Apprecié Couma Bizin Valeur Ou la-vie
“Du sang Christ [pou] purifié nou conscience ek efface nou bann mauvais actions, pou ki nou kapav donne Bondié enn service sacré.”—HÉBREUX 9:14.
1. Couma nou montré ki nou accorde enn grand valeur ar nou la-vie?
SI DIRE ou mette enn prix lor ou la-vie, combien ou ti pou métté? Nou tou, nou accorde enn grand valeur ar nou la-vie ek la vie nou bann proches. La preuve c’est ki kan nou tombe malade, nou al guette enn docteur. Ou-soit, mem si nou pa malade, nou faire enn check-up régulièrement. Oui, nou envie reste vivant ek en bonne santé. Mem parmi bann dimoune agé ou-soit handicapé, la majorité pa envie mort; zot envie reste vivant.
2, 3. (a) D’après Proverbes 23:22, ki l’obligation ou éna? (b) Toujours d’après sa Proverbes-la, ki l’obligation ou éna envers Bondié?
2 Valeur ki ou accordé ar ou la-vie éna enn l’influence lor ou relation avec lézot. Par exemple, Parole Bondié dire: “Écoute to papa ki’nn donne toi la vie, ek pa méprise to mama zis parski li’nn vinn vieux.” (Proverbes 23:22) “Écouté” veut dire plus ki zis tendé séki pé dire ou; sa proverbe-la védir écouté ek après obéir. (Exode 15:26; Deutéronome 7:12; 13:18; 15:5; Josué 22:2; Psaume 81:13) Pou ki raison la Bible dire ou écoute ou papa ek ou mama? C’est pa zis parski zot pli grand ki ou, ou-soit parski zot éna plus l’expérience, mais c’est parski c’est zot ki finn ‘donne ou la-vie.’ Donc, si ou apprécié valeur ou la-vie, ou pou senti ki ou éna enn dette envers bann dimoune ki’nn donne ou sa la-vie-la.
3 Bien sûr, si ou enn vrai Chrétien, ou koné ki ou la-vie vinn de Jéhovah Limem. Grâce à Li, ou “éna la vie”; ou kapav “agir” couma enn dimoune ki éna bann sentiments; asterla, ou “existé” ek ou kapav faire bann plans pou l’avenir, oui, mem pou la vie éternelle. (Actes 17:28; Psaume 36:9; Ecclésiaste 3:11) En accord avec Proverbes 23:22, li bon ki ou “écoute” Bondié ek obéir Li. Li bon ki ou comprend façon ki Li considère la vie, ek laisse ou guidé par séki Li pensé, au lieu ki ou laisse ou guidé par séki lezot pensé lor la vie.
Montré Respect pou la Vie
4. Dans commencement l’histoire l’humanité, couma Bondié ti montré l’importance pou respecté la vie?
4 Dans commencement l’histoire l’humanité, Jéhovah ti faire bien comprend ki Li pa ti éna l’intention permette bann humains faire séki zot envie avec la vie. Nou trouve sa bien dans séki la Bible dire lor Caïn. Li ti tellement jaloux ki li ti tire enn la vie innocent, la-vie Abel, so frère. Eski ou pensé ki Caïn ti éna droit prend enn décision coumsa en rapport avec la vie? Pa d’après Bondié. Li ti faire Caïn rann enn compte kan Li ti dire li: “Ki to finn faire? Écouté! Du sang to frère, lor la terre, pé crié moi.” (Genèse 4:10) Remarqué ki, du sang Abel ki ti’nn coulé lor la terre, ti représente so la-vie, enn la vie ki’nn fini dans enn manière brite ek ki ti pé crié pou ki Bondié tire vengeance.—Hébreux 12:24.
5. (a) Ki interdiction Bondié ti établi dans l’époque Noé, ek ar ki sa ti appliqué? (b) Dans ki sens sa interdiction-la ti enn l’étape important?
