Protez U Kont la Tronpri

“Fer atansyon: petet pu ena kikenn ki pu amenn zot kuma so viktim, par mwayin . . . enn tronpri ki dan vid.”—COLOSSIENS 2:8.

1-3. (a) Mansyonn bann legzanp ki montre ki la tronpri inn rant dan tu domenn nu lavi? (b) Kifer nu bizin pa etone par la tronpri ki ena dan lemond zordi?

“KOMYE parmi zot, finn deza gayn bann kliyan ki koz zot manti?” Se seki ki enn profeser lalwa ti demande kan li ti fer enn sondaz parmi plizir milye avoka, detrwa lane desela. Ki repons li ti gayne? Li explike: “Parmi tu sa bann avoka-la, selman enn ladan zame pan’nn gayn enn kliyan ki koz li manti.” Pu ki rezon u krwar? “Ebyin, sa avoka-la ti’nn fek kumans travay dan enn gran konpayni ek li pa ti ankor koz avek okenn kliyan.” Sa lexperyans-la montre enn realite byin tris—nu truv mansonz ek tronpri partu dan lemond zordi.

² Tronpri egziste dan diferan form ek li’nn rant dan preske tu domenn nu lavi modern. Nu zwenn enn kantite legzanp lor radyo, televizyon ek zurnal. Par egzanp, bann politisyin kasyet seki zot fer, bann kontab ek bann avoka egzazer profi komersyal bann gran konpayni, piblisite tronp bann konsomater, ek sertin koz manti devan lakur pu gayn larzan avek lasirans. Pa fini, la relizyon usi tronp dimunn. Enn kantite dimunn finn les zot gayne par bann fos doktrinn ki bann sef relizye anseyne, kuma par egzanp l’immortalité de l’âme (nam viv apre lamor), lanfer, ek la Trinité.—2 Timothée 4:3, 4.

³ Eski tu sa bann tronpri-la bizin etonn nu? Pa vreman. La Bib ti predir ki “dan dernye zur . . . , bann ki pratik seki move ek bann ki tronp lezot pu vinn pli pir ankor, zot pu met zotmem ek lezot dan lerer.” (2 Timothée 3:1, 13) Antan ki Kretyin, nu bizin fer atansyon avek bann lide ki kapav anbet nu ek deturn nu avek la verite. Me, ena de kestyon ki suleve: Kifer la tronpri egziste partu kumsa zordi, ek ki nu kapav fer pu pa les nu tronpe?

Kifer Ena Sa Kantite Tronpri-La Zordi?

4. Ki explikasyon la Bib done pu montre kifer tronpri egziste partu dan lemond zordi?

⁴ La Bib explik klerman kifer lemond ranpli ar tronpri. Lapot Jean ti ekrir ki “lemond antye truv dan puvwar le méchant.” (1 Jean 5:19) Sa “méchant-la,” se Satan le Diable. Jésus ti dir konsernan Satan: “Li pa’nn tini ferm dan la verite, parski pena la verite dan li. Li koz manti, parski so natir-mem kumsa, li enn manter ek limem papa tu mansonz.” Alor, nu pa bizin etone ki lemond ranpli ar tronpri, parski li pe reflet tu sinpleman latitid ek manyer azir so Sef, Satan.—Jean 8:44; 14:30; Éphésiens 2:1-3.

5. Kuma eski Satan pe fer tu seki li kapav zordi pu tronp limanite, ek kisannla li plis vize?

⁵ Depi ki Satan inn perdi so plas dan lesyel, li “ena enn gran koler,” ek li pe fer tu seki li kapav zordi pu tronp limanite, parski li kone ki li pa res buku letan. Li determine pu detrir pli buku dimunn ki li kapav, akoz sa, li “pe met later antye dan lerer.” (Révélation 12:9, 12) Se pa zis detanzantan ki Satan tronp bann dimunn. Non, okontrer, li pe travay la nwit-lizur pu met bann imin dan lerer.a Li servi tu sort mwayin pu avegle lespri bann inkrwayan ek pu elwayn zot ar Bondye—li servi plizir trik ek li azir kuma enn tret. (2 Corinthiens 4:4) Satan determine pu devor sirtu bann ki pe ador Bondye “avek lespri ek la verite.” (Jean 4:24; 1 Pierre 5:8) Fode zame nu bliye ki, an realite, Satan inn dir ki li kapav deturn ninport kisannla ar Bondye. (Job 1:9-12) Asterla, anu get sertin kitsoz ki Satan maniganse pu tronp nu ek seki nu kapav fer pu protez nu.—Éphésiens 6:11.

