Jéhovah, Li-mem Nou Secours
“Mo secours vinn de Jéhovah, Celui ki’nn faire le ciel ek la terre.”—PSAUME 121:2.
1, 2. (a) Kifer nou tou nou bizin l’aide parfois? (b) Ki qualité secours nou kapav gagné ar Jéhovah?
KISANNLA parmi nou jamais pa bizin l’aide? En réalité, nou tou nou bizin l’aide parfois, soit pou faire face ar enn gros problème, soit pou endure la mort enn kikenn ki nou bien content, ou-soit pou supporte enn grand l’épreuve. Souvent kan bann dimoune bizin l’aide, zot tourne zot vers enn camarade ki pou aide zot dans zot problème. Kan nou partage nou la-peine avec enn camarade coumsa, li beaucoup pli facile pou supporte nou problème. Mais, l’aide ki enn dimoune kapav apporté, li bien limité. En plus, li pa touletan possible ki lézot aide nou kan nou dans problème.
2 Seulement, éna enn Kikenn ki kapav secours nou, ek ki possède enn grand pouvoir ek bann capacités sans limites. En plus, li donne nou l’assurance ki jamais li pa pou abandonne nou. Enn psalmiste ti faire nou koné Kisannla-sa, kan li ti dire avec confiance: “Mo secours vinn de Jéhovah.” (Psaume 121:2) Kifer psalmiste-la ti sûr ki Jéhovah pou secours li? Anou examine Psaume 121 pou réponn sa question-la. Sa pou permette nou trouvé kifer nou aussi nou kapav compte lor Jéhovah pou secours nou.
Enn Secours Sûr
3. Vers ki montagnes kitfois le psalmiste ti lève so lizié, ek kifer?
3 D’abord, psalmiste-la ti montré ki étant donné ki Jéhovah Li-mem le Créateur, nou kapav faire Li confiance. Li ti dire: “Mo pou lève mo lizié vers bann montagnes. Kot-sa mo secours pou sorti? Mo secours vinn de Jéhovah, Celui ki’nn faire le ciel ek la terre.” (Psaume 121:1, 2) Sa psalmiste-la pa ti lève so lizié vers n’importe ki montagne. Kan li ti écrire sa bann paroles-la, temple Jéhovah ti trouve à Jérusalem. Sa la-ville-la ti dans hauteur, lor bann montagnes Juda ek li ti représente place kot Jéhovah resté. (Psaume 135:21) Kitfois psalmiste-la ti lève so lizié vers bann montagnes Jérusalem kot temple Jéhovah ti été, et avec confiance li ti compte lor Jéhovah pou secours li. Kifer sa psalmiste-la ti sûr ki Jéhovah kapav aide li? Parski Li-mem “ki’nn faire le ciel ek la terre.” En réalité, psalmiste-la ti pé dire: ‘Péna nanyin ki kapav empêche le Créateur Tout-Puissant pou aide moi!’—Isaïe 40:26.
4. Couma enn psalmiste ti montré ki Jéhovah prend bien compte besoins so bann serviteurs, ek kifer sa pensée-la rassure nou?
4 Ensuite psalmiste-la ti expliqué ki Jéhovah touletan prend compte séki so bann serviteurs bizin, li ti dire: “Li impossible ki Li laisse toi tombé. Celui ki pé veille lor toi, pa kapav assoupi. Guetté! Li pa pou assoupi, ni Li pou al dormi, Celui ki pé veille lor Israël.” (Psaume 121:3, 4) Li impossible ki Bondié permette bann dimoune ki faire Li confiance “tombé” c’est-à-dire, tombé spirituellement dans enn façon ki zot pa pou kapav relevé. (Proverbes 24:16) Kifer? Parski Jéhovah pareil couma enn berger ki bien éveillé, ki pé veille so bann moutons. Eski sa pensée-la pa rassure nou? Oui! Pa mem pou enn ti-moment, Jéhovah pou ferme so lizié devant besoins so bann serviteurs. Li veille lor zot la-nuit li-jour.
