Kot-sa le monde pé allé?

L’UNITÉ MONDIAL. Sa, li enn kitsoz ki faire revé. Eski c’est pa seki tou dimoune envie? Oui, finn ena beaucoup kozé lor l’unité. Allé-vini, bann reunion entre bann chef dan le monde finn concentré lor sa sujet-la. En août 2000, plus ki 1,000 chef religieux ti reuni dan Nations Unies, New York pou Sommet du millénaire pour la paix dans le monde. Zot ti discute concernant bann solution pou bann la-guerre ki ena dan le monde. Mais, conference-la mem ti donne enn l’idée lor bann desaccord ki existé dan le monde. Enn expert lor la loi musulman, ki sorti Jérusalem, ti refuse assisté sa conference-la parski enn pretre juif ti pou la. Lezot ti troublé parski pa ti invite dalaï-lama pou deux premier jour, pangar offense la Chine.

En octobre 2003, pou reunion Coopération économique Asie-Pacifique (APEC), representant bann pays ki trouve lor la cote Pacifique ti reuni en Thaïlande, pou discute bann question ki concerne securité le monde. Sa 21 nation ki ti present-la, ti promette pou detruire bann reseau terrorist, ek zot ti tombe d’accord lor bann moyen pou ameliore securité dan le monde. Pourtant, pendant sa conference-la plusieurs representant ti grogné a cause remark ki enn premier ministre ti faire. Zot ti dire ki so bann parole ti enn l’accusation rempli ar la haine, kont bann Juif.

Kifer pena okenn l’unité?

Mem si ena beaucoup kozé lor l’unité mondial, sa pé produire bien tigit resultat. Malgré bann zeffort ki beaucoup pé faire, kifer nou toujours pa finn kapav ena l’unité mondial dan 21^eme siecle?

Nou trouve enn partie reponse dan commentaire ki enn parmi bann premier ministre ki ti assisté conference APEC ti faire. Li ti dire: “Ena enn kitsoz ki appel l’orgueil national.” Oui, dimoune inn tombe net dan nationalisme. Chaque nation ek communauté racial pé laisse-li dirigé par so desir pou ena so prop gouvernement. L’envie pou vinn independant, l’esprit rivalité, ek desir pou gagne plus, finn crée enn situation kot la guerre kapav eclaté n’importe kan. Dan beaucoup cas, kan finn bizin choisir entre l’interet national ek l’interet mondial c’est l’interet national ki finn passe avant.

Enn ecrivain Psaume ti servi enn expression bien approprié pou decrire nationalisme. Li ti appel sa, “la peste ki faire gagne problem.” (Psaume 91:3) Sa finn couma enn l’epidemie pou le monde ek li finn amenn enn quantité souffrance. Nationalisme faire dimoune ena la haine pou lezot, ek li finn existé depuis bien longtemps. Zordi nationalisme encore responsable pou division, ek okenn dirigeant humain pa finn kapav arrete sa.

Beaucoup expert d’accord ki nationalisme ek bann pays ki rod zot l’interet personnel, sa-mem ki racine beaucoup problem dan le monde. Par exemple, U Thant, ancien secretaire Nation Unies ti dire: “Ena tellement beaucoup problem zordi a cause bann mauvais l’attitude . . . Parmi, ena sa l’idée nationaliste-la—‘Ki li ena tort ou-soit raison, li mo pays.’ ” Zordi bann nation tellement occupé pou rod zot l’interet personnel, ki pli allé, zot pé reclame zot prop droit pou dirige zot pays. Bann ki ena plus pouvoir pa envie perdi mem enn tigit zot pouvoir ek zot l’independance. Par exemple, l’International Herald Tribune ti faire sa commentaire-la lor l’Union européenne: “Rivalité ek mefiance, c’est seki nou trouvé avant tou dan politik européen. Pou la plupart bann pays ki forme partie dan l’Union européenne, zot encore trouve sa impossible pou accepté ki enn lot pays gagne enn pli grand l’influence ek prend la tête.”

Parole Bondié, la Bible, decrire bien resultat domination humain, kan li dire: “Dimoune finn domine dimoune pou zot prop malheur.” (Ecclésiaste 8:9) Letan zot inn separe le monde en different nation, le monde finn vive seki sa principe la Bible-la dire: “Enn kikenn ki reste dan so coin tousel, pou rod so prop desir egoïste; li pou resisté kont la sagesse ki pratik.”—Proverbes 18:1.

Nou Createur ki konn seki pli bon pou nou, jamais pa ti envie ki bann dimoune etabli zot bann prop gouvernement ek dirige zot par zot-mem. Kan bann dimoune finn faire sa, zot pa finn prend compte projet Bondié, ek zot pa finn prend compte aussi ki tou kitsoz pou Bondié. Psaume 95:3-5 dire: “Jéhovah, Li enn Bondié ki grand ek enn lé-Roi ki grand, ek li pli grand ki tou bann lezot bondié. Li ena dan so la-main tou bann profondeur la terre ki pli secret, ek tou bann sommet montagne pou Li, ek la mer ki Li-mem finn faire, sa pou Li. Li finn faire la terre ki ferme avek so la-main.” Tou dimoune ti bizin reconette Bondié couma Celui ki ena droit pou dirige zot. Kan zot etabli zot prop gouvernement, bann nation pé al kont volonté Bondié.—Psaume 2:2.

