Parole Jéhovah vivant

ALORS ki zot pé campé dan bann la-plaine Moab en 1473 a.n.l., bann Israélite surement bien content kan zot tann sa bann parole-la: “Prepare bann provision pou zot-mem, parski dan trois jour zot pou traverse sa [la-riviere] Jourdain-la pou rentré, ek prend pays ki Jéhovah, zot Bondié pé donne zot, pou zot prend possession.” (Josué 1:11) Sa 40 an ki zot inn passé dan desert-la pé al fini.

Enn tipé plus ki 20 an plitar, Josué ki pé dirige zot, deboute au milieu la terre Canaan ek dire bann ancien dan Israël: “Guetté, mo’nn faire zot tire au sort pou mo donne couma enn l’heritage pou zot bann tribu, sa bann nation ki resté-la, ek aussi tou bann nation ki mo’nn detruire, depuis Jourdain ziska la Grande Mer, kot soleil couché. Ek c’est Jéhovah zot Bondié ki ti pé repousse bannla devant zot, ek ki’nn tire bannla dan pays a cause zot, ek zot inn prend pays, pareil couma Jéhovah to Bondié ti’nn promette toi.”—Josué 23:4, 5.

Livre Josué ti ecrire en 1450 a.n.l. par Josué, ek li raconte bann kitsoz bien interessant ki’nn deroulé pendant sa 22 an-la. Nou situation pareil couma situation bann Israélite ki ti’nn paré pou rente dan la Terre promise, parski nouveau lé-monde ki Jéhovah inn promette nou, li derriere la porte. Alors anou considere livre Josué avek enn grand l’interet.—Hébreux 4:12.

VERS “BANN LA-PLAINE DESERT JÉRICHO”

(Josué 1:1–5:15)

Josué gagne vrai-mem enn grand responsabilité kan Jéhovah dire li: “Mo serviteur Moïse inn mort, ek asterla levé, traverse [la riviere] Jourdain, toi ek tou sa peuple-la, [pou zot rente] dan pays ki mo pé donne zot, bann garson Israël”! (Josué 1:2) Josué bizin dirige enn nation plusieurs million dimoune ziska dan la Terre promise. Pou prepare terrain, li envoye deux espion dan Jéricho—la ville ki zot bizin prend en premier. Rahab, enn prostitué, reste là, ek li finn tann koz bann grand kitsoz ki Jéhovah inn faire pou So peuple. Li protege ek aide bann espion ek, en retour, bannla promette pou garde li en vie.

Letan bann espion retourné, Josué ek le peuple inn paré pou bougé ek pou traverse Jourdain. Mem si la riviere pé debordé, sa pa empeche zot traversé, parski Jéhovah faire de l’eau ki la-haut arreté ek forme enn la-digue, ek li laisse le reste de l’eau, desann ek devidé dan la mer Morte. Apré ki zot traverse la riviere Jourdain, bann Israélite dresse zot camp dan Guilgal, pré ar Jéricho. Quatre jour plitar, dan la soirée quatorzieme jour mois Abib, zot celebré Pâque dan la plaine desert Jéricho. (Josué 5:10) Lendemain, zot commence mange certain kitsoz ki zot recolté dan l’endroit, ek zot arrete gagne la manne. Dan sa period-la, Josué circonci tou bann male ki’nn né dan desert.

Reponse pou bann question biblik:

2:4, 5—Kifer Rahab embete bann zom ki le roi envoyé pou rod bann espion? Rahab riské so la-vie pou protege bann espion parski li’nn commence gagne la foi en Jéhovah. Alors, pena nanyin ki oblige li dire sa bann ki pé rod faire di-tort peuple Bondié-la, kot sa bann espion-la été. (Matthieu 7:6; 21:23-27; Jean 7:3-10) En realité, Rahab ti “consideré couma enn dimoune juste par bann action,” ek faire sa bann zom ki le roi envoyé-la al dan mauvais direction, forme partie dan sa bann action-la.—Jacques 2:24-26.

5:14, 15—Kisannla ki “prince l’armée Jéhovah”? Prince ki vinn fortifié Josué letan commence prend la Terre promise, li surement “la Parole”—Jésus Christ avant li vinn lor la terre. (Jean 1:1; Daniel 10:13) Sa fortifié nou vrai-mem kan nou ena l’assurance ki Jésus dan tou so la-gloire, li avek le peuple Bondié zordi dan zot la-guerre spirituel!

Bann leson pou nou:

1:7-9. Pou reussi dan seki nou envie faire lor plan spirituel, li bien important ki nou lire la Bible toulé-jour, ki nou medite regulierement lor seki li dire, ek ki nou mette en pratik seki nou aprann.

1:11. Josué demann le peuple pou prepare zot provision. Fodé pa zot zis croise lé-bras ek attann ki Jéhovah donne zot seki zot bizin. Jésus encourage nou pou pa prend tracas pou bann kitsoz ki nou bizin pou vive ek li promette ki ‘pou donne nou tou sa bann lezot kitsoz-la.’ Mais sa pa vedir ki nou pa bizin faire zeffort pou gagne seki nou bizin pou vive.—Matthieu 6:25, 33.

