Formé pou Donne Témoignage à Fond
“Zot pou mo témoins dans Jérusalem, partout dans Judée ek dans Samarie, ek ziska dans région pli loin lor la terre.”—ACTES 1:8.
1, 2. Ki mission Pierre ti gagné, ek kisannla ti donne li sa mission-la?
“JÉSUS, ki ti né à Nazareth . . . finn donne nou l’ordre pou prêche ar bann dimoune ek pou donne témoignage à fond pou faire dimoune koné ki c’est Li-mem ki Bondié finn établi pou juge bann vivants ek bann morts.” (Actes 10:38, 42) C’est par sa bann paroles-la ki l’apôtre Pierre ti explique Corneille ek so famille, mission ki li ti gagné pou vinn enn évangélisateur.
2 Kan eski Jésus ti donne sa mission-la? Kitfois, Pierre ti pé pense séki Jésus ti dire après so résurrection, ek zis avant li monte dans le ciel. Dans sa l’occasion-la, Jésus ti dire so bann disciples fidèle: “Zot pou mo témoins dans Jérusalem, partout dans Judée ek dans Samarie, ek ziska dans région pli loin lor la terre.” (Actes 1:8) Mais, déjà depuis inpé lé-temps, Pierre ti koné ki en tant ki disciple Jésus, li ti pou bizin koz avec lézot lor la-foi ki li ti éna en Jésus.
Trois Ans Formation
3. Ki miracle Jésus ti faire, ek ki l’invitation li ti faire ar Pierre ek André?
3 Plusieurs mois après so baptême en l’an 29 N.L., Jésus ti prêche dans l’endroit kot Pierre et so frère André ti pé travail. Zot ti bann pécheurs lor la mer Galilée. Zot finn al la-pêche toute la nuit sans gagne okenn poisson. Pourtant Jésus ti dire zot: “Al kot de l’eau pli fond, ek jette zot filets pou la pêche.” Kan zot ti faire séki Jésus ti dire zot, ‘zot finn trappe enn quantité poissons. Oui, zot filets finn mem commence déchiré.’ Kan Pierre ti trouve sa miracle-la, li ti paralysé par la peur, mais Jésus ti rassure li, ek ti dire li: “Arrête gagne peur. À partir zordi, c’est bann dimoune ki to pou la-pêche.”—Luc 5:4-10.
4. (a) Couma Jésus ti prépare so bann disciples pou donne témoignage? (b) Ki comparaison nou kapav faire entre témoignage ki Jésus ti donné ek témoignage ki so bann disciples ti pou donné?
4 Dé-suite, Pierre ek André, ek aussi Jacques ek Jean, bann garçons Zébédée, ti quitte zot bateaux ek ti suive Jésus. Pendant presque trois ans, zot ti accompagne Jésus dans so tournée prédication ek li ti forme zot pou vinn bann évangélisateurs. (Matthieu 10:7; Marc 1:16, 18, 20, 38; Luc 4:43; 10:9) À la fin sa période-la, le 14 Nisan l’an 33 N.L., Jésus ti dire zot: “Celui ki éna la foi en moi, li aussi pou faire travail ki mo pé faire; ek li pou faire bann travail pli grand encore.” (Jean 14:12) Bann disciples Jésus ti pou donne témoignage à fond pareil couma Jésus, mais zot ti pou faire sa dans plus l’endroit et pendant pli longtemps ki li. Oui, couma bientôt zot ti pou aprann, zot ek tou dimoune ki pou vinn disciples après ti pou donne témoignage “tou bann nations,” ziska “la fin sa système-la.”—Matthieu 28:19, 20.
5. Dans ki façons nou kapav profite formation ki Jésus ti donne so bann disciples?
5 Nou pé vive “la fin sa système-la.” (Matthieu 24:3) Zordi, nou péna mem privilège ki bann disciples dans premier siècle ki ti accompagne Jésus ek ti observe li prêche avec bann dimoune. Mais, kan nou lire la Bible, nou kapav profit formation ki li ti donné. Nou kapav aprann couma li ti prêché ek ki l’instructions li ti donne so bann disciples. (Luc 10:1-11) Mais, dans sa l’article-la, nou pou examine enn l’autre kitsoz bien important ki Jésus ti montré so bann disciples—l’importance pou éna enn bon l’attitude envers travail prédication.