5. Kifer psalmiste dire ki Jéhovah dans “côté droite”?
5 Le psalmiste ti éna confiance ki Jéhovah protège fidèlement so bann serviteurs, c’est pou sa ki li ti écrire: “Jéhovah pé protège toi. Jéhovah, Li to l’ombrage dans to côté droite. Soleil pa pou trop fort pou toi, pendant li-jour, ni la lune, à-soir.” (Psaume 121:5, 6) En Proche-Orient, enn voyageur ki ti pé marche dans enn soleil difé, ti pou bien content gagne protection dans enn place kot éna l’ombrage. Jéhovah Li couma enn l’ombrage pou so bann serviteurs, Li protège zot contre bann malheurs ki kapav faire zot du mal pareil couma enn chaleur ki brûlé. Remarqué ki verset-la dire ki Jéhovah dans “côté droite.” Longtemps, kan enn soldat ti al la-guerre, so-la main droite pa ti protégé complètement par so bouclier, parski bouclier-la ti dans so la-main gauche. Mais, enn camarade fidèle ti kapav protège sa soldat-la kan li ti vinn dans so côté droite pou laguerre. Pareil couma sa camarade-la, Jéhovah aussi, avec fidélité, déboute à côté so bann serviteurs, toujours prêt pou secours zot.
6, 7. (a) Couma le psalmiste donne nou l’assurance ki Jéhovah jamais pa pou arrête secours so bann serviteurs? (b) Kifer nou kapav éna mem confiance ki le psalmiste?
6 Eski enn jour Jéhovah pou arrête secours so bann serviteurs? Non, jamais! Psalmiste-la ti conclure par sa bann paroles-la: “Jéhovah Li-mem pou protège toi contre tou malheur. Li pou veille lor to nâme. Jéhovah Li-mem pou protège toi kan to sorti ek kan to rentré, asterla ek pou touletan.” (Psaume 121:7, 8) Remarqué ki psalmiste-la arrête écrire dans le présent pou écrire dans le futur. Avant, dans verset 5 li ti dire: “Jéhovah pé protège toi.” Mais dans versets 7 ek 8, li ti écrire: “Jéhovah Li-mem pou protège toi.” Donc, bann vrai adorateurs gagne l’assurance ki dans l’avenir aussi, Jéhovah pou contigne aide zot. N’importe kot zot allé, n’importe ki malheur ki abatte lor zot, Jéhovah pou toujours là pou secours zot.—Proverbes 12:21.
7 Oui, celui ki’nn écrire Psaume 121 ti sûr ki le Créateur Tout-Puissant veille lor so bann serviteurs pareil couma enn bon berger bien attentionné, ek pareil couma enn gardien ki reste lor so garde. Pareil couma sa psalmiste-la, nou aussi nou kapav éna confiance en Jéhovah, parski Li pa changé. (Malaki 3:6) Eski sa veut-dire ki touletan Jéhovah pou protège nou physiquement? Non, mais tant ki nou compte lor Li pou gagne secours, Li pou protège nou contre tou kitsoz ki kapav faire nou du tort lor plan spirituel. Donc li normal ki nou pose nou sa question-la: ‘Couma eski Jéhovah secours nou?’ Anou examine quatre façons couma Li faire sa. Dans sa l’article-la, nou pou guetté couma Jéhovah ti aide so bann serviteurs dans le temps Biblique. Dans l’article suivant, nou pou examiné couma Li aide so bann serviteurs zordi.
Secours Bann Anges
8. Kifer li pa étonnant ki bann anges bien intéressé ar bien-être bann serviteurs Jéhovah ki lor la terre?
8 Jéhovah éna anges par millions enba so direction. (Daniel 7:9, 10) Sa bann créatures spirituel-la faire so volonté avec fidélité. (Psaume 103:20) Zot bien koné ki Jéhovah éna enn grand l’amour pou bann dimoune ki servi Li ek ki Li envie aide zot. Li pa étonnant ki bann anges bien intéressé ar bien-être bann serviteurs Bondié ki lor la terre. (Luc 15:10) Donc, sûrement ki bann anges bizin content ki Jéhovah servi zot pou aide bann dimoune. Dans ki façons Jéhovah ti servi bann anges pou secours so bann serviteurs dans le passé?
9. Donne enn l’exemple couma bann anges inn gagne pouvoir ar Jéhovah pou protège bann dimoune fidèle.
9 Bann anges inn gagne pouvoir ar Jéhovah pou protège ek pou délivré bann dimoune fidèle. Deux anges ti aide Lot ek so bann tifi pou sauvé kan ti éna destruction Sodome et Gomorrhe. (Genèse 19:1, 15-17) Enn seul ange ti détruire 185,000 soldats Assyriens ki ti menace Jérusalem. (2 Rois 19:35) Kan ti jette Daniel dans la fosse aux lions, Jéhovah “ti envoye so ange ek ti ferme la gueule bann lions.” (Daniel 6:21, 22) Enn ange ti délivré l’apôtre Pierre dans prison. (Actes 12:6-11) La Bible mentionne plusieurs lézot l’exemples kot bann anges inn protège bann serviteurs Jéhovah. Sa confirme séki Psaume 34:7 dire: “Ange Jéhovah pé campe autour bann ki éna la crainte pou Li, ek Li délivré zot.”
