Bon Conseil pou Bann Ki Marié
“Fodé ki bann femme soumette ar zot mari pareil couma zot soumette ar le Seigneur. Mari, contigne content zot femme.” —Éphésiens 5:22, 25.
1. Ki bon fason pensé nou bizin ena lor mariage?
DAPRÉ Jésus, enn mariage c’est enn l’arrangement ki Bondié inn faire pou ki enn zom ek enn femme vive ensam ek vinn “enn sel chair.” (Matthieu 19:5, 6) Li concerne deux dimoune ki ena different personnalité, ki aprann pou interesse zot ar mem kitsoz, ek ki travail ensam pou reussi mem l’objectif. Enn mariage c’est enn promesse ki deux dimoune faire pou reste ensam ziska ki la mort separe zot. Li pa enn l’arrangement ki dure zis pou enn ti-moment, ki kapav fini a cause n’importe ki ti zaffaire. Dan beaucoup pays, kapav gagne divorce facilement, mais bann Chrétien zot, zot considere mariage couma enn kitsoz ki sacré. Zot mette fin ar zot mariage seulement pou enn raison bien grave.—Matthieu 19:9.
2. (a) Ki kitsoz bann couple ena pou aide zot dan zot mariage? (b) Kifer li important ki enn couple faire zeffort pou ki zot mariage reussi?
2 Enn kikenn ki habitué donne conseil bann dimoune marié, ti dire: “Dan enn bon mariage bann conjoint toujours adapté-zot ar bann nouveau kitsoz ki arrivé, zot traite bann problem ki apparette, ek dan chaque l’etape dan zot la-vie, zot servi tou l’aide ki disponible.” Pou bann couple Chrétien, parmi bann kitsoz ki pou aide zot, ena bann bon conseil ki sorti dan la Bible, soutien zot compagnon Chrétien, ek enn bon relation avek Jéhovah par la priere. Enn bon mariage reste solide malgré bann difficulté, ek pendant zot mariage, mari ek femme toulé-deux pou konn le bonheur ek la joie. Pli important encore, enn bon mariage donne l’honneur Jéhovah, ki’nn crée mariage.—Genèse 2:18, 21-24; 1 Corinthiens 10:31; Éphésiens 3:15; 1 Thessaloniciens 5:17.
Imite Jésus ek So Congregation
3. (a) Faire enn resumé conseil ki Paul ti donne bann couple. (b) Ki bon l’exemple Jésus inn donné?
3 Ena deux mille an de cela, l’apotre Paul ti donne bann bon conseil pou bann ki marié. Li ti ecrire: “Pareil couma la congregation soumette ar Christ, fodé ki bann femme aussi, soumette ar zot mari, dan tou kitsoz. Mari, contigne content zot femme, pareil couma Christ aussi finn content la congregation ek finn donne li-mem pou li.” (Éphésiens 5:24, 25) C’est vrai-mem bann bon l’exemple ki cité dan sa passage-la! Bann femme Chrétien ki soumette avek l’humilité ar zot mari, zot imite la congregation kan zot reconette ek accepté principe ki sakenn ena enn chef. Bann mari Chrétien ki contigne content zot femme, soit dan bann situation facile ou difficile, montré ki zot suive l’exemple Christ ki content la congregation ek prend li soin.
4. Couma bann mari kapav suive l’exemple Jésus?
4 Bann mari Chrétien, zot chef dan zot famille, mais zot aussi, zot ena enn chef, Jésus. (1 Corinthiens 11:3) Alors, pareil couma Jésus prend soin so congregation, bann mari prend soin zot famille lor plan spirituel ek physique, mem si zot bizin faire sacrifice pou sa. Zot mette l’interet zot famille avant zot prop desir ek preference. Jésus ti dire: “Tou kitsoz ki zot envie bann dimoune faire pou zot, zot aussi, zot bizin faire pareil pou bannla.” (Matthieu 7:12) Sa principe-la applik surtout dan mariage. Paul ti montré sa kan li ti dire: “Bann mari bizin content zot femme pareil couma zot prop lé-corps. . . . Jamais okenn zom pa finn ena la haine pou so prop lé-corps, mais li nourri li ek prend li soin.” (Éphésiens 5:28, 29) Enn zom bizin nourri so femme ek prend li soin, pareil couma li prend la peine pou faire sa ar li-mem.
