Prend Soin Bann Dimoune Âgé—Enn Responsabilité Chrétien
“Mem kan zot inn vinn vieux, moi, mo reste toujours pareil; ek kan zot gagne cheveux blanc, moi mo pou toujours soutenir zot.”—ISAÏE 46:4.
1, 2. Couma eski soin ki nou Créateur donné, li différent avec séki bann parents humain donne zot zenfants?
BANN parents bien dévoué prend soin zot zenfants depuis zot tipti ziska ki zot vinn adolescents. Mem kan bann zenfants-la inn vinn adulte ek zot éna zot propre famille, zot parents contigne prend zot compte ek donne zot l’aide ki bizin.
2 Séki bann dimoune kapav faire pou zot zenfants, li limité. Mais nou Créateur kapav toulé temps donne so bann serviteurs so l’attention ek so l’aide. Jéhovah ti dire so peuple dans le passé: “Mem kan zot inn vinn vieux, moi mo reste toujours pareil; ek kan zot gagne cheveux blanc, moi mo pou toujours soutenir zot.” (Isaïe 46:4) C’est vrémem enn grand l’encouragement pou bann Chrétiens âgé! Jéhovah pa abandonne bann séki reste fidèle envers Li. Au contraire, Li promette pou prend zot soin, pou soutenir zot, ek pou guide zot pendant tou zot la-vie, mem kan zot inn vinn vieux.—Psaume 48:14.
3. Ki nou pou examiné dans sa l’article-la?
3 Couma nou kapav imite l’amour ki Jéhovah montré envers bann dimoune âgé? (Éphésiens 5:1, 2) Anou guetté couma bann zenfants, bann anciens dans congrégation, ek chaque Chrétien kapav prend soin bann dimoune âgé dans l’organisation Jéhovah.
Nou Responsabilité en Tant ki Zenfants
4. Ki responsabilité bann zenfants Chrétiens éna envers zot parents?
4 “Honore to papa ek to mama.” (Éphésiens 6:2; Exode 20:12) Sa citation-la sorti dans les Écritures Hébraïques. C’est bann paroles simple mais ki éna beaucoup poids. L’apôtre Paul ti cite sa verset-la pou rappelle bann zenfants responsabilité ki zot éna envers zot parents. Mais ki rapport sa verset-la éna avec soin ki nou donne bann dimoune âgé? Enn l’exemple Biblique bien touchant pou aide nou réponn sa question-la.
5. (a) Couma nou koné ki Joseph pa ti blié so responsabilité envers so famille? (b) Ki sa védir honore nou parents, ek ki bon l’exemple Joseph inn donne nou dans sa domaine-la?
5 Pendant plus ki 20 ans, Joseph pa ti éna okenn contact avec Jacob, so papa ki ti âgé. Pourtant, Joseph pa ti perdi l’amour ki li ti éna pou so papa, Jacob. En fait, kan Joseph ti révèle so bann frères kisannla li ti été vrémem, désuite après li ti demann zot: “Eski mo papa encore vivant?” (Genèse 43:7, 27; 45:3) Sa l’époque-la, ti éna enn grand famine en Canaan. Alors, Joseph ti envoye sa message-la so papa: “Vinn kot moi. Pa tardé. Ek to bizin reste dans pays Goshèn ek to bizin contigne reste près kot moi . . . Mo pou faire toi gagne mangé là-bas.” (Genèse 45:9-11; 47:12) Oui, pou nou honore nou parents âgé, nou bizin protège zot ek donne zot séki zot bizin lor plan matériel kan zot népli kapav occupe zot-mem. (1 Samuel 22:1-4; Jean 19:25-27) Joseph ti accepté pou prend sa responsabilité-la avec plaisir.
6. Couma Joseph ti montré enn vrai l’amour pou so papa, ek couma nou kapav imite li?
6 Avec bénédiction Jéhovah, Joseph ti vinn enn parmi bann dimoune ki pli riche ek pli important en Égypte. (Genèse 41:40) Mais, li pa ti pensé ki li’nn vinn trop important ou-soit ki li trop occupé, pou honore so papa ki ti éna 130 ans. Kan li ti aprann ki Jacob (ou Israël) ti près pou arrivé, “Joseph ti faire prépare so kaless ek li ti al joinde Israël, so papa dans pays Goshèn. Couma li’nn trouve so papa, li’nn maye li ek li’nn plor lor so zépaule plusieurs fois.” (Genèse 46:28, 29) Si Joseph ti accueillir so papa coumsa, c’est pa zis par respect, ou-soit pou lizié dimoune, mais c’est parski li ti bien content so papa ek li pa ti honté pou montré so l’amour. Si nou éna bann parents âgé, eski nou montré ki nou éna beaucoup l’affection pou zot?