Montré l’Intérêt pou Bann Dimoune
6, 7. Ki qualité Jésus ti éna ki ti faire li efficace dans so ministère, ek couma nou kapav imite li dans sa domaine-la?
6 Kifer Jésus ti kapav donne enn témoignage aussi efficace? Enn raison c’est parski li ti bien intéressé ar bann dimoune ek li ti prend zot bien compte. Enn psalmiste ti prédire ki Jésus pou “éna pitié pou bann ti-dimoune ek pou bann pauvres.” (Psaume 72:13) Li finn vrai-mem réalise sa prophétie-la. La Bible raconte séki ti arrivé enn jour: “Kan li ti trouve la foule, li ti éna pitié pou zot, parski zot ti maltraité ek bien désespéré pareil couma bann moutons ki péna berger.” (Matthieu 9:36) Mem bann ki ti faire bann grand péchés, ti senti ki Jésus intéressé ar zot, ek zot ti attiré vers li.—Matthieu 9:9-13; Luc 7:36-38; 19:1-10.
7 Zordi, nou aussi nou pou gagne bann bon résultats si nou montré mem l’intérêt pou bann dimoune. Avant ou al prêché, kifer ou pa prend enn ti létan pou réfléchi ki quantité bann dimoune bizin sa message ki ou pé apporté-la? Pense bann problèmes ki zot kapav éna ki zis le Royaume pou réglé. Faire en sorte ki ou éna enn l’attitude positif envers tou dimoune, parski ou pa koné kisannla ki pou intéressé ar ou message. Li possible ki prochain dimoune ki ou joinde, finn prié pou ki enn kikenn couma ou vinn aide li!
Poussé par l’Amour
8. Pareil couma Jésus, ki pousse so bann disciples pou prêche la bonne nouvelle?
8 La bonne nouvelle ki Jésus ti prêché ti concerne l’accomplissement volonté Jéhovah, sanctification So nom, ek justification So souveraineté—c’est bann questions pli important ki kapav existé devant l’humanité. (Matthieu 6:9, 10) C’est parski Jésus ti content so Papa ki li ti poussé pou garde so l’intégrité ziska la fin, ek pou donne enn témoignage à fond lor Royaume ki pou réglé sa bann questions-la. (Jean 14:31) Zordi, bann disciples Jésus aussi éna mem motivation ek c’est pou sa ki zot accomplir zot ministère avec zèle. L’apôtre Jean ti dire: ‘Voilà séki l’amour pou Bondié veut-dire, ki nou obéir so bann commandements,’ sa comprend aussi commandement pou prêche la bonne nouvelle ek pou faire bann disciples.—1 Jean 5:3; Matthieu 28:19, 20.
9, 10. À part l’amour pou Bondié, ki l’autre l’amour pousse nou pou donne témoignage à fond?
9 Jésus ti dire so bann disciples: “Si zot content moi, zot pou obéir mo bann commandements. Celui ki éna mo bann commandements ek ki obéir zot, c’est li-mem ki content moi.” (Jean 14:15, 21) Donc, l’amour pou Jésus bizin pousse nou pou donne témoignage lor la vérité ek pou obéir bann lézot kitsoz ki Jésus inn commandé. Enn fois, après so résurrection, kan Jésus ti apparette devant so bann disciples, li ti dire Pierre: “Nourri mo bann ti-moutons. . . . Prend soin mo bann ti-moutons. . . . Nourri mo bann ti-moutons.” Ki ti bizin pousse Pierre pou faire sa? Nou trouve la réponse dans question ki Jésus ti pose Pierre plusieurs fois. Li ti demann li: “Eski to content moi? . . . Eski to content moi? . . . Eski to éna l’affection pou moi?” Oui, l’amour ki Pierre ti éna pou Jésus, so l’affection pou li, ti pou pousse li pou donne enn témoignage à fond, pou rode bann “ti-moutons” Jésus, ek après, pou vinn enn berger spirituel pou zot.—Jean 21:15-17.
