“Finn paye enn grand prix pou acheté zot”
“Finn paye enn grand prix pou acheté zot. Oui, faire tou zot possible pou glorifié Bondié.”—1 CORINTHIENS 6:20.
1, 2. (a) Dapré la Loi mosaïk, dan ki fason ti bizin traite bann esclave Israélite? (b) Ki choix enn esclave ki ti content so maitre, ti ena?
ENN dictionnaire biblik, Holman Illustrated Bible Dictionary, dire: “Dan le passé, l’esclavage ti enn kitsoz bien populaire ek beaucoup dimoune ti accepté sa.” Sa dictionnaire-la ajouté: “L’economie l’Égypte, la Grèce, ek Rome ti depann lor travail bann esclave. Dan lepok bann premier chrétien, enn dimoune lor trois en Italie, ek enn dimoune lor cinq dan lezot pays, ti enn esclave.”
2 Mem si l’esclavage ti existé en Israël, la Loi mosaïk ti protege bann esclave. Par exemple, la Loi ti dire ki fodé pa ki enn Israélite reste enn esclave plus ki six an. Lor so septieme l’année, li ti bizin “gagne so liberté, sans ki li paye nanyin.” Mais bann la-loi lor fason ki ti bizin traite bann esclave ti tellement juste ek bon, ki ti ena sa disposition-la dan la Loi mosaïk: “Si esclave-la insisté ek li dire: ‘Mo vrai-mem content mo maitre, mo femme ek mo bann garson, mo pa oulé gagne mo liberté,’ alors so maitre bizin amenn li pré ar vrai Bondié, ek li bizin amenn li pré kot la porte ou-soit linteau la porte; ek so maitre bizin perce so zoreille avek enn poinson, ek li bizin reste so esclave pou touletan.”—Exode 21:2-6; Lévitique 25:42, 43; Deutéronome 15:12-18.
3. (a) Ki forme l’esclavage bann chrétien premier siecle ti accepté? (b) Ki pousse nou pou servi Bondié?
3 L’esclavage volontaire ki ti ena en Israël, represente l’esclavage ki bann vrai chrétien koné. Par exemple, bann ecrivain la Bible, couma Paul, Jacques, Pierre ek Jude ti dire ki zot bann esclave Bondié ek Christ. (Tite 1:1; Jacques 1:1; 2 Pierre 1:1; Jude 1) Paul ti rappel bann chrétien ki ti reste Thessalonique ki zot ti “laisse zot bann idole pou tourne vers Bondié, pou travail couma bann esclave pou enn Bondié vivant ek veritable.” (1 Thessaloniciens 1:9) Ki ti pousse sa bann chrétien-la pou vinn bann esclave Bondié? Eh bien, ki ti pousse enn esclave Israélite pou renonce ar so liberté? C’est parski li ti content so maitre. Oui, bann chrétien aussi zot esclave Bondié parski zot content Li. Kan nou aprann pou konn vrai Bondié ek pou content Li, nou senti-nou poussé pou servi Li avek “tou [nou] leker ek tou [nou] nâme.” (Deutéronome 10:12, 13) Alors, ki sa vedir vinn enn esclave Bondié ek Christ? Couma sa influence nou la-vie toulé-jour?
“Faire tou kitsoz pou la gloire Bondié”
4. Couma eski nou vinn bann esclave Bondié ek Christ?
4 Dapré enn definition, enn esclave, li enn “dimoune ki ena enn ou plusieurs proprietaire legal, ek li obligé obeir tou seki dire li.” Jéhovah vinn nou proprietaire legal, kan nou voué nou la-vie pou servi Li ek kan nou prend bapteme. L’apotre Paul ti expliké: “Zot pena okenn pouvoir lor zot-mem, parski finn paye enn grand prix pou acheté zot.” (1 Corinthiens 6:19, 20) Sa grand prix-la, c’est sacrifice Jésus Christ, parski lor base sa sacrifice-la, Jéhovah accepté nou couma so bann serviteur, ki nou bann chrétien oint ou-soit ki nou ena l’esperance pou vive lor la terre. (Éphésiens 1:7; 2:13; Révélation 5:9) Sa vedir ki, kan nou prend bapteme, “Jéhovah vinn nou proprietaire.” (Romains 14:8) Parski finn acheté nou avek di-sang Jésus, nou vinn so bann esclave aussi, ek nou obligé suive so bann commandement.—1 Pierre 1:18, 19.