7. Kifer Jacob ti envie ki so le corps enterré en Canaan?
7 Jacob ti garde enn profond l’attachement ar Jéhovah ziska la fin so la-vie. (Hébreux 11:21) Li ti éna la foi dans bann promesses Bondié, c’est pou sa ki li ti demandé ki so le-corps enterré en Canaan. Joseph ti honore so papa ek li ti faire séki li ti demandé, mem si sa ti coûte beaucoup ek ti demann beaucoup zéffort.—Genèse 47:29-31; 50:7-14.
8. (a) Pou ki raison principal nou prend soin nou parents âgé? (b) Ki enn serviteur à plein temps ti faire pou prend soin so parents âgé? (Guette l’encadré page 15.)
8 Ki ti pousse Joseph pou prend soin so papa? C’est vrai ki Li ti éna enn grand l’amour pou so papa, ek li ti conscient ki li ti éna enn dette envers celui ki’nn donne li la vie. Mais si li ti agir coumsa, c’est aussi parski li ti envie faire Jéhovah plaisir. Nou’si nou bizin éna mem désir. Paul ti écrire: “Si enn veuve éna zenfants ou-soit ti-zenfants, bannla bizin aprann pou pratique l’attachement envers Bondié d’abord dans zot propre lakaz ek zot bizin rempli zot devoir fidèlement envers zot parents ek envers zot grand-parents, parski sa faire Bondié plaisir.” (1 Timothée 5:4) Oui, l’amour ek la crainte pou Jéhovah pou pousse nou pou prend soin nou parents âgé mem si nou gagne beaucoup difficulté pou faire sa.a
Couma Bann Anciens Montré Ki Zot Prend Soin Bann Ki Âgé
9. Kisannla Jéhovah inn établi pou prend soin so bann serviteurs, mem bann ki âgé?
9 Kan Jacob ti près pou mort, li ti dire ki Jéhovah, Limem “vrai Bondié ki finn prend moi soin couma enn Berger, pendant tou mo la-vie ziska zordi.” (Genèse 48:15) Dans nou l’époque, Jéhovah prend soin so bann serviteurs par l’intermédiaire bann surveillants Chrétiens. Sa bann anciens-la travail enba direction Jésus, “le grand Berger.” (1 Pierre 5:2-4) Couma bann anciens kapav imite Jéhovah kan zot prend soin bann Chrétiens âgé dans la congrégation?
10. Ki finn faire pou aide bann Chrétiens âgé lor plan matériel? (Guette l’encadré page 17.)
10 Enn tipé après formation congrégation Chrétienne, bann zapôtres ti choisir “sept frères ki éna enn bon réputation ek ki rempli ar l’esprit [saint] ek sagesse” pou en charge ‘distribution mangé chaque jour’ parmi bann veuves ki ti pauvre. (Actes 6:1-6) Plitar, Paul ti donne Timothée, ki ti enn ancien, bann instructions pou mette bann veuves ki éna enn bon réputation lor la liste bann dimoune ki bizin gagne enn l’aide matériel. (1 Timothée 5:3, 9, 10) Pareillement, c’est avec plaisir ki bann anciens dans congrégation mette en place enn programme pou aide bann personnes âgé, kan li nécessaire. Mais seulement, prend soin bann dimoune âgé demann plus ki sa.
11. Ki Jésus ti dire lor enn veuve pauvre ki ti faire enn ti contribution?
11 A la fin so ministère lor la-terre, Jésus ti pé assizé dans temple, là li ti “pé guetté ki manière la foule ti pé mette l’argent dans bann boîtes trésor.” Enn coup, enn kikenn finn attire so l’attention. La Bible dire: “Enn veuve ki pauvre ti vini, ek li ti mette deux ti pièces ki ti éna bien tigit valeur” dans boîte-la. Jésus ti appelle so bann disciples ek li ti dire zot: “Vrémem mo dire zot, sa veuve ki pauvre-la finn mette pli beaucoup ki tou bann séki pé mette l’argent dans boîte trésor; parski bannla finn mette séki zot ti éna en plus, mais li, dans so la-misère, li finn mette tou séki li ti éna pou vive.” (Marc 12:41-44) C’est vrai, contribution sa veuve-la ti bien tigit. Mais, Jésus ti koné ki séki li ti faire ti éna beaucoup valeur pou so Papa ki dans lé-ciel, parski sa ti montré so grand l’attachement envers Jéhovah. Malgré l’âge sa veuve-la, Jésus pa ti ignore séki li ti faire.
