Dans Nou l’Époque, Kisannla Vrai-même Qualifié pou Dirigé?

En 1940, bann dirigeants dans Parlement Britannique ti trouve zot dans enn situation critique. David Lloyd George, ki ti éna 77 ans, ti pé écoute sa débat-la. Li ti’nn faire la Grande Bretagne remporte la victoire dans Première Guerre Mondiale, ek so l’expérience dans politique ti permette li évalué avec discernement travail bann haut responsables dans gouvernement. Dans enn discours ki li ti prononcé dans la Chambre des ­communes le 8 Mai, li ti dire: “La nation paré pou faire tou ­sacrifices ki bizin tant ki zot éna enn dirigeant, tant ki Gouvernement montré clairement ki zot bann objectifs ek tant ki la nation confiant ki bann ki pé dirigé, zot pé faire tout séki zot kapav.”

PAROLES Lloyd George montré clairement ki bann dimoune atann ki zot bann dirigeants montré zot compétent ek faire bann zefforts sincère pou essaye améliore la vie bann dimoune. Enn agent ki travail pou élection dire sa coumsa: “Kan bann dimoune vote pou enn président, zot pé vote pou enn kikenn avec ki zot pé confié zot la-vie, zot l’avenir, zot zenfants.” Li enn travail monstre pou enn dimoune montré li à la hauteur enn confiance coumsa. Kifer?

Nou lé-monde rempli avec problèmes ki parette impossible pou résoudre. Par exemple, ki dirigeant inn montré li tellement sage ek puissant ki li kapav faire crime ek la guerre disparaite? Kisannla zordi, parmi bann dirigeants éna capacité ek compassion ki bizin pou donne mangé, de l’eau propre ek soin médical à chaque humain? Kisannla ki koné couma pou protège l’environnement ek pou rétabli séki’nn fini gâté, ek éna détermination pou faire sa? Kisannla ki assez capable ek assez puissant pou assuré ki tou dimoune gagne enn long la-vie heureux?

Bann Humains Pa Kapav Faire Sa Travail-⁠La

Li vrai ki certains dirigeants finn réussi dans enn certaine mesure. Mais seulement, zot au pouvoir pou au maximum dé-trois dizaines l’années​​—⁠ek kisannla ki pou dirigé après? Le Roi Salomon ki ti vive dans ancien Israël ti enn de bann dirigeants pli capable ki’nn jamais existé. Li ti réfléchi lor sa question-la, ek à la fin, li ti dire: “Moi, mo’nn haïr tou mo travail dur ki mo ti pé faire enba soleil [ek] ki mo pou laisse pou dimoune ki pou vinn après moi. Ek kisannla ki koné si li pou sage ou-soit bête? Pourtant li pou prend contrôle lor tou mo travail dur ki moi mo’nn faire zefforts pou faire avec sagesse enba soleil. Sa aussi dans vide.”​​—⁠Ecclésiaste 2:​18, 19.

Salomon pa ti koné si sa dimoune ki ti pou vinn après li-la ti pou contigne so travail ou-soit ti pou craze partout. Pou Salomon, chaque fois ki remplace bann ancien dirigeants par bann nouveau, c’est enn kitsoz “dans vide.” Lézot versions la-Bible servi l’expression “la fumée,” ou-soit “en vain.” Enn version dire: “Sa péna okenn sens.”

Parfois, servi violence pou amène enn changement dirigeants par force. Éna bann dirigeants capable ki’nn mort assassiné alors ki zot ti pé faire zot travail. Enn fois, Abraham Lincoln, enn président États-Unis ki bien respecté, ti dire bann ki ti pé écoute li: “Zot inn choisir moi pou rempli enn poste important pou enn tigit lé-temps, ek asterla pou zot, mo éna enn l’influence ki pa pou tardé pou fini.” Effectivement li pa’nn reste président pou longtemps. Malgré tou séki li ti faire ek so désir pou faire plus pou bann dimoune, Président Lincoln inn dirige so pays pou quatre ans seulement. Dans commencement so deuxième mandat, enn dimoune ki ti envie change dirigeant, ti touye li.

Même bann meilleur dirigeants humain pa kapav garanti zot propre l’avenir. Alors eski ou kapav éna confiance ki zot pou garanti séki pou ou? La Bible dire: “Pa mette zot confiance dans bann dimoune important, ni dans bann dimoune [ordinaire], ki pa kapav delivré personne. So l’esprit sorti, li retourne dans so la-terre; sa jour-la même so bann pensées fini.”​​—⁠Psaume 146:​3, 4.

Li peut-être difficile pou accepté sa conseil-la, pou pa mette nou confiance dans bann dirigeants humains. Mais seulement, la Bible pa dire ki l’humanité jamais pa pou éna enn bon dirigeant stable. Isaïe 32:⁠1 dire: “Guetté! Enn lé-roi pou régné pou la justice.” Jéhovah, Créateur bann humains, inn prépare “enn lé-roi,” enn Dirigeant, ki bientôt pou prend contrôle tou kitsoz lor la terre. Kisannla sa? Prophétie la-Bible identifié li.