2:4-13. Apré ki li’nn tann koz bann grand action ki Jéhovah inn faire, ek li’nn realisé ki le temps critik, Rahab prend decision pou al dan coté bann adorateur Jéhovah. Si sa faire inpé lé-temps ki ou pé etudié la Bible ek ki ou reconette ki nou pé vive dan “bann dernier jour,” li surement important ki ou prend decision pou servi Bondié!—2 Timothée 3:1.

3:15. Kan li tann bon rapport bann espion ki ti’nn al Jéricho, Josué pa tardé pou agir; li pa attann ki de l’eau la riviere Jourdain baissé. Dan bann kitsoz ki nou faire pou vrai l’adoration, nou bizin agir avek courage au lieu ki nou renvoye pou plitar, kan situation kitfois parette pli favorable.

4:4-8, 20-24. Sa 12 roche ki tiré dan la riviere Jourdain-la bizin servi couma enn memorial pou Israël. Bann action ki Jéhovah faire zordi pou delivré so peuple dan la main zot bann l’ennemi, zot aussi servi couma enn memorial pou montré ki Li avek zot.

ZOT CONTIGNE GRANDI ZOT TERRITOIRE

(Josué 6:1–12:24)

La ville Jéricho “fermé partout . . . , personne pa rentré ni sorti.” (Josué 6:1) Couma pou kapav prend sa la-ville-la? Jéhovah dire Josué ki li bizin faire. Bientot bann muraille tombé ek la ville detruire. Zis Rahab ek so famille sauvé.

Prochain la ville ki bann Israélite bizin prend, c’est Aï, enn la-ville royal. Bann espion ki ti al la-bas raconté ki pena beaucoup dimoune ki reste dan sa la-ville-la, alors pa bizin envoye beaucoup soldat pou prend la ville-la. Pourtant, environ 3,000 soldat ki al attak sa la-ville-la, sauvé devant bann zom Aï. Kifer? Jéhovah pa avek bann Israélite. Akân, ki dan tribu Juda, commette enn peché kan zot attak Jéricho. Apré ki li reglé sa situation-la, Josué attak Aï. Le roi Aï impatient pou al laguerre kont bann Israélite parski li’nn gagne la victoire lor zot premier fois. Mais dan plan ki li faire, Josué profité ki bann zom Aï ena trop beaucoup confiance dan zot-mem, ek li reussi prend la ville.

Guibéôn li ‘enn grand la-ville—li pli grand ki Aï, ek tou so bann zom bien fort.’(Josué 10:2) Mais kan zot tendé ki Israël inn reussi gagne la victoire lor Jéricho ek Aï, bann zom Guibéôn faire enn trik pou ki Josué faire enn l’alliance la-paix avek zot. Parski bannla inn change coté, bann nation ki alentour trouve sa couma enn menace pou zot. Cinq lé-roi parmi zot marié piké ek attak Guibéôn. Israël sauve bann Guibéonite ek batte bann ki’nn attak zot. Enba direction Josué, zot reussi prend bann la-ville ki dan sud ek l’ouest, ek aussi zot batte bann lé-roi dan le nord ki’nn faire enn alliance entre zot. En tout, zot reussi batte 31 lé-roi dan l’ouest la riviere Jourdain.

Reponse pou bann question biblik:

10:13—Couma eski enn zaffaire extraordinaire coumsa kapav arrivé? “Eski ena enn kitsoz ki trop extraordinaire pou Jéhovah,” Li ki’nn crée le ciel ek la terre? (Genèse 18:14) Si Jéhovah envie, li kapav change mouvement la-terre pou ki soleil ek la lune kapav parette pa pé bougé kan guette zot a partir la terre. Ou-soit sans ki li change mouvement la-terre ek la-lune, li kapav detourne bann rayon soleil ek la lune dan enn fason ki zot la-lumiere contigne arrive ziska la terre. En tout cas, “jamais pa finn ena enn jour coumsa” dan l’histoire bann dimoune.—Josué 10:14.

10:13—Ki été livre Yashar? Sa livre-la mentionné encore dan 2 Samuel 1:18 kan pé koz poem ki appel “L’Arc”—enn chanté deuil pou le roi Israël Saül, ek so garson Yonathân. Sa ti surement enn livre chanté ek poem lor bann evenement historik en Israël ek li enn livre ki bann Juif ti surement bien koné.

Bann leson pou nou:

6:26; 9:22, 23. Malediction ki Josué ti prononcé kan Jéricho ti detruire, li realisé 500 an plitar. (1 Rois 16:34) Malediction Noé lor so ti-zenfant Canaan realisé kan bann Guibéonite vinn esclave. (Genèse 9:25, 26) Parole Jéhovah, li toujours realisé.

7:20-25. Certain kapav considere sa vol ki Akân ti commette-la couma enn ti offense nanyin ditou, zot kapav mem dire ki sa pa ti faire personne di-tort. Zot kapav pense pareil pou bann ti vol ek bann ti desobeissance ar la loi la-Bible. Seulement, nou bizin pareil couma Josué—nou bizin determiné pou resisté bann pression pou commette bann kitsoz illegal ek immoral.

