Jessé, ti grandi pre ar Bethléhem, ek li ti vinn enn berze. Sirman, plizir fwa li ti gayn lokazyon pu admir enn zoli lesyel ranpli ar zetwal, alor li ti pe vey trupo so papa dan bann patiraz trankil! Pena dut ki li ti rapel tusala kan, inspire par Bondye, li ti konpoz ek sant sa bann zoli parol ki nu truve dan Psaumes 19: “Lesyel pe anons la glwar Bondye; ek travay so lamin, lespas pe rakonte. Partu lor later, tann tapaz ki zot fer, ek ziska dan but later, tann zot bann diskur.”—Psaumes 19:1, 4.

² Zur apre zur, la nwit apre la nwit, san okenn diskur, san okenn parol, san okenn lavwa, lesyel extraordiner ki Jéhovah finn kre, proklam so la glwar. Wi, la kreasyon zame aret proklam la glwar Bondye. Kan nu konsider temwaynaz silansye ki zot rande devan “later antye,” sa fer nu pran konsyans ki nu byin tipti. Me, sa temwaynaz-la, li pa sifi. Bann imin fidel ankuraze pu zwenn zot lavwa ansam avek la kreasyon. Enn ekrivin Psaumes, ki nu pa kone kuma apele, ti adres sa bann parol inspire-la ar bann fidel adorater: “Anu rekonet la glwar ek lafors Jéhovah. Anu rekonet la glwar ki non Jéhovah merite.” (Psaumes 96:7, 8) Bann ki pros ar Jéhovah, zot byin dispoze pu fer sa. Me, rekonet la glwar Bondye, ki sa inplike?

3. Kifer eski bann dimunn donn Bondye la glwar?

³ Pu donn Bondye la glwar, bann parol pa sifi. Ena plis ki sa ki inplike. Bann Israélites dan lepok Isaïe ti glorifye Bondye avek zot lalev, me laplipar parmi zot pa ti sinser. Atraver Isaïe, Jéhovah ti dir: “Sa lepep-la finn apros avek so labus, ek zot finn donn mwa la glwar zis avek zot lalev, ek zot finn elwayn zot leker ar mwa.” (Isaïe 29:13) Luanz ki ti sorti dan labus sa bann dimunn-la, pa ti vo nanyin. Pu ki sa luanz-la ena valer, fode ki enn dimunn donn Jéhovah loner avek enn leker ranpli ar lamur ek li rekonet sinserman ki pena personn ki ena sa kalite la glwar-la. Jéhovah Li tusel Kreater. Limem le Tout Puissant. So la zistis ek so lamur parfe. Limem ki pu delivre nu. Ek Limem Suverin lezitim, ar ki tu kreatir ki viv dan lesyel ek lor later, bizin sumet. (Révélation 4:11; 19:1) Si vremem nu krwar sa bann kitsoz-la, anu glorifye Li avek tu nu leker.

4. Pu donn Bondye la glwar, ki bann instriksyon Jésus ti done, ek kuma nu kapav swiv sa bann instriksyon-la?

⁴ Jésus Christ ti dir nu kuma pu glorifye Bondye. Li ti dir: “Mo Papa gayn la glwar kan zot kontiyn raport buku frwi ek kan zot montre ki zot mo bann disip.” (Jean 15:8) Kuma eski nu raport buku frwi? Dabor, se kan nu pres “la bonn nuvel lor rwayom” avek tu nu leker. Kumsa nu pe zwenn ansam avek la kreasyon, pu “koz” lor “bann kalite invizib” Bondye. (Matthieu 24:14; Romains 1:20) Anplis, kan nu fer sa, nu tu nu pe partisipe, dan enn fason direk uswa indirek, pu fer bann nuvo disip. Kumsa bann luanz ki zot sante pu Jéhovah, pe vinn deplizanpli for. Dezyeman, nu devlop frwi ki lespri sin prodir an nu, ek nu fer zefor pu imit bann gran kalite Bondye. (Galates 5:22, 23; Éphésiens 5:1; Colossiens 3:10) Rezilta: Nu kondwit tulezur, glorifye Bondye.

