“Kan Nou Trouve enn Perle Ki Éna Beaucoup Valeur”

“Bann zom pé faire bann grand zeffort pou avance ver Royaume ki dan le ciel, ek bann ki pé faire zeffort pou avancé coumsa, zot pé reussi gagne li.”—MATTHIEU 11:12.

1, 2. (a) Lor ki qualité rare, Jésus ti attire l’attention dan enn parmi bann parabole ki koz lor Royaume? (b) Ki Jésus ti dir dan parabole enn perle ki éna beaucoup valeur?

ESKI éna enn kitsoz ki ou tellement content, ki ou pou disposé pou donne tou séki ou éna pou gagne sa? Mem si beaucoup dimoune dir ki zot kapav faire tou pou gagne bann kitsoz couma l’argent, la gloire, pouvoir ou enn position dan le monde, li bien rare ki enn dimoune trouve enn kitsoz ki li tellement envi, ki li disposé pou sacrifié tou séki li éna pou gagne sa. C’est lor sa qualité ki extraordinaire mais bien rare-la ki Jésus ti pé kozé dan enn so bann parabole lor Royaume Bondié ki faire dimoune reflechi.

² C’est zis ar so bann disciple ki Jésus ti dir sa parabole-la. Souvent appel sa parabole lor enn perle ki éna enn grand valeur. Guette séki Jésus ti dir: “Royaume ki dan le ciel pareil couma enn marchand ki voyagé, ek ki al rod bann joli perle. Kan li finn trouve enn perle ki ti éna beaucoup valeur, li finn allé, ek dé-suite li finn al vann tou séki li ti éna pou li acheté sa.” (Matthieu 13:36, 45, 46) Ki Jésus ti envi so bann disciple aprann dan sa parabole-la? Ki bienfait nou kapav gagné grace a bann parole Jésus?

Bann Perle Éna enn Grand Valeur

3. Kifer bann joli perle ti éna beaucoup valeur dan le passé?

³ Depuis longtemps, dimoune considere bann perle couma enn bijou ki éna enn grand valeur. Enn livre dir ki dapré enn ecrivain Romain ki ti appel Pline l’Ancien, bann perle ti éna “pli grand valeur ki tou kitsoz” ki ti existé. Bann perle zot pa couma l’or, l’argent ou-soit bann lezot pierre precieuse, parski c’est bann créature vivant ki produire bann perle. Beaucoup dimoune koné ki certain espèce zhuître kapav enveloppe bann kitsoz ki irrite zot, couma bann ti la-grain di-sable, ar enn matiere ki appel nacre, ek transforme zot en bann joli perle bien brillant. Dan le passé, ti tir bann pli joli perle surtout dan la Mer Rouge, dan Golfe Persique ek dan l’Océan Indien, bann l’endroit bien loin ar Israël. C’est surement a cause sa ki Jésus ti koz lor “enn marchand ki voyagé, ek ki ti al rod bann joli perle.” Oui, bizin faire beaucoup zeffort pou trouve bann vrai perle, ki éna beaucoup valeur.

4. Ki leson principal nou tiré dan parabole Jésus lor enn marchand ki ti voyagé?

⁴ Mem si depuis longtemps bann joli perle coute bien cher, mais leson principal dan sa parabole-la c’est pa lor prix bann perle. Dan sa parabole-la, Jésus pa ti zis compare Royaume Bondié ar enn perle ki ti éna enn grand valeur, li ti attire l’attention lor “enn marchand ki voyagé, ek ki ti al rod bann joli perle” ek ar reaction sa marchand-la kan li finn trouve enn. Enn marchand perle ki ti voyagé pa ti pareil couma enn commercant ordinaire. Li ti enn specialist dan sa domaine-la, li ti konn guette bien tou bann ti-detail ek trouve bann qualité necessaire ki rann enn perle extraordinaire. Kan li ti guette enn perle, li ti koné si li enn vrai, ek li pa ti laisse li embeté par bann perle ki pa ti éna valeur ou-soit ki ti fausse.

