“Mette lor Zot, l’Équipement Complet ki Bondié Donné”

“Mette lor zot, l’équipement complet ki Bondié donné, pou zot kapav tini ferme kont séki le Diable manigancé.”—ÉPHÉSIENS 6:11.

1, 2. Décrire, dans ou propre mots, l’équipement spirituel ki bann Chrétiens bizin mette lor zot.

DANS premier siècle N.L., Rome ti arrive au sommet de so pouvoir. Grâce à la force so bann légions, li ti éna enn bel l’emprise lor le monde sa l’époque-la. Enn historien ti décrire l’armée Romain couma “l’organisation militaire le plus efficace de l’histoire.” Dans l’armée professionel de Rome, ti éna bann soldats bien discipliné ki ti’nn suive enn training bien dur. Mais si éna enn kitsoz ki ti contribué beaucoup à zot succès, c’est zot l’équipement la-guerre. C’est ar sa l’équipement la-même ki l’apôtre Paul ti faire référence kan li ti décrire l’équipement spirituel ki bann Chrétiens bizin, pou zot réussi combatte kont le Diable.

² Dans Éphésiens 6:14-17, Paul décrire sa l’équipement spirituel-la: “Tini ferme . . . Serre zot lé-reins avec la vérité, mette zot cuirasse de la justice, mette dans zot li-pieds l’équipement de la bonne nouvelle de la paix. Surtout, prend grand bouclier de la foi; avec sa, zot pou kapav teingne tou bann projectiles enflammé du méchant. Accepté aussi le casque du salut, ek l’épée de l’esprit, c’est-à-dire parole Bondié.” Enn l’équipement coumsa, littéralement ti assure enn soldat Romain enn grand protection. Soldat-la ti manié aussi enn l’épée; sa-même ti so zarme principal pou affronte enn l’autre combattant face à face.

3. Kifer nous bizin obéir bann instructions Jésus Christ ek suive so l’exemple?

³ À part l’équipement ek training, succès l’armée Romain ti dépann lor l’obéissance bann soldats à zot commandant. Pareillement, bann Chrétiens bizin obéir Jésus Christ; la Bible décrire li couma “commandant bann communautés national.” (Isaïe 55:4) Li également le “chef de la congrégation.” (Éphésiens 5:23) Jésus donne nous bann instructions lor nou la-guerre spirituel et li donne nous enn l’exemple parfait lor façon ki nous bizin mette nou l’équipement spirituel lor nous. (1 Pierre 2:21) Étant donné ki éna beaucoup points commun entre personnalité Christ ek nou l’équipement spirituel, la Bible conseille nous pou ‘équipe’ nous avec façon pensé Christ. (1 Pierre 4:1) Asterla, laisse nous analyse chaque pièce nou l’équipement spirituel, et pendant ki nous faire sa, nous pou considère l’exemple Jésus pou montré l’importance ek l’éfficacité sa l’équipement spirituel-la.

Nous Bizin Protège Nou lé-Reins, Nou l’Estomac, ek Nou li-Pieds

4. Ki rôle enn ceinture ti joué dans l’équipement enn soldat, et ki sa aprann nous?

⁴ Serre nou lé-reins avec la vérité. Dans le temps Biblique, bann soldats ti porte enn ceinture en cuir, ki ti entre 5-15 centimètres largeur. Certains traducteurs pensé ki sa verset-la ti bizin plutôt lire coumsa: “avec la vérité couma enn ceinture ki’nn serre zot lé-reins.” Sa ceinture-la ti protège lé-reins enn soldat, et li ti enn bon support pou tini so l’épée. Kan enn soldat ti serre so lé-reins, sa veut dire ki li ti prêt pou la bataille. Paul finn prend l’exemple ceinture enn soldat pou montré à ki point la vérité Biblique bizin influence nou la-vie. Oui, li bizin serre nous pareil couma sa ceinture-la. Coumsa, nous pou kapav vive en harmonie avec la vérité ek défann li n’importe kan. (Psaume 43:3; 1 Pierre 3:15) Mais pou arrivé faire sa, nous bizin étudié la Bible sérieusement et médite lor-la. Pou Jésus, la loi Bondié ti ‘dans fond so léker.’ (Psaume 40:8) C’est pou sa ki kan so bann adversaires ti questionne li, li ti kapav cite les Écritures de mémoire pou réponn zot.—Matthieu 19:3-6; 22:23-32.

