Bann Ki Donne Bondié la Gloire Recevoir Bénédictions
“Zot pou prosterne devant toi, A Jéhovah, et zot pou donne to nom la gloire.”—PSAUME 86:9.
1. Kifer nou kapav donne la gloire Jéhovah dans façon ki dépasse séki création ki péna la vie kapav faire?
JÉHOVAH mérité ki tou so création donne Li louange. Alors ki so bann création ki péna la vie donne Li la gloire en silence, nou bann humains, nou éna capacité pou raisonné, pou comprend, pou montré nou l’appréciation, ek pou adoré. C’est donc avec nou ki psalmiste dire: “Pousse bann cris la-victoire vers Bondié, zot tou bann peuple la-terre. Chante bann mélodies pou la gloire so nom. Donne Li bann louanges ki rempli avec la gloire.”—Psaume 66:1, 2.
2. Kisannla inn écoute sa l’ordre pou donne nom Bondié la gloire-la, et kifer?
2 La majorité bann humains refuse pou reconnaître Bondié ou-soit pou donne Li la gloire. Seulement, dans 235 pays, plus ki six millions Témoins de Jéhovah montré ki zot trouve “bann qualités invisible” Bondié à travers bann kitsoz ki Li’nn faire. Zot montré aussi ki zot inn tann témoignage ki la création donné en silence. (Romains 1:20; Psaume 19:2, 3) Par zot l’étude la-Bible, zot finn aussi arrive konn Jéhovah et content Li. Psaume 86:9, 10 ti prédire: “Tou bann nations ki to’nn crée pou vini, et zot pou prosterne devant toi, A Jéhovah, et zot pou donne to nom la gloire. Parski to grand et to pé faire bann kitsoz extraordinaire; to tousel, to Bondié.”
3. Couma la “grande foule” rann enn “service sacré la nuite-lijour”?
3 Révélation 7:9, 15 aussi, décrire enn “grande foule” adorateurs ki “pé rann [Bondié] enn service sacré la nuite-lijour dans so temple.” C’est pa ki Bondié impose so bann serviteurs enn service 24 heures lor 24, mais so bann adorateurs, zot finalement enn l’organisation mondiale. Donc, kan soleil couché dans certains pays, bann serviteurs Bondié ki trouve dans l’autre côté la terre pé encore donne témoignage. C’est à cause sa ki nou kapav dire ki soleil jamais pa couché lor bann ki donne la gloire Jéhovah. Bientôt “tou séki respiré” pou lève zot la-voix pou donne louanges Jéhovah. (Psaume 150:6) Mais, en attendant, ki nou kapav faire lor plan individuel pou donne Bondié la gloire? Ki difficultés nou kapav gagné? Et ki bénédictions atann bann ki donne la gloire Bondié? Pou nou réponn, anou considère enn récit Biblique ki concerne tribu Israélite de Gad.
Enn Problème Dans le Passé
4. Ki problème tribu Gad ti bizin faire face?
4 Avant ki zot rente dans la Terre Promise, bann Israélites dans tribu Gad ti demandé si zot ti kapav établi dans l’est la rivière Jourdain kot ti ena enn l’endroit ki ti bon pou l’élevage boeuf. (Nombres 32:1-5) Vive dans sa l’endroit-la ti pou représente bann grave problèmes pou zot. Bann tribus ki ti dans l’ouest Jourdain, ti pou bénéficié protection vallée sa la rivière-la—enn barrière naturel ki ti protège zot kont bann l’armée ki ti kapav attaque zot. (Josué 3:13-17) Mais, dans so livre The Historical Geography of the Holy Land, Adam Smith dire concernant bann pays ki trouve dans l’est la rivière Jourdain: “Lor sa grand plateau l’Arabie-la, partout éna zis terrain plate sans okenn barrière. À cause sa, li finn touletan facile pou bann nomades affamés rente partout et, toulé l’années, certains ti vinn en grand groupe pou prend bann la-terre kot ti éna l’herbe pou zot troupeau.”
5. Couma eski Jacob ti encourage bann descendants Gad pou réagir kan pou attaque zot?
5 Couma tribu Gad ti pou faire face avec sa qualité pression ki ti pou touletan éna lor zot-la? Bann centaines l’années avant, zot ancêtre Jacob ti annoncé dans prophétie ki li ti faire lor so lili la-mort: “En séki concerne Gad, enn la-troupe pillards pou attaque li, mais li pou attaque zot par derrière.” (Genèse 49:19) Enn coup guetté, sa bann paroles-la kapav parette bien déprimant. Mais, en réalité, sa ti impliqué ki tribu Gad ti bizin attaqué en retour. Jacob ti donne zot l’assurance ki si zot faire sa, bann pillards-la pou sauvé ek tribu Gad pou poursuive zot par derrière.