5. Couma bann femme kapav imite congregation Chrétien?
5 Bann femme ki adore Bondié prend model lor congregation Chrétien. Kan Jésus ti lor la terre, so bann disciple ti abandonne volontairement zot bann l’occupation pou suive li. Apré so la-mort, zot ti contigne soumette ar li, ek pendant preské 2000 an ki finn passé, vrai congregation Chrétien finn reste soumette ar Jésus ek finn suive so direction dan tou kitsoz. Bann femme Chrétien aussi pareil; zot pa meprise zot mari, ni zot considere l’arrangement Biblik ki concerne l’autorité dan enn mariage, couma enn kitsoz ki sans importance. Au contraire, zot soutenir zot mari, zot soumette, zot cooperé, ek coumsa zot reussi encourage zot mari. Kan mari ek femme agir avek amour coumsa, zot mariage pou reussi ek toulé-deux pou trouve la joie dan zot menage.
Contigne Reste Avek Zot
6. Ki conseil Pierre ti donne bann mari, ek kifer sa conseil-la important?
6 L’apotre Pierre aussi ti conseil bann couple, ek li ti donne bann conseil bien direct pou bann mari. Li ti dire zot: “Contigne reste ar [zot femme] dapré la connaissance, donne zot l’honneur, pareil couma enn vase pli faible, enn vase feminin, parski ensam avek bannla, zot aussi, zot pou herite la vie, ki enn faveur immeritée; pou ki pena nanyin ki blok zot la-priere.” (1 Pierre 3:7) La fin sa verset-la montré nou kifer li tellement important ki nou prend conseil Pierre avek serieux. Si enn mari pa donne l’honneur so femme, so relation avek Jéhovah pou affecté. Bondié kapav mem pa ecoute so la-priere.
7. Couma enn mari bizin donne l’honneur so femme?
7 Alors, couma bann mari kapav donne l’honneur zot femme? Enn mari ki donne l’honneur so femme, traite li avek amour, respé ek dignité. Sa lepok-la, enn traitment coumsa ti pou kapav parette drole pou beaucoup dimoune. Enn specialiste dan langue Grec, ti ecrire: “Dapré la-loi Romain, bann femme pa ti ena okenn droit. Dapré sa la-loi-la, li ti ena mem droit ki enn zenfant. . . . Li ti net enba control so mari, ek li ti bizin soumette ar tou so bann caprice.” C’est vrai-mem enn grand difference avek l’enseignement Chrétien! Enn mari Chrétien ti donne l’honneur so femme. Dan fason ki li ti traite li, li ti laisse-li guidé par bann principe Biblik, pa par bann caprice personnel. En plus, li ti ena enn grand consideration pou li, “dapré la connaissance,” li ti prend compte ki so femme enn vase pli faible.
Dan Ki Sens Li enn “Vase Pli Faible”?
8, 9. Dan ki fason bann femme zot egal ar bann zom?
8 Kan Pierre ti dire ki enn femme li “enn vase pli faible,” li pa ti oulé dire ki bann femme pli faible ki bann zom lor plan intellectuel ou spirituel. Li vrai ki beaucoup zom dan congregation ena bann privilege ki bann femme pa attann pou gagné, ek dan la famille, bann femme bizin soumette ar zot mari. (1 Corinthiens 14:35; 1 Timothée 2:12) Seulement, bann zom ek bann femme toulé-deux bizin manifesté mem la foi, mem l’endurance ek ena enn mem principe moral bien elevé. Couma Pierre ti dire, bann mari ek bann femme toulé-deux, zot “herite la-vie, ki enn faveur immeritée.” En seki concern zot delivrance, toulé-deux egal devant Jéhovah. (Galates 3:28) Pierre ti pé ecrire bann Chrétien oint dan premier siecle. Donk, li ti pé rappel bann mari Chrétien ki en tant ki “heritier ensam avek Christ,” zot, ek zot femme ti ena mem l’esperance pou al dan le ciel. (Romains 8:17) Enn jour, zom ek femme, toulé-deux, ti pou servi couma bann pretre ek bann lé-roi dan Royaume Bondié, dan le ciel!—Révélation 5:10.
