Bann l’Avantage Ki Nou Gagné kan Nou Faire la Paix

ED TI pé mort, ek Bill ti ena la haine pou li. Ena 20 an ki Ed ti’nn prend enn decision ki ti faire Bill perdi so travail, ek a cause sa, sa deux bon camarade-la ti vinn deux l’ennemi. Asterla Ed ti essaye demann excuse pou ki li kapav mort en paix. Seulement, Bill pa ti oulé tann nanyin.

Preské 30 an apré sa, alors ki Bill ti pré pou mort, li ti expliké kifer li pa ti pardonné. “Ed pa ti’nn bizin agir coumsa avek so pli bon camarade. Mo pa ti vrai-mem envie faire la paix apré vingt an. . . . Kapav mo ti ena tort, mais c’est seki mo ti ressenti.”a

Bann problem ki dimoune gagné entre zot pa touletan fini mal coumsa, mais souvent bann dimoune blessé ek zot vinn amer. Prend l’exemple enn dimoune ki ena mem sentiment ki Ed. Letan li realisé ki so decision inn cause di-tort, sa kapav faire li vive avek enn conscience coupable ek sentiment ki li’nn vrai-mem perdi l’amitié enn camarade. Pourtant, li senti-li blessé kan li pensé couma so camarade ki li’nn offensé inn rejette l’amitié ki ti ena entre zot, coumadir sa pa vaut nanyin.

Seulement, enn dimoune ki ena mem sentiment ki Bill, retrouve li couma enn victime innocent ek li kapav vinn bien amer ek garde lot dimoune-la dan so leker. Pou li, so ancien camarade ti bien koné ek kitfois inn faire li di-tort par expré. Souvent, kan ena enn problem entre deux dimoune, sakenn sur ki c’est li ki ena raison ek ki tou tort tombe lor lot dimoune-la. Alors, deux dimoune ki ti camarade avant, aster, zot inn vinn deux l’ennemi.

Zot contigne sa la-guerre-la en silence—enn vire so ledo kan lot-la passé, ek zot ignore zot camarade kan zot joinde dan enn group. Depuis loin, zot veille zot camarade dan coin lizié ou-soit zot ena enn regard froid ek rempli ar la haine. Kan zot arrivé kozé, zot koz brite ou-soit zot dire bann parole ki coupé couma enn rasoir.

Pourtant, mem si zot pa parette ditou en bon terme, surement zot d’accord lor certain kitsoz. Kitfois zot reconette ki zot ena bann problem grave ek ki li faire la peine pou casse l’amitié avek enn camarade proche. Sakenn surement senti douleur sa blessure ki encore ouvert-la, ek toulé-deux koné ki bizin faire kitsoz pou gueri sa. Mais kisannla ki pou faire premier pas pou repare sa relation ki finn gaté-la ek faire la paix? Personne pa disposé pou faire sa.

Ena deux mille an, bann zapotre Jésus Christ ti parfois gagne bann discussion kot zot ti en colere. (Marc 10:35-41; Luc 9:46; 22:24). Apré enn sa bann discussion-la, Jésus ti demann zot: “Ki zot ti pé discuté coumsa lor chemin?” Zot ti tellement honté ki zot inn reste trankil ek personne pa’nn reponn enn mot. (Marc 9:33, 34) Bann l’enseignement Jésus ti aide zot pou retombe d’accord. So conseil ek bann conseil ki certain so bann disciple inn donné, contigne aide dimoune pou resoudre zot bann desaccord ek repare bann l’amitié ki ti’nn cassé. Anou guetté couma.

Faire Zeffort pou Faire la Paix

“Mo pa’lé koz avek sa dimoune-la. Mo pa’lé trouve li ditou.” Si ou’nn deja dire bann parole coumsa concernant enn dimoune, ou bizin faire kitsoz, pareil couma sa bann text la-Bible-la montré.

Jésus ti enseigné: “Alors, si kan to pé amenn to present devant l’autel ek ki là to rappel ki to frere ena kitsoz kont toi, laisse to present là, devant l’autel, ek allé, al faire d’abord la paix avek to frere.” (Matthieu 5:23, 24) Li ti dire aussi: “ Si to frere commette enn peché, al devoile so faute entre toi ek li tousel.” (Matthieu 18:15) Ki ou’nn offense enn dimoune ou-soit ki enn dimoune inn offense ou, bann parole Jésus montré l’importance pou ou koz sa avek lot dimoune-la sans tardé. Ou bizin faire sa “dan enn l’esprit douceur.” (Galates 6:1) Mais sa conversation-la, c’est pa pou trouve bann excuse pou fason ki ou’nn faire, pou ou protege ou reputation ou-soit pou force lot dimoune-la pou demann pardon, mais pou faire la paix. Eski sa conseil la Bible-la marché?