10. Couma Jéhovah ti servi enn ange pou encourage prophète Daniel?
10 Dans certains cas, Jéhovah ti servi bann anges pou encourage ek pou fortifié bann dimoune fidèle. Nou éna enn l’exemple bien touchant dans Daniel chapitre 10. Sa l’époque-la, kitfois Daniel ti près pou gagne 100 ans. Prophète-la ti bien découragé, sûrement parski Jérusalem ti en ruine, ek reconstruction temple ti pé tardé. Li ti aussi bien tracassé après ki li finn gagne enn vision ki faire peur. (Daniel 10:2, 3, 8) Avec amour, Bondié ti envoye enn ange pou encourage li. Plusieurs fois, ange-la ti rappelle Daniel ki li enn kikenn ki “bien désirable” dans lizié Bondié. Résultat? Prophète âgé-la ti dire avec sa ange-la: “To’nn fortifié moi.”—Daniel 10:11, 19.
11. Cite enn l’exemple couma Jéhovah ti servi bann anges pou dirige l’activité prédication la bonne nouvelle.
11 Jéhovah ti servi aussi bann anges pou dirige l’activité prédication la bonne nouvelle. Enn ange ti dirige Philippe pou al prêche lor Christ avec enn eunuque Éthiopien, ki après ti prend baptême. (Actes 8:26, 27, 36, 38) Enn tipé après, Jéhovah ti envie ki prêche la bonne nouvelle ar bann non-Juifs ki pa ti circonci. Dans enn vision, enn ange ti apparette ar Corneille, enn non-Juif ki ti éna la crainte pou Bondié, ek ti dire li al faire cherche l’apôtre Pierre. Kan bann messagers Corneille ti trouve Pierre, zot ti dire li: “Corneille . . . inn gagne bann instructions Bondié par enn ange pou faire toi vinn dans so lakaz ek pou tann séki to éna pou dire.” Pierre ti allé, ek lerla, bann premiers non-Juif ki pa ti circonci, ti commence faire partie dans congrégation Chrétienne. (Actes 10:22, 44-48) Maziné couma ou ti pou senti-ou si ou ti koné ki enn ange inn aide ou pou joinde enn dimoune ki so léker bien disposé!
L’Aide à Travers l’Esprit Saint
12, 13. (a) Kifer bann zapôtres Jésus ti éna bann bon raisons pou pensé ki l’esprit saint ti pou kapav aide zot? (b) Dans ki façon l’esprit saint ti donne pouvoir bann premier Chrétiens?
12 Zis avant li mort, Jésus ti rassure so bann disciples ki zot pa pou reste sans l’aide. So Papa ti pou donne zot enn “assistant, c’est-à-dire l’esprit saint.” (Jean 14:26) Bann zapôtres ti éna bann bons raisons pou pensé ki l’esprit saint ti pou kapav aide zot. Après tou, bann Écritures inspiré rempli ar bann l’exemples lor façon ki Jéhovah inn servi l’esprit saint, la force ki pli fort dans l’univers, pou aide so bann serviteurs.
13 Dans beaucoup situations, Jéhovah inn servi l’esprit saint pou donne bann dimoune pouvoir pou zot faire so volonté. L’esprit saint ti donne bann Juges pouvoir pou délivré nation Israël. (Juges 3:9, 10; 6:34) Sa mem l’esprit-la ti donne bann premier Chrétiens la force pou contigne prêche avec zèle malgré tou sorte l’opposition. (Actes 1:8; 4:31) Succès ki zot ti gagné dans zot ministère ti enn preuve ki l’esprit saint ti pé agir. Sinon, couma nou ti pou kapav expliqué ki bann dimoune “sans instructions ek ordinaire” ti kapav prêche la bonne nouvelle lor Royaume Bondié partout dans bann pays ki ti’nn fini découvert sa l’époque-la?—Actes 4:13; Colossiens 1:23.
14. Couma eski Jéhovah ti servi so l’esprit-saint pou éclaire so bann serviteurs?
14 Jéhovah ti aussi servi so l’esprit saint pou éclaire so bann serviteurs. Avec l’aide l’esprit Bondié, Joseph ti kapav interprète bann rêves prophétique Pharaon. (Genèse 41:16, 38, 39) Par so l’esprit saint, Jéhovah ti révèle so bann projets ar bann dimoune humble, mais Li ti cachiette sa ar bann ki orgueilleux. (Matthieu 11:25) Donc, concernant bann kitsoz ki Jéhovah préparé “pou bann ki content Li,” l’apôtre Paul ti dire: “C’est ar nou ki Bondié finn révèle sa bann kitsoz-la grâce à so l’esprit.” (1 Corinthiens 2:7-10) Oui, c’est seulement avec l’aide l’esprit saint ki enn dimoune ti pou kapav comprend vrai-mem volonté Jéhovah.