10 Zordi, nou pa konn Jésus personnellement couma Pierre. Mais, nou comprend bien séki Jésus inn faire pou nou. Nou léker touché par l’amour extraordinaire ki finn pousse li pou “goutte la mort pou tou dimoune.” (Hébreux 2:9; Jean 15:13) Nou partage mem sentiments ki Paul, kan li ti écrire: “L’amour ki Christ éna, oblige nou . . . Li finn mort pou tou, pou ki bann ki vive, népli vive pou zot-mem, mais pou [li].” (2 Corinthiens 5:14, 15) Nou montré ki nou bien apprécié l’amour ki Jésus éna pou nou, ek ki en retour nou content li nou aussi, si nou donne témoignage avec zèle ek à fond. (1 Jean 2:3-5) Jamais nou pou envie éna enn l’attitude indifférent envers nou travail prédication, coumadire sacrifice Jésus péna enn grand valeur pou nou.—Hébreux 10:29.
Pa Laisse Nanyin Détourne Ou l’Attention
11, 12. Pou ki raison Jésus ti vinn dans le monde, ek couma li finn montré ki li ti considère sa travail-la couma pli important pou li?
11 Kan Jésus ti devant Ponce Pilate, li ti dire: “C’est pou sa ki mo finn né, ek c’est pou sa ki mo finn vinn dans le monde, pou donne témoignage lor la vérité.” (Jean 18:37) Jésus pa ti laisse nanyin détourne so l’attention pou donne témoignage lor la vérité. C’est sa ki Jéhovah ti envie li faire.
12 Satan pa ti manqué pou testé Jésus dans sa domaine-la. Zis après so baptême, Satan ti propose Jésus pou faire li vinn enn grand dimoune dans le monde, pou donne li “tou bann royaumes dans le monde ek zot la-gloire aussi.” (Matthieu 4:8, 9) Plitar, bann Juifs ti envie faire Jésus vinn enn lé-roi. (Jean 6:15) Peut-être zordi, certains kapav pensé ki si Jésus ti accepté sa bann l’offres-la, li ti pou enn lé-roi ki ti pou kapav faire beaucoup di-bien pou l’humanité. Mais Jésus li, li ti rejette sa qualité pensée-la. Li ti garde so l’esprit fixé pou donne témoignage lor la vérité.
13, 14. (a) Ki kitsoz pa ti réussi détourne Jésus ar travail ki li ti faire? (b) Mem si Jésus pa ti éna beaucoup lor plan matériel, ki li finn réussi faire?
13 En plus, Jésus pa ti laisse li détourné par la richesse. C’est à cause sa ki li pa ti enn dimoune riche. Li pa ti mem éna enn lakaz pou li. Enn fois li ti dire: “Bann renards éna l’endroits kot zot al dormi, ek bann zoiseaux éna zot nique, mais le Fils de l’homme péna okenn place pou pose so la-tête.” (Matthieu 8:20) D’après la Bible, kan Jésus ti mort, seul kitsoz de valeur ki li ti éna, c’est linge ki ti lor li, ek lor ki bann Romains ti faire enn tirage au sort. (Jean 19:23, 24) Mais eski sa veut-dire ki Jésus ti’nn rate so la-vie? Non, jamais!
14 Jésus ti faire beaucoup plus pou l’humanité ki n’importe ki dimoune ki pli riche ek généreux ki jamais finn existé. Paul ti dire: “Zot konn faveur immérité ki nou Seigneur Jésus Christ ti éna, ki mem si li ti riche, li ti vinn pauvre pou zot, pou ki zot vinn riche à travers so pauvreté.” (2 Corinthiens 8:9; Philippiens 2:5-8) Mem si Jésus pa ti éna beaucoup lor plan matériel, li ti donne bann dimoune humble, possibilité pou gagne la vie éternelle ek pou vinn parfait. Oui, nou bizin éna beaucoup reconnaissance envers li! Nou bien content ki li finn récompensé, parski li’nn garde so l’esprit fixé pou faire volonté so Papa!—Psaume 40:8; Actes 2:32, 33, 36.
15. Ki kitsoz ki pli important ki la richesse?
15 Zordi, bann Chrétiens ki faire zefforts pou imite Jésus, pa laisse l’envie pou vinn riche, détourne zot. (1 Timothée 6:9, 10) Zot reconnaite ki la richesse kapav permette enn dimoune pou vive bien, mais zot koné ki zot l’avenir éternelle pa dépann lor la. Kan enn Chrétien mort, tou so di-bien péna okenn valeur pou li, pareil couma linge Jésus, pa ti éna okenn valeur pou li kan li ti mort. (Ecclésiaste 2:10, 11, 17-19; 7:12) Kan enn Chrétien mort, seul kitsoz ki éna enn vrai valeur, c’est so relations avec Jéhovah ek Jésus Christ.—Matthieu 6:19-21; Luc 16:9.