9:15, 26, 27. Kan nou tombe d’accord pou faire enn kitsoz, nou bizin prend sa bien serieux ek garde nou parole.

JOSUÉ ACCOMPLI SO DERNIER MISSION

(Josué 13:1–24:33)

Asterla ki li’nn vinn vieux—li pré pou gagne 90 an—Josué commence divise pays entre bann tribu. Enn bien gros travail! Bann tribu Ruben ek Gad ek la moitié tribu Manassé inn deja fini gagne zot l’heritage dan l’est la riviere Jourdain. Asterla bann lezot tribu gagne zot l’heritage dan coté l’ouest par tirage au sort.

Tabernacle, li installé Shilo dan territoire Éphraïm. Caleb gagne la ville Hébrôn, ek Josué gagne Timnath-Sérah. Bann Lévite gagne 48 la-ville, parmi ena 6 la-ville refuge. Letan zot pé retourne dan zot l’heritage dan l’est Jourdain, bann soldat Ruben, Gad ek la moitié tribu Manassé monte enn l’autel ki “bien visible.” (Josué 22:10) Bann tribu dan l’ouest Jourdain trouve sa couma enn apostasie, ek enn la-guerre manké eclaté entre bann tribu, mais grace a enn bon communication, evité ki ena enn la-guerre ki verse di-sang.

Apré ki Josué inn reste pou enn tipé lé-temps Timnath-Sérah, li appel bann ancien, bann chef, bann juge, ek bann commandant en Israël, ek li encourage zot pou montré zot courageux ek pou reste fidel ar Jéhovah. Plitar, Josué rassemblé tou bann tribu Israël dan Shekèm. La li rappel zot bann kitsoz ki Jéhovah inn faire depuis lepok Abraham, ek encore enn fois, li encourage zot pou “ena la crainte pou Jéhovah ek servi Li avek fidelité ek verité.” Le peuple senti-zot alors poussé pou reponn: “C’est Jéhovah nou Bondié ki nou pou servi, ek nou pou ecoute seki Li dire nou!” (Josué 24:14, 15, 24) Apré sa, Josué mort, l’age 110 an.

Reponse pou bann question biblik:

13:1—Eski seki sa verset-la dire pa en contradiction avek seki Josué 11:23 dire? Non, parski bann Israélite inn prend la Terre promise dan deux l’etape: premierement par la guerre ki zot inn bizin faire pou gagne la victoire lor sa 31 lé-roi ki ti dan pays Canaan-la, ek deuxieme l’etape, zot inn prend tou pays-la par action bann tribu ek bann individu. (Josué 17:14-18; 18:3) Mem si bann Israélite pa ti pousse bann Cananéen net, bann ki ti reussi sapé pa ti enn vrai menace pou securité Israël. (Josué 16:10; 17:12) Josué 21:44 dire: “Jéhovah ti donne zot repos dan tou coté.”

24:2—Eski Térah, papa Abraham, ti adore bann idole? Térah pa ti enn adorateur Jéhovah avant. Kitfois li ti adore Sîn, bondié la-lune—enn bondié ki ti bien populaire dan Our. Dapré tradition Juif, Térah ti kitfois mem enn fabricant idole. Seulement, kan Abraham quitte Our pou obeir l’ordre Bondié, Térah al Harân avek li.—Genèse 11:31.

Bann leson pou nou:

14:10-13. Mem si li ena 85 an, Caleb offert so service pou tire bann habitant dan region Hébrôn. C’est bann Anaqim—bann zom ki enn grandeur exceptionnel, ki reste dan sa l’endroit-la. Avek l’aide Jéhovah, Caleb reussi, ek Hébrôn vinn enn la-ville refuge. (Josué 15:13-19; 21:11-13) L’exemple Caleb encourage nou pou pa peur pou accompli bann mission theocratik ki difficile.

22:9-12, 21-33. Nou bizin faire attention pou pa mal interprete bann mobile lezot.

‘Pena enn sel parole ki pa finn realisé’

Apré ki li’nn bien vive, Josué dire bann ki ena responsabilité en Israël: “Pena enn sel parole parmi tou bann bon parole ki Jéhovah zot Bondié finn dire zot, ki pa finn realisé. Zot tou finn vinn vrai.” (Josué 23:14) Tou seki raconté dan livre Josué montré sa bien!

“Tou bann kitsoz finn ecrire pou nou instruction, pou ki par nou l’endurance ek par consolation ki bann Écritures donné, nou kapav garde l’espoir.” (Romains 15:4) Nou kapav sur ki nou confiance dan bann promesse Bondié pa mal placé. Pena enn promesse ki pa pou realisé, zot tou pou vinn vrai.

[Zimage, page 30]

Eski ou koné kifer Rahab, ki ti enn prostitué, ti consideré couma enn dimoune juste?

[Zimage, page 32]

Kan Akân ti kokin, sa pa ti enn ti offense—sa ti ena bann consequence grave

[Zimage, page 32]

“Par la foi, bann muraille Jéricho ti tombé.”—Hébreux 11:30