5. En tant ki bann esclave Jéhovah, ki l’obligation nou ena avant tou, ek couma nou kapav faire sa?
5 Bann esclave bizin obeir zot maitre. Nou finn vinn bann esclave par nou-mem ek parski nou content nou Maitre. Dan 1 Jean 5:3, nou lire: “Ala seki vedir l’amour pou Bondié, ki nou suive so bann commandement, et pourtant so bann commandement pa lourd pou obeir.” Alors, nou l’obeissance montré ki nou ena l’amour ek ki nou soumette, ek nou montré sa dan tou seki nou faire. Paul ti dire: “Kan zot pé mangé, kan zot pé boire, ou-soit n’importe ki zot pé faire, faire tou kitsoz pou la gloire Bondié.” (1 Corinthiens 10:31) Toulé-jour dan nou la-vie, mem dan bann ti kitsoz, nou envie montré ki nou “travail couma bann esclave pou Jéhovah.”—Romains 12:11.
6. En tant ki bann esclave Bondié, couma eski sa influence bann decision ki nou prend dan nou la-vie? Montré sa par en l’exemple.
6 Par exemple, kan nou bizin prend bann decision, nou envie prend compte volonté nou Maitre ki dan le ciel, Jéhovah. (Malaki 1:6) Bann decision difficile kapav testé nou l’obeissance envers Bondié. Eski lerla, nou pou suive so conseil au lieu ki nou ecoute nou leker ki “traitre” ek ki “bien mauvais”? (Jérémie 17:9) Mélissa, enn chrétienne celibataire, ti fek baptisé, kan enn jeune garson ti commence interessé ar li. Garson-la ti parette bien gentil, ek li ti pé deja etudié la Bible avek bann Témoins de Jéhovah. Mem sa, enn ancien ti rappel Mélissa ki li sage pou obeir commandement Jéhovah, ek pou “marié zis dan le Seigneur.” (1 Corinthiens 7:39; 2 Corinthiens 6:14) Mélissa admette: “Li pa ti facile pou moi pou suive sa conseil-la. Mais mo ti’nn decidé ki, parski mo finn voué mo la-vie pou faire volonté Bondié, mo pou obeir so bann instruction, ki ti bien clair.” Kan Mélissa reflechi lor seki ti arrivé par la suite, li dire: “Mo extra content ki mo finn suive sa conseil-la. Inpé apré, garson-la finn arrete etudié la Bible. Si mo ti contigné avek li, zordi mo ti pou finn marié avek enn incroyant.”
7, 8. (a) Kifer fodé pa ki nou rod faire plaisir bann zom? (b) Montré par enn l’exemple couma nou kapav surmonte la peur bann dimoune.
7 En tant ki bann esclave Bondié, fodé pa ki nou vinn esclave bann zom. (1 Corinthiens 7:23) Bien-sur, nou tou nou content kan dimoune accepté nou ek content nou, mais nou bizin rappel ki bann chrétien ena bann principe different avek bann dimoune dan le monde. Paul ti pose sa question-la: “Eski mo pé rod faire plaisir bann zom?” Li ti dire: “Si mo ti encore pé faire plaisir bann zom, mo pa ti pou enn esclave Christ.” (Galates 1:10) Alors pa question ki nou cedé ar l’influence nou bann camarade ek faire plaisir bann zom. Mais alors, ki nou kapav faire kan ena pression lor nou pou faire couma tou dimoune?
8 Prend l’exemple Elena, enn jeune chrétienne ki vive en Espagne. Parmi so bann camarade, plusieurs ti faire don zot di-sang. Zot ti koné ki, parski Elena enn Témoin de Jéhovah, li pa donne di-sang, ni li accepté enn transfusion di-sang. Kan enn l’occasion ti presenté, Elena ti profité pou explik so position devant tou bann zeleve dan so classe. Li ti faire enn presentation devant zot tou. Li dire: “Mo ti bien peur pou kozé. Mais, mo ti bien prepare moi, ek mo ti gagne bann bon resultat, ki mo pa ti atann. Mo ti gagne respé beaucoup parmi mo bann camarade, ek mo professeur ti dire moi ki li admire seki mo ti pé faire. Surtout, mo ti content ki mo finn gagne l’occasion pou defann nom Jéhovah ek pou explik enn fason claire kifer mo prend sa position biblik-la.” (Genèse 9:3, 4; Actes 15:28, 29) Oui, en tant ki bann esclave Bondié ek Christ, nou different. Pourtant, si nou prepare nou bien pou defann nou croyance avek respé, li possible ki sa faire dimoune respecté nou.—1 Pierre 3:15.
