Questions Bann Lecteurs

Dans 2 Corinthiens 6:14, lor kisannla Paul ti pé kozé kan li ti servi terme “non-croyants”?

Nou lire dans 2 Corinthiens 6:14: “Pa forme enn l’attachement ki pa allé avec bann non-croyants.” Si nou guette le contexte, li claire ki Paul pé koz lor bann dimoune ki pa faire parti dans la congrégation Chrétienne. Nou trouve sa aussi dans bann lézot versets la Bible ki servi mem l’expression: “non-croyant” ou-soit “bann non-croyants.”

Par exemple, dans 1 Corinthiens 6:6, Paul réprimande bann Chrétiens parski zot al devant la justice, “devant bann non-croyants.” Ici, sa bann non-croyants-la c’est bann juges ki exerce zot l’autorité dans la cour en Corinthe. Dans so deuxième lettre, Paul dire ki Satan “finn aveuglé l’esprit bann ki pa’lé croire [non-croyants].” Sa bann non-croyants-la pa reconnaite la bonne nouvelle parski éna enn ‘voile’ devant zot lizye. Zot pa’nn montré okenn lintere pou servi Jéhovah. Àcause sa Paul ti dire: “Kan zot retourne vers Jéhovah, voile-la li enlevé.”—2 Corinthiens 3:16; 4:4.

Certains non-croyants, zot pa obeir la loi, ou-soit zot pratique l’idolâtrie. (2 Corinthiens 6:15, 16) Mais, pa tout ki kont bann serviteurs Jéhovah. Certains mem montre lintere pou la vérité. Éna beaucoup ki éna bann conjoints Chrétiens, ek zot dispoze pou contigne vive avec zot. (1 Corinthiens 7:12-14; 10:27; 14:22-25; 1 Pierre 3:1, 2) Paul finn servi sak fois terme “non-croyant” pou identifié bann ki pa faire parti dans congrégation Chrétienne. À vrai dire, c’est bann ‘dimoune ki croire dans le Seigneur’ ki forme la congrégation.—Actes 2:41; 5:14; 8:12, 13.

En réalité, principe ki nou trouvé dans 2 Corinthiens 6:14, li enn guide précieux pou bann Chrétiens dans tou domenn zot la-vie. Souvent finn utilise sa principe-la couma enn sage conseil pou bann ki pé rode enn conjoint. (Matthieu 19:4-6) Li pou bien sage si enn Chrétien ki voué ek baptisé pa rode enn conjoint parmi bann non-croyants, parski zot péna mem valeurs moral, mem l’objectifs, ek mem croyances, ki enn vrai Chrétien.

Mais ki kapav dire lor bann dimoune ki étudié la Bible ek ki associé zot ar la congrégation Chrétienne? Ki kapav dire lor bann proclamateurs non-baptisé? Eski zot bann non-croyants? Non. Bann personnes ki finn accepté la vérité concernant la bonne nouvelle ek ki pé faire bann bon progrès vers le baptême, nou pa kapav qualifié zot couma non-croyants. (Romains 10:10; 2 Corinthiens 4:13) Avant mem so baptême, la Bible appelle Corneille “enn kikenn ki bien sincère ek ki éna la crainte pou Bondié.”—Actes 10:2.

Alors, si terme ‘non-croyant’ dans 2 Corinthiens 6:14, pa applique ar enn proclamateur non-baptisé, eski li sage ki enn Chrétien baptisé fréquente enn proclamateur non-baptisé ek marié avec li? Non. Kifer? À cause conseil direct ki Paul finn donné concernant bann veuves. Paul ti écrire: “Li libre pou marié avec n’importe kisannla li envie, mais seulement dans le Seigneur.” (1 Corinthiens 7:39) En accord avec sa conseil-la, bann Chrétiens ki baptisé encouragé pou rode bann conjoints seulement parmi bann ki “dans le Seigneur.”

Ki veut dire expression “dans le Seigneur,” ek enn lot expression ki pareil: “en Christ”? Paul koz lor bann dimoune ki ti “en Christ” ou-soit “dans le Seigneur” dans Romains 16:8-10 ek Colossiens 4:7. Si ou lire sa bann versets-la, ou pou trouvé ki c’est ‘bann compagnons de travail,’ ‘bann frères bien-aimé,’ ‘bann ki approuvé,’ ‘bann fidèle ministres,’ ek ‘bann co-esclaves.’

Kan eski enn kikenn vinn enn “esclave dans le Seigneur”? C’est kan par limem li faire seki enn esclave bizin faire, ek li renié limem. Jésus ti dire: “Si kikenn envie suive moi, li bizin renié limem ek prend so poteau de supplice ek contigne suive moi.” (Matthieu 16:24) Enn kikenn commence suive Christ ek soumet li entièrement ar volonté Bondié, kan li voué li ar Bondié. Après sa, li baptisé ek li vinn enn ministre ordonné, ek approuvé par Jéhovah.a Donc, ‘marié avec enn kikenn dans le Seigneur’ veut dire marié avec enn kikenn ki’nn démontré ki vrémem li enn croyant, ki’nn voué so la-vie, ek ki’nn vinn ‘enn esclave Bondié ek Seigneur Jésus Christ.’—Jacques 1:1.

Enn kikenn ki étudié la Bible avec bann Témoins de Jéhovah ek ki pé faire bann bon progrès spirituel, li mérite félicitation. Mais, li pankor voué so la-vie à Jéhovah, ek li pankor engage li pou amenn enn la vie de service et de sacrifice. Li encore pé faire bann changements nécessaire. Li bizin fini faire bann changements ki nécessaire pou li vinn enn kikenn ki voué, enn Chrétien baptisé, avant ki li envisage enn lot grand changement dans so la-vie, couma le mariage.

Dans sa cas-la eski li bon ki enn Chrétien poursuive so fréquentation avec enn kikenn ki pé progressé bien dans so l’étude, avec l’intention pou atann li baptisé pou zot marié? Non. Li pou difficile pou konn so vrai mobile. Kifer li’nn prend baptême? Eski c’est parski li koné ki éna enn Chrétien ki envie marié ar li, me ki pa pou accepté faire sa tant ki li pa baptisé?

Normalement, enn proclamateur non-baptisé pa prend longtemps pou progressé ziska baptême. Donc, conseil ki dire nou marié seulement dans le Seigneur, li pa déraisonnable. Mais, ki nou kapav dire pou enn kikenn ki’nn arrive l’âge pou li marié, ki’nn grandi dans enn famille Chrétien, ki’nn servi dans la congrégation couma enn membre actif pendant plusieurs l’années, ek ki toujours pé servi couma enn proclamateur non-baptisé? Eh bien, ki finn empêche li voué so la-vie à Jéhovah? Kifer li hésité? Eski li éna bann doutes? Bien ki li pa enn non-croyant, nou pa kapav qualifié li couma enn kikenn ki “dans le Seigneur.”

Sa conseil ki Paul finn donné lor mariage-la, li bien utile pou nou. (Isaïe 48:17) Kan toulé deux futur conjoints finn voué zot ar Jéhovah, zot l’engagement dans le mariage éna enn base solid ek spirituel. Zot partage mem valeurs moral ek zot envie al dans mem direction. C’est sa ki contribué beaucoup à zot bonheur dans le mariage. En plus, kan enn kikenn ‘marié seulement dans le Seigneur,’ li montre so fidélité envers Jéhovah ek sa pou faire li gagne bann bénédictions éternel, parski “avec enn kikenn ki fidèle, [Jéhovah] aussi pou montré [li] fidèle.”—Psaume 18:25.

[Note]