5, 6. (a) Ki kitsoz interessant nou remarké avek marchand dan parabole Jésus? (b) Dan parabole lor enn tresor ki finn cachiette, ki nou aprann lor sa marchand ki ti voyagé-la?

⁵ Éna enn lot kitsoz ki nou remarké ar sa marchand-la. Normalement, li possible ki enn marchand ordinaire ti pou calculé avant, ki valeur sa perle-la éna, pou li koné comié li pou acheté li, pou li kapav en retour faire enn profit kan li re-vann li. Li ti pou reflechi aussi si ti pou éna dimoune ki ti pou interessé pou acheté sa perle-la, pou li kapav vann li vite. Avrédir, li ti pou plus interessé pou vann perle-la pli vite possible pou gagne enn profit, ki pou garde li pou li-mem. Mais marchand dan parabole Jésus, pa ti reagir coumsa. Li pa ti interessé pou faire enn profit. En fait, li ti disposé pou sacrifié “tou séki li ti éna” kitfois tou so di-bien pou li kapav acheté séki li ti pé rodé.

⁶ Peut-etre pou beaucoup commercant, sa marchand dan parabole Jésus-la pa ti agir avek sagesse. Enn businessman ki malin pa ti pou prend enn risk coumsa. Mais marchand dan parabole Jésus ti éna bann lezot principe. Recompense ki li ti pou gagné, c’est pa enn profit financier, mais la joie ek satisfaction pou possede enn kitsoz ki éna enn grand valeur. Nou trouve sa l’idée-la dan enn lot parabole ki Jésus ti donné lor mem sujet. Li ti dir: “Royaume ki dan le ciel couma enn tresor ki finn cachiette dan enn karo, ki enn zom finn trouvé ek finn cachiette; ek dan so la-joie, li al vann tou séki li éna ek li acheté sa karo-la.” (Matthieu 13:44) Oui, la joie ki sa missié-la ti gagné kan li ti trouve sa tresor-la ek garde sa pou li, sa-mem ti assez pou pousse li pou sacrifié tou séki li ti éna. Eski zordi éna dimoune coumsa? Eski éna enn tresor ki vaut sa sacrifice-la?

Bann Ki Ti Konn Grand Valeur Royaume Bondié

7. Couma Jésus ti montré ki li ti bien konn grand valeur ki Royaume Bondié éna?

⁷ Kan Jésus ti dir sa parabole-la, li ti pé koz lor “royaume ki dan le ciel.” Li-mem li ti bien konn grand valeur ki Royaume Bondié éna, et nou trouve sa bien kan nou lire bann l’Évangile. Apré so bapteme en l’an 29 N.L., Jésus “ti commence preché ek li ti dir: ‘Repenti zot tou, parski royaume ki dan le ciel finn kosté.’ ” Pendant trois an et demi, li ti enseigne la foule lor Royaume. Li ti voyagé partout dan pays, “li ti al dan enn la-ville apré lot et dan enn village apré lot, pou preche la bonne nouvel lor Royaume Bondié.”—Matthieu 4:17; Luc 8:1.

8. Ki Jésus ti faire pou montré séki Royaume Bondié pou faire dan l’avenir?

⁸ Jésus ti faire beaucoup miracle partout dan pays. Li ti gueri bann malade, nourri bann dimoune ki ti faim, calmé bann tempete, li ti mem ressuscite bann dimoune mort. Jésus ti faire tou sa bann miracle-la, pou montré aussi séki Royaume Bondié pou faire dan l’avenir. (Matthieu 14:14-21; Marc 4:37-39; Luc 7:11-17) Finalement, kan Jésus ti donne so la-vie en sacrifice, li ti montré so fidelité enver Bondié ek enver So Royaume. Li ti mort couma enn martyr lor enn poteau. Pareil couma sa marchand ki ti voyagé-la ti disposé pou sacrifié tou séki li ti éna pou gagne enn “perle ki éna beaucoup valeur,” Jésus aussi ti vive ek ti mort pou Royaume Bondié.—Jean 18:37.