“Partu lor Later”

5. Explike kuma Paul ti met laksan lor responsabilite ki bann Kretyin ena pu donn Bondye la glwar kan zot partaz zot lafwa avek lezot.

⁵ Dan let ki li ti ekrir bann Romains, Paul ti met laksan lor responsabilite bann Kretyin pu glorifye Bondye kan zot partaz zot lafwa avek lezot. Mesaz prinsipal sa liv-la se ki zis bann ki ena lafwa an Jésus Christ ki kapav sove. Dan Romains sapit 10, Paul ti montre ki bann Juifs dan so lepok ti pe rod gayn enn bon pozisyon devan Bondye atraver Lalwa Mosaïque, olye ki zot swiv “Christ ki ti la fin lalwa.” Akoz sa Paul ti dir: “Si devan tu dimunn to dir ‘sa parol-la ar to prop labus’ ki Jésus li Senyer, ek to ena lafwa dan to leker ki Bondye finn lev li parmi bann mor, to pu sove.” Apartir sa moman-la, “[pa finn ena] okenn diferans ant Juifs ek Grecs, parski ena enn sel Senyer ki reyn lor tu dimunn, [ek] ki zenere ar tu bann ki fer apel ar so non. Parski ‘tu seki invok non Bondye, pu sove.’ ”—Romains 10:4, 9-13.

6. Kuma eski Paul finn aplik Psaumes 19:4?

⁶ Apre sa, avek buku lozik, Paul demande: “Kuma eski zot pu fer apel ar enn kikenn an ki zot pena lafwa? Ek kuma zot pu ena lafwa an enn kikenn ki zame zot pa finn tann parle? Ek kuma zot pu tande si personn pa prese?” (Romains 10:14) Konsernan Israël, Paul dir: “Pa tu ki finn obeir la bonn nuvel.” Kifer? Se pa parski zot ti mank bann lokazyon pu fer li, me plito parski zot ti mank lafwa. Paul montre sa kan li sit Psaumes 19:4. Olye ki li aplik sa tex-la ar temwaynaz silansye ki la kreasyon pe done, li aplik li ar laktivite predikasyon. Li dir: “Wi, dayer ‘partu lor later, tann tapaz ki zot fer, ek ziska dan but later, tann zot bann koze.’ ” (Romains 10:16, 18) Wi, parey kuma la kreasyon glorifye Jéhovah, bann Kretyin premye syek, ti pres la bonn nuvel delivrans partu. Donk, zot ti donn Bondye la glwar “partu lor later.” Dan let ki li ti ekrir bann Colossiens, Paul ti dir usi ziska kot sa la bonn nuvel ti’nn fane, setadir “dan tu kreasyon ki truv anba lesyel.”—Colossiens 1:23.

Bann Temwin Zele

7. Dapre Jésus, ki responsabilite bann Kretyin ena?

⁷ Aparaman, Paul ti ekrir bann Colossiens apepre 27 an apre lamor Jésus Christ. Me kuma eski dan sa tigit letan-la, la bonn nuvel finn kapav ariv ziska dan Colosses? Se parski bann premye Kretyin ti zele, ek Jéhovah ti beni zot zel. Jésus ti anonse depi lontan ki so bann disip ti pu vinn bann predikater aktif. Dayer li ti dir: “Fode ki la bonn nuvel anonse ar tu bann nasyon avan.” (Marc 13:10) Avek sa profesi-la, Jésus ti azut enn komannman ki nu truv dan bann dernye verse l’Évangile Matthieu: “Ale ek fer dimunn dan tu bann nasyon vinn disip, batiz zot o non du Père, du Fils ek lespri sin, anseyn zot pu pratik tu bann kitsoz ki mo finn dir zot.” (Matthieu 28:19, 20) Enn tipe apre ki Jésus finn mont dan lesyel, so bann disip finn kumans obeir sa bann parol-la.

