La loi lor l’amour ki ecrire dan leker
“Mo pou mette mo la-loi dan zot, ek mo pou ecrire li dan zot leker.”—JÉRÉMIE 31:33.
1, 2. (a) Ki nou pou examiné asterla? (b) Couma eski Jéhovah ti montré so presence lor montagne Sinaï?
DAN toulé-deux lartik ki nou finn examiné avant, nou finn aprann ki kan Moïse ti desann lor montagne Sinaï, ti ena bann rayon la lumiere ki ti reflete la gloire Jéhovah, ki ti sorti lor so figure. Nou ti koz aussi lor voile ki Moïse ti mette lor so figure. Asterla, anou examine enn sujet ki ena enn rapport avek sa l’evenement-la ek ki important pou bann chrétien zordi.
2 Kan Moïse ti la-haut lor montagne Sinaï, li ti gagne bann instruction ar Jéhovah. Bann Israélite ki ti rassemblé devant montagne Sinaï ti trouve presence Bondié dan enn fason extraordinaire. “Ti commence ena l’orage ek zeclair, ek ti ena enn gros nuage lor montagne ek ti ena enn son cor, bien fort, ek le peuple ki ti dan camp, ti commence tremblé. . . . Ek ti ena la fumée partout lor montagne Sinaï, parski Jéhovah ti desann lor sa montagne-la dan enn difé; ek sa la-fumée-la ti pé monte couma la fumée enn four, ek montagne-la entier ti pé tremblé beaucoup.”—Exode 19:16-18.
3. Couma Jéhovah ti donne bann Israélite les Dix Commandements, ek ki sa peuple-la ti comprend?
3 Jéhovah ti koz avek le peuple a travers enn ange, Li ti donne zot bann la-loi ki plitar ti appel les Dix Commandements. (Exode 20:1-17) Alors, pa ti ena okenn doute ki c’est Bondié Tout-Puissant ki ti donne sa bann la-loi-la. Jéhovah ti ecrire sa bann commandement-la lor bann tablette ros—bann tablette ki Moïse ti crasé kan li ti trouve bann Israélite pé adore enn veau en or. Jéhovah ti ré-ecrire sa bann commandement-la lor enn ros. Sa fois-la, kan Moïse ti desann lor montagne avek sa bann tablette-la, ti ena bann rayon la lumiere ki ti pé sorti lor so figure. La, zot tou ti pou comprend ki sa bann la-loi-la ti ena enn grand l’importance.—Exode 32:15-19; 34:1, 4, 29, 30.
4. Kifer les Dix Commandements ti bien important?
4 Ti mette sa deux tablette lor ki les Dix Commandements ti ecrire-la, dan l’arche de l’alliance, ki ti trouve dan Très-Saint dan tabernacle, ek plitar dan Très-Saint dan temple. Bann principe fondamental la Loi Moïse ti basé lor sa dix commandement-la, ek enn gouvernement national ki ti pou dirigé par Bondié Li-mem, ti pou basé aussi lor sa bann commandement-la. Zot ti montré ki Jéhovah ti pé traite avek enn peuple special, enn peuple ki Li’nn choisir.
5. Dan ki fason eski bann la-loi ki Bondié ti donne bann Israélite ti montré so l’amour?
5 Sa bann la-loi-la faire nou konn beaucoup kitsoz lor Jéhovah, surtout so l’amour pou so peuple. Zot ti vrai-mem enn grand cadeau pou bann ki ti obeir zot! Enn bibliste ti dire ki les Dix Commandements, zot beaucoup pli superieur ki n’importe ki system moral ki dimoune finn kapav inventé. Concernant la Loi mosaïk en entier, Jéhovah ti dire: “Si zot obeir tou seki mo dire zot faire, ek zot garde mo l’alliance, lerla vrai-mem zot pou vinn mo di-bien special parmi tou bann lezot peuple, parski la terre entier pou moi. Ek zot pou vinn pou moi enn royaume pretre ek enn nation saint.”—Exode 19:5, 6.