9 Pena doute ki bann femme Chrétien ki oint, zot pa inferieur ar zot mari, ki bann oint zot aussi. En principe, li pareil aussi pou bann Chrétien ki ena l’esperance pou vive lor la terre. Bann zom ek bann femme ki forme la “grande foule,” zot toulé-deux lave zot robe ek faire li vinn blanc dan di-sang l’Agneau. Toulé-deux group participé pou loué Jéhovah “la-nuit-li-jour,” dan le monde entier. (Révélation 7:9, 10, 14, 15) Bann zom ek bann femme toulé-deux pé attann pou gagne “liberté extraordinaire en tant ki bann zenfant Bondié,” kan zot pou profite “la vie veritable.” (Romains 8:21; 1 Timothée 6:19) Ki enn Chrétien li oint, ou-soit ki li forme partie parmi lezot brebis, tou Chrétien servi Jéhovah couma enn “sel troupeau” enba direction “enn sel berger.” (Jean 10:16) Sa li enn bon raison pou ki bann mari ek bann femme Chrétien donne l’honneur sakenn so camarade!
10. Dan ki sens eski bann femme zot ‘bann vase pli faible’?
10 Alors, couma eski bann femme zot ‘bann vase pli faible’? Kitfois Pierre ti faire remarké ki en general, bann femme pli tipti ek ena moins la force ki bann zom. En plus, parski nou imparfait, privilege extraordinaire ki bann femme ena pou gagne zenfant, sa affaibli zot la-santé. Bann femme ki ena l’age pou gagne zenfant, kitfois zot pa en forme regulierement. Zot bien bizin enn l’attention special ek enn grand consideration kan zot passe par sa bann moment difficile-la, ou-soit kan zot tombe enceinte ek gagne zenfant, enn l’experience ki fatigue zot beaucoup. Enn mari ki donne l’honneur so femme, ek ki reconette ki so femme bizin so soutien, pou contribué beaucoup pou ki so mariage reussi.
Dan enn Lakaz Kot Mari ek Femme Pena Mem Religion
11. Dan ki sens enn mariage kapav reussi mem si mari ek femme pa dan mem religion?
11 Ki arrivé kan mari ek femme pa dan mem religion parski zis enn parmi zot ki finn accepté la verité apré zot mariage? Eski dan sa cas-la enn mariage kapav reussi? Kan nou guette beaucoup mariage ki dan sa situation-la, nou kapav dire oui. Enn mari ek enn femme ki dan different religion kapav reussi zot mariage, sa vedir ki zot kapav contigne reste ensam ek toulé-deux kapav konn le bonheur. En plus, zot mariage toujours valide devant Jéhovah; zot encore toujour “enn sel chair.” C’est pou sa ki bann Chrétien marié, zot encouragé pou reste avek zot conjoint ki pa dan la verité, si conjoint-la d’accord. Si ena bann zenfant, bannla pou profite fidelité zot parent ki Chrétien.—1 Corinthiens 7:12-14.
12, 13. Couma bann femme Chrétien kapav suive conseil Pierre ek aide zot mari ki pa Témoin?
12 Pierre ti donne bann bon conseil pou bann femme Chrétien ki vive avek enn mari ki pa partage zot la-foi. Bann mari Chrétien ki dan mem situation kapav aussi applik sa bann conseil-la. Pierre ti ecrire: “Zot, bann femme, soumette ar zot mari, pou ki si certain pa obeir la parole, kapav gagne zot sans parole grace a conduite zot femme, parski bannla finn temoin ki zot ena enn bon conduite ek enn profond respé.”—1 Pierre 3:1, 2.