L’Aide à Travers Parole Bondié
15, 16. Ki Jéhovah ti dire Josué li ti bizin faire pou agir avec sagesse?
15 Parole ki Jéhovah inn inspiré, li “utile pou enseigné,” ek li permette bann serviteurs Bondié pou “bien qualifié, bien équipé pou tou bon travail.” (2 Timothée 3:16, 17) Éna plusieurs l’exemples dans la Bible ki montré couma certaine parties Parole Bondié ki ti’nn fini écrire, ti aide bann serviteurs Bondié dans le passé.
16 Parole Bondié ti enn guide sûr pou bann vrai adorateurs Bondié. Kan Josué ti gagne responsabilité pou guide nation Israël, Jéhovah ti dire li: ‘Fodé pa ki sa livre la-loi-la reste loin ar to la-bouche; to bizin lire li doucement la-nuit, li-jour, pou ki to kapav veille bien pou faire tou séki finn écrire ladan, parski lerla to pou réussi dans séki to faire ek to pou agir avec sagesse.’ Remarqué ki Bondié pa ti promette Josué ki Li pou gagne la sagesse par miracle. Plûtot, si Josué ti lire ek médite lor “sa livre la-loi-la,” lerla li ti pou agir avec sagesse.—Josué 1:8; Psaume 1:1-3.
17. Couma eski certain parties Parole Bondié ki ti disponible dans l’époque Daniel ek Yoshiya, ti aide zot?
17 Parole Bondié ti aussi enn l’aide pou faire konn volonté Bondié ek so projet. Par exemple, grâce à séki Jérémie ti écrire, Daniel ti kapav discerné combien lé-temps Jérusalem ti pou reste désert. (Jérémie 25:11; Daniel 9:2) Noté aussi séki ti arrivé pendant règne Yoshiya, le Roi Juda. Sa l’époque-la, la nation ti’nn éloigné avec Jéhovah ek apparemment bann lé-rois ti’nn néglige pou faire enn copie personnel la-Loi Bondié ek pou suive séki éna ladan. (Deutéronome 17:18-20) Mais kan ti pé répare le temple, ti’nn retrouve “livre la loi-la mem,” ki peut-être ti’nn écrire par Moïse. Li possible ki c’est texte original ki zot ti découvert, ek sa ti’nn écrire apépré 800 ans avant. Kan Yoshiya ti écoute séki ti’nn écrire ladan, li ti réalisé ki quantité la nation ti’nn al kont volonté Jéhovah. Lerla, li ti prend bann dispositions bien ferme pou faire séki ti’nn écrire dans sa livre-la. (2 Rois 22:8; 23:1-7) Eski sa pa montré nou ki dans le passé, bann serviteurs Bondié ti gagne l’aide à travers bann parties Parole Bondié ki ti disponible?
L’Aide à Travers Nou Bann Frères ek Soeurs
18. Kan enn vrai adorateur pé aide so compagnon, kifer nou kapav dire ki c’est Jéhovah ki la source sa l’aide-la?
18 Souvent Jéhovah aide nou à travers nou bann frères ek soeurs. Oui, n’importe kan enn vrai adorateur aide so compagnon, en réalité c’est Jéhovah ki fourni sa l’aide-la. Kifer nou dire sa? Pou deux raisons. Premièrement, l’esprit saint impliqué ladan. Sa l’esprit-la permette bann ki laisse zot influencé par li, produire enn fruit, ki englobe l’amour ek la bonté. (Galates 5:22, 23) Donc, kan enn serviteur Bondié senti-li poussé pou aide so compagnon, sa montré ki l’esprit-saint Jéhovah pé agir. Deuxièment, nou finn crée à l’image Bondié.(Genèse 1:26) Sa veut-dire ki nou éna capacité pou reflète so bann qualités, couma la bonté ek la compassion. Alors, n’importe kan enn serviteur Jéhovah aide enn l’autre, en réalité c’est Celui ki sa dimoune-la pé imité, ki vrai-mem pé donne sa l’aide-la.