5 Après Déluge, l’humanité ti prend enn nouveau départ avec zis huit dimoune. Dans enn déclaration ki applique pou tou dimoune, Bondié ti donne plus détails lor façon ki Li considère la vie ek du sang. Li ti dire ki dimoune kapav mange la chair bann zanimaux, mais li ti mette sa interdiction-la: “Zot gagne droit mange tou zanimaux vivant. Pareil couma bann plantes, mo donne zot tousala. Seulement, la chair avec so nâme, c’est-à-dire so du sang, fodé pa zot mangé.” (Genèse 9:3, 4) Certain Juifs prétann ki d’après sa verset-la, bann dimoune pa gagne droit mange la chair ou-soit du sang enn zanimo ki ti encore vivant. Mais plitar li ti vinn clair ki en réalité, Bondié ti pé défann mange du sang pou nourri nou. En plus, commandement ki Bondié ti donne Noé, ti enn grand pas dans réalisation So projet ki concerne du sang, enn projet ki pou permette bann dimoune gagne la vie éternelle.
6. À travers Noé, couma Bondié ti bien montré la façon ki Li considère la vie bann humains?
6 Bondié ti contigne dire: “Mo pou ré-demann du sang zot nâme. Mo pou ré-demann sa ar tou créature vivant; dans la main tou dimoune, dans la main so semblable aussi, mo pou ré-demann so nâme. Celui ki verse du sang enn dimoune, li aussi so du sang pou versé pareil, parski Bondié finn crée dimoune dans so ressemblance.” (Genèse 9:5, 6) Sa déclaration-la concerne tou dimoune, ek par la nou trouvé ki pou Bondié, du sang enn dimoune représente so la-vie. C’est Bondié ki donne dimoune la vie, du sang représente la vie, ek personne pa gagne droit tire sa la-vie-la. Si enn dimoune faire enn crime, pareil couma Caïn, le Créateur gagne droit “ré-demann” criminel-la so propre la vie an retour.
7. Kifer nou bizin intéresse nou ar séki Bondié ti dire Noé concernant du sang?
7 Par sa bann paroles-la, Bondié ti pé donne l’ordre bann dimoune pou pa faire enn mauvais l’utilisation du sang. Eski jamais ou pa finn demann ou-mem kifer Bondié inn donne sa l’ordre-la? Oui, pou ki raison Bondié considère du sang coumsa? En réalité, réponse sa question-la concerne enn l’enseignement bien important dans la Bible, ki fondamental pou bann Chrétiens, mem si beaucoup religions préfère ignore li. Ki sa l’enseignement-la sa, ek couma eski li concerne ou la-vie, ou bann décisions, ek ou bann actions?
Couma Ti Gagne Droit Servi du Sang?
8. Dans la Loi, ki restriction Jéhovah ti metté lor l’utilisation du sang?
8 Kan Jéhovah ti donne bann Israélites la Loi, Li ti donne plus détails ki concerne la vie ek du sang. Kan Li ti prend sa disposition-la, li ti faire enn nouveau pas pou accompli so projet. Sûrement ou koné ki d’après la Loi, ti bizin donne Bondié bann dons, couma la grain, de l’huile ek du vin. (Lévitique 2:1-4; 23:13; Nombres 15:1-5) Ti éna aussi bann sacrifices zanimaux. Concernant sa bann sacrifices-la, Bondié ti dire: “Nâme enn dimoune, li dans so du sang, ek moi mo’nn mette sa lor l’autel pou zot, pou couvert péché zot nâme, parski c’est du sang ki couvert péché, grâce à nâme ki dans sa du sang-la. C’est pou sa ki mo’nn dire bann Israélites: ‘Okenn nâme parmi zot pa gagne droit mange du sang.’ ” Jéhovah ti ajouté ki si enn kikenn, couma enn chasseur ou-soit enn fermier ti touye enn zanimo pou mangé, li ti bizin verse so du sang ek couvert li avec la poussière. La terre représente marchepied Bondié, ek kan enn dimoune verse du sang lor la terre, sa védir ki li reconnaître ki sa la-vie-la pé retourne ar Bondié, ki donne la vie.—Lévitique 17:11-13; Isaïe 66:1.