Protez U Kont Bann Aposta

6, 7. (a) Ki bann aposta kapav pretann? (b) Kuma eski la Bib montre klerman seki bann aposta anvi?

⁶ Pandan lontan, Satan inn servi bann aposta pu tronp bann serviter Bondye. (Matthieu 13:36-39) Bann aposta kapav pretann ki zot pe ador Jéhovah ek ki zot krwar dan la Bib. Me anrealite, zot pe rezet so lorganizasyon vizib ki lor later. Sertin mem return avek bann lanseynman ki dezonor Bondye ek ki sorti dan “Babylone la Grande,” lanpir mondyal fos relizyon. (Révélation 17:5; 2 Pierre 2:19-22) Par linspirasyon Bondye, bann ekrivin la Bib finn servi bann mo byin for pu devwal mobil bann aposta ek bann metod ki zot servi.

⁷ Ki bann aposta anvi? Buku pa zis kontant zot abandonn la relizyon ki avan, zot ti konsider kuma vre relizyon. Suvan, zot anvi ki lezot swiv zot. Olye fer zot prop disip, buku aposta rod fer “bann disip [Christ] swiv zot.” (Actes 20:29, 30) Konsernan bann fos anseynan, lapot Paul ti lans sa lavertisman-la: “Fer atansyon: petet pu ena kikenn ki pu amenn zot kuma so viktim.” (Colossiens 2:8) Eski sa pa dekrir seki buku aposta pe sey fer? Normalman enn kidnaper kidnap so viktim san ki li atann, ek li amenn li lwin avek so fami. Pareyman, bann aposta vir lespri bann manb kongregasyon ki fer zot konfyans, pu elwayn zot avek la kongregasyon.

8. Ki metod bann aposta servi pu reysi fer seki zot anvi?

⁸ Ki metod bann aposta servi pu reysi fer seki zot anvi? Suvan, zot deform la verite, zot dir bann demi-verite, ek zot koz kareman bann gro manti. Jésus ti kone ki dimunn ti pu “koz manti ek dir tu sort kalite move kitsoz kont” so bann disip. (Matthieu 5:11) Sa bann dimunn-la pu dir bann foste pu tronp lezot. Lapot Pierre ti averti bann Kretyin ki bann aposta ti pu ‘dir bann kitsoz pu tronp zot’; zot pu ‘met dimunn dan lerer par zot lanseynman,’ ek zot pu ‘deform bann Lekritir’ pu reysi fer seki zot anvi. (2 Pierre 2:3, 13; 3:16) Malerezman, defwa bann aposta reysi “bulvers lafwa sertin.”—2 Timothée 2:18.

9, 10. (a) Kuma nu kapav protez nu kont bann aposta? (b) Kifer sa pa truble nu si nu konpreansyon lor proze Bondye bizin rafine?

⁹ Kuma nu kapav protez nu kont bann aposta? Se kan nu swiv konsey la Bib, ki dir: “Fer atansyon avek bann ki fer divizyon ek ki kre lokazyon pu fer lezot tonbe, parski sa li kontrer avek seki zot inn aprann; evit zot.” (Romains 16:17) Nu evit sa bann dimunn-la kan nu rezet zot bann rezonnman. Kuma? Se kan nu evit koz avek zot, lir seki zot ekrir, ek al lor zot bann sit Internet. Kifer nu bizin azir kumsa? Premyerman, parski Parol Bondye donn nu lord pu azir kumsa, ek nu sir ki Jéhovah tuzur anvi seki pli bon pu nu.—Isaïe 48:17, 18.

