Accepté Direction enn Bondié Vivant

“Tourne zot vers enn Bondié vivant, ki’nn faire le ciel, la terre ek la mer ek tou séki ladan.”—ACTES 14:15.

1, 2. Kifer nou bizin reconnaite ki Jéhovah Li “enn Bondié vivant”?

APRÈS ki Paul ek Barnabas ti guéri enn monsieur dans la ville Lystres, Paul ti dire bann dimoune ki ti là: “Nou’si nou éna mem faiblesse ki zot, ek nou pé annonce zot la bonne nouvelle pou ki zot kapav détourne zot ar bann kitsoz inutile, ek tourne zot vers enn Bondié vivant, ki’nn faire le ciel ek la terre ek la mer ek tou séki ladan.”—Actes 14:15.

² Oui, Jéhovah Li pa enn idole sans la vie, mais Li enn “Bondié vivant”! (Jérémie 10:10; 1 Thessaloniciens 1:9, 10) Non seulement Limem Li vivant, mais Li donne aussi la vie. “Limem ki’nn donne tou dimoune la vie ek le souffle ek tou lézot kitsoz.” (Actes 17:25) Li envie ki nou profite nou la-vie, zordi ek dans l’avenir. Paul ti dire ki Bondié “inn prouvé ki Li existé par bann bon kitsoz ki Li’nn faire, Li donne la pluie [ek] bann saisons pou récolté; Li donne mangé en abondance ek Li rempli [nou] léker avec la joie.”—Actes 14:17.

3. Kifer nou kapav éna confiance dans direction Bondié?

³ Bondié intéressé ar nou la-vie, ek sa donne nou enn raison pou éna confiance dans So direction. (Psaume 147:8; Matthieu 5:45) Mais certains pa faire Bondié confiance, si zot pa comprend enn certain principe Biblique ou-soit si zot trouve li trop sévère. Pourtant, à la longue, li sage ki nou mette nou confiance dans direction Jéhovah. Nou prend enn l’exemple: Mem si enn Israélite pa ti comprend la loi ki ti défann touche enn cadavre, sa la loi-la ti pou so propre bien. Premièrement, kan li ti obéir, sa ti rapproche li plus ar Jéhovah; deuxièmement, sa ti pou évite li atrappe bann maladies.—Lévitique 5:2; 11:24.

4, 5. (a) Avant l’époque Chrétien, ki la loi Bondié ti donné lor du sang? (b) Couma nou koné ki sa la loi-la concerne bann Chrétiens?

⁴ Li pareil pou la loi ki Bondié ti donné lor du sang. Li ti dire Noé ki fodé pa mange du sang. Plitar, dans la Loi, Bondié ti dire ki seul façon ki kapav servi du sang, c’est kan faire sacrifices pou bann péchés. Par sa bann instructions-la, Bondié ti pé rode faire comprend rôle suprême ki du sang ti pou joué plitar: rançon Jésus Christ ti pou sauve la vie bann dimoune. (Hébreux 9:14) Oui, Bondié ti donne sa la loi-la dans nou l’intérêt ek pou nou propre bien-être. Dans 19^ème siècle, enn Bibliste, Adam Clarke, ti faire enn commentaire lor Genèse 9:4, li ti écrire: “Zordi, bann Chrétiens Orthodoxe pé toujours obéir l’ordre ki Bondié ti donne Noé . . . D’après la Loi, personne pa ti gagne droit mange du sang parski sa ti représente du sang ki ti pou versé pou péché le monde entier; ek dans l’époque [Chrétien], personne pa ti gagne droit mange [du sang], parski sa ti bizin touletan représente du sang ki finn versé pou pardon bann péchés.”

⁵ Kitfois, sa Bibliste-la ti pé faire référence ar l’Évangile, c’est-à-dire la bonne nouvelle lor Jésus. Et li enn bonne nouvelle pu koné ki Bondié inn envoye so Garçon pou verse so du sang, afin ki nou kapav gagne la vie éternelle. (Matthieu 20:28; Jean 3:16; Romains 5:8, 9) Dans so commentaire, Bibliste-la ti pé aussi faire référence ar commandement ki bann Chrétiens ti gagné plitar, pou pa mange du sang.