12. Couma bann anciens kapav montré zot l’appréciation pou séki bann Chrétiens âgé faire dans la congrégation?
12 Pareil couma Jésus, bann anciens pa ignore séki bann Chrétiens âgé faire pou favorise vrai l’adoration. Bann anciens kapav félicite bann Chrétiens âgé parski zot sorti dans prédication ou-soit parski zot participé dans réunions. Félicite zot aussi pou zot l’endurance ek parski zot éna enn bon l’influence dans la congrégation. Enn l’encouragement sincère kapav aide bann Chrétiens âgé pou trouve “enn raison pou trouve la gloire” dans zot service. Lerla, zot pou évite faire bann comparaisons décourageant avec séki enn l’autre Chrétien pé faire, ou-soit avec séki zotmem ti pé faire avant.—Galates 6:4.
13. Dans ki façon bann anciens kapav profite l’expérience ek capacité bann Chrétiens âgé?
13 Kan bann anciens profite l’expérience ek capacité ki bann Chrétiens âgé éna, c’est enn façon pou zot reconnaître l’aide ki bannla apporté dans la congrégation. De temps en temps, kapav interviewé bann Chrétiens âgé exemplaire ou-soit servi zot dans bann démonstrations. Enn ancien dire: “Kan mo interviewé enn Chrétien âgé ki finn élevé so zenfants dans la vérité, l’assistance vrémem porte enn grand l’attention.” Bann anciens dans enn l’autre congrégation dire ki enn soeur pionnier ki éna 71 ans, inn réussi aide certain proclamateurs pou vinn régulier dans la prédication. Soeur-la encourage zot aussi pou faire bann kitsoz “de base,” c’est-à-dire pou lire la Bible ek faire texte du jour, ek après pou médite lor séki zot lire.
14. Couma enn collège d’ancien ti montré so l’appréciation pou enn ancien âgé?
14 Bann anciens apprécié aussi séki lézot anciens âgé faire. José, enn frère 70 ans ti servi pendant longtemps couma ancien. Mais récemment, li ti bizin al faire enn grand l’opération. Après, li’nn reste en convalescence pendant enn longue période le-temps, donc li ti pensé pou rann privilège ki li ti éna dans congrégation en tant ki surveillant-président. Li dire: “Mo ti bien surpris par réaction bann lézot anciens. Zot pa ti oulé ki mo rann mo privilège, mais au contraire zot ti demann moi ki l’aide mo bizin pou contigne servi couma ancien.” Avec l’aide enn l’autre jeune ancien, José ti kapav contigne garde so privilège pou servi en tant ki surveillant-président ek sa ti enn grand bénédiction pou la congrégation. Enn l’autre ancien dire: “La congrégation bien apprécié travail ki José faire en tant ki ancien. Zot bien content li ek zot éna enn grand respect pou so l’expérience ek so la-foi. Li fortifié nou congrégation.”
Prend Soin Sakenn So Camarade
15. Kifer tou bann Chrétiens bizin senti zot concerné par bien-être bann séki âgé parmi zot?
15 Responsabilité pou prend soin bann Chrétiens âgé, pa concerne zis bann zenfants ki éna bann parents âgé, ou-soit bann frères responsable. L’apôtre Paul ti compare congrégation avec le corps enn dimoune. Li ti écrire: “Bondié inn faire le corps humain enn façon ki li’nn donne plus l’honneur certain parti ki ti moins honorable, pou ki péna okenn division dans le corps-la, mais pou ki tou membres kapav prend soin sakenn so camarade pareil.” (1 Corinthiens 12:24, 25) Enn l’autre traduction dire: “Chaque parti [enn le corps humain bizin] concerné par bien-être so camarade.” (Knox) Pou ki congrégation marche bien, chaque membre bizin senti li concerné ar bien-être so camarade; sa comprend bann Chrétiens âgé aussi.—Galates 6:2.