Enn Ki Vrai-Même Qualifié pou Dirigé

Éna deux mille ans, enn ange ti dire enn jeune femme Juif ki ti appelle Marie: “To pou tombe enceinte ek to pou donne naissance enn garçon, ek fodé to appelle li Jésus. Li pou vinn enn kikenn ki grand ek pou appelle li garçon Très-Haut; ek Jéhovah pou donne li trône David, so papa, ek li pou dirigé couma lé-roi lor bann descendants Jacob pou toujours, ek so royaume pa pou fini jamais.” (Luc 1:​31-​33) Oui, Jésus de Nazareth, li lé-Roi ki prophétie la-Bible identifié.

Bann zimages ek sculptures religieux souvent montré Jésus soit couma enn ti-baba, soit couma enn dimoune faible ki manque mangé, ou-soit couma enn dimoune ki pé faire pénitence ek ki accepté tou séki faire li. Sa bann zimages-la pa faire nous gagne confiance en li en tant ki Dirigeant. Mais vrai Jésus Christ ki la Bible décrire, ti vinn enn homme dynamique, fort, zélé ek ki pa ti peur pou entreprend kitsoz. Ek li ti possède bann lézot qualités ki ti qualifié li pou dirigé. (Luc 2:​52) Asterla anou guette dé-trois aspects so personnalité remarquable.

Jésus ti garde enn l’intégrité parfait. So conduite ti tellement droite et honnête ki publiquement li ti mette so bann l’ennemis au défi pou présente enn accusation valable contre li. Zot pa ti réussi. (Jean 8:​46) So bann l’enseignements droite ti convaincre bann dimoune sincère pou vinn so disciples.​​—⁠Jean 7:​46; 8:​28-​30; 12:⁠19.

Jésus ti complètement voué avec Bondié. Li ti tellement déterminé pou fini travail ki Bondié ti’nn donne li, ki okenn opposant, humain ou-soit démon, pa ti kapav faire li reculé. Bann attaques violent pa ti faire li peur. (Luc 4:​28-​30) La fatigue ek la faim pa ti décourage li. (Jean 4:​5-​16, 31-​34) Même si so bann camarades ti abandonne li, jamais li pa ti écarte li avec so l’objectif.​​—⁠Matthieu 26:​55, 56; Jean 18:​3-⁠9.

Jésus ti éna enn l’intérêt profond pou bann dimoune. Li ti donne bann ki ti affamé mangé. (Jean 6:​10, 11) Li ti donne réconfort bann déprimés. (Luc 7:​11-​15) Li ti faire bann dimoune retrouve clair ek ré-tendé ek li ti redonne bann malades zot la-santé. (Matthieu 12:​22; Luc 8:​43-​48; Jean 9:​1-⁠6) Li ti donne l’encouragement so bann apôtres ki ti travaille dur. (Jean chapitres 13-​17) Li ti montré ki li vrai-même “l’excellent berger” ki prend soin so bann brebis.​​—⁠Jean 10:​11-​14.

Jésus ti paré pou travaille. Li ti lave lipié so bann apôtres pou li donne zot enn leçon important. (Jean 13:​4-​15) Li-même so lipié ti sale kan li ti marche lor bann chemins rempli avec la poussière pou prêche la bonne nouvelle. (Luc 8:⁠1) Même kan li ti pé pense pou al reposé dans enn “l’endroit isolé,” li ti prend compte bann la-foules ki ti pé rode li pou li enseigne zot encore. (Marc 6:​30-​34) Par là, li’nn donne enn l’exemple pou tou bann Chrétiens concernant la persévérance dans travail.​​—⁠1 Jean 2:⁠6.

Jésus ti complète so mission ek ti quitte la terre. Pou récompense li pou so fidélité, Jéhovah inn donne li la royauté ek l’immortalité dans le ciel. La Bible dire concernant Jésus après so résurrection: “Aster ki li’nn relevé parmi bann morts, Christ népli pou mort encore, la mort népli éna pouvoir lor li.” (Romains 6:⁠9) Ou kapav sûr ki li-même meilleur Dirigeant possible pou l’humanité. Enn fois ki Jésus Christ prend plein contrôle lor la terre, pa pou bizin donne pouvoir enn l’autre dimoune, ni jamais change dirigeant. Personne pa pou tire li au pouvoir pendant so règne ek travail ki li’nn faire jamais pa pou détruire par enn dimoune ki pa qualifié. Mais ki li pou faire en particulier pou profit l’humanité?