6. Ki instructions bann Chrétiens ti gagné en rapport avec du sang, ek kifer?

⁶ Sûrement ou koné ki Bondié ti donne bann Israélites plis ki six cent la-lois. Après la mort Jésus, bann disciples pa ti obligé suive tou sa bann la lois-la. (Romains 7:4, 6; Colossiens 2:13, 14, 17; Hébreux 8:6, 13) Seulement, plitar enn question ti’nn levé concernant la circoncision: Bann non-Juifs ki envie bénéficié sacrifice Jésus, eski zot aussi, zot pou bizin circonci ek montré ki zot encore pé suive la Loi? En l’an 49 N.L., le collège central ti examine sa question-la. (Actes, chapitre 15) Avec l’aide l’esprit saint, bann apôtres ek bann anciens ti arrive à la conclusion ki circoncision ti népli obligatoire kan la Loi finn aboli. Mais, ti éna certains la-lois kan-mem, ki bann Chrétiens ti bizin contigne suive. Guette séki le collège central ti écrire dans enn lettre adressé ar tou bann congrégations: “L’esprit saint ek nou-mem, nou finn décidé pou pa ajoute encore fardeau lor zot, à part sa bann kitsoz ki nécessaire-la: Pa mange bann kitsoz ki’nn sacrifié ar bann zidoles, pa prend du sang ek pa mange bann zanimaux ki’nn mort touffé, ek pa commette fornication. Si zot veille bien pou pa faire sa bann kitsoz-la, zot pou prospéré.”—Actes 15:28, 29.

7. Ki quantité li important ki bann Chrétiens “pa prend du sang”?

⁷ Pou le collège central, la loi “pa prend du sang” ti aussi important ki la loi kont l’immoralité sexuel ek l’idolâtrie. Sa montré ki nou bizin prend au sérieux sa l’interdiction lor du sang-la. Bann Chrétiens ki adore zidoles ou-soit ki commette l’immoralité sexuel sans repenti, pa pou “hérite royaume Bondié”; “zot réservé pou . . . la seconde mort.” (1 Corinthiens 6:9, 10; Révélation 21:8; 22:15) Remarque bien sa grand différence-la: Si nou pa respecté la loi Bondié lor du sang, nou risqué mem gagne la mort éternelle. Mais kan nou respecté sacrifice Jésus, nou kapav gagne la vie éternelle.

8. Couma nou koné ki bann premier Chrétiens ti prend bien au sérieux la loi Bondié lor du sang?

⁸ Couma bann premiers Chrétiens ti comprend la-loi lor du sang, ek couma zot ti applique sa? Rappelle séki Clarke ti dire: “Dans l’époque [Chrétien], personne pa ti gagne droit mange [du sang], parski sa ti bizin touletan représente du sang ki finn versé pou pardon bann péchés.” L’histoire montré ki bann premiers Chrétiens ti prend sa la loi-la au sérieux. Tertullien ti écrire: “Après enn combat gladiateurs, certain dimoune ti galopé pou boire du sang chaud ki ti pé coulé depuis la gorge bann criminel . . . ek zot ti prend sa du sang-la pou guéri épilepsie.” Alors ki bann païens ti consomme du sang, bann Chrétiens zot, d’après Tertullien, “du sang animal pa ti mem présent dans zot repas . . . Pou testé bann Chrétiens, ti zot offert boudin pou mangé, conscient pourtant ki bannla pa gagne droit mange sa.” Oui, mem si bann Chrétiens ti menacé de mort, zot pa ti mange du sang. Zot ti prend la loi Bondié vrémem au sérieux.

9. Bann Chrétiens pa ti mange du sang. Mais, dans ki façon encore zot pa ti servi du sang?

⁹ Certain kapav pensé ki collège central ti défann simplement mangé ek boire du sang—par exemple, la viande ki pa’nn saigné. C’est vrai; d’ailleurs c’est sa ki Bondié ti dire principalement ar Noé. Et donc, bann apôtres ti défann bann Chrétiens ‘mange bann zanimaux ki’nn mort touffé,’ ki pa’nn saigné. (Genèse 9:3, 4; Actes 21:25) Mais, bann premier Chrétiens ti koné ki sa l’ordre-la ti éna enn pli grand signification. Parfois, certain dimoune ti prend du sang pou bann raisons médical. Tertullien ti dire ki certain païens ti boire du sang pou soigne zot épilepsie. Ek sûrement ti servi du sang lézot façons encore pou traite certains maladies ou-bien, pou soi-disant améliore la santé. Mais mem pou bann raisons ‘médical,’ bann Chrétiens ti refuse prend du sang, ek sa, malgré ki sa ti mette zot la-vie en danger.