16. Couma nou kapav intéresse nou ar bann Chrétiens âgé kan nou assisté réunions?
16 Bann réunions donne nou enn bon l’occasion pou intéresse nou ar bann Chrétiens âgé. (Philippiens 2:4; Hébreux 10:24, 25) Eski nou prend le temps pou koz avec bann personnes âgé dans sa bann l’occasion-la? Bien ki li bon nou prend zot nouvelle, eski nou pa kapav aussi “partage kitsoz spirituel” avec zot? Kitfois nou kapav partage enn l’expérience encourageant ou-soit enn pensé Biblique. Étant donné ki certain dimoune âgé pa trop kapav marché, li bon ki c’est nou ki approche zot, au lieu ki nou atann ki zot vinn koz ar nou. Si certain gagne difficulté pou tendé, nou bizin pa koz trop vite ek prononce bien nou bann mots. Pou ki kapav éna enn “échange d’encouragement,” nou bizin écoute bien séki dimoune âgé-la pé dire nou.—Romains 1:11, 12.
17. Couma nou kapav montré ki nou interessé ar bann Chrétiens âgé ki pa kapav sorti kot zot?
17 Ki nou pou faire si certain Chrétiens âgé pa kapav assisté réunions? Jacques 1:27 montré ki c’est nou responsabilité en tant ki Chrétiens pou “prend soin bann orphelins ek bann veuves dans zot difficultés.” En Grec, “prend soin” védir “visité.” (Actes 15:36) Nou kapav sûr ki bann dimoune âgé bien apprécié nou bann visites! Vers l’année 65 N.L., l’apôtre Paul, ki ti âgé, ti emprisonné à Rome ek li ti senti li tou seul. Li ti envie trouve Timothée, so compagnon, ek li ti écrire li sa bann mots-la : “Faire tou to possible pou vinn guette moi bientôt.” (Philémon 9; 2 Timothée 1:3, 4; 4:9) Mem si bann Chrétiens âgé pa dans prison, mais le fait ki zot pa kapav sorti kot zot à cause enn mauvais la santé, zot coumadire dans prison mem. Dans enn certaine façon, zot aussi zot pé dire: ‘S’il-vous-plaît, faire tou zot possible pou vinn guette moi bientôt.’ Eski nou prend compte sa bann supplications-la?
18. Ki bienfait nou visite kapav éna lor bann Chrétiens âgé?
18 Jamais pa sous-estime bienfait ki ou visite éna lor enn frère ou-soit enn soeur âgé. Kan enn Chrétien ki ti appelle Onésiphore ti à Rome, li ti al rod Paul partout, li ti réussi trouve li ek après, ‘souvent li ti al réconforte li.’ (2 Timothée 1:16, 17) Enn soeur âgé dire: “Mo bien content passe le temps avec bann jeunes. Séki mo plus apprécié, séki zot traite moi couma enn membre zot famille. Sa encourage moi beaucoup.” Enn l’autre Chrétien âgé dire: “Mo bien apprécié kan kikenn envoye moi enn carte, téléphone moi pou deux-trois minutes, ou-soit rann moi enn ti visite. Sa encourage moi beaucoup.”
Jéhovah Récompense Bann Ki Prend Soin Lézot
19. Ki bénédiction nou gagné kan nou prend soin bann dimoune âgé?
19 Nou gagne beaucoup bénédictions kan nou prend soin bann dimoune âgé. C’est enn grand privilège pou fréquente bann Chrétiens âgé ek profite zot connaissance ek zot l’expérience. Bann ki donne zot le temps pou occupe lézot, ressenti la joie ki gagné kan donné. Zot éna aussi sentiment ki zot inn faire zot devoir, ek zot éna la paix de l’esprit parski zot inn rempli zot responsabilité Biblique. (Actes 20:35) En plus, bann ki prend soin bann dimoune âgé, pa pou peur ki enn jour zot-mem, zot pou abandonné kan zot pou vinn vieux. La Bible donne sa l’assurance-la: “Enn dimoune bon coeur pou engraissé, ek enn dimoune ki arrose bien lézot, lézot aussi pou arrose li bien.”—Proverbes 11:25.
20, 21. Couma Jéhovah considère bann ki prend soin bann dimoune âgé, ek ki détermination nou bizin éna?