Enn la-loi ki ecrire dan leker
6. Ki la loi finn ena plus valeur ki bann la-loi ki ti ecrire lor bann tablette ros?
6 Oui, sa bann la-loi-la ti ena enn grand valeur. Mais eski ou koné ki bann chrétien oint ena enn kitsoz ki ena beaucoup plus valeur ki bann la-loi ki’nn ecrire lor bann tablette ros? Jéhovah ti annoncé ki Li pou faire enn nouveau l’alliance, ki pa pou pareil avek l’alliance la Loi ki Li ti faire avek nation Israël. Li ti dire: “Mo pou mette mo la-loi dan zot, ek mo pou ecrire li dan zot leker.” (Jérémie 31:31-34) Jésus, mediateur nouveau l’alliance, pa ti ecrire enn code la-loi pou so bann disciple. Li ti grave la loi Jéhovah dan l’esprit ek dan leker so bann disciple par so bann parole ek so bann action.
7. Kisannla ti gagne “la loi Christ” en premier, ek kisannla ti commence suive sa la-loi-la plitar?
7 Sa la-loi-la appel “la loi Christ.” C’est pa nation Israël, bann descendant Jacob ki ti gagne sa, mais Jéhovah ti donne sa en premier enn nation spirituel, “Israël Bondié.” (Galates 6:2, 16; Romains 2:28, 29) Israël Bondié, c’est bann chrétien ki finn oint ar l’esprit saint. Avek le temps, “enn grand la-foule” ki sorti dan tou nation ek ki envie adore Jéhovah zot aussi, finn joinde ensam avek sa bann chrétien oint-la. (Révélation 7:9, 10; Zekaria 8:23) Sa deux group-la forme “enn sel troupeau” ki dirigé par “enn sel berger,” zot suive “la loi Christ” ek zot laisse sa la-loi-la guide zot dan tou seki zot faire.—Jean 10:16.
8. Ki difference ti ena entre la Loi mosaïk ek la loi Christ?
8 Bann Israélite ti obligé suive la Loi mosaïk parski zot ti né dan nation Israël. Mais bann chrétien zot, zot obeir la loi Christ parski zot finn choisir pou faire sa. Bann kitsoz couma race ek l’endroit kot enn dimoune inn né, zot pena okenn l’importance. Bann chrétien aprann pou konn Jéhovah ek so bann principe, ek zot envie faire so volonté. Parski zot ena la loi Bondié “dan zot,” coumadir sa finn ecrire “dan zot leker,” bann chrétien oint pa obeir Bondié zis parski Li kapav puni bann ki desobeir Li; ni zot obeir zis par devoir. Si zot obeir Bondié, c’est parski zot l’obeissance basé lor enn kitsoz ki pli important ek ki beaucoup pli fort. Bann membre lezot brebis aussi obeir Bondié parski zot ena so la-loi dan zot leker.
Bann la-loi ki basé lor l’amour
9. Couma Jésus ti montré ki tou bann la-loi Jéhovah zot basé lor l’amour?
9 Nou kapav servi enn sel mot pou montré lor ki tou bann la-loi ek bann l’ordre Jéhovah basé: l’amour. L’amour ti toujours, ek li pou toujours enn kitsoz fondamental dan vrai l’adoration. Kan enn kikenn ti demann Jésus ki pli grand commandement dan la Loi, li ti reponn: “To bizin content Jéhovah to Bondié avek tou to leker ek avek tou to nâme ek avek tou to l’esprit.” Ek deuxieme commandement: “To bizin content to prochain couma to-mem.” Lerla li ti dire: “La Loi en entier, ek bann Prophete aussi, zot basé lor sa deux commandement-la.” (Matthieu 22:35-40) Par sa bann parole-la, Jésus inn montré ki pa zis la Loi avek les Dix Commandements, mais aussi tou bann Écritures hébraïques, ti basé lor l’amour.
