Eski ou reconette signe presence Jésus?
PERSONNE pa envie tombe bien malade, ou-soit passe par enn catastrophe. Pou li kapav evite sa qualité problem-la, enn dimoune ki ena la sagesse prend compte bann signe ki montré ki ena danger, ek li faire seki necessaire pou evite sa. Jésus ti decrire enn signe special ki nou bizin reconette. Sa signe-la ti pou ena enn l’effet lor la terre entier ek li ti pou affecté tou dimoune, ou ek ou famille aussi.
Jésus ti koz lor Royaume Bondié ki pou tire tou seki mauvais ek faire la terre vinn enn paradi. So bann disciple ti envie konn plus lor la ek kan sa Royaume-la ti pou vini. Zot ti demandé: “Ki signe pou montré to presence ek lepok la fin sa system-la?”—Matthieu 24:3.
Jésus ti koné ki apré so la-mort ek so resurrection, beaucoup lé-temps ti pou passé avant ki li gagne pouvoir dan le ciel couma le Roi messianik pou dirige la terre. Parski bann dimoune pa ti pou trouvé kan li ti pou gagne pouvoir couma le Roi, Jésus ti donne enn signe ki ti pou permette so bann disciple reconette so “presence” ek aussi “lepok la fin sa system-la.” Dan sa signe-la ena plusieurs kitsoz ki, kan mette zot ensam, faire nou koné ki Jésus present dan so royaume.
Dan zot l’Evangile, Matthieu, Marc, ek Luc, sakenn raconte reponse ki Jésus ti donné. (Matthieu, chapitre 24 ek 25; Marc, chapitre 13; Luc, chapitre 21) Bann lezot ecrivain la Bible finn ajoute bann detail ar sa signe-la. (2 Timothée 3:1- 5; 2 Pierre 3:3, 4; Révélation 6:1-8; 11:18) Pena assez place dan sa lartik-la pou examine tou bann detail, mais nou pou guette cinq element important ki forme partie dan sa signe ki Jésus ti mentionné-la. Ou pou trouvé ki sa ena enn signification ki important pou ou personnellement.—Guette l’encadré lor page 6.
“Enn changement ki’nn mark commencement enn nouveau lepok”
“Nation pou leve kont nation ek royaume kont royaume.” (Matthieu 24:7) Dapré journal allemand Der Spiegel, avant 1914 bann dimoune “ti croire dan enn l’avenir extraordinaire kot ti pou ena plus liberté, progré, ek prosperité.” Mais, tou kitsoz inn changé. Magazine GEO dire: “La guerre ki ti commencé en août 1914 ek ti fini en novembre 1918 ti enn l’evenement ki ti faire peur. Li ti faire enn grand changement dan l’histoire; li ti faire enn separation entre seki ti passé avant ek seki ti pou passé apré.” Plus ki 60 million soldat ki ti sorti dan cinq continent ti prend part dan sa la-guerre terrible-la. Toulé-jour ti ena apepré 6,000 soldat ki ti trouve la mort. Depuis sa, bann historien chaque generation ek tou bann different l’opinion politik finn considere “bann l’année 1914 ziska 1918 couma enn changement ki’nn mark commencement enn nouveau lepok.”
Premier Guerre mondial ti bouleverse la societé dan enn fason permanent, ek li ti aussi amenn le monde dan bann dernier jour sa system-la. Le reste 20eme siecle finn konn plus la-guerre, ek plus terrorisme. Situation pa finn amelioré dan commencement 21eme siecle. En plus la guerre, nou pé trouve lezot element sa signe-la.
La famine, bann l’epidemie ek bann tremblement de terre
“Pa pou ena assez mangé.” (Matthieu 24:7) Ti ena la famine en Europe pendant Premier Guerre mondial, ek depuis sa, la famine finn contigné dan le monde. Historien Alan Bullock ecrire ki, en 1933 dan la Russie ek dan l’Ukraine, “enn grand quantité dimoune ki ti pé mort de faim ti pé marché partout-partout dan la campagne . . . Bann lekor ti empilé enn lor lot dan bord chemin.” En 1943, journaliste T. H. White ti temoin enn la-famine dan province Henan en Chine. Li ti ecrire: “Kan ena la famine, dimoune kapav mange preské tou kitsoz; ek lekor enn dimoune kapav crase sa bann kitsoz-la, mange zot ek converti zot en l’energie. Mais fodé la mort pé vrai-mem menace enn dimoune pou faire li accepté mange bann kitsoz ki personne pa ti’nn pense pou mangé avant.” Malheureusement, la famine inn vinn enn kitsoz banal en Afrique pendant sa bann dernier dizaine l’année-la. Mem si la terre produire assez mangé pou tou dimoune, FAO, l’Organisation des Nations unies pour l’alimentation et l’agriculture, estimé ki dan le monde entier ena 840 million dimoune ki pena assez mangé.
“Pou ena bann l’epidemie dan enn l’endroit apré lot.” (Luc 21:11) Journal allemand, Süddeutsche Zeitung dire: “Inn calculé ki la grippe espagnol inn touye entre 20 million ek 50 million dimoune en 1918, plus ki seki la peste noire ou-soit Premier Guerre mondial finn touyé.” Depuis sa, bann maladie couma malaria, la variole, tuberculose, polio, ek choléra finn affecté enn grand quantité dimoune. Ek bann dimoune gagne peur kan zot trouve maladie sida pé contigne augmenté sans ki kapav faire nanyin. Zordi nou pé vive dan enn situation ki deconcerte nou: Malgré bann grand progré dan domaine medical, bann maladie pé persisté. Sa situation ki le monde jamais pa finn koné avant-la, montré dan enn fason clair ki nou pé vive dan enn lepok ki pa pareil couma lezot lepok.