Pa Découragé par l’Opposition
16. Couma Jésus ti faire face ar l’opposition?
16 Mem si Jésus ti gagne l’opposition, sa pa ti empêche li pou contigne donne témoignage lor la vérité. Li pa ti découragé, mem si li ti koné ki li ti pou bizin donne so la-vie en sacrifice à la fin so ministère. Paul ti dire lor Jésus: “À cause la joie ki ti placé devant li, li finn endure enn poteau de supplice, sans prend compte la honte, ek li finn assize à droite trône Bondié.” (Hébreux 12:2) Remarqué ki Jésus pa ti “prend compte la honte.” Li pa ti tracassé ki so bann adversaires ti pensé lor li. Li ti garde so l’attention fixé lor la volonté Bondié.
17. Ki leçon nou kapav tiré ar l’endurance Jésus?
17 Paul ti tire leçon lor l’endurance Jésus pou encourage bann Chrétiens. Li ti dire zot: “Réfléchi bien lor celui ki finn endure bann [mauvais kozé] de la part bann pécheurs, ki finn faire sa contre zot propre l’intérêt, pou ki zot pa fatigué ek zot pa renoncé.” (Hébreux 12:3) Li vrai ki, si toulé-jours nou bizin faire face ar l’opposition ou-soit bann moqueries, sa kapav fatigue nou beaucoup. Li kapav fatigant aussi, si nou bizin contigne résisté contre bann possibilités tentant ki sa lé-monde-la offer. Aussi, bann membres nou famille kapav critique nou parski zot, zot encourage nou pou faire enn grand carrière dans le monde. Seulement, couma Jésus, nou compte lor Jéhovah pou soutenir nou, alors ki nou mette le Royaume en premier dans nou la-vie.—Matthieu 6:33; Romains 15:13; 1 Corinthiens 2:4.
18. Ki bon leçon nou kapav tiré ar séki Jésus ti dire Pierre?
18 Jésus pa ti laisse-li détourné par nanyin, ek nou ti trouve sa kan li ti commence koz avec so bann disciples lor so la-mort ki ti pé kosté. Pierre ti encourage Jésus pou li “bon” avec li-mem, ek li ti mem rassure li ki li “pa pou konn sa sort-la.” Jésus pa ti ou’lé tann nanyin ki ti pou kapav affaibli so détermination pou faire volonté Jéhovah. Li ti tourne so lédo ar Pierre ek li ti dire li: “Passe derrière moi, Satan! To enn l’obstacle ki faire moi tombé, parski to pa péna pensées Bondié, mais pensées dimoune.” (Matthieu 16:21-23) Nou aussi pareil, anou déterminé pou rejette bann pensées humains. Mais au contraire, anou toujours laisse nou guidé par pensées Bondié.
Bann Bienfaits Réel
19. Mem si Jésus ti faire beaucoup miracles, ki partie so ministère ti pli important?
19 Jésus ti faire beaucoup miracles pou montré ki li-mem le Messie. Li ti mem ressuscite bann morts. Séki li ti faire ti attire la-foule, mais Jésus pa ti vinn lor la terre zis pou faire enn travail social. Li ti vini pou donne témoignage lor la vérité. Li ti koné ki n’importe ki bienfait matériel li ti apporté, sa ti pou enn tigit letan seulement. Mem bann dimoune ki li ti ressuscité, ti pou ré-mort après. Seulement kan li ti rann témoignage lor la vérité ki li ti pou kapav aide certains dimoune pou gagne la vie éternelle.—Luc 18:28-30.
20, 21. Couma bann vrai Chrétiens garde zot l’équilibre en rapport avec bann bon actions ki zot faire?
20 Zordi, certains dimoune pensé ki zot pé imite bann bon travail ki Jésus ti faire, kan zot construire bann l’hôpital ou-soit kan zot faire lézot travail social pou bann pauvres. Dans certain cas, sa coûte zot beaucoup l’argent ek zot mérite félicitations pou zot sincérité. Seulement, tou soulagement ki zot kapav apporté, li pa pou longtemps. Zis Royaume Bondié ki pou amène enn soulagement durable. C’est pou sa ki bann Témoins de Jéhovah, zot faire pareil couma Jésus ek zot concentré zot l’attention pou donne témoignage lor la vérité concernant Royaume Bondié.