9. Ki nou aprann ar l’exemple sa ange ki ti aparette ar l’apotre Jean-la?
9 Si nou rappel ki nou bann esclave Bondié, sa kapav aide nou pou reste humble. Enn fois, l’apotre Jean ti tellement impressioné par enn vision extraordinaire lor Jérusalem celeste, ki li ti tombe dan lipié sa ange ki Bondié ti envoyé couma enn porte-parole-la, pou adore li. Ange-la ti dire li: “Attention! Pa faire sa! Mo zis enn esclave pareil couma toi ek pareil couma to bann frere ki prophete, ek pareil couma bann ki suive bann parole ki ena dan sa rouleau-la. Adore Bondié.” (Révélation 22:8, 9) Sa ange-la finn vrai-mem donne enn bon l’exemple tou bann esclave Bondié, pa vrai? Certain chrétien ena bann responsabilité special dan congregation. Pourtant, Jésus ti dire: “Si enn kikenn envie vinn grand parmi zot, li bizin vinn zot serviteur, ek kikenn ki envie vinn premier parmi zot, li bizin vinn zot esclave.” (Matthieu 20:26, 27) En tant ki disciple Jésus, nou tou nou bann esclave.
“Seki nou finn faire, sa-mem nou ti bizin faire”
10. Donne bann l’exemple biblik pou montré ki bann serviteur fidele Bondié pa ti toujours trouve sa facile pou faire So volonté.
10 Li pa toujours facile pou bann dimoune imparfait faire volonté Bondié. Prophete Moïse ti hesité pou obeir kan Jéhovah ti demann li pou al delivré bann Israélite ki ti esclave en Égypte. (Exode 3:10, 11; 4:1, 10) Kan Yona ti gagne mission pou al annonce bann Ninivite enn message jugement, li “ti levé ek li ti sauvé devant Jéhovah, pou al Tarsis.” (Yona 1:2, 3) Barouk, secretaire Jérémie ti plaigné parski li ti dire ki li fatigué. (Jérémie 45:2, 3) Ki nou pou faire si nou bann desir ou nou bann preference personnel, zot pa en accord avek volonté Bondié? Nou gagne la reponse dan enn l’exemple ki Jésus ti donné.
11, 12. (a) Faire enn resumé l’exemple ki Jésus ti donné en Luc 17:7-10. (b) Ki leson nou tiré dan l’exemple ki Jésus ti donné?
11 Jésus ti koz lor enn esclave ki ti occupe troupeau so maitre toute la journée. Kan esclave-la ti arrive lakaz, bien fatigué apré 12 heure-temps travail, so maitre pa ti dire li assisé pou prend enn bon repas. Au contraire li ti dire li: “Prepare enn kitsoz pou mo mangé, mette enn tablier ek servi moi ziska ki mo’nn fini mangé ek boire, apré sa to kapav mangé ek boire.” Sa esclave-la ti kapav mangé zis kan li ti fini servi so maitre. A la fin so l’exemple, Jésus ti dire: “Zot aussi, kan zot finn fini faire tou séki finn donne zot pou faire, zot bizin dire: ‘Nou bann esclave ki pa bon pou nanyin. Séki nou finn faire, sa-mem nou ti bizin faire.’ ”—Luc 17:7-10.
12 Par sa l’exemple-la, Jésus pa ti pé dire ki Jéhovah pa apprecié seki nou faire dan so service. La Bible bien clair lor la, li dire: “Bondié pa injuste pou blié zot travail ek l’amour ki zot finn montré pou so nom.” (Hébreux 6:10) Mais seki nou aprann dan parabole Jésus, c’est ki enn esclave pa kapav faire seki li envie, ni occupe zis so prop confort. Kan nou finn voué nou la-vie pou servi Bondié, ek kan nou finn choisir pou vinn so bann esclave, nou finn accepté pou faire so volonté passe avant nou volonté. Nou bizin soumette-nou ar volonté Bondié.