9. D’après la Loi, ki seul façon ti gagne droit servi du sang, ek pou ki raison?
9 Sa la-Loi-la pa ti zis enn pratique religieux ki péna okenn signification pou nou. Eski ou’nn remarqué kifer bann Israélites pa ti gagne droit mange du sang? Bondié ti dire zot: “C’est pou sa ki mo’nn dire bann Israélites: ‘Okenn nâme parmi zot pa gagne droit mange du sang.’ ” Pou ki raison? Jéhovah ti dire: “Moi mo’nn mette sa lor l’autel pou zot, pou couvert péché zot nâme.” Eski ou trouvé couma sa bann paroles-la aide nou pou comprend kifer Bondié ti dire Noé ki fodé pa dimoune mange du sang? Certainement! Oui, Bondié inn décidé pou considère du sang couma enn kitsoz ki éna enn grand valeur. Li’nn réserve sa zis pou enn l’utilisation spécial ki pou kapav sauve beaucoup la vie. Du sang ti pou joué enn rôle important pou couvert bann péchés. Donc, d’après la Loi, seul façon ki Bondié ti autorise servi du sang, c’est lor l’autel, pou couvert péchés bann Israélites ki ti vinn demann Jéhovah pardon.
10. Kifer du sang bann zanimaux pa ti assez pou pardonne complètement péchés bann Israélites, mais ki sa bann sacrifices-la ti rappelle zot?
10 Bann Chrétiens aussi ti reconnaite l’utilisation du sang dans sa façon-la. L’apôtre Paul ti faire référence avec disposition ki ti éna dans la Loi, kan li ti écrire: “D’après la Loi, presque tou kitsoz purifié avec du sang, ek péna pardon si pa verse du sang.” (Hébreux 9:22) Paul ti montré clairement ki sacrifices bann Israélites pa ti faire zot vinn bann dimoune parfait, sans péché. Li ti écrire: “Sa bann sacrifices-la ti rappelle [bann Israélites] zot péché l’année après l’année, parski li impossible ki du sang taureaux ek boucs enlève bann péchés.” (Hébreux 10:1-4) Seulement, sa bann sacrifices-la ti éna zot utilité. Zot ti rappelle bann Israélites ki zot ti bann pécheurs, ek ki, en plus sa bann sacrifices-la, zot ti bizin encore enn lot kitsoz pou zot péchés pardonné complètement. Mais si du sang, ki ti représente la vie bann zanimaux, pa ti kapav couvert complètement péchés bann humain, eski éna enn lot du sang ki ti pou kapav faire sa?
Bondié Ki Donne la Vie Trouve enn Solution
11. Couma nou koné ki sacrifices ki ti faire avec du sang bann zanimaux, ti pé dirige l’attention lor enn lot kitsoz?
11 En réalité, la Loi ti pé dirige l’attention lor enn kitsoz ki beaucoup plus efficace pou réalise volonté Bondié. Paul ti demandé: “Alors, kifer [éna] la Loi?” Li ti réponn: “Li finn ajouté pou mette en évidence bann péchés, ziska ki la semence avec ki ti faire enn promesse, vini; ek la Loi ti transmette à travers bann anges par la main enn médiateur [Moïse].” (Galates 3:19) Pareillement, Paul ti écrire: “Dans la Loi éna zis enn l’ombrage bann bon kitsoz ki pou vini, mais péna la réalité sa bann kitsoz-la.”—Hébreux 10:1.
12. Couma nou kapav comprend déroulement projet Bondié en rapport avec du sang?
12 Donc, séki nou finn aprann ziska présent, séki dans l’époque Noé, Bondié ti donne l’ordre bann dimoune pou mange la chair bann zanimaux pou zot vive, mais zot pa ti gagne droit mange du sang. Plitar, Bondié ti dire ki “nâme enn dimoune, li dans so du sang.” Oui, Li ti décidé ki du sang représente la vie ek Li ti dire: “Moi mo’nn mette [du sang] pou zot lor l’autel, pou couvert péchés zot nâme.” Seulement, plitar ti pou éna enn l’autre déroulement extraordinaire dans projet Bondié. La Loi ti annonce bann bon kitsoz ki pou vini. Ki sa bann kitsoz-la sa?