8, 9. Dapre liv Actes, kuma bann Kretyin finn reazir konsernan bann lord ki Jésus ti done?

⁸ Apre ki bann fidel disip ti gayn lespri sin, pandan la Pentecôte lane 33 N.L., premye kitsoz ki zot finn fer, se al prese. Zot finn koz “lor bann kitsoz extraordiner ki Bondye finn fer” ar bann laful dan Jérusalem. Zot predikasyon ti byin-byin efikas, ek “apepre trwa mil dimunn” finn batize. Avek zel, bann disip finn kontiyn donn Bondye la glwar devan tu dimunn ek zot finn gayn bann bon rezilta.—Actes 2:4, 11, 41, 46, 47.

⁹ Byin vit bann sef relizye finn kumans remark laktivite sa bann Kretyin-la. Zot ti agase par fransiz Pierre ek Jean. Akoz sa zot finn donn sa de zapot-la lord pu aret prese. Me, bann zapot-la finn reponn: “Nu pa kapav aret koz lor bann kitsoz ki nu finn truve ek nu finn tande.” Apre ki bann sef relizye-la finn menas zot ek finn larg zot, Pierre ek Jean finn return kot zot bann frer, ek zot tu finn priye Jéhovah. Avek kuraz zot finn demann Li: “Permet to bann esklav kontiyn koz to parol avek kuraz.”—Actes 4:13, 20, 29.

10. Ki lopozisyon finn kumans aparet, ek kuma eski bann vre Kretyin finn reazir?

¹⁰ Sa lapriyer-la ti an armoni avek volonte Jéhovah, ek sa finn vinn byin evidan inpe plitar. Bann zapot finn arete, ek apre par enn mirak, enn anz finn larg zot. Sa anz-la ti dir zot: “Ale, ek apre ki zot finn pran zot plas dan tanp, kontiyn dir lepep tu bann parol konsernan sa lavi-la.” (Actes 5:18-20) Parski bann zapot ti obeir, Jéhovah ti kontiyn beni zot. Donk, “tulezur dan tanp, ek lakaz-lakaz zot finn kontiyn anseyne ek anons la bonn nuvel konsernan Christ Jésus, san arete.” (Actes 5:42) Wi, an okenn fason, lopozisyon pa finn kapav anpes bann disip Jésus pu donn Bondye la glwar devan tu dimunn.

11. Ki latitid bann premye Kretyin ti ena anver laktivite predikasyon?

¹¹ Zis apre, Étienne finn arete, ek zot finn lapid li amor. Sa finn sulev enn gran persekisyon dan Jérusalem. Ti fors tu bann disip, eksepte bann zapot, pu kit Jérusalem. Eski zot ti dekuraze par sa persekisyon-la? Zame! Nu lir: “Bann ki ti disperse, ti travers peyi ek zot finn anons la bonn nuvel.” (Actes 8:1, 4) Ankor enn fwa, nu retruv sa zel ki zot ti ena pu anons la glwar Bondye. Dan Actes sapit 9, nu lir ki kan Saul de Tarse, enn Pharisien, ti pe vwayaze pu al Damas pu kumans persekisyon bann disip Jésus laba, li finn gayn enn vizyon lor Jésus, ek li ti vinn aveg. Dan Damas, Ananias finn geri Saul par enn mirak. Ki premye kitsoz Saul, ki plitar ti vinn lapot Paul, finn fer? Resi-la dir: “Tutswit dan bann sinagog li finn kumans prese ki Jésus limem garson Bondye.”—Actes 9:20.

Zot Tu Ti Partisip dan Laktivite Predikasyon

12, 13. (a) Dapre bann istoryin, ki kitsoz ti byin remarkab konsernan premye kongregasyon Kretyin? (b) Kuma eski liv Actes ek bann parol Paul, an ankor avek deklarasyon sa bann istoryin-la?