Utilisation du Sang Dans Traitement Médical

10. Ki utilisation la médecine pé faire avec du sang, ek ki question sa soulevé?

¹⁰ Zordi, servi du sang dans bann traitements médical. Pou bann premier transfusions du sang, ti servi du sang total—enn dimoune ti donne so du sang, ki ti stocké ek servi par la suite pou soigne enn dimoune malade ou-soit ki’nn blessé dans la guerre. Mais avec le temps, bann scientistes finn réussi sépare bann composants principal ki éna dans du sang. Sa finn permette bann docteurs faire bann transfusions zis avec bann composants du sang, séki veut dire ki ti kapav servi du sang-la avec pli beaucoup dimoune. Par exemple, ti kapav servi plasma avec enn dimoune ki’nn blessé, ek avec enn l’autre, ti kapav servi globules rouge. Lézot recherches inn montré ki kapav sépare enn composant principal, couma plasma, en plusieurs fractions ek donne sa encore pli beaucoup dimoune. Bann scientistes pé contigne faire encore lézot recherches dans sa domaine-la, ek d’après bann rapports, zot pé servi bann nouveau fractions du sang dans la médecine. Couma enn Chrétien bizin considère l’utilisation bann fractions du sang? Anou prend l’exemple enn Chrétien ki bien décidé pou pa accepté enn transfusion du sang. Supposé ki so docteur encourage li pou accepté zis enn composant du sang, globules rouge, ou-soit enn ti fraction sa composant du sang-la. Ki enn serviteur Bondié pou faire? Couma li kapav prend enn décision ki reflète so respect pou valeur sacré du sang ek pou valeur suprême du sang Christ?

11. Ki position médical bann Témoins de Jéhovah inn adopté depuis longtemps en rapport avec du sang?

¹¹ Sa faire plusieurs l’années ki bann Témoins de Jéhovah inn bien faire comprend zot position lor du sang. Par exemple, zot ti envoye enn l’article ki finn parette dans The Journal of the American Medical Association (27 Novembre, 1981; ek ki’nn finn ré-publié dans brochure Comment le sang peut-il vous sauver la vie ? pages 27-9).a Sa l’article-la ti faire référence ar livres Genèse, Lévitique ek Actes. Li ti dire: “C’est vrai ki sa bann versets-la pa’nn écrire dans bann termes médical, mais pou bann Témoins de Jéhovah, sa bann versets-la interdit transfusion du sang total, globules rouge, plasma ek aussi globules blanc ek plaquettes.” En 2001, brochure Emergency Care ti faire enn commentaire: “Dans du sang éna plusieurs composants: plasma, globules rouge, globules blanc ek plaquettes.” Donc, en harmonie avec bann faits médical, bann Témoins de Jéhovah refuse transfusion du sang total, aussi bien ki so quatres composants principal.

12. (a) Ki finn dire lor position bann Témoins de Jéhovah concernant bann composants principal du sang? (b) Kot-sa nou kapav gagne plis l’explication lor sa sujet-la?

¹² L’article dans sa journal médical-la ajouté: “Croyances religieux bann Témoins, pa interdit nécessairement l’utilisation bann fractions du sang couma albumine, immunoglobuline, ek bann préparations pou soigne bann hémophiles. Chaque Témoin décidé pou li-mem si li pou accepté sa bann traitements-la ou non.” Depuis 1981, finn kapav divise bann composants du sang en plusieurs ti fractions, ki servi pou soigne bann patients. Dans La Tour de Garde 15 Juin, 2000, éna bann renseignements utiles lor sa sujet-la dans “Question des Lecteurs.” C’est enn l’article- bien détaillé ki donne bann arguments logique. Ou pou remarqué aussi ki li en harmonie avec bann l’idées principal ki ti présenté en 1981. Sa “Questions des lecteurs-la” inn ré-publié dans La Tour de Garde 15 Juin, 2004, en Français.

Ou Conscience

13, 14. (a) Ki veut dire enn conscience, ek ki rôle li joué en rapport avec du sang? (b) Ki la loi, Bondié ti donne bann Israélites lor consommation la viande, mais ki questions certain ti kapav soulevé?

¹³ Sa bann renseignements-la faire appel à nou conscience kan nou bizin prend bann décisions. Kifer? Bann Chrétiens d’accord ki zot bizin suive bann principes Bondié. Mais, dans certaines situations zot bizin prend bann décisions personnel ek laisse zot guidé par zot conscience. La conscience c’est capacité ki nou éna pou examine enn situation ki souvent concerne nou conduite, ek lerla prend enn décision. (Romains 2:14, 15) Mais conscience tou dimoune pa pareil.b La Bible dire ki certains, zot ‘conscience faible,’ ek donc pou lézot, pli fort. (1 Corinthiens 8:12) Tou Chrétiens péna mem maturité spirituel; pa tou ki laisse pensée Bondié influence zot décision. Nou kapav prend l’exemple bann Juifs concernant consommation la viande.