Bann Problèmes Avec Ki Nou Bizin Faire Face Zordi kan Nou Adore Jéhovah
6, 7. Couma situation bann Chrétiens zordi ressemblé situation tribu Gad?
6 Pareil couma tribu Gad, bann Chrétiens exposé zordi ar bann pressions ek bann fardeaux ki système Satan mette lor zot; zordi péna miracle pou faire nou sap la-dans. (Job 1:10-12) Beaucoup parmi nou bizin faire face avec bann pressions couma al l’école, gagne nou la-vie, ek élevé bann zenfants. Éna aussi bann pressions àcause bann problèmes personnel. Certains bizin endure enn “piquant dans la chair” dans forme enn handicap ou enn maladie grave. (2 Corinthiens 12:7-10) Certains accablé par bann sentiments ki zot pa vaut grand-chose. “Bann jours difficile” la vieillesse kapav empêche bann Chrétiens âgé pou servi Jéhovah avec même la-force ki zot ti éna avant.—Ecclésiastes 12:1.
7 L’apôtre Paul aussi rappelle nou ki “nou bizin lutté . . . kont bann mauvais l’esprits ki trouve dans le ciel.” (Éphésiens 6:12) Nou touletan exposé ar “l’esprit du monde,” l’esprit rebelle ek dépravation moral ki Satan ek so bann démons favorisé. (1 Corinthiens 2:12; Éphésiens 2:2, 3) Pareil couma Lot ki ti éna la crainte pou Bondié, nou kapav bouleversé par bann kitsoz immoral ki bann dimoune autour nou dire ek faire. (2 Pierre 2:7) Nou aussi exposé avec l’attaque direct ki Satan faire. Li pé laguerre kont bann membres reste oints, “ki suive bann commandements Bondié et ki pé rann témoignage lor Jésus.” (Révélation 12:17) Satan attaque aussi bann “lézot brebis” par bann interdictions ek persécutions.—Jean 10:16.
Nou Cédé ou Nou Défann Nou?
8. Couma nou bizin réagir kan Satan attaque nou, et kifer?
8 Couma nou bizin réagir kan Satan attaque nou? Pareil couma tribu Gad, nou bizin fort lor plan spirituel ek défann nou, en accord avec bann instructions Jéhovah. Li bien triste, mais certains inn commence cédé enba bann pression la-vie, ek zot inn néglige zot bann responsabilités spirituel. (Matthieu 13:20-22) Ala séki enn Témoin ti dire lor kifer l’assistance bann réunions inn baissé dans so congrégation. “Bann frères tou simplement fatigué. Zot bien stressé.” Li vrai ki, zordi, dimoune éna enn quantité raisons pou fatigué. Li donc facile pou considère nou l’adoration couma enn l’autre pression, enn l’obligation ki enn fardeau. Mais eski c’est enn bon façon pensé?
9. Couma nou kapav gagne soulagement kan nou prend joug Jésus?
9 Guette séki Jésus ti dire bann la-foule dans so l’époque, ki, zot aussi ti fatigué par bann pressions la-vie: “Vinn vers moi, zot tou ki pé rinté ek ki éna poids lor zot, ek moi mo pou soulage zot.” Eski Jésus ti pé rode dire ki zot ti pou gagne soulagement si zot diminué zot service pou Bondié? Au contraire, Jésus ti dire: “Prend mo joug lor zot ek aprann avec moi, parski mo douce et mo éna l’humilité, et zot pou gagne soulagement pou zot nâme.” Enn joug, c’est enn boute du bois ou métal ki permette enn dimoune ou enn zanimo sarrié enn fardeau ki lourd. Alors kifer enn kikenn pou envie prend enn joug coumsa? Eski nou péna assez poids lor nou déjà? Oui, mais pareil couma nou kapav lire dans texte Grec, Jésus ti dire: “Rente enba mo joug avec moi.” Mazinn enn coup: Jésus pé offert pou aide nou sarrié nou fardeau! Nou péna pou faire sa avec nou propre la force.—Matthieu 9:36; 11:28, 29, note; 2 Corinthiens 4:7.