5. Expliqué couma bann conseils la Bible kapav aide nous faire face ar bann l’épreuves ou-soit tentations.

⁵ Kan nous laisse la vérité Biblique guide nous, li kapav protège nous kont bann fausse raisonnements ek li kapav aide nous pou prend bann bon décisions. Face ar tentation ou-soit l’épreuve, bann conseils la Bible pou renforci nou détermination pou faire séki bon. C’est coumadire nous pé trouve nou Grand Instructeur, Jéhovah, et nous pé tann enn la-voix derrière nous ki dire: “Ala chemin-la. Marche ladan.”—Isaïe 30:20, 21.

6. Kifer nou léker symbolique bizin protection, ek couma eski la justice kapav aide nous pou protège li?

⁶ Cuirasse de la justice. Cuirasse enn soldat protège enn organe bien important: so léker. Nou léker symbolique—séki nous été intérieurement—demann enn protection spécial parski li éna touletan tendance pou faire séki mauvais. (Genèse 8:21) Donc, nous bizin aprann konn bann principes juste de Jéhovah ek content sa bann principes-la. (Psaume 119:97, 105) Nou l’amour pou la justice pou faire nous rejette manière pensé sa lé-monde-la ki méprise bann instructions clair de Jéhovah. En plus, kan nous content séki juste ek nous haïr séki mauvais, nous pa pou amène enn la-vie ki kapav ruine nous. (Psaume 119:99-101; Amos 5:15) Jésus finn laisse enn bon l’exemple dans sa domaine-la. Concernant li, la Bible dire: “To finn content la justice, et to finn haïr désobéissance la loi.”—Hébreux 1:9.a

7. Kifer enn soldat Romain ti bizin enn bon soulier, ek ki sa démontré?

⁷ Mette dans zot li-pieds l’équipement de la bonne nouvelle de la paix. Bann soldats Romain ti bizin mette bann souliers ki pa use vite ou-soit bann sandalettes ki bien solide. Parski, dans enn campagne de guerre, souvent zot ti marche 30 kilomètres par jour et zot l’équipement ek zarmes ti pèse environ 27 kilos. Si Paul pé faire référence ar souliers bann soldats, c’est pou montré ki nous bizin prêt pou prêche le message du Royaume avec tou séki disposé pou écouté. Sa li important parski sinon, couma eski bann dimoune pou konn Jéhovah si nous pa prêt ek disposé pou prêché?—Romains 10:13-15.

8. Couma eski nous kapav imite l’exemple Jésus en tant ki prédicateur de la bonne nouvelle?

⁸ Ki activité ti pli important dans la vie Jésus? Li ti dire Gouverneur Romain Ponce Pilate: ‘Mo finn vinn dans le monde pou donne témoignage lor la vérité.’ Jésus ti prêche avec n’importe ki dimoune ki ti disposé pou écouté. Li ti tellement content so ministère ki li ti faire sa passe avant so bann besoins physique. (Jean 4:5-34; 18:37) Si, pareil couma Jésus, nous prend plaisir pou prêche la bonne nouvelle, nous pou trouve beaucoup l’occasions pou partage sa avec lézot. Et en plus, kan nous bien occupé dans nou ministère, sa aide nous pou reste fort lor plan spirituel. —Actes 18:5.