¹⁴ D’après la Bible, li clair ki enn dimoune ki obéir Bondié pa pou mange enn la viande ki pa’nn saigné. Sa l’ordre-la ti tellement important, ki mem dans enn cas urgent, kan bann soldats Israélites ti mange la viande sans verse du sang, zot ti coupable enn péché bien grave. (Deutéronome 12:15, 16; 1 Samuel 14:31-35) Mais, ti éna lézot questions ki certain ti kapav soulevé. Par exemple, kan enn Israélite ti touye enn mouton, ki vitesse li ti bizin verse so du sang? Eski li ti bizin tranche so la gorge pou laisse so du sang coulé? Eski li ti nécessaire ki li enpandan mouton-la par so la patte derrière? Si oui, pou comié le temps ? Couma li ti pou faire avec enn gros vache? Mem après ki li’nn verse so du sang, ti pou encore éna du sang dans so la chair. Eski li ti pou kapav mange sa la viande-la? Kisannla ki ti bizin décidé?

15. Couma certain Juifs ti réagir lor consommation la viande, mais ki l’ordre Bondié ti donné?

¹⁵ Mazinn enn Juif bien zélé ki ti pose sa bann questions-la. Kitfois li ti pou népli acheté la viande dans bazar. Pareillement, enn l’autre Juif li, peut-être li pa ti pou mange enn la viande, ki li pensé finn offert à enn idole. Lézot kitfois pou mange la chair enn zanimo à condition ki’nn faire certaines rites pou verse so du sang.c (Matthieu 23:23, 24) Ki ou pensé lor sa bann différents réactions-la? Bondié pa ti atann ki Juifs réagir coumsa. Alors, eski li ti pou ki zot envoye enn la-liste questions ar enn comité rabbins pou décidé ki bizin faire dans chaque situation? Malgré ki sa coutume-la ti’nn développé dans la religion Juif, nou content ki zordi Jéhovah pa atann ki nou prend bann décisions dans sa façon-la, en rapport avec du sang. Bondié ti donne bann instructions simple lor façon ki bizin touye bann zanimaux ki pur ek verse zot du sang, mais Li pa’nn dire plis ki sa.—Jean 8:32.

16. Kifer bann Chrétiens éna différents l’opinion lor bann piqures ki contenir enn ti fraction du sang?

¹⁶ Couma nou finn dire dans paragraph 11 ek 12, bann Témoins de Jéhovah pa accepté transfusion du sang total, ni okenn so quatre composants principal: plasma, globules rouge, globules blancs, ek plaquettes. Mais ki zot pensé lor bann ti fractions sa bann composants-la? Par exemple, certains sérums contenir bann anti-corps pou combatte certaines maladies ou-soit poison serpent. (Guette “Question des lecteurs” dans La Tour de Garde 15 Juin 2000, page 30, paragraph 4) Éna pa considère bann ti fractions du sang couma du sang li-mem, ek donc pou zot, commandement “pa prend du sang” pa appliqué dans sa cas-la. (Actes 15:29; 21:25; page 31, paragraphe 2) Si zot pense coumsa, c’est zot responsabilité. Mais, lézot Chrétiens, zot conscience pa permette zot accepté okenn fraction du sang (humain ou animal), mem si c’est enn ti fraction nanyin ditou.d Lézot peut-être accepté bann piqures ki éna protéine plasmatique pou combatte bann maladies ou-soit poison serpents, mais ki pourtant refuse lézot ti fractions du sang. En plus, éna bann produits ki fabriqué à partir enn parmi bann composants du sang. Sa bann produits-la souvent éna mem l’effet ki sa composant du sang-la li-mem; zot préserve la vie enn dimoune. Donc, à cause sa, la plupart Chrétiens pa accepté zot.

17. (a) Couma nou conscience kapav aide nou kan nou bizin décide lor bann fractions du sang? (b) Kifer nou bann décisions lor sa question-la, li bien sérieux?