10. Ki bann résultats nou gagné kan nou faire zefforts pou donne Bondié la gloire?
10 Kan nou prend sa joug ki Jésus offert nou pou vinn so bann disciples, nou pé laguerre kont Satan. Jacques 4:7 promette: “Oppose kont Diable, et li pou al loin ar zot.” Sa pa védir ki li facile pou oppose kont Satan. Servi Bondié demann nou beaucoup zefforts. (Luc 13:24) Mais la Bible faire nou sa promesse-la dans Psaume 126:5: “Bann ki sème avec larmes pou récolté avec enn crié la-joie.” Oui, nou pa adore enn Bondié ki péna reconnaissance. Li “récompense bann ki faire zeffort pou rode Li,” et Li béni bann ki donne Li la gloire.—Hébreux 11:6.
Donne la Gloire Bondié en Tant Ki Bann Proclamateurs Royaume
11. Couma la prédication servi couma enn zarme pou defann nou kont bann attaques Satan?
11 Jésus ti donne sa l’ordre-la: “Donc, allé et faire bann disciples parmi tou bann nations, baptise zot au nom du Père, et du Fils, et de l’esprit saint.” Premier façon pou offert Bondié “sacrifice de louange,” c’est par travail la prédication. (Matthieu 28:19; Hébreux 13:15) Nou “l’équipement complet la-guerre spirituel,” sa-mem nou défense kont bann attaques Satan, et, enn partie important la-dans c’est, kan nou “mette dans nou lipié, l’équipement la bonne nouvelle concernant la paix.” (Éphésiens 6:11-15) Enn bon façon pou fortifié nou la-foi, c’est kan nou donne louange Bondié dans la prédication. (2 Corinthiens 4:13) Sa aide nou pou évite éna bann pensées négatif dans nou l’esprit. (Philippiens 4:8) Kan nou participe dans la prédication, sa permette nou profite compagnie édifiant bann lézot adorateurs Jéhovah.
12, 13. Couma bann familles kapav édifié kan zot participe régulièrement dans la prédication? Donne enn l’exemple.
12 La prédication kapav aussi enn activité familial ki bien édifiant. Bien sûr, bann jeunes bizin enn distraction équilibré. Mais, fodé pa le temps ki bann famille passé ensemble dans prédication vinn enn corvée. Bann parents kapav rann prédication pli agréable si zot forme zot zenfants pou vinn pli efficace. Eski bann jeunes péna tendance pou content enn kitsoz kan zot kapav faire li bien? Bann parents kapav aide zot zenfants pou trouve plaisir dans prédication si zot montré zot équilibré et pa démann bann jeunes pou faire plus ki zot kapav.—Genèse 33:13, 14.
13 En plus, kan enn famille servi Jéhovah ensemble, sa permette zot pou vinn pli proche entre zot. Guette l’exemple sa soeur ki ti retrouve li avec cinq zenfants kan so mari ki pa ti partage so la-foi, ti quitte li. Li ti bizin travail pou nourri so bann zenfants. Eski li ti tellement fatigué ki li pa ti prend compte besoins spirituel so bann zenfants? Li rappelle: “Mo ti étudié la Bible et bann publications avec sérieux et mo ti essaye applique séki mo ti lire. Mo ti amène mo bann zenfants réunions ek prédication régulièrement. Résultat mo bann zefforts? Tou mo cinq zenfants baptisé.” Enn participation actif dans prédication kapav aide ou aussi dans zefforts ki ou pé faire pou élevé ou zenfants “dans discipline ek dans avertissements Jéhovah.”—Éphésiens 6:4.
14. (a) Couma bann jeunes kapav donne la gloire Jéhovah dans l’école? (b) Ki kapav aide bann jeunes pou zot pa “honté à cause la bonne nouvelle”?