13. Kifer la mort Jésus ti important?
13 La réalité ti centré lor la mort Jésus Christ. Sûrement ou koné ki bann l’ennemis Jésus ti torture li ek ti koulout li lor enn poteau. Li ti mort couma enn criminel. Paul ti écrire: “Alors ki nou ti encore faible, dans l’époque ki ti’nn fixé, Christ finn mort pou bann dimoune ki éloigné ar Bondié. . . . Bondié finn manifesté so l’amour pou nou, parski, alors ki nou ti encore bann dimoune ki faire péché, Christ inn mort pou nou.” (Romains 5:6, 8) Kan Christ inn mort pou nou, li’nn donne enn rançon pou couvert nou péchés. La rançon, c’est enn l’enseignement fondamental pou bann Chrétiens. (Matthieu 20:28; Jean 3:16; 1 Corinthiens 15:3; 1 Timothée 2:6) Ki rapport la rançon éna avec la vie ek du sang, ek couma ou la-vie concerné par sa?
14, 15. (a) Couma certain traductions la Bible mette l’accent lor la mort Jésus, kan zot inn traduire Éphésiens 1:7? (b) Ki point important nou kapav raté kan nou lire Éphésiens 1:7?
14 Certains religions mette beaucoup l’accent lor la mort Jésus. Zot bann fidèles souvent dire “Jésus inn mort pou moi.” Par exemple, guetté couma certain traductions la Bible inn traduire Éphésiens 1:7: “C’est par li ek par so la-mort ki nou gagne la libération, c’est-à-dire, nou libéré ar nou péché.” (The American Bible, par Frank Scheil Ballentine, 1902) “Par la mort Christ, nou libéré, ek nou péché pardonné.” (Today’s English Version, 1966) “C’est en Christ ek par sacrifice so la-vie ki nou finn libéré, enn libération ki faire nou gagne pardon nou péché.” (The New Testament, par William Barclay, 1969) “C’est par la mort Christ ki nou péché finn pardonné ek ki nou finn libéré.” (The Translator’s New Testament, 1973) Ou trouvé couma sa bann traductions-la mette beaucoup l’accent lor la mort Jésus. Certain kapav dire ‘mais, la mort Jésus bien important, donc ki manqué dans sa bann traductions-la?’
15 Si ou compte zis lor sa bann traductions-la, ou kapav rate enn point bien important, ek sa kapav limite ou compréhension lor message la Bible. Kifer? Parski dans version original Éphésiens 1:7, éna enn mot Grec ki veut dire “du sang” ek sa bann traductions-la pa mentionne sa mot-la. Mais beaucoup traductions la Bible, par exemple La Traduction du monde nouveau, traduire sa verset-la dans enn façon pli exact, zot mette: “Par li, nou gagne la libération par la rançon grâce à so du sang, oui, nou gagne pardon nou bann fautes. C’est coumsa ki Bondié faire nou enn grand faveur ki nou pa mérité.”
16. Ki l’expression “so du sang” bizin faire nou pensé?
16 L’expression “so du sang” éna beaucoup signification ek sa bizin faire nou pense beaucoup kitsoz ki en rapport avec du sang. La mort enn dimoune pa ti pou assez, mem si c’est la mort enn dimoune parfait couma Jésus. Jésus inn accompli séki ti annoncé dans la Loi, surtout séki ti arrivé pendant jour des Propitiations. Pendant sa jour spécial-la, ti sacrifié bann zanimaux ki ti indiqué dans la Loi. Après sa, grand prêtre ti prend enn parti du sang sa bann zanimaux-la ek li ti amène sa dans Très-Saint, parti pli sacré dans tabernacle ou dans temple. Là, li ti présente sa du sang-la devant Bondié, coumadire li ti en so présence mem.—Exode 25:22; Lévitique 16:2-19.