Bouclier, Casque, ek l’Épée

9. Ki protection enn grand bouclier ti assure enn soldat Romain?

⁹ Grand bouclier de la foi. Le mot Grec ki’nn traduire par “grand bouclier” veut dire enn bouclier assez grand pou couver presque le corps enn soldat en entier. Sa ti pou protège li kont bann “projectiles enflammé” ki mentionné dans Éphésiens 6:16. Dans le temps Biblique, bann soldats ti servi bann roseaux, ki coumadire bann bâtons bamboo, ek dans zot boute ti éna enn réservoir métallique rempli ar enn liquide enflammé. Enn Bibliste décrire sa bann roseaux-la couma “enn parmi bann zarmes pli dangereux de l’époque.” Si enn soldat pa ti éna enn assez grand bouclier pou protège li kont sa bann projectiles-la, li ti kapav bien blessé ou-soit même perdi la vie.

10, 11. (a) Ki “projectiles enflammé” Satan servi pou affaibli nou la-foi? (b) Couma eski l’exemple Jésus montré l’importance pou éna la foi dans bann l’épreuves?

¹⁰ Ki bann “projectiles enflammé” Satan servi pou affaibli nou la-foi? Li kapav provoque persécution ou-soit l’opposition dans la famille, dans travail, ou-bien dans l’école. Désir matérialiste ek immoral finn faire certains beaucoup du tort lor plan spirituel. Pou protège nous-même kont sa bann dangers-la, nous bizin “surtout prend grand bouclier de la foi.” Nous développe la foi à mesure ki nous aprann konn Jéhovah, nous koz ar Li régulièrement dans la prière, ek nous médite lor façon ki Li béni nous ek protège nous.—Josué 23:14; Luc 17:5; Romains 10:17.

¹¹ Kan Jésus ti lor la terre, li ti montré l’importance pou éna enn la-foi solide dans bann l’épreuves. Li ti éna enn confiance total dans bann décisions so Papa, et li ti prend plaisir pou faire so volonté. (Matthieu 26:42, 53, 54; Jean 6:38) Même kan li ti ressenti enn grand l’angoisse dans jardin Gethsémané, Jésus ti dire so Papa: “Non pa couma moi mo envie, mais couma toi to envie.” (Matthieu 26:39) Jésus ti touletan comprend l’importance pou garde so l’intégrité ek pou faire so Papa plaisir. (Proverbes 27:11) Si nous éna enn tel confiance en Jéhovah, nous pa pou permette bann critiques ou-soit l’opposition affaibli nou la-foi. Au contraire, si nous compte lor Jéhovah, si nous exprime nou l’amour pou Li, ek si nous garde so bann commandements, nou la-foi pou vinn pli solide. (Psaume 19:7-11; 1 Jean 5:3) Okenn bienfait matériel ni okenn plaisir sensuel ki passagère, pa kapav égale bann bénédictions ki Jéhovah finn réservé pou bann ki content Li.—Proverbes 10:22.

12. Ki partie important nou lé-corps nou casque symbolique protégé, et kifer sa protection-la li capital?

¹² Casque du salut. Enn casque ti protège la tête enn soldat ek surtout so cerveau, le siège de so l’intelligence. Nou l’espérance, en tant ki Chrétien, li couma enn casque parski li protège nou l’esprit. (1 Thessaloniciens 5:8) Malgré ki nous finn transforme nou l’esprit grâce à la connaissance exacte ki éna dans Parole Bondié, nous encore toujours faible ek imparfait. Nous l’esprit kapav facilement gâté. Bann l’objectifs ki sa lé-monde-la encouragé, kapav détourne nou pensées ou-soit remplace l’espérance ki Bondié finn donne nous. (Romains 7:18; 12:2) Le Diable ti offert Jésus “tou bann royaumes du monde ek zot la-gloire” dans l’intention pou détourne li, mais li pa ti réussi. (Matthieu 4:8) Jésus ti refuse so offre catégoriquement, et plitar Paul ti ajouté concernant Jésus: “Pou la joie ki ti placé devant li [Jésus], li finn endure enn poteau de supplice, li finn méprise la honte, et li finn assize à la droite trône Bondié.”—Hébreux 12:2.