¹² Buku dimunn rekonet ki tu bann manb premye kongregasyon Kretyin ti partisip dan laktivite predikasyon. Konsernan sa bann Kretyin-la, Philip Schaff ekrir: “Sak kongregasyon ti enn sosyete misyoner, ek sak krwayan Kretyin ti enn misyoner.” (History of the Christian Church) W. S. Williams dir: “An zeneral, tu dimunn kone ki tu bann Kretyin dan Legliz premye syek, sirtu bann ki ti ena don lespri, ti pres l’Évangile.” (The Glorious Ministry of the Laity) Avek konviksyon li dir: “Jésus Christ pa ti etabli predikasyon kuma enn privilez ki zis sertin manb dan legliz ti kapav profite.” Mem Celse, enn ansyin lennmi bann Kretyin ti ekrir: “Bann dimunn ki travay lalenn, bann kordonye, bann ki travay lapo, bann ti dimunn ordiner ki pa edike, ti pres l’Évangile avek zel.”

¹³ Kan nu lir seki finn pase dan liv Actes, nu truve ki sa bann deklarasyon-la zot vre. Pandan la Pentecôte lane 33 N.L., apre ki bann disip ti gayn lespri sin, zot tu, bann zom ek bann fam, ti anons devan tu dimunn bann kitsoz extraordiner ki Bondye finn fer. Apre persekisyon ki ti kumanse kan Étienne ti asasine, tu bann Kretyin ki ti disperse, ti pres la bonn nuvel partu. Apepre 28 an plitar, kan Paul ti pe ekrir, pa zis enn ti grup clergé, me tu bann Kretyin Hébreux, li ti dir: “Atraver li, anu tuletan donn Bondye enn sacrifice de louange, setadir frwi nu lalev ki fer deklarasyon piblik pu so non.” (Hébreux 13:15) Paul ti pe explik so lopinyon lor laktivite predikasyon kan li ti dir: “Si mo pe anons la bonn nuvel, se pa pu glorifye momem, me se enn obligasyon ki mo ena. Wi, maler lor mwa si mo pa anons la bonn nuvel!” (1 Corinthiens 9:16) Wi, tu bann Kretyin fidel dan premye syek ti ena mem santiman ki Paul.

14. Ki relasyon ena ant lafwa ek la predikasyon?

¹⁴ Wi, enn vre Kretyin bizin partisip dan laktivite predikasyon, parski sa li ena enn rapor direk avek lafwa. Paul ti dir: “Avek so leker enn kikenn montre lafwa pu la zistis, me avek so labus enn kikenn fer deklarasyon piblik pu delivrans.” (Romains 10:10) Eski se selman enn ti grup dan kongregasyon, setadir enn ti grup clergé, ki egzers lafwa ek donk ki ena responsabilite pu prese?a Non! Tu bann vre Kretyin devlop enn lafwa solid dan zot Senyer Jésus Christ. Donk, zot motive pu fer deklarasyon piblik zot lafwa ar lezot. Si zot pa fer sa, zot lafwa li mor. (Jacques 2:26) Parski tu bann Kretyin fidel dan premye syek ti montre zot lafwa dan sa fason-la, non Jéhovah ti gayn enn gran luanz.

15, 16. Donn bann legzanp ki montre ki laktivite predikasyon ti progrese malgre bann problem.

¹⁵ Dan premye syek, Jéhovah ti beni so pep kan Li ti donn lakrwasman malgre bann problem ki ti ena andan ek andeor la kongregasyon. Par egzanp, Actes sapit 6 koz lor enn dezakor ki ti ena ant bann disip ki ti koz Hébreu ek seki ti koz Grec. Bann zapot ti rezud problem-la. Ki finn arive apre? La Bib dir: “Parol Bondye ti kontiyn grandi, ek pli ale, bann disip ti pe ogmante dan Jérusalem; ek parmi bann pret, enn gran laful ti kumans obeir lafwa.”—Actes 6:7.