17. Couma Jésus inn accompli séki ti prédire par jour des Propitiations?
17 Paul ti expliqué ki Jésus inn accompli séki ti prédire par jour des Propitiations. D’abord, li ti dire ki grand prêtre en Israël ti rentre dans le Très Saint enn fois par an avec du sang ki li ti offert “pou limem ek pou péchés ki le peuple ti faire par ignorance.” (Hébreux 9:6, 7) Pou réalise séki jour des Propitiations ti annoncé, Jésus ti al dans le ciel après so résurrection. Le fait ki li ti enn l’esprit, donc sans la chair, ni du sang, li ti kapav parette devant “Bondié en personne, pou nou.” Ki li ti présente Bondié? Pa enn kitsoz physique, mais enn kitsoz ki éna beaucoup valeur. Paul continué, li dire: “Kan Christ inn vini couma grand prêtre . . . , li pa ti rentre avec du sang bann boucs ou-soit du sang bann jeune taureaux, mais li ti rentre dans enn l’endroit sacré enn fois pou tou, avec so propre du sang. Li ti gagne enn délivrance éternelle pou nou. Parski, si du sang boucs ek taureaux . . . sanctifié enn kikenn ziska so purification, du sang Christ pou faire sa encore plus, grâce à enn l’esprit éternel, li finn offert limem sans défaut ar Bondié, pou purifié nou conscience ek efface nou bann mauvais actions, pou ki nou kapav rann Bondié enn service sacré?” Oui, Jésus inn présente Bondié valeur so du sang.—Hébreux 9:11-14, 24, 28; 10:11-14; 1 Pierre 3:18.
18. Kifer zordi bann Chrétien bizin prend en considération séki la Bible dire lor du sang?
18 Grâce à la vérité ki Bondié faire nou koné, sa permet nou comprend séki la Bible dire concernant tou bann l’aspects extraordinaire lor du sang. Par exemple, nou comprend kifer Bondié ena sa l’opinion-la lor du sang, nou comprend aussi couma nou, nou bizin considère du sang, ek kifer nou bizin respecté bann restrictions ki Bondié inn metté lor l’utilisation du sang. Kan ou lire les Écritures grecques chrétiennes, ou pou trouve beaucoup versets ki faire référence avec du sang Christ. (Guette l’encadré.) Sa montré clairement ki chaque Chrétien bizin exerce la foi “dans so du sang [du sang Jésus].” (Romains 3:25) C’est seulement “grâce à du sang ki [Jésus] inn versé” ki nou kapav gagne pardon nou péché, ek éna la paix avec Bondié. (Colossiens 1:20) Sa applique certainement pou bann dimoune avec ki Jésus inn faire enn l’alliance spécial pou règne avec li dans le ciel. (Luc 22:20, 28-30; 1 Corinthiens 11:25; Hébreux 13:20) Zordi, sa applique aussi pou la “grande foule” ki pou survive à la “grande tribulation” ki pé vini ek ki pou gagne la vie éternelle dans paradis lor la terre. Dans enn sens symbolique, zot inn ‘lave zot robes dans du sang l’Agneau.’—Révélation 7:9, 14.
19, 20. (a) Kifer Bondié inn décidé pou mette bann restrictons lor l’utilisation du sang, ek ki nou bizin pensé lor la? (b) Ki nou bizin intéressé pou koné?