14 Jeunes, si ou vive dans enn pays kot la loi permette ou rann témoignage dans l’école, eski ou donne Bondié la gloire dans l’école ou eski ou laisse la crainte pou bann zom empêche ou rann témoignage? (Proverbes 29:25) Enn Témoin ki éna 13 ans et ki reste Porto Rico écrire: “Jamais mo’nn senti moi embarassé pou prêché dans l’école parski mo koné ki sa c’est la vérité. Dans classe, mo toujours lève mo la-main et mo dire séki mo’nn aprann dans la Bible. Kan mo éna enn période libre, mo al dans bibliothèque l’école et mo lire livre Les jeunes s’interrogent.”a Eski Jéhovah inn béni so zefforts? Li raconté: “Parfois mo bann camarades l’école pose moi bann questions et zot mem démann enn livre.” Si ou pa pé faire grand-chose dans sa domaine-la, kitfois ou bizin vérifié pou ou-même “volonté Bondié, ki bon, agréable et parfait” par enn l’étude personnel sérieux. (Romains 12:2) Kan ou sûr ki séki ou’nn aprann, li la vérité, jamais ou pa pou “honté à cause la bonne nouvelle.” —Romains 1:16.
Enn “la-Porte Ki Donne L’accès” ar Service
15, 16. Par ki “grand la-porte ki donne l’accès ar l’activité” certains Chrétiens inn rentré, et ki bénédictions zot finn gagné?
15 L’apôtre Paul ti écrire ki “enn grand la-porte ki donne l’accès ar l’activité” ti’nn ouvert pou li. (1 Corinthiens 16:9) Eski ou situation permette ou pou rente par enn la-porte ki donne accès ar enn pli grand l’activité? Si, par exemple ou faire pionnier permanent ou pionnier auxiliaire, sa védire ki ou bizin passe 70 ou 50 heures par mois dans travail prédication. Naturellement, bann lézot Chrétiens apprecié service fidèle bann pionniers. Mais, bann pionniers pa senti zot pli supérieur ki zot bann frères ek soeurs, parski zot passe plus le temps dans prédication. Au contraire, zot cultive l’attitude ki Jésus ti encouragé: “Nou bann esclaves bon à rien. Séki nou’nn faire, c’est séki nou ti bizin faire.”—Luc 17:10.
16 Pou nou faire pionnier, nou bizin discipline nou-mem, éna enn bon l’organisation personnel ek disposé pou faire sacrifice. Mais, li vaut la peine à cause bann bénédictions ki nou gagné. Tamika, enn jeune pionnier dire: “Li enn vrai bénédiction pou moi pou kapav konn bien servi la Bible. Kan ou pionnier, ou servi la Bible tellement souvent. Asterla kan mo al de porte en porte, mo kapav pense bann versets ki adapté pou chaque dimoune ki mo joinde.” (2 Timothée 2:15) Enn pionnier ki appelle Mica dire: “Trouvé couma la vérité influence la vie bann dimoune, c’est enn l’autre bénédiction extraordinaire.” Matthieu, enn jeune, li aussi koz lor la joie “trouve enn dimoune vinn dans la vérité. Péna pli grand la-joie ki sa.”
17. Kuma eski enn Chrétienne inn surmonte bann sentiments négatif ki li ti ena lor service pionnier?
17 Eski li ti pou possible pou ou rente par sa la-porte ki amène dans service pionnier-la? Kitfois ou ti pou content mais ou pa senti ou capable. Enn jeune soeur ki appelle Kenyatte avoué: “Mo ti éna bann pensées négatif lor service pionnier. Mo pa ti senti moi capable. Mo pa ti koné couma pou prepare bann introductions ou couma pou raisonné lor bann versets la-Bible.” Mais, bann anciens inn démann enn pionnier ki éna l’expérience pou travail avec li. Kenyatte rappelle: “Li ti korek pou travail avec li. Sa ti donne moi l’envie pou faire pionnier.” Kitfois ou aussi ou pou envie faire pionnier si ou gagne inpé l’encouragement ek formation.
18. Ki bénédictions bann ki prend service missionnaire kapav gagné?
18 Service pionnier kapav ouver la porte pou lézot privilèges service. Par exemple, certains couples marié kapav qualifié pou gagne formation pou vinn missionnaires ek al prêché dans enn l’autre pays. Bann missionnaires bizin adapté avec enn nouveau pays, kitfois enn nouveau langage, enn nouveau culture, ek nouveau mangé. Mais sa bann sacrifices-la nanrien à côté bann bénédictions ki zot gagné. Mildred, enn missionnaire dans Mexique depuis longtemps, dire: “Jamais, mo’nn regrette mo décision pou vinn missionnaire. Sa-mem ti mo désir depuis mo ti bien jeune.” Ki bann bénédictions li’nn gagné? “Dans mo pays, li ti difficile pou trouve enn l’étude la-Bible. Ici, inn arrive moi éna jusqu’à quatre étudiants commence prêché en même temps!”