10. Couma nou koné ki la loi Christ, li basé lor l’amour?
10 Eski la loi ki dan leker bann chrétien, li basé li aussi lor l’amour pou Bondié ek pou nou prochain? Oui! Pou nou kapav suive la loi Christ, nou bizin ena enn l’amour sincere pou Bondié. Dan sa la-loi-la, ena aussi enn nouveau commandement—bann chrétien bizin manifesté sakenn pou so camarade, enn l’amour ki basé lor enn l’esprit sacrifice. Zot bizin content zot camarade pareil couma Jésus ti content so bann disciple, ek li ti disposé pou donne so la-vie pou so bann camarade. Li ti enseigne so bann disciple pou content Bondié ek pou ena l’amour entre zot, pareil couma li ti content zot. Sa l’amour extraordinaire ki bann chrétien ena entre zot-la, c’est qualité principal ki pou faire lezot dimoune koné kisannla ki bann vrai chrétien. (Jean 13:34, 35; 15:12, 13) Jésus ti mem dire zot ki zot bizin content zot l’ennemi.—Matthieu 5:44.
11. Couma Jésus ti montré l’amour pou Bondié ek pou bann dimoune aussi?
11 Jésus ti donne enn l’exemple parfait dan fason ki bizin manifesté l’amour. Kan li ti enn creature spirituel dan le ciel, li ti accepté avek plaisir pou vinn lor la terre pou faire volonté so Papa. Li pa ti zis donne so la-vie pou ki lezot dimoune kapav vive pou touletan, li ti aussi montré bann dimoune couma zot bizin vive. Li ti ena l’humilité, li ti bon ek li ti prend lezot compte. Li ti soulage bann dimoune ki ti dan bann problem ek bann ki ti pé passe misere. Li ti aussi dire bann “parole la vie eternel,” ek li ti touletan pé aide bann dimoune pou konn Jéhovah.—Jean 6:68.
12. Kifer nou kapav dire ki ena enn rapport direct entre l’amour pou Bondié ek l’amour pou nou prochain?
12 Avredir, ena enn rapport direct entre l’amour pou Bondié ek l’amour pou nou prochain. L’apotre Jean ti ecrire: “L’amour sorti kot Bondié . . . Si enn kikenn dire: ‘Mo content Bondié,’ et pourtant li ena la haine pou so frere, li enn menteur. Parski enn kikenn ki pa content so frere, ki li’nn trouvé, pa kapav content Bondié, ki li pa’nn trouvé.” (1 Jean 4:7, 20) Oui, l’amour sorti kot Jéhovah, ek Jéhovah, Li aussi personnifié sa qualité-la. Tou seki Jéhovah faire, Li faire sa par amour. Si nou, nou kapav montré l’amour, c’est parski Li finn faire nou dan so ressemblance. (Genèse 1:27) Kan nou content nou prochain, nou montré ki nou content Bondié.
Si nou ena l’amour, nou pou obeir
13. Si nou envie content Bondié, ki nou bizin faire en premier?
13 Couma nou kapav content Bondié, mem si nou pa kapav trouve Li? Premierement, li bien important ki nou aprann konn Li. Nou pa kapav vrai-mem content ek faire confiance enn dimoune ki nou pa koné. Alors, pou nou aprann konn Bondié, so Parole encourage nou pou lire la Bible, pou prié Li, ek pou frequente bann dimoune ki deja konn Li ek ki content Li. (Psaume 1:1, 2; Philippiens 4:6; Hébreux 10:25) Dan la Bible, ena quatre Evangile ki bien utile, parski zot faire nou konn personnalité Jéhovah a travers la vie ek ministere Jésus Christ. Plus nou konn Bondié ek nou reconnaissant envers Li pou l’amour ki Li ena pou nou, plus nou pou envie obeir Li ek imite so personnalité. Oui, nou l’amour pou Bondié faire nou obeir Li.