19 Oui, li clair ki du sang éna enn signification spécial pou Bondié. Pou nou aussi li bizin pareil. Nou Créateur ki interessé ar la vie, éna droit pou mette bann restrictions lor l’utilisation du sang. Tellement li interessé ar nou la-vie, ki li’nn décidé ki pou réserve l’utilisation du sang dans enn façon bien important, en fait, seul façon ki pou rann la vie éternelle possible. Sa façon-la concerne du sang précieux Jésus. Nou bien reconnaissant envers Jéhovah parski Li’nn agir pou nou bien dans la façon ki Li’nn servi du sang—du sang Jésus—pou faire nou gagne la vie éternelle! Nou bien reconnaissant envers Jésus aussi, parski li’nn disposé pou verse so du sang en sacrifice pou nou! Oui, nou comprend sentiments l’apôtre Jean, kan li ti dire: “Celui ki content nou ek ki’nn libère nou ar nou péchés par so propre du sang—ek li’nn faire nou vinn enn royaume ek bann prêtres pou so Bondié ek so Papa—oui, à li la gloire ek la puissance pou toujours. Amen.”—Révélation 1:5, 6.
20 Nou Bondié Li sage ek Limem ki donne la vie. Depuis longtemps Li finn pense rôle ki du sang pou joué pou sauve la vie bann dimoune. Alors, nou kapav demann nou: ‘Ki l’effet sa bizin éna lor nou décisions ek lor nou bann actions?’ Nou pou examine sa question-la dans prochain l’article.
Couma Ou Pou Reponn?
• Ki nou kapav aprann lor façon ki Bondié considère du sang, d’après bann récits lor Abel ek Noé?
• Dans la Loi, ki limites Bondié ti metté lor l’utilisation du sang, ek kifer Li ti mette sa?
• Couma Jésus ti accompli séki ti prédire par jour des Propitiations?
• Couma du sang Jésus kapav sauve nou la-vie?
[L’encadré lor page 12]
KI DU SANG KI SAUVE LA VIE?
“Veille bien lor zotmem ek lor troupeau Bondié parmi lequel l’esprit saint finn établi zot couma bann surveillants pou guide So congrégation, ki Li’nn acheté avec du sang so propre Garçon.”—Actes 20:28.
“Encore plus asterla, étant donné ki [Bondié] finn considère nou couma bann dimoune droite par du sang [Jésus], grâce à li, colère Bondié népli lor nou.”—Romains 5:9.
“Zot pa ti éna okenn l’espoir ek zot ti sans Bondié dans le monde. Mais asterla, en union avec Christ Jésus, zot ki avant ti éloigné [ar Bondié], zot inn vinn près [ar Li], grâce à du sang Christ.”—Éphésiens 2:12, 13.
“Bondié inn juge bon ki tou so bann qualités existé en [Jésus], ek par so l’intermédiaire, pou réconcilié tou lézot kitsoz avec Limem, ek faire la paix, grâce à du sang ki li’nn versé lor enn poteau de supplice.”—Colossiens 1:19, 20.
“Donc, frères, . . . par du sang Jésus, nou éna la liberté pou rentre dans enn l’endroit sacré.”—Hébreux 10:19.
“C’est pa avec bann kitsoz périssable . . . ki zot finn arrête amène enn la vie ki péna sens, ki zot bann ancêtres finn transmette zot. Mais c’est avec enn du sang précieux, pareil couma du sang enn l’agneau sans défaut ek sans tache, oui avec du sang Christ.”—1 Pierre 1:18, 19.
“Si nou pé marche dans la lumière, pareil couma Limem Li dans la lumière, nou participe ensemble avec nou camarade, ek du sang Jésus, so Garçon, purifié nou ar tou nou péchés.”—1 Jean 1:7.
“To mérité pou prend sa rouleau-la ek pou casse so scellé, parski [zot] finn touye toi, ek avec to du sang, to finn acheté pou Bondié, bann dimoune dans tou tribus, ek langues ek peuples ek nations.”—Révélation 5:9.
“Parski finn jette li dehors, sa accusateur nou bann frères-la, . . . Ek zot finn réussi combatte li, grâce à du sang l’Agneau ek grâce à zot témoignage.”—Révélation 12:10, 11.
[Zimage lor page 10]
À travers la Loi, Bondié ti montré clairement ki du sang pou joué enn rôle dans pardon bann péchés
[Zimage lor page 11]
Grâce à du sang Jésus, beaucoup dimoune kapav gagne la vie sauve