13. Couma eski nous kapav préserve nou confiance dans l’espérance ki’nn placé devant nous?

¹³ Jésus pa finn acquérir automatiquement confiance ki li ti éna en Jéhovah. Donc si, au lieu ki nou garde nou l’espérance clair dans nou l’esprit, nous rempli nou bann pensées avec bann rêves ek bann objectifs sa système-la, eh bien nous pou perdi la foi dans bann promesses Bondié. Avec le temps, nous kapav même perdi nou l’espérance complètement. Par contre, si nous médite régulièrement lor bann promesses Bondié, nous pou contigne réjouir nou dans l’espérance ki’nn placé devant nous.—Romains 12:12.

14, 15. (a) Décrire nou l’épée symbolique. Couma nous kapav servi li? (b) Montré, à travers enn l’exemple, couma l’épée de l’esprit kapav aide nous pou résisté kont tentation.

¹⁴ L’épée de l’esprit. Parole Bondié, c’est-à-dire message ki éna dans la Bible, li couma enn l’épée puissant ki coupe deux côtés. Li kapav coupe tou bann faussetés religieux ek aide bann dimoune sincère pou gagne la liberté spirituel. (Jean 8:32; Hébreux 4:12) Sa l’épée spirituel-la kapav aussi défann nous kan nous subir bann tentations ou-soit kan bann apostats rode mine nou la-foi. (2 Corinthiens 10:4, 5) Combien nous reconnaissant ki ‘toute Écriture li inspiré par Bondié et li équipe nous couma bizin pou tou bon travail’!—2 Timothée 3:16, 17.

¹⁵ Kan li ti tenté par Satan dans désert, Jésus ti servi l’épée de l’esprit efficacement pou repousse bann fausse raisonnements ek bann tentations rusé de Satan. Chaque fois ki Satan ti tente li, Jésus ti réponn: “Finn écrire.” (Matthieu 4:1-11) David, enn Témoin de Jéhovah en Espagne, finn trouvé li aussi, couma la Bible aide li pou résisté kont tentation. Kan li ti éna 19 ans, enn joli jeune fille ki ti travaille dans même compagnie de nettoyage ki li, ti propose li pou “passe enn lé-temps ensemble.” David ti rejette so bann avances, et li ti demann so supervisor si kapav transfère li dans enn l’autre département pou ki sa situation-la pé reproduire. David raconté: “Mo ti rappelle l’exemple Joseph. Li ti rejette l’immoralité ek dé-suite li ti sauvé, li ti allé. C’est séki mo’nn faire moi aussi.”—Genèse 39:10-12.

16. Expliqué kifer nous bizin enn formation pou nous kapav ‘bien manié la parole la vérité.’

¹⁶ Jésus ti servi aussi l’épée de l’esprit pou libère lézot de l’emprise de Satan. Jésus ti dire: “Séki mo enseigné pa sorti ar moi, mais sorti ar celui ki’nn envoye moi.” (Jean 7:16) Pou imite l’enseignement efficace de Jésus, nous bizin gagne enn formation. Concernant bann soldats Romain, historien Juif, Josèphe ti écrire: “Chaque soldat ti faire l’exercice physique toulé-jours, et zot ti faire sa avec sérieux. Zot ti agir comme-ci ti éna la guerre; c’est pou sa ki zot ti supporte la fatigue pli facilement.” Dans nou la-guerre spirituel, nous bizin servi la Bible. Et en plus, nous bizin ‘faire tou nou possible pou présente nous-même couma bann dimoune approuvé devant Bondié, ki péna nanyin pou honté et ki manié bien la parole la vérité.’ (2 Timothée 2:15) Eski nous pa ressenti enn satisfaction personnel kan nous servi la Bible pou réponn question enn dimoune interessé?