Ki nou bizin?

Sel fason pou ena l’unité mondial, c’est etabli enn gouvernement mondial ki travail dan l’interet tou dimoune. Beaucoup dimoune ki prend le temps pou reflechi lor situation ki existé dan le monde, zot d’accord avek sa. Seulement zot al rod dan mauvais direction. Par exemple, enn quantité dimoune, parmi, bann chef religieux, finn encourage bann dimoune pou mette zot confiance dan Nations Unies pou gagne l’unité mondial. Seulement, mem ki bann l’organisation humain finn bien envie faire kitsoz ki bon, jamais zot finn reussi trouve enn solution pou bann problem mondial. Au contraire, la plupart sa bann l’organisation-la inn seulement montré division ki existé parmi bann different nation.

La Bible dire nou ki nou bizin faire attention pou pa tourne vers bann l’organisation humain pou trouve solution. Li dire: “Pa mette zot confiance dan bann dimoune important, ni dan bann dimoune [ordinaire], ki pa kapav delivré personne.” (Psaume 146:3) Eski sa vedir ki nou pena okenn l’espoir pou gagne l’unité mondial? Non. Ena enn lot solution.

Beaucoup dimoune pa koné ki Bondié finn deja etabli enn gouvernement ki kapav amenn l’unité mondial. La Bible dire concernant Jéhovah: “Moi, mo’nn installe mo lé-roi lor Sion, mo montagne saint. Demann moi, ek mo pou donne toi bann nation couma to l’heritage, ek la terre entier couma to proprieté.” (Psaume 2:6, 8) Nou remarké ki dapré sa text-la, Jéhovah finn ‘installe so lé-roi,’ ki Li appel “mo garson” dan verset 7. Sa garson-la, li-mem Jésus Christ, pli grand parmi So bann garson spirituel. Li finn gagne l’autorité lor tou bann nation.

Couma nou pou gagne l’unité mondial

La plupart dimoune pa reconette sa domination ki Bondié inn etabli dan le ciel-la. Mem enn tigit aussi, bann nation pa oulé cede sa pouvoir ki zot croire zot ena-la. Mais, Bondié pa pou tolere bann ki refuse reconette So droit pou dirigé, ek gouvernement ki Li finn etabli. Psaume 2:9 dire nou ki pou arrive zot: “To [so Garson, Jésus Christ] pou casse zot avek enn sceptre en fer, ek pou crase zot pareil couma [crase] enn recipient en la-terre.” Ki zot conscient ou non, bann nation inn commence enn la-marche ki pé amenn zot vers enn situation kot Bondié pou laguerre ar zot. Dernier livre dan la Bible koz lor “bann lé-roi la terre entier” ki pé group ensam pou “la guerre grand jour Bondié, ki Tout-Puissant.” (Révélation 16:14) Bann nation ek tou sa bann division ki existé entre zot-la, pou disparette. Sa pou ouvert chemin pou ki gouvernement Bondié faire so travail sans ki personne mette baton dan so la-roue.

En tant ki lé-Roi l’univers, Jéhovah, a travers so Garson, pou servi So puissance avek sagesse pou faire bann changement ki necessaire, pou kapav ena l’unité mondial. Gouvernement Bondié pou amenn vrai l’unité, ek li pou beni tou bann ki content la justice. Kifer ou pa prend dé-trois minute pou lire Psaume 72 dan ou la-Bible? Là, ou pou trouve enn joli description prophetik seki Garson Bondié pou faire pou bann dimoune kan li pou dirigé. Bann dimoune pou konn vrai l’unité mondial, ek tou zot bann problem—dominere, la violence, la misere, etc.—pou disparette.

Dan sa lé-monde ki divisé-la, beaucoup dimoune pensé ki enn l’espoir coumsa pa realiste. Mais li enn erreur pou pense coumsa. Touletan Bondié finn realise so bann promesse dan le passé, ek nou sur ki Li pou realise so bann promesse dan l’avenir. (Isaïe 55:10, 11) Eski ou ti pou content trouve sa changement-la? Li enn kitsoz possible. En realité, ena deja enn peuple ki pé prepare-zot pou sa lepok-la. Zot sorti dan tou nation, mais au lieu ki zot laguerre, zot pé soumette dan l’unité ar gouvernement Bondié. (Isaïe 2:2-4) Kisannla zot été? C’est bann Témoins de Jéhovah. Kifer ou pa accepté l’invitation pou assisté zot bann reunion? Surement, ou pou apprecié compagnie agreable enn peuple ki kapav aide ou pou soumette ar gouvernement Bondié, ek pou konn enn l’unité ki jamais pa pou fini.

[Bann zimage, page 7]

Bann dimoune dan tou nation pé prepare-zot pou vive dan enn monde kot ena l’unité

[Remerciement photo page 4]

Saeed Khan/AFP/Getty Images

[Remerciement photo page 5]

Enn madame ki dan chagrin: Igor Dutina/AFP/Getty Images; bann manifestant: Said Khatib/AFP/Getty Images; bann char la guerre: Joseph Barrak/AFP/Getty Images