13, 14. (a) Dan ki situation parfois nou bizin force nou-mem pou servi Jéhovah? (b) Kifer nou bizin faire volonté Bondié passe avant?
13 Kitfois sa demann nou beaucoup zeffort pou etudié Parole Bondié ek bann publication ki “l’esclave fidel et avisé” donne nou. (Matthieu 24:45) Sa li surtout vrai si nou gagne difficulté pou lire, ou-soit si enn publication koz lor “bann kitsoz profond en rapport avek Bondié.” (1 Corinthiens 2:10) Pourtant, nou bizin trouve lé-temps pou nou l’etude personnel. Kitfois, nou pou bizin discipline nou-mem pou nou pa taillé-rasé kan nou etudié. Mais, si nou pa discipline nou, couma eski nou pou arrivé apprecié “mangé solide [ki] pou bann dimoune mur”?—Hébreux 5:14.
14 Ki nou pou faire kan nou rente lakaz fatigué, apré enn longue journée travail? Li possible ki nou pou bizin force nou-mem pou nou al reunion. Ou-soit, kitfois nou pa trouve sa facile pou nou preche avek bann dimoune ki nou pa koné. Paul li-mem ti dire ki kitfois, nou pou bizin annonce la bonne nouvelle ‘kont nou volonté.’ (1 Corinthiens 9:17) Seulement, nou faire tousala, parski Jéhovah—nou Maitre ki dan le ciel, ek ki nou bien content—dire nou faire sa. Mais, eski nou pa satisfait ek nou senti nou bien chaque fois nou finn faire zeffort pou etudié, pou assisté reunion ek pou preché?—Psaume 1:1, 2; 122:1; 145:10-13.
Pa ‘guette derriere’
15. Couma Jésus finn donne nou enn l’exemple soumission envers Bondié?
15 Jésus Christ finn montré so soumission ar so Papa dan fason pli extraordinaire ki ena. Li ti dire so bann disciple: “Mo finn sorti dan le ciel pou vinn ici, pa pou faire mo volonté, mais volonté celui ki finn envoye moi.” (Jean 6:38) Kan li ti pé souffert dan enn fason terrible dan jardin Gethsémané, li ti faire sa la-priere-la: “Papa, si possible, faire sa coupe-la passe loin ar moi. Mais pa couma mo envie, mais couma toi, to envie.”—Matthieu 26:39.
16, 17. (a) Couma eski nou bizin considere bann kitsoz ki nou finn laissé derriere nou? (b) Expliké kifer Paul ti ena raison pou considere bann possibilité ki li ti ena dan le monde, couma “enn tas saleté.”
16 Jésus Christ envie ki nou reste fidel ar decision ki nou finn prend pou servi Bondié couma bann esclave. Li ti dire: “Enn dimoune ki finn mette so la-main lor charrette ek ki guette bann kitsoz ki derriere li, li pa merite royaume Bondié.” (Luc 9:62) Kan nou travail couma bann esclave pou Bondié, li pa bon si touletan nou pé pense seki nou finn laissé derriere nou. Au contraire, anou apprecié seki nou finn gagné parski nou finn choisir pou vinn bann esclave Bondié. Paul ti ecrire bann Philippien: “Mo considere tou kitsoz couma enn perte, parski connaissance lor Christ Jésus, mo Seigneur, ena enn grand valeur. A cause li, mo finn accepté perdi tou kitsoz ek mo considere tousala couma enn tas saleté, pou mo kapav gagne Christ.”—Philippiens 3:8.
17 Pense tou sa bann kitsoz ki Paul ti considere couma enn tas saleté-la, ek ki li finn abandonné pou gagne bann recompense spirituel en tant ki enn esclave Bondié. Li pa ti zis renonce ar bann avantage ki ti ena dan le monde, mais aussi possibilité ki enn jour, li ti pou vinn enn chef dan religion Juif. Si Paul ti contigné pratik sa religion-la, kitfois li ti pou kapav arrive mem position ki Siméon, garson Gamaliel ki ti enseigne Paul. (Actes 22:3; Galates 1:14) Siméon ti vinn enn chef parmi bann Pharisien, ek mem si li pa ti trop envie, li ti ena enn grand part dan rebellion ki bann Juif ti faire kont Rome en 66-70 n.l. Li ti perdi la vie dan sa la-guerre-la. Bann fanatik Juif ou-soit l’armée Romain ti touye li.
