Dimoune Pé Rod enn Bon Gouvernement

“Dans le monde entier, bann pays dépann de plus en plus sakenn lor so camarade, ek sa finn crée partout enn série problèmes ki okenn pays népli kapav résoudre par li-mem. C’est seulement à travers enn coopération internationale ki nous pou réussi affronte bann dangers ek bann difficultés ki l’humanité pé koné de plus en plus.”—Ghulam Umar, enn Pakistanais ki analyse la politique.

ZORDI le monde rempli ar bann situations ki parette contradictoires. Alors ki nous entouré par enn l’abondance lor plan matériel, beaucoup dimoune bizin lutté pou gagne zot la-vie. Li vrai ki nous pé vive enn l’époque kot beaucoup kitsoz électronique, kot dimoune éna kitfois plus l’éducation ek plus connaissance ki avant, mais pourtant bann dimoune pé gagne de plus en plus difficultés pou trouve enn travail stable. Mem si li parette ki dimoune éna plus liberté ki avant, mais plusieurs millions pé vive dans la peur ek dans l’insécurité. Nous éna possibilité pou faire bann kitsoz bien intéressant, mais partout dans la société éna la corruption ek dimoune pé méprise la loi. Sa situation-la finn faire beaucoup dimoune désespéré.

Le monde bizin affronte tellement beaucoup problèmes, ki okenn pays ni okenn groupe pays pa pé kapav faire face ar sa. Donc, beaucoup observateurs finn arrive à la conclusion ki, pou ki la paix ek la sécurité mondial vinn enn réalité, tous pays dans le monde bizin laisse zot dirigé par enn seul gouvernement. Albert Einstein, par exemple, depuis longtemps ti soutenir sa l’idée-la. En 1946, li ti dire: “Mo sûr ki la majorité dimoune lor la terre envie vive dans la paix ek la sécurité . . . C’est seulement création enn gouvernement mondial ki pou kapav réalise sa désire-la.”

Cinquante ans plitar, sa désire-la pankor réalisé. Le Monde, enn journal Français, ti imprime enn l’article lor bann problèmes ki éna dans 21^ème siècle. Li ti dire: “Li bien important pou crée enn système judiciaire, administratif ek constitutionnel, ki enn gouvernement international pou kapav servi pou intervenir rapidement n’importe ki côté dans le monde, si jamais éna enn massacre ethnique. Li important aussi ki dimoune accepté l’idée ki asterla, la Terre, li enn seul pays.” Mais kisannla, ou-soit ki kitsoz éna pouvoir ek capacité pou réalise sa projet-la ek donne nous l’assurance ki dans l’avenir, pou éna la paix lor la terre?

Eski la Solution, C’est Nations Unies?

Beaucoup dimoune finn faire confiance dans l’Organisation des Nations unies pou amène la paix lor la terre. Eski Nations unies c’est enn gouvernement ki pou kapav amène vrai la paix ek sécurité dans le monde? C’est vrai ki finn éna beaucoup discours politique bien convaincant ki finn donne dimoune l’espoir. Par exemple, dans so “Déclaration du Millénaire” en l’an 2000, l’Assemblée générale des Nations unies ti prend enn résolution ferme. Li ti déclaré: “Nous pou faire tout séki nous kapav pou ki dimoune arrête souffert à cause la guerre, soit la guerre civile, ou-soit la guerre entre plusieurs pays. La guerre finn touye plus ki 5 millions dimoune pendant dernier dix ans ki finn passé.” Bann déclaration coumsa finn faire Nations unies gagne l’admiration ek louange beaucoup dimoune à travers le monde, ek li finn mem gagne prix Nobel de la paix en 2001. Comité prix Nobel de Norvège ti honore Nation unies kan li’nn donne li sa prix-la, ek li ti dire “c’est seulement à travers Nations unies ki pou kapav réussi éna la paix ek coopération dans le monde.”

Malgré tout sa-la, eski l’organisation des Nations unies, ki finn crée en 1945, finn prouvé ki li enn gouvernement ki kapav amène enn la paix réelle ek durable dans le monde? Non, parski à cause l’intérêt personel ek l’ambitions nationaliste so bann pays-membres, éna plusieurs projets ki li pa finn réussi réalisé. D’après enn journaliste, dans lizié beaucoup dimoune, Nations unies “li zis là pou donne nous enn l’indication lor l’opinion générale bann dimoune à travers le monde,” ek “so programme rempli ar bann problèmes ki finn débatte pendant plusieurs l’années sans ki jamais finn trouve vrémem enn solution.” Séki nous encore pé demandé c’est: Eski vrémem enn jour, tous bann pays dans le monde pou uni?

La Bible dire ki sa l’unité-la pou réalisé bientôt. Mais couma sa pou arrivé? Ki gouvernement ki pou kapav faire sa? Nous invite ou pou lire prochain l’article kot ou pou gagne bann réponses.

[Zimage lor page 3]

Einstein ti soutenir l’idée ki bizin éna enn gouvernement mondial

[Credit line]

Einstein: U.S. National Archives photo