Ki Sa Nouveau Dirigeant-La Pou Faire

Psaume 72 donne nous certains détails prophétique concernant couma sa lé-Roi parfait ek immortel-la pou dirigé. Dans versets 7 ek 8, nous lire: “Dans so l’époque, le juste pou germé, ek pou éna la paix en abondance ziska ki la lune népli existé. Ek Li pou éna sujets d’enn la-mer à enn l’autre ek depuis la Rivière ziska dans bann boute la terre.” Pendant so règne ki pou profitable, bann habitants la-terre pou gagne la sécurité éternelle. Li pou détruire tou bann zarmes ki existé ek li pou même tire dans léker bann dimoune sa désir pou faire la guerre-la. Bann ki zordi attaque zot camarades couma bann lions vorace ek ki agir couma bann l’ours agressif avec zot prochain, pou’nn change zot mentalité complètement. (Isaïe 11:​1-⁠9) Pou éna la paix en abondance.

Psaume 72 dire encore dans versets 12 à 14: “Li pou sape sa pauvre ki crié au secours-la, ek aussi sa dimoune ki dans grand chagrin-la, ek ninport kisannla ki péna personne pou aide li. Li pou éna pitié pou bann ti dimoune ek pou bann pauvres, ek Li pou sape nâmes bann pauvres. Li pou délivré zot nâmes ar violence ek ar bann ki pé faire dominère avec zot, ek zot di-sang pou éna valeur devant so lizié.” Bann ti dimoune, bann pauvres, ek bann ki dans grand chagrin pou forme partie dans enn famille humain heureux, uni enba direction lé-Roi Jésus Christ. Dans zot la-vie pou népli éna douleur ek désespoir, mais la joie.​​—⁠Isaïe 35:⁠10.

Verset 16 promette: “Pou éna la grain en abondance lor la terre; là-haut lor bann montagnes pou éna plus ki bizin.” Zordi éna par millions dimoune ki touletan konn la faim. Souvent à cause la politique ek bann dimoune ki gourmand tou kitsoz, péna enn distribution égal pou tou dimoune gagne assez mangé. Alors enn quantité dimoune, surtout bann zenfants mort sans mangé. Mais kan Jésus Christ pou dirigé, sa problème-la pou disparaite. La terre pou produire bann bon récoltes nourriture ki pou donne nous beaucoup plaisir. Tout dimoune pou bien nourri.

Eski ou ti pou content konn sa bann bienfaits ki enn bon gouvernement pou amené-la? Si oui, nous encourage ou pou renseigne ou lor sa dirigeant ki très bientôt pou gouverne la terre partout-la. Bann Témoins de Jéhovah pou content pou aide ou faire sa. Ou pa pou regretté, parski Jéhovah Li-même dire concernant so garçon: “Moi, mo’nn installe mo lé-roi lor Sion, mo montagne saint.”​​—⁠Psaume 2:​6.

[Encadré lor page 5]

ENN SEUL COUP ZOT INN PERDI ZOT POUVOIR

Normalement enn dirigeant kapav compte lor respect ek soutien so bann sujets, si li faire zot gagne la paix ek bann conditions la-vie stable dans enn mesure raisonnable. Seulement, si bann dimoune perdi confiance dans li pou certain raison, enn l’autre dimoune pou kapav bientôt remplace li au pouvoir. Pli bas nous cite dé-trois l’exemples bann situations ki, enn seul coup, inn oblige bann dirigeants puissant pou quitte le pouvoir.

Bann mauvais conditions la-vie. Vers la fin du 18^ème siècle, enn quantité citoyens Français ti obligé paye beaucoup taxes alors ki pa ti éna assez mangé. Sa bann conditions-la ti ­con­tribué pou amène la Révolution Française ek résultat: En 1793, ti décapite Lé-Roi Louis XVI.

La Guerre. Certains parmi bann l’empereurs pli puissant ki’nn existé finn perdi pouvoir avec la Première Guerre Mondiale. Par exemple, en 1917, dans Saint–Pétersbourg, en ­Russie, enn la-famine ki ti causé par la guerre, finn amène la Révolution de Février. Résultat: Tsar Nicolas II inn détrôné ek bann Communistes inn vinn au pouvoir. En Novembre 1918, l’Allemagne ti envie la paix, mais bann Alliés pa ti oulé arrête laguerre tant ki pa change dirigeant. Résultat: L’Empereur Allemand ­Guillaume II, ti obligé al en exil en Hollande.

L’envie pou éna différents systèmes gouvernement. En 1989, ti enlève le rideau de fer. Bann gouvernements ki ti solide couma roche ti vinn la poussière kan zot bann sujets ti rejette Communisme ek ti établi différent formes gouvernement.

[Zimage lor page 7]

Jésus ti nourri bann affamés, ti guéri bann malades ek ti donne enn bon l’exemple pou tou bann Chrétiens

[Credit Line page 4]

Lloyd George: Photo par Kurt Hutton/Picture Post/Getty Images