Ernest enn supervisor dan enn grand bureau.b Pendant beaucoup l’année, dan so travail, li’nn bizin occupe bann problem delicat avek tou qualité dimoune ek li’nn bizin garde bann relation amical avek zot. Li’nn trouvé couma bann desaccord kapav developpé facilement. Li dire: “Parfois mo’nn gagne problem avek lezot. Mais kan sa arrivé, mo assizé avek sa dimoune-la ek mo discute problem-la. Al guette zot direct. Koz avek zot, avek l’intention pou faire la paix. Sa toujours marché.”

Alicia ena bann camarade ki sorti dan different culture, ek li dire sa: “Parfois mo dire kitsoz, ek lerla mo senti ki kitfois mo’nn offense kikenn. Mo al guette sa dimoune-la ek mo demann li excuse. Kitfois mo demann excuse pli souvent ki mo ti bizin, parski mem si lot dimoune la pa’nn offensé, moi, mo senti-moi pli bien si mo’nn demann excuse. Lerla mo koné ki pena okenn malentendu.”

Couma Surmonte Bann Barriere

Mais souvent ena bann barriere ki empeche faire la paix kan ena bann dispute personnel. Eski ou’nn deja dire: “Kifer moi ki bizin premier pou faire la paix? Li ki responsable pou sa problem-la.” Ou-soit eski’nn deja arrive ou al vers enn dimoune pou resoudre enn problem ek tann dimoune-la dire: “Mo pena nanyin pou dire toi”? Certain dimoune reagir dan sa bann fason-la parski zot sentiment finn blessé. Proverbes 18:19 dire: “Kan commette enn peché kont enn frere, li vinn plus ki enn la-ville fortifié; ek ena bann dispute ki [solide] couma barre ki trouve dan enn la-tour kot dimoune resté.” Alors prend bann sentiment lot dimoune-la en consideration. Si li repousse ou, attann enn tigit lé-temps ek ré-essayé encore. Lerla, kitfois “la ville fortifié” pou ouvert ek pou kapav enleve ‘barre’ ki lor la porte ki amenn ziska reconciliation.

Si enn dimoune peur pou perdi so dignité, sa kapav vinn enn lot barriere pou ena la paix. Certain dimoune pensé ki zot pou abaisse-zot si zot bizin demann excuse ou-soit mem koz avek enn dimoune ki pa en bon terme avek zot. Li normal ki nou prend compte nou l’amour prop, mais eski enn dimoune ki refuse faire la paix pé gagne plus l’amour prop ou-soit moins? Eski sa l’interet pou so l’amour prop-la pa en realité l’orgueil?

Jacques, enn parmi bann ecrivain la Bible, montré ki ena enn rapport entre enn l’esprit ki content discuté, avek l’orgueil. Apré ki li’nn devoile bann “la-guerre” ek “la-lutte” ki certain Chrétien ti ena entre zot, li dire: “Bondié kont bann ki ena l’orgueil, mais Li donne so faveur immeritée, bann ki ena l’humilité.” (Jacques 4:1-3, 6) Couma l’orgueil kapav empeche faire la paix?

L’orgueil embete dimoune; li faire zot croire ki zot pli bon ki lezot. Bann ki ena l’orgueil pensé ki zot ena droit pou jugé si zot prochain bon ou pa bon. Dan ki fason? Kan zot gagne enn desaccord avek enn dimoune, souvent zot pensé ki jamais li pa pou kapav changé. L’orgueil pousse certain pou considere bann ki pa pareil couma zot, couma bann ki pa merite l’attention, ek encore moins merite enn excuse sincere. Alors bann ki laisse zot dirigé par l’orgueil personnel souvent laisse bann dispute contigné au lieu ki zot resoudre zot couma bizin.

Pareil couma enn barriere ki blok circulation lor enn chemin, l’orgueil souvent blok bann demarche ki kapav favorise la paix. Alors si ou senti ki ou pa trop envie faire la paix avek kikenn, kitfois ou pé lutté avek l’orgueil. Couma ou kapav surmonte l’orgueil? Letan ou developpe so contraire—l’humilité.