14. Kifer nou kapav dire ki bann la-loi Bondié pa lourd pou obeir?
14 Kan nou content enn dimoune, nou koné ki li content ek ki li pa content, ek nou prend sa compte. Nou pa envie deplaire bann dimoune ki nou content. L’apotre Jean ti ecrire: “Ala seki vedir l’amour pou Bondié: nou bizin suive so bann commandement; ek pourtant so bann commandement pa lourd.” (1 Jean 5:3) Sa bann commandement-la, zot pa lourd pou obeir, ni zot beaucoup. C’est l’amour ki guide nou. Nou pa bizin aprann par coeur enn code kot ena enn quantité regle pou koné ki nou bizin faire dan tou ti kitsoz; nou laisse l’amour pou Bondié guide nou. Si nou content Bondié, nou pou faire so volonté avek plaisir. Sa pou faire nou gagne so faveur ek c’est nou-mem ki pou tire profit, parski Bondié donne nou toujours bann conseil dan nou l’avantage.—Isaïe 48:17.
15. Ki pou pousse nou pou imite Jéhovah? Expliké.
15 L’amour pou Bondié pousse nou pou imite so bann qualité. Kan nou content enn dimoune, nou admire so bann qualité ek nou essaye ressemblé li. Guette relation ki ti ena entre Jéhovah ek Jésus. Zot ti ensam dan le ciel, kitfois pou plusieurs milliard l’année. Ti ena enn l’amour profond ek pur entre zot. Jésus ti ressemblé so Papa dan enn fason tellement parfait ki li ti kapav dire so bann disciple: “Kikenn ki finn trouve moi, finn trouve aussi mo Papa.” (Jean 14:9) Plus nou gagne la connaissance lor Jéhovah ek lor so Garson, ek nou developpe enn grand l’amour pou zot, plus nou pou envie ressemblé zot. Nou l’amour pou Jéhovah ensam avek l’aide so l’esprit saint, pou permette nou pou “tire [nou] vié personnalité avek so bann pratik, ek mette nouveau personnalité lor [nou].”—Colossiens 3:9, 10; Galates 5:22, 23.
L’amour en action
16. Couma eski nou montré nou l’amour pou Bondié ek pou nou prochain kan nou preché ek enseigné?
16 En tant ki chrétien, nou laisse nou l’amour pou Bondié ek pou nou prochain pousse nou pou preche Royaume Bondié ek pou faire bann disciple. Kan nou faire sa, nou faire Jéhovah plaisir, parski “Li envie ki tou sorte qualité dimoune sauvé ek gagne enn connaissance exact lor la verité.” (1 Timothée 2:3, 4) Nou kapav lerla ena la joie pou aide lezot pou ki zot ena la loi Christ ecrire dan zot leker. Nou content aussi kan nou trouve zot transforme zot personnalité pou reflete bann qualité Jéhovah. (2 Corinthiens 3:18) Oui, pli grand cadeau ki nou kapav donne bann dimoune, c’est aide zot pou konn Bondié. Bann ki accepté l’amitié Jéhovah kapav profite sa pou touletan.
17. Kifer li sage ki nou developpe l’amour pou Bondié ek pou nou prochain, plutot ki l’amour pou bann kitsoz materiel?
17 Nou pé vive dan enn lé-monde kot dimoune attache enn grand l’importance ar bann kitsoz materiel, ek certain mem ena l’amour pou sa bann kitsoz-la. Pourtant, bann kitsoz materiel, zot pa eternel. Zot kapav perdi, ou-soit abimé. (Matthieu 6:19) La Bible donne nou sa l’avertissement-la: “Le monde pé al fini ek so desir aussi, mais celui ki faire volonté Bondié, pou reste pou toujours.” (1 Jean 2:16, 17) Oui, Jéhovah pou reste pou toujours, ek bann ki content Li ek ki servi Li, zot aussi pou reste pou toujours. Alors, eski li pa pli sage ki nou developpe l’amour pou Bondié ek pou nou prochain, plutot ki nou rod bann kitsoz ki ena dan le monde, bann kitsoz ki zis temporaire?
