Kot Sa Nous Kapav Trouve le Bonheur?

ÉNA deux-trois l’années de cela, ti faire enn sondage en France, en Allemagne, en Grande-Bretagne ek aux États Unis ek ti demann bann dimoune: “Ki ou bizin pou trouve le bonheur?” Parmi bann dimoune ki ti interviewé, 89 % ti réponn: enn bon la-santé; 79 % : enn mariage heureux ou-soit vive heureux avec enn partenaire; 62 % : la joie pou élevé bann zenfants; ek 51 % dire ki c’est enn carrière réussi. Ek même si en général beaucoup dimoune pensé ki l’argent pa faire le bonheur, 47 % parmi bann ki ti interviewé, pense le contraire. Mais ki nous trouvé dans la réalité?

Premièrement, anou guetté ki lien éna soi-disant, entre l’argent ek le bonheur. Enn l’enquête lor cent dimoune ki pli riches en Amérique, inn montré ki zot pa pli heureux ki bann dimoune en général. En plus, pendant trente dernier l’années, beaucoup Américains inn presque doublé zot biens materiels, mais d’après bann psychiatres, zot pa pli heureux ki avant. En fait, enn rapport dire ki “pendant sa même période-la, quantité dimoune ki gagne dépression, inn augmenté; éna trois fois plus suicide parmi bann adolescents; ek nombre divorce inn doublé.” Dans apépré 50 pays différents, bann dimoune ki’nn étudié lien ki éna entre l’argent ek le bonheur, inn arrive à la conclusion ki pa kapav acheté le bonheur avec l’argent.

Deuxièmement, eski vrai-même enn bon la-santé, enn mariage heureux, ek enn carrière réussi, zot important pou trouve le bonheur? Si sa bann facteurs-la zot ti vrai-même indispensable pou nous heureux, ki nous kapav dire lor bann millions dimoune ki péna enn bon la-santé, ek tou séki pa satisfait ar zot la-vie mariage? Ki nous kapav dire lor bann couples ki péna zenfants, ek tou sa bann zom ek femmes ki pa’nn réussi zot carrière-la? Eski tou sa bann dimoune-la inn condamné pou vive malheureux? Ek bann dimoune ki asterla en bonne santé ek ki satisfait ar zot mariage, eski bonheur ki zot supposé éna, pou disparaître, si jamais zot situation changé?

Eski Nous Pé Rod Kot Bizin?

Tou dimoune envie vive heureux. Sa pa étonne nous, parski la Bible décrire le Créateur couma “le Dieu heureux,” ek li dire ki dimoune finn crée dans ressemblance Bondié. (1 Timothée 1:11; Genèse 1:26, 27) Donc, li normal ki bann dimoune rod le bonheur. Mais beaucoup pensé ki kan zot inn trouve le bonheur, c’est coumadire zot pé attrape enn poignée du sable, parski toulé-deux glisse facilement dans la main.

Mais eski li possible ki certains pé faire trop grand zefforts pou trouve le bonheur? C’est seki Eric Hoffer, enn philosophe, ti pensé. Li ti dire: “Kan dimoune rod le bonheur, c’est enn parmi bann raison principal ki faire zot malheureux.” Sa li vrai si nous pé rod le bonheur kot pa bizin. Dans sa cas-la, nous kapav sûr ki nous pou déçu ek nous pou agacé. Si nous faire tout pou vinn riche, pou gagne la gloire ou-soit popularité, si nous rod faire enn carrière dans la politique, dans domaine social ou-soit vive zis pou faire nous-même plaisir, ek gagne dé-suite tou seki nous envie, tousala pa pou faire nous trouve le bonheur. Nous comprend kifer certain finn éna même l’attitude contradictoire ki enn écrivain, ki ti dire: “Si seulement nous ti arrête faire zefforts pou rod le bonheur, nous ti pou kapav vive plus heureux”!

Li intéressant noté ki d’après sondage ki’nn mentionné au commencement sa l’article-la, 4 dimoune lor 10 pensé ki nous kapav trouve le bonheur kan nous faire du bien ek aide lézot. Ek 1 dimoune lor 4 dire avec conviction ki la foi ek bann croyances religieux, joué enn grand rôle pou vive heureux. Donc, li clair ki nous bizin ré-considère séki rann enn dimoune vrai-même heureux. L’article suivant pou aide nous pou faire sa.

[Zimage, page 3]

Beaucoup dimoune pensé ki l’argent, enn la-vie famille heureux, ou-soit enn carrière réussi, c’est sa ki faire le bonheur. Eski ou d’accord?