19, 20. Couma service dans Béthel, service international ek l’École de formation ministérielle finn amène bann bénédictions pou beaucoup?
19 Bann ki dans service Béthel dans filiales bann Témoins de Jéhovah, gagne aussi beaucoup bénédictions. Sven, enn jeune frère ki pé servi en Allemagne, dire concernant so travail dans Béthel: “Mo senti ki mo pé faire enn kitsoz ki éna enn valeur durable. Mo ti pou kapav servi mo bann capacités dans le monde. Mais li ti pou couma dire mo pé dépose l’argent dans enn la-banque ti pé al faire faillite.” Li vrai ki bizin faire sacrifice pou servi couma enn volontaire ki pa gagne salaire. Mais Sven dire: “Kan ou rente kot ou, ou koné ki tou séki ou’nn faire pendant sa journée-la ti pou Jéhovah. Et sa donne ou enn sentiment ‘extraordinaire.’ ”
20 Certains frères inn aussi konn bann bénédictions dans service international pou construire bann filiales dans lézot pays. Enn couple ki’nn travail dans huit pays ti écrire: “Bann frères ici, zot extra. Chaque fois ki nou éna pou allé, nou léker cassé—sa faire huitième fois ki sa arrive nou. Nou finn vrémem gagne enn l’expérience extraordinaire!” Éna aussi l’École de formation ministérielle ki donne bann frères célibataire qualifié, enn formation spirituel. Enn frère ki’nn assisté sa l’école-la ti écrire: “Li difficile pou mo trouve bann mots pou dire zot merci pou sa l’école extraordinaire-la. Ki l’autre l’organisation pou faire autant zeffort pou donne enn formation coumsa?”
21. Avec ki défi tou bann Chrétiens bizin faire face dans zot service pou Bondié?
21 Oui, enn quantité la-portes ki donne l’accès ar l’activité, ouvert. Li vrai, la plipar parmi nou pa kapav servi dans Béthel ou dans enn l’autre pays. Jésus li-mem ti reconnaître ki bann Chrétien ti pou produire différent quantité “fruits” dépendant lor zot situation. (Matthieu 13:23) Alors, séki nou bizin réussi faire en tant ki Chrétien, c’est tire plus l’avantage possible dans nou situation—éna enn full participation dans service Jéhovah dans mesure ki nou situation permette nou. Kan nou faire sa, nou pé donne Jéhovah la gloire, et nou kapav sûr ki sa faire Li bien plaisir. Guette cas Ethel, enn soeur âgé ki dans enn home. Li donne témoignage régulièrement avec bann lézot dimoune ki reste dans so home et par téléphone. Malgré ki li limité, li faire tou séki li kapav dans so service.—Matthieu 22:37.
22. (a) Dans ki lézot façons nou kapav donne Bondié la gloire? (b) Ki moment extraordinaire pé atann nou?
22 Seulement pa blié ki prédication, li zis enn parmi bann différent façons ki nou éna pou donne Jéhovah la gloire. Kan nou éna enn conduite ek enn l’apparence exemplaire dans nou travail, dans l’école et dans nou lakaz, nou pé réjouir léker Jéhovah. (Proverbes 27:11) Proverbes 28:20 promette: “Enn dimoune ki montré so fidélité par so bann actions, pou gagne beaucoup bénédictions.” Alors, nou bizin “sème en abondance” dans nou service pou Bondié, parski nou koné ki nou pou récolté enn quantité bénédictions. (2 Corinthiens 9:6) Si nou faire sa, nou pou éna privilège pou là dans sa moment extraordinaire kot “tou séki respiré” pou donne Jéhovah la gloire ki li bien mérité!—Psaume 150:6.
[Note]
a Livre Les jeunes s’interrogent—Réponses pratiques publié par bann Témoins de Jéhovah.
Eski Ou Rappelle?
• Couma peuple Bondié servi Jéhovah “la nuite-lijour”?
• Ki difficulté tribu Gad ti bizin faire face, et ki sa montré bann Chrétiens, zordi?
• Couma la prédication li enn protection kont bann attaques Satan?
• Par ki “la-porte” certains inn rentré, et ki bénédictions zot inn gagné?
[Zimage lor page 31]
Service pionnier kapav ouver la porte pou lézot privilèges service, couma:
1. Service international
2. Service Béthel
3. Service missionnaire