Faire Tou lé-Contraire

L’humilité, li enn qualité ki la Bible encourage nou pou manifesté. “Resultat l’humilité ek la crainte pou Jéhovah, c’est la richesse ek la gloire ek la vie.” (Proverbes 22:4) Dan Psaume 138:6, nou lire couma Bondié considere bann dimoune ki ena l’humilité ek bann ki ena l’orgueil: “Jéhovah Li bien la-haut, et pourtant Li trouve dimoune ki ena l’humilité, mais dimoune ki ena l’orgueil, Li konn li zis de loin.”

Pou beaucoup dimoune, l’humilité pareil coumadir zot pé perdi la face. Li parette ki bann ki dirige le monde pense coumsa. Mem si bann nation en entier soumette ar zot volonté, bann chef politik pena courage pou accepté zot bann erreur avek humilité. Si enn dirigeant demann excuse, bann journaliste pou koz lor la! Kan, ena dé-trois temps enn representant gouvernement ti demann excuse parski li pa’nn faire seki ti bizin kan ti ena enn catastrophe ki’nn cause la mort, so bann parole ti dan premier page bann journal.

Remarké couma enn dictionnaire explik l’humilité: “Qualité enn dimoune ki humble ou-soit ki ena enn l’opinion bien bas lor li . . . le contraire, c’est l’orgueil ou-soit l’arrogance.” Alors l’humilité decrire fason ki enn dimoune considere li-mem, pa l’opinion ki lezot ena lor li. Kan enn dimoune reconette so bann erreur avek humilité ek demann excuse avek tou so leker, sa pa abaisse li; au contraire, sa faire lezot ena plus l’estime pou li. La Bible dire: “Avant ki enn dimoune tombé, ena l’orgueil dan so leker, ek avant la gloire, ena l’humilité.”—Proverbes 18:12.

Concernant bann politicien ki pa demann excuse pou zot bann erreur, enn observateur dire: “Li malheureux ki zot pensé ki c’est enn signe faiblesse si zot admette zot bann erreur. C’est bann dimoune faible ek ki pa senti-zot en securité ki preské jamais dire, ‘Excusé.’ Mais c’est bann dimoune ki ena enn grand leker ek ki ena courage, ki pa senti-zot abaissé kan zot dire, ‘Mo’nn faire enn erreur.’ ” Sa li vrai aussi pou bann ki pa dan politik. Si ou faire zeffort pou remplace l’orgueil par l’humilité, ou ena beaucoup plus chance pou faire la paix si ou gagne enn desaccord personnel. Guetté couma enn famille ti decouvert ki sa vrai.

Enn malentendu ti crée bann tension entre Julie ek so frere William. William ti tellement en colere avek Julie ek so missié, Joseph, ki li ti coupe tou contact avek zot. Li ti mem retourne tou bann cadeau ki Julie ek Joseph ti’nn donne li pendant tou sa lé-temps-la. A mesure ki bann mois ti passé, l’amertume ti remplace sa l’amitié ki ti existé avant entre sa frere-la ek so soeur.

Seulement, Joseph ti decide mette Matthieu 5:23, 24 en pratik. Li ti essaye approche so beau-frere avek enn l’esprit douceur ek ti envoye li bann lettre personnel kot li ti demann excuse pou bann offense ki li ti’nn commette. Joseph ti encourage so madame pou pardonne so frere. Avek le temps, William inn trouvé ki Julie ek Joseph ti vrai-mem envie faire la paix ek sa inn touche so leker. William ek so madame inn joinde Julie ek Joseph; zot tou inn demann excuse, zot inn embrasse zot camarade, ek zot inn retabli zot l’amitié.

Si ou pé envie resoudre enn dispute personnel avek enn kikenn, applik bann l’enseignement la-Bible avek patience ek faire bann zeffort pou faire la paix avek sa dimoune-la. Jéhovah pou aide ou. Seki Bondié ti dire Israël dan le passé, pou vinn vrai pou ou: “Ah si seulement to ti prend compte mo bann commandement! Lerla to la-paix ti pou vinn couma enn la-riviere.”—Isaïe 48:18.

[Note]

[Zimage, page 7]

Kan nou demann excuse, souvent sa retabli la paix