19. D’après la Bible, couma Jéhovah ti donne so l’aide so peuple à travers zot bann compagnons?
19 Dans l’époque Biblique, couma Jéhovah ti donne so l’aide so peuple à travers zot bann compagnons? Souvent, Jéhovah ti pousse enn parmi so bann serviteurs pou conseil enn l’autre, pareil couma kan Jérémie ti donne Barouk bann conseils ki ti sauve so la-vie. (Jérémie 45:1-5) Parfois, bann vrai adorateurs ti senti-zot poussé pou aide matériellement zot bann compagnons. C’est séki ti arrivé kan bann Chrétiens en Macédoine ek Achaïe ti manifesté enn grand désir pou secours zot bann frères ki ti dans le besoin à Jérusalem. L’apôtre Paul ti remarqué ki sa qualité générosité-la ti produire “enn remerciement pou Bondié.”—2 Corinthiens 9:11.
20, 21. Dans ki circonstances Paul ti encouragé par bann frères Rome?
20 Éna surtout bann récits bien touchant ki montré nou couma bann serviteurs Jéhovah inn faire zefforts pou fortifié ek encourage sakenn so camarade. Anou prend par exemple séki ti arrive l’apôtre Paul. Kan li ti en route pou al Rome couma enn prisonnier, li ti voyage lor enn grand la-route ki bann Romains ti construire, ki ti appelle la voie Appienne. Dernier partie sa voyage-la ti bien difficile, parski bann voyageurs ti bizin traverse enn région bien plate kot éna enn quantité la-mare.a Bann frères dans congrégation Rome ti koné ki Paul ti pé vini. Ki zot ti pou faire? Eski zot ti pou atann bien au chaud, en ville dans zot lakaz, ziska ki Paul arrivé pou al accueillir li?
21 Luc, enn écrivain Biblique, ki ti accompagne Paul pendant sa voyage-la, dire nou séki’nn arrivé: “À partir là-bas [Rome], kan bann frères inn gagne nouvelle ki nou pé vini, zot inn vinn joinde nou ziska Bazar Appius ek ziska Trois-Tavernes.” Eski ou kapav mazinn sa? Kan zot inn koné ki Paul ti pé vini, enn groupe frères ti sorti Rome pou al joinde li. Enn partie ti atann kot Bazar Appius, ki ti trouve 74 kilomètres ar Rome, ek ki ti enn centre bien réputé, kot bann voyageurs ti change zot cheval ek ti reposé. Lé-reste frères ti pé atann Trois-Tavernes, enn l’autre place ki ti trouve 58 kilomètres en dehors la ville, kot bann voyageurs ti arrêté pou reposé. Couma Paul ti réagir? Luc dire: ‘Kan Paul ti trouve zot, li ti remercié Bondié ek li’nn prend courage.’ (Actes 28:15) Oui, sa bann frères-la ti faire beaucoup zefforts pou faire sa longue voyage-la ek le simple fait ki Paul ti trouve zot, sa ti donne li courage ek la force! Kisannla Paul ti remercié pou sa soutien ki ti aide li-la? Li’nn remercié Celui ki ti derrière sa l’aide-la, c’est-à-dire Jéhovah.
22. Ki nou texte de l’année pou 2005, ek ki nou pou examiné dans prochain l’article?
22 Li clair ki façon ki Bondié inn agir, ki’nn rapporté dans la Bible, montré ki Jéhovah Li enn secours. Personne pa kapav secours nou couma Li. C’est pou sa raison-la ki texte de l’année bann Témoins de Jéhovah pou 2005, sorti dans Psaume 121:2: “Mo secours vinn de Jéhovah.” Mais couma eski Jéhovah secours nou zordi? C’est séki nou pou examiné dans prochain l’article.
[Note]
a Horace, enn poète Romain (65—8 A.N.L.), ki ti faire mem voyage, ti faire enn commentaire lor couma dernier partie sa voyage-la pa ti agréable ditou. Li ti décrire Bazar Appius couma enn place ki ti “rempli ar bann zom ki ti sarrié dimoune dans zot ti bateaux ek bann dimoune malhonnête ki ti propriétaire bann tavernes.” Li ti plaigné parski ti éna “bann crapauds ek bann moustiques insignifiant” ek enn de-l’eau “dégoûtant.”
Eski Ou Rappelle?
Dans ki façons eski Jéhovah ti secours so bann serviteurs—
• par bann anges?
• à travers l’esprit saint?
• à travers so Parole inspiré?
• à travers nou bann compagnons?
[L’encadré page 10]
Texte de l’année 2005 pou: “Mo secours vinn de Jéhovah.”—Psaume 121:2.
[Zimage, page 12]
Paul ti remercié Bondié pou l’aide ki li ti gagné avec bann frères à Rome