¹⁰ Dezyeman, nu kontan lorganizasyon ki’nn anseyn nu sa bann verite ki ena buku valer-la ek ki’nn separ nu avek Babylone la Grande. Me an mem tan, nu rekonet ki nu konesans lor proze Bondye pa parfe; nu konpreansyon finn rafine atraver bann lane. Bann Kretyin ki fidel atann avek pasyans ki Jéhovah donn zot sa bann eklersisman-la. (Proverbes 4;18) Anatandan, nu pa pu kit lorganizasyon ki Jéhovah pe servi zordi, parski nu truve ki Li pe beni sa lorganizasyon-la.—Actes 6:7; 1 Corinthiens 3:6.

Atansyon! Pa Tronp Umem

11. Kifer bann imin inparfe ena tandans pu tronp zotmem?

¹¹ Bann imin inparfe ena tandans pu tronp zotmem, ek Satan li, li sot lor sa lokazyon-la. Jérémie 17:9 dir: “Leker pli tret ki ninport ki lezot kitsoz, ek li byin move,” ek Jacques inn ekrir: “Sakenn li teste kan li les so prop dezir amenn li ek tant li.” (Jacques 1:14) Si nu leker tante, li pu fer nu truv pese kuma enn kitsoz atiran, ki pa grav. Avredir, nu pe tronp numem kan nu pans kumsa, parski si nu sede ek nu fer pese, to-u-tar sa pu rwinn nu lavi.—Romains 8:6.

12. Dan ki fason nu kapav tronp numem?

¹² Tandans pu tronp numem kapav fasilman vinn enn pyez pu nu. Nu leker tret kapav fer nu exkiz enn move febles ki nu ena uswa zistifye enn pese grav. (1 Samuel 15:13-15, 20, 21) Nu leker kapav usi rod bann fason pu exkiz enn kondwit ki pa tro korek. Nu pran, par egzanp, divertisman. Sertin divertisman kapav fer nu dibyin ek detann nu. Me, laplipar divertisman ki lemond ofer—dan bann fim, bann program televizyon ek lor Internet—zot indesan ek imoral. Li fasil pu konvink numem ki nu kapav get bann kitsoz sal san ki sa fer nu ditor. Sertin mem rezonn kumsa: “Sa pa fatig mo konsyans, ki problem alor?” Me sa bann kalite dimunn-la pe ‘tronp zotmem avek [enn] fos rezonnman.’—Jacques 1:22.

13, 14. (a) Ki legzanp dan la Bib montre ki nu konsyans li pa tuletan enn gid sir? (b) Kuma nu kapav anpes nu tronp numem?

¹³ Kuma nu kapav fer atansyon pu nu pa tronp numem? Pu kumanse, nu bizin rapel ki nu pa kapav tuzur kont lor nu konsyans. Pran legzanp lapot Paul. Avan ki li ti vinn Kretyin, li ti persekit bann disip Christ. (Actes 9:1, 2) So konsyans pa ti fatig li sa lepok-la. Me, li kler ki so konsyans pa ti byin gide. Li ti dir: “Mo ti dan linyorans ek mo ti azir kumsa parski mo ti mank lafwa.” (1 Timothée 1:13) Donk, se pa parski enn divertisman pa fatig nu konsyans, ki sa vedir ki seki nu pe fer li bon. Se selman enn konsyans ki’nn forme par Parol Bondye ki kapav donn nu enn direksyon sir.

¹⁴ Pu nu evit tronp numem, nu bizin rapel detrwa sigzesyon ki byin itil. Analiz umem dan lapriyer. (Psaume 26:2; 2 Corinthiens 13:5) Si u egzaminn u onetman, petet u pu truve ki u bizin fer sertin sanzman dan u fason panse ek dan u fason azir. Ekut lezot. (Jacques 1:19) Kan u egzaminn umem, u kapav ena tandans pu les u inflyanse par u prop lide. Akoz sa, li bon ki u ekut lezot Kretyin ki ena plis lexperyans. Zot pu fer u konpran bann kitsoz dan enn fason pli realis. Si u santi ki u desizyon uswa u fason azir kapav truble bann Kretyin ki ekilibre, ek ki ena lexperyans lor plan spirityel, kitfwa u pu bizin demann u: ‘Eski mo’nn byin form mo konsyans uswa eski mo leker pe tronp mwa?’ Nuri u regilyerman avek la Bib ek bann piblikasyon ki baze lor la Bib. (Psaume 1:2) Sa pu ed u gard u bann panse, u bann latitid, ek u bann santiman an akor avek bann prinsip Bondye.