20 Jéhovah récompense bann zenfants, bann anciens ek tou Chrétiens ki éna la crainte pou Li ek ki, prend soin bann Chrétiens âgé, de bon cœur. Sa l’attitude-la, li en harmonie avec sa proverbe-la: “Séki aide enn ti dimoune, pé prête Jéhovah, ek Jéhovah pou rann li sa en retour.” (Proverbes 19:17) Si l’amour pousse nou pou aide bann ti dimoune ou-soit bann séki pauvres, Bondié considère sa coumadire nou pé prête Li enn loan ek Li pou paye nou sa en retour avec so bénédiction. Kan nou prend soin avec amour nou bann compagnons Chrétiens âgé, Jéhovah pou rann nou sa. Beaucoup parmi sa bann Chrétiens-la zot ‘pauvres par rapport ar sa lé-monde-la, mais riche concernant la foi.’—Jacques 2:5.
21 Oui, Bondié pou rann nou beaucoup pou séki nou faire! Parmi so bénédiction éna la vie éternelle. La majorité bann serviteurs Jéhovah pou gagne la vie éternelle dans paradis lor la terre kot tou conséquences péché pou disparaître. Bann Chrétiens âgé ki fidèle pou éna la joie pou retrouve zot jeunesse ek zot la force. (Révélation 21:3-5) À mesure ki nou pé atann sa l’époque béni-la, anou contigne rempli nou responsabilité Chrétien pou prend soin bann dimoune âgé.
[Note]
a Éna bann conseils pratique lor façon ki nou kapav prend soin nou parents âgé dans Réveillez-vous ! 8 Février, 1994, pages 3-10.
Ki Ou Pou Reponn?
• Couma bann zenfants kapav honore zot parents âgé?
• Couma bann anciens kapav montré ki zot apprécié bann Chrétiens âgé dans la congrégation?
• Ki chaque Chrétien kapav faire pou montré so l’intérêt sincère pou bann Chrétiens âgé?
• Ki bénédiction nou gagné kan nou prend soin bann Chrétiens âgé?
[L’encadré lor page 15]
Kan So Parents Ti Bizin L’aide
En 1999, Philippe ti pé travail couma enn volontaire en Libéria, lor enn construction bann Témoins de Jéhovah. C’est lerla ki li’nn gagne nouvelle ki so papa ti bien malade. Li ti koné ki so mama pa ti pou kapav faire face li tousel ar sa situation-la. Alors, li ti décidé pou retourne kot li pou arrange enn traitement médical pou so papa.
Philippe dire: “Li pa ti facile pou prend décision pou retourne lakaz, mais mo ti conscient ki mo responsabilité principal ti d’abord pou prend soin mo parents.” Pendant trois ans ki li’nn reste avec zot, li ti aide bannla pou déménagé ek al reste dans enn lakaz ki ti pli convenable pou zot situation. Avec l’aide lézot Chrétiens, li ti faire bann changements nécessaire pou adapté lakaz-la ar bann besoins spécial so papa.
Li pli facile asterla pou mama Philippe faire face ar problème la santé so mari. Récemment, Philippe finn kapav accepté enn l’invitation pou al travail en tant ki volontaire dans filiale bann Témoins de Jéhovah en Macédoine.
[L’encadré lor page 17]
Zot Pa Finn Ignore So Situation
Ada, c’est enn Chrétienne 85 ans, ki reste l’Australie. Kan li ti tombe malade, li pa ti kapav quitte so lakaz. Bann anciens dans congrégation ti faire l’arrangements pou aide li. Zot ti organise enn groupe frères ek soeurs pou faire sa. Bannla ti bien content pou faire différent travail kot Ada, couma nettoyé, lavé, cuit mangé ek acheté commission.
Sa faire dix ans depuis ki Ada recevoir sa l’aide-la. En tou, plus ki 30 Témoins de Jéhovah inn aidé pou occupe li. Zot contigne visite li, ek lire bann publications avec li. Zot mette li au courant lor bann progrès ki éna dans la congrégation ek zot prié avec li régulièrement.
Enn ancien dans sa congrégation-la dire: “Bann ki prend soin Ada considère sa couma enn privilège pou aide li. Beaucoup finn motivé par so l’exemple fidélité ki li finn éna envers Jéhovah, pendant plusieurs l’années. Pou zot, li impensable ki zot ignore so situation.”
[Zimage lor page 14]
Eski nou montré beaucoup l’affection envers nou parents âgé?
[Zimage lor page 16]
Nou tou dans congrégation kapav montré nou l’amour pou nou bann compagnons Chrétiens ki âgé