13 Li bon si enn femme reussi explik so croyance avek tact, ar so mari. Mais ki pou faire si so mari pa’lé ecouté? C’est so choix. Kan-mem, ena encore l’espoir, parski enn conduite Chrétien aussi kapav donne enn grand temoignage. Beaucoup mari ki au commencement pa ti interessé, ou-soit ki ti mem opposé ar croyance zot femme, finn ‘gagne enn leker bien disposé pou la vie eternel’ kan zot finn remark bon conduite zot femme. (Actes 13:48) Mem si enn mari pa accepté la verité, li possible ki li impressioné par bon conduite so femme, ek sa amenn bann bienfait dan zot mariage. Enn mari ki marié ar enn femme Témoin de Jéhovah, admette ki jamais li, li pou kapav vive dapré bann principe Biblik bien elevé ki bann Témoins de Jéhovah suive. Mais kan-mem, li dire ki li enn “mari heureux ki’nn marié avek enn femme bien agreable,” ek li ti felicite so femme ek bann lezot Témoins dan enn lettre ki li ti ecrire dan enn la-gazette.
14. Couma bann mari kapav aide zot femme ki pa Témoin?
14 Bann mari Chrétien ki finn mette en pratik bann principe l’apotre Pierre, zot aussi, zot finn gagne zot femme par zot conduite. Bann femme ki pa Témoin de Jéhovah, finn trouve zot mari vinn pli responsable, ek arrete gaspille l’argent lor cigarette, l’alcool, ek joué, ek zot finn remarké ki zot mari nepli ena enn langage grossier. Certain parmi sa bann femme-la finn faire connaissance bann lezot membre congregation. Zot finn impressioné par l’amour ki existé parmi bann Chrétien, ek seki zot finn trouvé parmi bann frere finn attire zot ar Jéhovah.—Jean 13:34, 35.
“Seki Zot Été Endan, dan Zot Leker”
15, 16. Avek ki qualité conduite enn femme Chrétien kapav gagne so mari ki pa Témoin?
15 Ki qualité conduite kapav gagne enn mari? C’est enn conduite ki enn femme Chrétien developpé normalement. Pierre dire: “Pa rod faire zot parette pli joli en dehors par bann cheveux tressé ek par bann bijou en or, ou-soit par bann joli linge, mais seki pou faire zot parette pli joli, c’est seki zot été endan, dan zot leker, kan zot manifesté enn caractere trankil ek douce, ki jamais pa pou disparette, ek ki ena enn grand valeur dan lizié Bondié. Parski c’est coumsa mem ki longtemps bann femme saint, ki ti mette zot l’espoir en Bondié, ti content arrange zot, ek zot ti soumette ar zot prop mari, pareil couma Sara ti habitué obeir Abraham, ek ti appel li ‘seigneur.’ Zot inn vinn so bann zenfant, pourvu ki zot contigne faire le bien ek pa peur okenn kitsoz ki kapav faire zot tremblé.”—1 Pierre 3:3-6.
16 Pierre ti conseil enn femme Chrétien pou pa compte lor so l’apparence. Au contraire, li bizin laisse so mari trouvé ki la Bible ena enn bon l’effet lor so caractere. So conduite pou faire so mari trouvé ki li ena enn nouveau personalité. Kitfois, mari-la pou trouve la difference avek ancien personnalité ki so femme ti ena avant. (Éphésiens 4:22-24) Surement, li pou trouvé ki “caractere trankil ek douce” ki so femme ena, li reconfortant ek agreable. Enn caractere coumsa pa zis faire enn mari content, mais li ena “enn grand valeur dan lizié Bondié.”—Colossiens 3:12.