Prié Dans Tou Circonstances

17, 18. (a) Couma eski la prière aide nous pou résisté kont Satan? (b) Cite en l’exemple pou montré valeur la prière.

¹⁷ Après ki Paul inn décrire bann différent pièces nou l’équipement spirituel, li donne enn l’autre bon conseil. Pou résisté kont Satan, bann Chrétiens bizin profite privilège pou faire “toutes sortes la-prières ek supplications.” Ki quantité fois nous bizin prié? Paul finn écrire: “Prié dans tou circonstances, en esprit.” (Éphésiens 6:18) Face ar tentations, l’épreuves ek découragement, la prière kapav fortifié nous beaucoup. (Matthieu 26:41) Jésus “ti offert bann supplications ek bann requêtes à Celui ki ti kapav sauve li de la mort, avec cris puissant ek larmes, et Bondié finn écoute so la-prière parski li ti éna la crainte pou Li.”—Hébreux 5:7.

¹⁸ Sa faire plus ki 15 ans ki Milagros pé occupe so mari ki éna enn maladie chronique. Li raconté: “Kan mo découragé, mo tourne vers Jéhovah dans la prière. Péna personne ki kapav aide moi couma Li. C’est vrai ki li arrivé défois, mo senti ki mo népli kapav contigné. Mais chaque fois ki mo fini prié Jéhovah, mo senti mo la-force renouvelé et mo senti moi pli bien.”

19, 20. Ki nous bizin pou remporte nou combat kont Satan?

¹⁹ Le Diable koné ki so lé-temps compté, et li pé intensifié so bann zefforts pou vaincre nous. (Révélation 12:12, 17) Nous bizin résisté kont sa l’ennemi puissant-la et “combatte sa joli combat pou nou la-foi”-la. (1 Timothée 6:12) Pou sa, nous bizin la puissance ki supérieur à la normal. (2 Corinthiens 4:7) Nous bizin aussi l’aide l’esprit saint Bondié; c’est pou sa donc, ki nous bizin prié pou gagne sa. Jésus ti dire: “Si zot, bien ki zot méchant, zot konn donne zot zenfants séki bon, combien plus le Père ki dans le ciel pou donne l’esprit saint à tou séki demann Li!”—Luc 11:13.

²⁰ Oui, li bien important ki nous mette, l’équipement complet ki Jéhovah donné. Sa veut dire ki nous bizin développe bann qualités ki faire Bondié plaisir, couma la foi ek la justice. Nous bizin content la vérité à tel point ki comme-ci nous finn serre-nous ar sa. Nous bizin aussi prêt pou saisi tou l’occasion pou prêche la bonne nouvelle, ek garde nous l’espérance clairement dans nou l’esprit. Nous bizin aprann manié bien l’épée de l’esprit. Si nous mette lor nous l’équipement complet ki Bondié donne nous, nous kapav remporte nous combat kont bann mauvais l’esprit ek glorifié le nom saint de Jéhovah.—Romains 8:37-39.

[Note]

Ki Ou Pou Réponn?

• Kisannla donne nous meilleur l’exemple lor manière ki nous bizin porte nou l’équipement spirituel, et kifer nous bizin suive so l’exemple de près?

• Couma eski nous kapav protège nou l’esprit ek nou léker symbolique?

• Couma eski nous kapav bien manié l’épée de l’esprit?

• Kifer nous bizin prié dans tou circonstance?

[Zimage, page 19]

Si nous étudié la Bible sérieusement, sa kapav motive nous pou saisi tou l’occasion pou prêche la bonne nouvelle

[Zimage, page 20]

Nou l’espérance sûr aide nous pou affronte bann l’épreuves

[, page 21]

Eski ou servi “l’épée de l’esprit” dans la prédication?