9. Ki qualité bien rare bann premier disciple Jésus ti manifesté?

⁹ Jésus pa ti zis mette le Royaume en premier dan so la-vie, mais li ti aussi rassemblé enn ti-group disciple. Zot aussi zot ti bien konn grand valeur ki Royaume Bondié éna. Parmi zot ti éna André, ki avant ti enn disciple Jean le Baptist. Kan li ti tann Jean dir ki Jésus li-mem “l’Agneau Bondié,” André ek enn lot disciple Jean Baptiste, ki ti appel Jean aussi, ek ki peut-etre ti enn parmi bann garson Zébédée, dé-suite ti attiré pou vinn ver Jésus, ek zot ti vinn bann croyant. Mais pa fini. Dé-suite, André ti al cherche so frere Simon ek ti dir li: “Nou finn trouve le Messie.” Enn tipé apré, Simon (ki plitar finn gagne nom Céphas, ou Pierre) ek aussi Philippe ek so camarade Nathanaël, ti reconette ki Jésus li-mem le Messie. En fait, Nathanaël ti poussé pou dir Jésus: “To-mem garson Bondié, to-mem lé-Roi Israël.”—Jean 1:35-49.

Poussé pou Agir

10. Couma bann disciple ti reagir kan Jésus ti vinn appel zot plusieurs mois apré zot premier rencontre?

¹⁰ Pareil couma sa marchand-la ti extra content kan li ti trouve enn perle ki éna beaucoup valeur, André, Pierre, Jean ek lezot disciple, zot aussi zot ti vrai-mem content kan zot ti’nn decouver le Messie. Ki zot ti faire apré? Bann Évangile pa dir séki zot ti faire zis apré ki zot ti joinde Jésus premier fois. Li possible ki la plupart finn retourne dan zot la-vie normal. Mais entre six mois ek enn an plitar, Jésus ti retourné pou vinn guette André, Pierre, Jean ek so frere, Jacques dan zot travail. Zot ti bann pêcheur lor la Mer Galilée,a ek kan Jésus ti trouve zot, li ti dir zot: “Suive moi ek mo pou faire zot la pêche bann dimoune.” Ki zot ti faire? L’Évangile Matthieu dir lor Pierre ek André: “Dé-suite zot ti laisse zot filet ek zot ti suive li.” Concernant Jacques ek Jean, nou lire: “Dé-suite, zot finn quitte zot bateau, ek aussi zot papa, ek zot finn suive li.” Dapré l’Évangile Luc, zot “finn abandonne tou séki zot ti éna ek zot finn suive li.”—Matthieu 4:18-22; Luc 5:1-11.

11. Pou ki raison surement bann disciple pa ti tardé pou agir kan Jésus ti vinn invite zot?

¹¹ Kan bann disciple ti accepté l’invitation Jésus, eski zot ti prend sa decision-la lor enn coup-de-tête, sans réfléchi? Jamais! Mem si zot ti retourne la pêche dan business zot famille apré, zot ti bien impressionné par séki zot finn trouvé ek séki zot finn tendé kan premier fois zot ti joinde Jésus. Preské enn an ti’nn passé, pendant sa period-la, zot ti gagne bien le temps pou reflechi lor tou sa bann evenement-la. Asterla, ti’nn arrive l’heure pou zot prend enn decision. Eski zot ti pou faire pareil couma sa marchand ki ti tellement touché kan li’nn trouve enn perle ki ti éna enn grand valeur-la, ki couma Jésus ti dir: “Li ti allé, ek dé-suite” li’nn al faire séki bizin pou acheté li? Oui. Zot leker ti touché par tou séki zot ti trouvé ek tou séki zot ti tendé. Zot ti koné ki le temps finn arrivé pou zot agir. Ek, couma la Bible dir nou, sans okenn hésitation, zot ti quitte tou pou vinn disciple Jésus.

12, 13. (a) Couma beaucoup dimoune ti reagir kan zot ti tann Jésus? (b) Ki Jésus ti dir lor so bann disciple fidel, ek ki nou comprend par sa?