Protez U Kont Bann Mansonz Satan

15, 16. (a) Ki bann mansonz Satan servi pu tronp nu? (b) Kuma eski nu kapav anpes sa bann mansonz-la tronp nu?

¹⁵ Satan servi diferan kalite mansonz pu tronp nu. Li rod fer nu krwar ki bann dibyin materyel kapav fer nu konn vre boner, me purtan suvan, se lekontrer ki arive. (Ecclesiaste 5:10-12) Li rod fer nu krwar ki sa lemond-la pu kontiyn egziste, mem si bann prev montre klerman ki nu pe viv dan “dernye zur.” (2 Timothée 3:1-5) Satan ankuraz dimunn pu panse ki pena okenn mal pu amenn enn lavi imoral, mem si bann ki’nn rod fer zotmem plezir suvan rekolte bann konsekans amer. (Galates 6:7) Kuma eski nu kapav evit les nu tronpe par sa bann mansonz-la?

¹⁶ Tir leson avek bann legzanp Biblik. Dan la Bib ena legzanp bann dimunn ki’nn les zot tronpe par bann mansonz Satan, ek zordi sa li enn lavertisman pu nu. Sa bann dimunn-la ti kontan bann kitsoz materyel, zot pa ti pran kont lepok ki zot ti pe viv, uswa zot ti tom dan limoralite—tusala finn amenn bann move konsekans lor zot. (Matthieu 19:16-22; 24:36-42; Luc 16:14; 1 Corinthiens 10:8-11) Tir leson avek bann legzanp modern. Malerezman, parfwa sertin Kretyin pa realize ki la fin byin pre, ek zot santi ki zot servis pu Jéhovah pe priv zot. Alor, zot kapav kit la verite pu galup deryer bann plezir. Me, sa bann dimunn-la zot “lor enn terin glisan,” parski, pa zordi pa demin, zot pu bizin pey konsekans zot move kondwit. (Psaume 73:18, 19) Li bon si nu kapav tir leson avek bann erer ki lezot inn komet.—Proverbes 22:3.

17. Kifer eski Satan rod fer nu krwar ki Jéhovah ni kontan nu, ni Li estim nu?

¹⁷ Ena enn lot mansonz byin efikas ki Satan servi. Li rod fer nu krwar ki Jéhovah pa kontan nu ek ki Li pena okenn lestim pu nu. Satan finn gayn lokazyon etidye bann imin inparfe pandan plizir milye lane. Li konn byin ki kan nu dekuraze, sa kapav afebli nu lor plan spirityel. (Proverbes 24:10) Alor, li rod fer nu krwar ki nu pena valer devan lizye Bondye. Si nu santi nu abat ek nu krwar ki vremem Jéhovah pa pran nu kont, nu kapav tante pu abandone. (2 Corinthiens 4:9) Samem ki Satan anvi! Alor, kuma nu pu protez nu kont sa mansonz ki Satan inn invante-la?

18. Kuma eski la Bib donn nu lasirans ki Jéhovah kontan nu?

¹⁸ Medit lor seki la Bib dir konsernan lamur ki Bondye ena pu nu. Atraver bann legzanp ki byin tusan, Parol Bondye donn nu lasirans ki Jéhovah pran nu kont ek Li kontan sakenn parmi nu. Par egzanp, nu lir ki Bondye met nu larm dan so “butey an lapo.” Ki sa vedir? Li truv bann larm ki u verse dan u lalit pu res fidel, ek zame Li pa bliye sa. (Psaume 56:8) Li kone kan u “ena enn gran sagrin dan [u] leker” ek Li pros avek u dan sa bann moman-la. (Psaume 34:18) Li konn tu ti detay lor u, mem kantite “seve ki [u] ena lor [u] latet.” (Matthieu 10:29-31) Me seki pli extraordiner, se ki Bondye “finn donn so sel Garson” pu u. (Jean 3:16; Galates 2:20) Parfwa, li difisil pu krwar ki sa bann pasaz la Bib-la aplik pu u personelman. Me, nu bizin krwar parol Jéhovah. Li ule ki nu krwar ki Li kontan nu pa selman antan ki grup, me sakenn parmi nu personelman.