18. Couma enn missionnaire finn montré enn l’amour ki basé lor l’esprit de sacrifice?
18 Bann dimoune ki contigne montré l’amour, zot glorifié Jéhovah. Anou prend l’exemple Sonia, enn missionnaire dan Sénégal. Li ti faire l’etude la Bible avek enn madame ki ti appel Heidi. Sa madame-la ti gagne sida avek so mari, ki pa ti enn Témoin de Jéhovah. Apré la mort so mari, Heidi ti prend bapteme, mais bientot, so la-santé finn commence deterioré, ek li ti bizin al reste l’hopital. Sonia raconté: “Bann dimoune ki ti travail dan l’hopital ti faire tou seki zot ti kapav, mais pa ti ena assez dimoune pou occupe li. Ti demann bann volontaire dan congregation pou vinn occupe Heidi dan l’hopital. Mo ti al passe deuxieme la-nuit avek li ek mo ti dormi lor enn natte, pré kot so lili. Mo ti aidé pou soigne li ziska so la-mort. Docteur ki ti en charge-la, ti dire moi: ‘Nou pli grand problem c’est ki souvent, couma bann famille koné ki enn membre dan zot famille finn gagne sida, zot abandonne li. Mais ou, ou pa so famille, ou sorti dan enn lot pays, ou pa mem race ki li, kifer ou finn accepté pou prend risk pou attrape enn maladie?’ Mo ti explik li ki, pou moi, Heidi ti vrai-mem couma mo soeur, mo ti senti-moi proche avek li coumadir nou ti ena mem mama ek mem papa. Parski Heidi ti pareil couma enn soeur pou moi, c’est avek plaisir ki mo finn occupe li.” Li bon nou koné aussi ki Sonia pa finn contaminé parski li finn occupe Heidi.
19. Kan nou ena la loi Bondié dan nou leker, ki l’occasion nou pou saisi?
19 Parmi bann serviteur Jéhovah, nou ena beaucoup l’exemple bann dimoune ki finn montré enn l’amour ki basé lor enn l’esprit de sacrifice. Pena okenn code la-loi ki finn ecrire ki identifié kisannla ki pé servi Bondié zordi. Mais plutot, nou trouvé ki seki finn ecrire dan Hébreux 8:10, pé realisé. Dan sa verset-la, “Jéhovah dire: ‘Sa-mem l’alliance ki mo pou faire avek bann Israélite apré sa bann jour-la, mo pou mette mo bann la-loi dan zot l’esprit, ek mo pou ecrire sa dan zot leker. Ek mo pou vinn zot Bondié, ek zot, zot pou vinn mo peuple.’ ” Anou toujours accorde enn grand valeur ar la loi lor l’amour ki Jéhovah finn ecrire dan nou leker, ek anou saisi tou l’occasion pou montré sa qualité-la.
20. Kifer la loi Christ li enn di-bien ki ena enn grand valeur?
20 C’est vrai-mem enn grand la-joie pou servi Bondié ensam avek nou bann frere ek soeur ki pé manifesté sa l’amour-la dan le monde entier! Bann ki ena la loi Christ dan zot leker, zot ena enn di-bien ki ena enn grand valeur, dan sa lé-monde kot pena l’amour-la. Zot pa zis gagne l’amour Jéhovah, mais zot aussi apprecié beaucoup sa grand l’amour ki ena entre zot-la. La Bible dire: “Guetté! Guette couma li bon ek li enn plaisir pou bann frere reste ensam dan l’unité!” Mem si bann Témoins de Jéhovah reste dan beaucoup nation, zot koz beaucoup langue, ek zot ena beaucoup different culture, ena enn l’unité entre zot ki pena dan okenn lot religion. Sa l’unité-la faire zot gagne faveur Jéhovah. Enn ecrivain Psaume ti ecrire: “Jéhovah finn donne l’ordre ki bizin ena benediction là [parmi enn peuple ki uni par l’amour], oui la vie pou touletan.”—Psaume 133:1-3.
Ki ou pou reponn?
• Ki l’importance les Dix Commandements ti ena?
• Ki été la loi ki ecrire dan bann leker?
• Ki role l’amour ena dan “la loi Christ”?
• Dan ki fason eski nou manifesté nou l’amour pou Bondié ek pou nou prochain?
[Zimage, page 19]
Bann Israélite ti ena bann la-loi ki ti ecrire lor bann tablette ros
[Zimage, page 20]
Bann chrétien ena la loi Bondié dan zot leker