¹² Oui, sa bann disciple fidel-la ti vrai-mem bien different ar lezot dimoune mentionné plitar dan bann Évangile! Ti éna beaucoup ki Jésus ti gueri ou-soit ti nourri, mais ki ti zis contigne vive zot la-vie pareil couma avant. (Luc 17:17, 18; Jean 6:26) Certain ti mem rod bann pretexte kan Jésus ti invite zot pou suive li. (Luc 9:59-62) Mais, concernant bann ki ti fidel, Jésus ti dir plitar: “Depuis lepok Jean Baptist ziska zordi, bann zom pé faire bann grand zeffort pou avance ver Royaume ki dan le ciel, ek bann ki pé faire zeffort pou avancé coumsa, zot pé reussi gagne li.”—Matthieu 11:12.

¹³ Ki sa vedir “avance ver” ek “avancé coumsa”? Enn dictionnaire (Vine’s Expository Dictionary of Old and New Testament Words), faire sa commentaire-la lor verbe Grec ki a l’origine sa deux expression-la, li dir: “Sa verbe-la faire comprend ki bizin faire bann grand zeffort.” Enn Biblist, Heinrich Meyer dir lor sa verset-la: “[Sa bann expression-la] decrire grand desir ki dimoune éna, bann grand zeffort ek la lutte ki zot faire pou gagne Royaume Messianik ki pé vini . . . Zot tellement envi gagne sa Royaume-la ki zot servi tou zot l’energie (zot nepli zis atann trankil).” Pareil couma sa marchand-la, sa bann disciple-la ti reconette bien vite séki ti éna vrai-mem valeur, ek zot ti accepté pou quitte tou séki zot ti éna pou le Royaume.—Matthieu 19:27, 28; Philippiens 3:8.

Lezot Vinn Rodé

14. Couma Jésus ti prepare so bann zapotre pou preche le Royaume ek ki resultat sa finn éna?

¹⁴ A mesure ki Jésus ti contigne preché, li ti forme lezot disciple ek li ti aide zot pou avance vers le Royaume. D’abord, li ti choisir 12, parmi so bann disciple, ki li ti appel bann zapotre ou-soit bann envoyé. Jésus ti donne zot bann instruction detaillé lor fason ki zot ti pou bizin faire travail predication. Li ti averti zot aussi lor bann defi ek bann difficulté ki ti pé atann zot devant. (Matthieu 10:1-42; Luc 6:12-16) Pendant apépré deux an, zot ti accompagne Jésus dan la predication partout dan pays ek zot ti bien proche avek li. Zot ti tann li kozé, zot ti temoin so bann miracle ek zot ti trouve l’exemple personnel ki li ti donné. (Matthieu 13:16, 17) Surement tousala finn tellement touche zot, ki pareil couma sa marchand-la, zot ti rod le Royaume avek tou zot leker ek avek beaucoup zèle.

15. Dapré Jésus, pou ki raison principal so bann disciple ti bizin content?

¹⁵ A part sa 12 zapotre-la, Jésus “finn choisir soixante-dix lezot disciple ek finn envoye zot, deux par deux, devant li dan chaque la-ville ek chaque l’endroit kot li-mem ti pou allé.” Li ti dir zot aussi ki bann difficulté zot ti pou gagné ek li ti donne zot l’ordre pou dir bann dimoune ki: “Royaume Bondié finn vinn pré ar zot.” (Luc 10:1-12) Kan sa 70 disciple-la ti retourné, zot ti rempli ar la joie, ek zot ti faire sa rapport-la ar Jésus: “Seigneur, mem bann demon soumette ar nou kan nou servi to nom.” Mais là, sans doute zot ti etonné kan Jésus ti dir zot ki dan l’avenir, a cause zot zèle pou le Royaume, zot pou konn enn pli grand la-joie encore. Li ti dir zot: “Pa bizin zot content parski bann demon pé soumette ar zot, mais plutot zot bizin content parski zot nom finn ecrire dan le ciel.”—Luc 10:17, 20.

16, 17. (a) Ki Jésus ti dir so bann zapotre fidel pendant dernier la-nuit ki li ti passé avek zot? (b) Ki la-joie ek ki l’assurance bann zapotre ti gagné kan Jésus ti koz ar zot?