21 Mais bien-sûr, bann vrai Chrétiens aussi aide zot prochains dans enn façon pratique. Paul ti écrire: “Donc, tant ki nou éna enn lé-temps favorable pou sa, anou faire le bien envers tou dimoune, mais surtout envers nou bann frères dans la foi.” (Galates 6:10) Kan éna enn catastrophe, ou-soit kan enn kikenn bizin l’aide, nou pa hésité pou “faire le bien” envers nou bann voisins ou-soit envers nou bann frères. Seulement, nou garde nou l’attention fixé lor séki pli important—donne témoignage lor la vérité.
Aprann par l’Exemple Jésus
22. Kifer bann Chrétiens prêche avec zot prochains?
22 Paul ti écrire: “Oui, malheur lor moi si mo pa annonce la bonne nouvelle!” (1 Corinthiens 9:16) Li ti prend la bonne nouvelle au sérieux, parski li ti koné ki la prédication ti représente la vie pou li-mem ek pou bann ki ti écoute li. (1 Timothée 4:16) Nou considère nou ministère pareil. Nou envie aide nou prochains. Nou envie montré nou l’amour pou Jéhovah. Nou envie prouvé ki nou éna l’amour pou Jésus ek montré ki nou apprécié so grand l’amour pou nou. Donc, nou prêche la bonne nouvelle ek nou “népli vive pou faire plaisir bann dimoune, mais pou faire volonté Bondié.”—1 Pierre 4:1, 2.
23, 24. (a) Ki leçon nou tiré ar miracle ki Jésus ti faire lor la pêche? (b) Kisannla zordi pé donne enn témoignage à fond?
23 Pareil couma Jésus, nou pa laisse nou détourné ar nou l’activité, kan dimoune sikann nou ou-soit kan zot rejette nou message avec colère. Nou tire enn leçon ar miracle ki Jésus ti faire kan li ti invite Pierre ek André pou suive li. Nou comprend ki si nou obéir Jésus, ek dans enn façon symbolique, nou jette nou filets dans de l’eau kot pa parette éna nanyin, nou la pêche pou kapav produire bann bon résultats. Beaucoup Chrétiens, finn gagne bann bon résultats après ki zot inn la-pêche pendant plusieurs l’années, dans de l’eau kot pa ti parette éna nanyin. Certains finn gagne possibilité pou al dans bann l’endroits pli productif ek zot finn faire enn bon la-pêche là-bas. N’importe ki nou faire, nou pa pou abandonne nou filets. Nou koné ki Jésus pankor mette fin ar travail prédication okenn part dans le monde.—Matthieu 24:14.
24 Zordi, plus ki six millions Témoins de Jéhovah, zot bien actif dans plus ki 230 pays. Dans La Tour de Garde 1er Février 2005, pou éna rapport mondial l’activité ki zot inn faire pendant l’année service 2004. Sa rapport-la pou montré ki quantité Jéhovah finn béni nou prédication. Pendant sa létan ki resté pou sa système-la, anou contigne prend à-coeur conseil l’apôtre Paul: “Prêche la parole, faire li sans tardé.” (2 Timothée 4:2) Anou contigne donne enn témoignage à fond ziska ki Jéhovah dire ki sa travail-la inn fini.
À partir sa l’année-la, Rapport Mondial bann Témoins de Jéhovah pou népli parette dans La Tour de Garde 1er Janvier. Mais li pou parette dans numéro 1er Février.
Eski Ou Kapav Réponn?
• Couma nou kapav profit formation ki Jésus ti donne so bann disciples?
• Ki l’attitude Jésus ti éna envers bann dimoune avec ki li ti prêché?
• Ki pousse nou pou donne enn témoignage à fond?
• Pareil couma Jésus, dans ki façons nou kapav garde nou l’attention fixé pou faire volonté Bondié?
[Zimage, page 25]
Raison principal kifer Jésus ti vinn lor la terre c’est pou donne témoignage lor la vérité
[Zimage, page 26]
Bann Témoins de Jéhovah concentré zot l’attention pou donne enn témoignage à fond