17. Couma eski Sara enn bon l’exemple pou bann femme Chrétien?
17 Pierre cite Sara couma enn model, ek li enn bon l’exemple pou bann femme marié, ki zot mari Témoin ou pa. Sara sans okenn doute, ti considere Abraham couma so chef. Mem dan so leker, li ti appel li so “seigneur.” (Genèse 18:12) Seulement, sa pa ti abaisse li. Li clair ki Sara ti enn femme bien fort lor plan spirituel, parski li ti ena personnellement enn la-foi solide en Jéhovah. Oui, li parmi sa “grand nuage Témoins” ki grace a zot la-foi, donne nou enn bon l’exemple ki pousse nou pou “galope avek endurance sa lé-course ki devant nou-la.” (Hébreux 11:11; 12:1) Enn femme Chrétien pa abaisse li-mem si li suive l’exemple Sara.
18. Ki principe ki appliké dan enn famille kot enn sel conjoint ki Témoin?
18 Dan enn couple kot sakenn ena enn religion different, mari-la toujours chef dan so famille. Si mari-la ki Témoin, li pou respecté religion so femme, mais li pa pou cedé kan sa concerne so la-foi. Si femme-la ki enn Témoin, li aussi li pa pou cedé kan sa concerne so la-foi. (Actes 5:29) Kan-mem, li pa pou defié l’autorité so mari. Li pou respecté so position ek li pou reste enba “la loi so mari.”—Romains 7:2.
Bann Conseil Sage Ki la Bible Donné
19. Ki certain pression ki kapav rann la vie mariage difficile, mais couma kapav faire face ar sa bann pression-la?
19 Zordi, ena beaucoup kitsoz ki kapav mette pression lor enn mariage. Certain zom pa assume zot responsabilité. Certain femme refuse pou accepté l’autorité zot mari. Dan certain mariage, ena ki gagne maltraité ou-soit gagne batté ar zot conjoint. Fidelité enn Chrétien kapav testé pou different raison: stress a cause la vie cher, l’imperfection, l’esprit le monde avek so l’immoralité ek dimoune nepli ena okenn sens moral. Mais seulement, bann zom ek bann femme Chrétien ki obeir bann principe Biblik, n’importe ki situation zot été, zot gagne benediction Jéhovah. Mem si enn sel conjoint applik bann principe Biblik, vaut mieux sa ki si personne pa faire li. En plus, Jéhovah content ek soutenir so bann serviteur ki reste fidel envers voeu ki zot ti faire kan zot ti marié, mem si parfois zot situation difficile. Li pa blié zot fidelité.—Psaume 18:25; Hébreux 6:10; 1 Pierre 3:12.
20. Ki conseil Pierre ti donne tou bann Chrétien?
20 Kan Pierre ti fini donne conseil bann ki marié, li ti dire sa bann parole encourageant-la: “Enfin, zot tou, zot bizin ena mem pensée, ek konn mette zot dan place zot camarade, montré l’affection fraternel, ena beaucoup compassion, ek l’humilité, pa rann personne le mal pou le mal, ek pa insulté en retour bann ki insulté zot, mais au contraire, reponn par enn benediction, parski c’est pou sa ki finn appel zot, pou ki zot kapav gagne enn benediction.” (1 Pierre 3:8, 9) Oui, c’est bann bon conseil pou nou tou, surtout pou bann ki marié!
Eski Ou Rapel?
• Couma bann mari Chrétien imite Jésus?
• Couma bann femme Chrétien imite la congregation?
• Dan ki fason bann mari kapav donne l’honneur zot femme?
• Ki pli bon fason agir enn femme Chrétien kapav ena envers so mari ki pa enn Témoin?
[Zimage, page 29]
Enn mari Chrétien content so femme ek prend li soin
Enn femme Chrétien respecté so mari ek donne li l’honneur
[Zimage, page 31]
Bann zom ek bann femme ki forme partie dan la “grand foule” ena l’espoir pou gagne la vie eternel dan Paradi
[Zimage, page 32]
Sara ti considere Abraham couma so seigneur