¹⁶ Plitar, bann tansyon politik finn kumans devlope ant Hérode Agrippa, le Rwa Juda, ek bann abitan lavil Tyr ek Sidon. Bann abitan sa de lavil-la ti fer bann lakor pu lape ki ti flat Hérode Agrippa. An retur Hérode ti fer enn diskur. Laful ki ti rasanble pu ekut sa diskur-la ti kumans kriye: “Se enn bondye ki pe koze, pa enn zom!” Tutswit, anz Jéhovah finn met Hérode Agrippa amor “parski li pa’nn donn Bondye la glwar.” (Actes 12:20-23) Bann ki ti met zot lespwar an bann dirizan imin, ti gayn enn gran sok! (Psaumes 146:3, 4) Me, bann Kretyin zot, zot ti kontiyn donn Jéhovah la glwar. Rezilta: “Parol Bondye ti kontiyn ogmante ek fane partu,” mem si sityasyon lor plan politik pa ti stab.—Actes 12:24.

Sa Lepok-La Konpare Avek Azordi

17. Dan premye syek, enn gran kantite dimunn finn zwenn ansam avek bann Kretyin oints pu fer ki kitsoz?

¹⁷ Wi, kongregasyon Kretyin internasyonal dan premye syek ti ranpli avek bann predikater aktif ek zele. Tu bann Kretyin fidel ti partisip dan predikasyon la bonn nuvel. Sertin finn zwenn bann dimunn sinser, ek parey kuma Jésus finn dir, zot finn anseyn sa bann dimunn-la pu obeir tu seki li ti dir. (Matthieu 28:19, 20) Rezilta: La kongregasyon finn ogmante deplizanpli, ek enn kantite dimunn finn kumans fer parey kuma le Rwa David ki ti rekonet la glwar Jéhovah. Zot tu ti repet sa bann parol inspire-la: “Avek tu mo leker mo donn twa loner, O Jéhovah mo Bondye, mo ule donn to non la glwar pu tuletan, parski to lamur fidel li gran anver mwa.”—Psaumes 86:12, 13.

18. (a) Ki diferans sertin ena ant kongregasyon Kretyin dan premye syek ek la Kretyinte zordi? (b) Ki nu pu egzamine dan prosin lartik?

¹⁸ Kan nu konsider tusala, bann parol Allison A. Trites, enn profeser teolozi, fer nu reflesi. Li ti fer enn konparezyon ant la Kretyinte zordi zur ek bann Kretyin dan premye syek. Li ti dir: ‘Zordi, dan la Kretyinte, zanfan bann manb enn legliz aksepte sa relizyon-la uswa kan zot sanz legliz pu al dan enn lot. Me lakrwasman ki mansyone dan liv Actes, ti enn lakrwasman grasa konversyon bann nuvo, parski sa kongregasyon-la ti fek kumans so travay.’ Me, eski sa vedir ki vre kongregasyon Kretyin nepli ena lakrwasman dan fason ki Jésus ti anonse? Non! Bann vre Kretyin zordi zot egzakteman parey kuma bann Kretyin dan premye syek; zot glorifye Bondye devan tu dimunn avek zel. Nu pu truv sa dan prosin lartik.

[Not anba paz]

Eski U Kapav Explike?

• Kuma eski nu donn Bondye loner?

• Ki aplikasyon Pol ti fer lor Psaumes 19:4?

• Ki relasyon ena ant lafwa ek la predikasyon?

• Ki kitsoz ti remarkab konsernan la kongregasyon Kretyin dan premye syek?

[Zimaz lor paz 21]

Lesyel tuletan fer nu truv la glwar Jéhovah

[Orizinn]

Courtesy of Anglo-Australian Observatory, photograph by David Malin

[Zimaz lor paz 23]

Laktivite predikasyon ena enn rapor direk avek lapriyer