18. Donne enn l’exemple ki montré couma bann kitsoz spirituel donne enn grand satisfaction dan la vie.
18 Beaucoup Témoins de Jéhovah finn suive l’exemple Paul. Par exemple, Jeanne dire: “Dé-trois l’année apré lekol, mo ti gagne enn travail couma secretaire principal, pou enn grand avocat dan Londres. Mo ti bien content mo travail, ek mo ti pé gagne beaucoup kas, mais dan mo leker mo ti koné ki mo ti kapav faire plus pou servi Jéhovah. Finalement, mo ti donne mo demission, ek mo ti commence service pionnier. Mo bien content ki mo finn prend sa decision-la, ena plus ki 20 an asterla! Service a-plein-temps finn rann mo la-vie pli riche ki n’importe ki travail secretaire. Pena nanyin ki donne pli grand satisfaction ki kan ou trouvé couma Parole Jéhovah kapav change la vie enn dimoune. Li extraordinaire pou ena enn part dan sa changement-la. Jéhovah donne nou beaucoup plus ki seki nou donne Li.”
19. Ki nou bizin bien decidé pou faire, ek kifer?
19 Nou situation kapav changé dan l’avenir. Mais nou l’engagement envers Bondié reste pareil. Nou reste toujours bann esclave Jéhovah, ek Li laisse nou decidé couma nou pou servi nou lé-temps, nou la-force, nou talent, ek nou bann lezot capacité. Alors, bann decision ki nou prend en rapport avek sa kapav montré nou l’amour pou Bondié. Zot montré aussi ki quantité nou disposé pou faire bann sacrifice. (Matthieu 6:33) Dan n’importe ki situation nou été, nou bizin bien decidé pou donne Jéhovah tou seki nou kapav? Paul ti ecrire: “Si en premier ena enn bonne volonté, li pou surtout acceptable dapré seki enn kikenn ena, pa dapré seki li pena.”—2 Corinthiens 8:12.
“Zot pé gagne zot fruit”
20, 21. (a) Ki fruit bann esclave Bondié gagné? (b) Couma Jéhovah recompense bann dimoune ki donne Li tou seki zot kapav?
20 Li pa enn fardeau pou servi Bondié couma esclave. Au contraire, sa condition-la sauve nou ar enn mauvais l’esclavage ki empeche nou pou vive heureux. Paul ti ecrire: “Parski zot finn liberé ar peché, mais zot finn vinn bann esclave Bondié, zot pé gagne zot fruit parski zot finn vinn saint, ek a la fin, [zot pou gagne] la vie eternel.” (Romains 6:22) Kan nou travail couma bann esclave pou Bondié, sa rapporte bann fruit, parski nou gagne bann bienfait grace a enn conduite saint, setadir enn conduite ki pur lor plan moral. En plus, dan l’avenir, sa service-la pou faire nou gagne la vie eternel.
21 Jéhovah li genereux envers so bann esclave. Kan nou faire tou seki nou kapav dan so service, Li ‘ouvert le ciel’ ek vide lor nou “enn benediction ziska ki personne pa mank nanyin.” (Malaki 3:10) Oui, li pou enn grand bonheur pou contigne servi Jéhovah couma so bann esclave pou l’eternité!
Eski ou rappel?
• Kifer nou vinn bann esclave Bondié?
• Couma nou montré ki nou soumette ar volonté Bondié?
• Kifer nou bizin disposé pou faire volonté Jéhovah passe avant nou prop volonté?
• Kifer fodé pa nou ‘guette bann kitsoz ki nou finn laissé derriere’ nou?
[Zimage, page 14]
L’esclavage volontaire ki ti ena en Israël, ti represente l’esclavage ki bann vrai chrétien koné
[Zimage, page 15]
Nou vinn bann esclave Bondié kan nou prend bapteme
[Zimage, page 15]
Bann chrétien faire volonté Bondié passe avant tou