¹⁶ Finalement, dernier nuit ki Jésus ti passé avek so bann zapotre, le 14 Nisan, l’an 33 N.L., li ti etabli enn l’evenement special, ki plitar ti appel Repas du Seigneur, ek li ti donne zot l’ordre pou celebré sa l’evenement-la. Pendant sa soirée-la, Jésus ti dir so 11 zapotre ki ti encore là: “Zot, zot finn contigne reste avek moi dan mo bann l’epreuve; et mo faire enn alliance avek zot, pareil couma mo Papa finn faire enn alliance avek moi pou enn Royaume, pou ki zot kapav mangé ek boire lor mem la-table ki moi, dan mo royaume, ek assize lor bann trone pou juge bann douze tribus d’Israël.”—Luc 22:19, 20, 28-30.

¹⁷ Surement bann zapotre ti ressenti enn grand la-joie ek enn grand satisfaction kan zot ti tann Jésus dir sa bann parole-la! Jésus ti pé offer zot pou gagne pli grand l’honneur ek privilege ki enn dimoune ti kapav gagné. (Matthieu 7:13, 14; 1 Pierre 2:9) Pareil couma sa marchand-la, zot aussi zot ti faire beaucoup sacrifice pou suive Jésus ek pou rod le Royaume. Asterla, zot ti kapav sur ki tou bann sacrifice ki zot ti’nn faire, zot pa ti faire sa pou nanyin.

18. Kisannla a part bann 11 zapotre, pou finalement profite Royaume Bondié zot aussi?

¹⁸ Mais, pa seulement bann zapotre ki ti avek Jésus sa soir-la, ki ti pou gagne bann bienfait ar Royaume Bondié. Jéhovah ti’nn decidé ki en tou 144,000 dimoune ti pou rentre dan l’alliance pou enn Royaume pou vinn lé-roi avek Jésus Christ dan so Royaume ki dan le ciel. En plus, dan enn vision, l’apotre Jean ti trouve ‘enn grand la-foule ki personne pa ti kapav compté, . . . ki ti pé debouté devant trone ek devant l’Agneau, . . . ’ ek ki ti pé dir: ‘Bondié ki pé assize lor so trone, ek l’Agneau, finn delivré nou.’ Sa bannla, zot bann dimoune ki pou reste lor la terre, ek lor ki sa Royaume-la pou gouverné.b—Révélation 7:9, 10; 14:1, 4.

19, 20. (a) Ki possibilité bann dimoune dan tou nation éna? (b) Ki question nou pou examiné dan prochain l’article?

¹⁹ Enn tipé avant ki Jésus ti monte dan le ciel, li ti donne sa l’ordre-la so bann disciple: “Allé, ek faire bann disciple parmi bann dimoune dan tou bann nation, baptise zot au nom du Père, et du Fils, et de l’esprit saint, enseigne zot pou suive tou bann kitsoz ki mo finn dir zot faire. Et guetté, mo avek zot toulé-jour ziska la fin sa system-la.” (Matthieu 28:19, 20) Donk, bann dimoune ki sorti dan tou nation ti pou vinn bann disciple Jésus Christ. Pareil couma sa marchand-la ti faire avek sa joli perle-la, zot aussi, zot ti pou rod le Royaume, avek tou zot leker, n’importe ki recompense ki pé atann zot, soit dan le ciel ou-soit lor la terre.

²⁰ Dapré Jésus, sa travail pou faire bann disciple-la pou contigné ziska “la fin sa system-la.” Donk, eski dan nou lepok, encore éna bann dimoune ki ressemblé sa marchand ki ti voyagé-la, ek ki disposé pou faire tou pou Royaume Bondié? Nou pou examine sa question-la dan prochain l’article.

[Note]

Eski Ou Kapav Expliké?

• Ki leson principal nou tiré dan parabole sa marchand ki ti voyagé-la?

• Couma Jésus ti montré ki li ti bien konn grand valeur ki Royaume Bondié éna?

• Kifer André, Pierre, Jean ek lezot disciple ti reagir dé-suite kan Jésus ti appel zot?

• Ki bann grand possibilité bann dimoune dan tou nation éna devant zot?

[Zimage, page 16]

‘Zot ti quitte tou pou suive Jésus’