¹⁷ Séki la Bible dire lor la conscience kapav aide nou, kan nou bizin prend bann décisions en rapport avec bann fractions du sang. Premièrement, ou bizin aprann séki Parole Bondié dire, ek laisse so connaissance-la forme ou conscience. Sa pou faire ou prend bann décisions ki en accord avec volonté Bondié, au lieu demann enn l’autre dimoune décide pou ou. (Psaume 25:4, 5) En rapport avec bann fractions du sang, certain finn éna sa raisonnement-la: ‘Étant donné ki c’est enn question conscience, donc mo décision péna okenn l’importance.’ Mais c’est pa enn bon raisonnement. C’est pa parski li enn question conscience ki nou décision péna l’importance. Au contraire, nou décision kapav éna bann conséquences bien grave. Sa kapav troublé conscience lézot, pareil couma Paul ti expliqué kan li ti koz lor consommation la viande à so l’époque. Peut-être sa bann la-viandes ki ti vann dans bazar-la, ti sacrifié ar bann zidoles. Enn Chrétien bizin faire attention ki li pa ‘blesse bann conscience ki faible.’ Si li choque lézot, li risqué ‘perdi so frère, pou ki Christ finn mort,’ ek sa pou enn péché kont Christ. Donc, mem si décision lor fractions du sang li enn décision personnel, nou bizin bien réfléchi avant nou décidé.—1 Corinthiens 8:8, 11-13; 10:25-31.

18. Couma enn Chrétien kapav empêche so conscience vinn insensible en rapport avec bann décisions lor du sang?

¹⁸ Ou bizin considère avec sérieux bann décisions ki ou prend lor du sang, parski ou décision pou éna enn l’effet lor ou. Si ou conscience ki guidé par la Bible, pou troublé si jamais ou accepté enn ti fraction du sang, fodé pa ou ignore li. Fodé pa aussi ki ou ignore ou conscience, zis parski enn l’autre dimoune dire ou: “To kapav accepté sa fraction du sang-la; beaucoup finn déjà accepté sa avant.” Rappelle bien ki zordi, beaucoup dimoune ignore zot conscience. Zot conscience finn vinn insensible; zot koz menti ek zot faire lézot mauvais kitsoz sans okenn regret. Certainement, bann Chrétiens pa envie vinn coumsa.—2 Samuel 24:10; 1 Timothée 4:1, 2.

19. Kan nou bizin prend bann décisions médical en rapport avec du sang, ki kitsoz nou bizin surtout prend en considération?

¹⁹ Dans l’article “Questions des lecteurs” ki trouve dans La Tour de Garde 15 Juin 2000, éna enn question ki posé à la fin: “Eski sa veut dire ki, parski sakenn éna so l’opinion ek ki c’est enn question conscience, ki c’est enn kitsoz sans importance? Non, c’est enn kitsoz bien sérieux.” Ou décision bien important, surtout parski ou relation avec Bondié en jeu. C’est sa relation-la tousel ki kapav amène ou vers la vie éternelle, ki possible grâce à du sang ki Jésus inn versé. Nou bizin éna enn grand respect pou du sang, parski c’est par sa moyen-la, ki Bondié sauve la vie bann dimoune. C’est avec raison ki Paul ti écrire: “Zot pa ti éna okenn l’espoir ek zot ti sans Bondié dans le monde. Mais asterla, dans l’unité avec Christ Jésus, zot ki avant ti’nn éloigné [ar Bondié], zot inn vinn près [ar Li] grâce à du sang Christ.”—Éphésiens 2:12, 13.

[Note]

Eski Ou Rappelle?

• Concernant du sang, ki la loi Bondié ti donne Noé, bann Israélites, ek bann Chrétiens?

• En rapport avec du sang, ki bann Témoins de Jéhovah refusé catégoriquement?

• En ki sens, accepté enn ti fraction du sang, li enn question conscience, mais ki sa pa veut dire?

• Kan nou prend bann décisions, kifer nou bizin pense surtout nou relation avec Bondié?

[Encadré lor page16]

(Pou plus detail guette publication)

NOU POSITION LOR DU SANG

DU SANG TOTAL

PA ACCEPTABLE

Globules rouges

Globules blancs

Plaquettes

Plasma

CHAQUE CHRÉTIEN BIZIN DÉCIDÉ

Fractions globules rouges

Fractions globules blancs

Fractions plaquettes

Fractions plasma

[Zimage lor page 14]

Collège central ti décidé ki fodé pa bann Chrétiens “prend du sang”

[Zimage lor page 17]

Pa ignore ou conscience si ou bizin prend enn décision ki concerne enn fraction du sang