19, 20. (a) Satan rod fer nu krwar ki Jéhovah pa kontan nu, alor kifer li inportan ki nu rekonet sa mansonz-la ek rezet li? (b) Kuma eski enn sirveyan itineran inn ed bann ki ti dekuraze?

¹⁹ Rekonet ek rezet sa mansonz-la. Si u kone ki enn kikenn pe koz manti, u pu fer atansyon pu pa les u tronpe. Pareyman, u kone ki Satan anvi u krwar li kan li dir ki Jéhovah pa kontan u. Ebyin, sa-mem kapav ed u pu pa les li tronp u. Apre ki enn Kretyenn ti’nn lir enn lartik Latur Degard ki averti nu kont bann taktik Satan, li ti dir: “Zame mo ti panse ki Satan rod servi mo bann santiman pu dekuraz mwa. Asterla ki mo konn sa, sa donn mwa lafors pu lit kont sa bann santiman-la.”

²⁰ Get lexperyans enn sirveyan itineran dan enn peyi l’Amérique du Sud. Kan li fer bann vizit pastoral kot bann frer ek ser ki dekuraze, suvan li demann zot, ‘Eski to krwar dan la Trinité?’ Frer-la uswa ser-la normalman reponn, ‘Non, pa ditu!’ parski li kone ki se enn parmi bann mansonz ki Satan servi. Apre sa, sirveyan-la demande, ‘Eski to krwar dan lanfer?’ Ankor enn fwa dimunn-la reponn, ‘Non, pa ditu!’ Lerla sirveyan-la explik zot ki ena enn lot mansonz ki Satan servi, me ki pa fasil pu rekonet. Li atir zot latansyon lor liv Approchez-vous de Jéhovah,b paz 249, paragraf 21 ki montre klerman ki, si nu dir ki Jéhovah pa kontan nu personelman, sa usi li enn mansonz ki Satan servi. Sa sirveyan itineran-la rakonte kuma li’nn gayn bann bon rezilta kan li’nn ed bann ki ti dekuraze pu rekonet sa mansonz Satan-la, ek rezet li.

Protez U Kont la Tronpri

21, 22. Kifer nu pa dan linyorans konsernan bann taktik ki Satan servi, ek ki nu bizin determine pu fer?

²¹ Alor ki la fin inn byin pre asterla, nu bizin atann ki Satan kontiyn fann enn kantite mansonz ek tronpri. Gran mersi, Jéhovah finn fer nu dekuver bann taktik ki Satan servi. La Bib ek bann piblikasyon “esklav fidel ek avize” devwal nu sa bann taktik demonyak-la. (Matthieu 24:45) Wi, li pli fasil pu reziste kont lennmi, kan nu kone alavans ki taktik li pu servi.—2 Corinthiens 2:11.

²² Alor, anu kontiyne fer atansyon avek rezonnman bann aposta. Anu determine pu pa tronp numem; se enn pyez surnwa ki Satan servi. Ek anu rekonet tu bann mansonz Satan ek rezet zot. Lerla nu pu kapav prezerv nu relasyon avek “Bondye la verite,” ki deteste la tronpri.—Psaume 31:5; Proverbes 3:32.

[Notes]

Eski U Rapel?

• Kifer ena sa kantite tronpri-la dan lemond zordi?

• Kuma eski nu kapav protez nu kont bann aposta?

• Kuma nu kapav protez nu kont tu tandans pu tronp numem?

• Kuma nu kapav anpes Satan tronp nu par so bann mansonz?

[Zimaz lor paz 17]

Pa tronp umem an seki konsern bann divertisman

[Zimaz lor paz 18]

Pu ki u pa tronp umem, analiz umem dan lapriyer, ekut lezot, ek nuri u regilyerman avek Parol Bondye