“Bann tremblement de terre.” (Matthieu 24:7) Dan sa dernier 100 an-la, bann centaine millier dimoune inn perdi la vie dan bann tremblement de terre. Dapré enn certaine source l’information, depuis 1914, chaque l’année finn ena apepré 18 tremblement de terre assez fort pou abime bann batiment ek faire la terre ouvert. Apepré enn fois par an finn ena bann tremblement de terre ki’nn touye pli beaucoup dimoune ek ki’nn assez fort pou crase bann batiment net. Malgré progré dan technologie, ena toujours beaucoup dimoune ki pé mort parski beaucoup la-ville kot population pé augmenté, trouve lor bann place kot bann plaque roche enba la terre pa stable.
Enn bon nouvel!
La plupart bann element signe dernier jour c’est bann kitsoz ki faire bann dimoune souffert. Mais Jésus ti aussi koz lor enn bon nouvel.
“Sa bon nouvel lor royaume-la pou preché partout kot dimoune resté lor la terre couma enn temoignage pou tou bann nation.” (Matthieu 24:14) Travail ki Jésus li-mem ti commencé, setadir predication bon nouvel lor Royaume, ti pou arrive so point pli important pendant bann dernier jour. C’est sa-mem ki’nn arrivé. Bann Témoins de Jéhovah pé preche message la Bible ek pé enseigne bann dimoune ki disposé, pou applik seki zot pé aprann dan zot la-vie toulé-jour. En ce moment, ena plus ki six million Témoins ki preché dan 235 pays ek dan plus ki 400 langage.
Nou remarké ki Jésus pa ti dire ki tou bann activité la vie ti pou arreté parski bann condition vinn difficile dan le monde. Li pa ti dire aussi ki nou pou trouve zis enn sel element sa signe-la arrivé dan le monde entier. Mais li ti annoncé ki enn quantité l’evenement ensam pou forme enn signe ki nou ti pou kapav trouvé n’importe kot-sa nou été lor la terre.
Si ou guette pli loin ki zis enn sel l’evenement, eski ou trouve enn signe composé ki pé arrivé partout lor la terre? Seki pé arrivé lor la terre affecté ou ek ou famille. Kitfois nou kapav demann nou-mem, kifer ena zis enn tigit dimoune-mem ki prend sa compte?
Seki nou envie passe avant
“Defann nagé,” “Attention courant!,” “Ralenti.” Sa c’est certain signe ek l’avertissement ki dimoune trouvé mais ki souvent zot pa prend compte. Kifer? Parski nou influencé facilement par seki nou envie. Par exemple, nou kapav pensé ki nou bizin roule pli vite ki la loi permette, ou-soit nou kapav bien envie nagé dan enn l’endroit kot pa gagne droit. Mais kan nou pa prend compte bann signe, li bien dangereux.
Par exemple, parfois ena tourist ki mort kan la neige degringolé en quantité a enn grand vitesse lor bann montagne Alpes en Autriche, en France, en Italie, ek en Suisse, parski zot pa prend compte bann l’avertissement ki encourage zot pou faire ski ou-soit snowboard zis lor bann parcours ki sur. Dapré journal Süddeutsche Zeitung, beaucoup tourist ki pa prend compte sa bann l’avertissement-la, suive enn fason pensée ki dire: “Pena l’amusement si pa prend risk.” Malheureusement kan pa prend compte bann l’avertissement, sa kapav ena bann resultat bien grave.
Ki bann raison dimoune ena pou zot pa prend compte signe ki Jésus ti decrire? Zot desir pou vinn pli riche kapav faire zot pa trouve clair, kitfois zot laisse-zot affecté par l’indifference, kitfois zot paralysé parski zot pa arrivé decidé ki zot pou faire, kitfois la routine inn vinn enn piege pou zot, ou-soit kitfois zot peur pangar zot perdi zot position dan la societé. Eski enn parmi sa bann kitsoz-la pé empeche ou prend compte signe presence Jésus? Eski li pa pou pli bon ki ou reconette sa signe-la ek lerla faire seki necessaire pou faire?
La vie lor la terre ki pou vinn enn paradi
Toulé-jour plus dimoune pé prend compte signe ki Jésus là. Kristian, enn jeune missié en Allemagne, dire: “Nou pé vive dan bann lé-temps bien difficile. Li sur ki nou pé vive dan bann ‘dernier jour.’ ” Li ek so madame passe beaucoup lé-temps pou koz avek lezot lor Royaume messianik. Frank reste dan mem pays. Li ek so madame encourage lezot grace a sa bon nouvel ki ena dan la Bible-la. Frank dire: “A cause situation ki ena dan le monde, zordi beaucoup dimoune tracassé concernant l’avenir. Nou essaye encourage zot grace a bann prophetie ki ena dan la Bible concernant la terre ki pou vinn enn paradi.” C’est dan sa fason-la ki Kristian ek Frank aidé pou realise enn l’aspect sa signe ki Jésus ti donné-la—predication bon nouvel lor Royaume.—Matthieu 24:14.
Kan bann dernier jour arrive zot point final, Jésus pou detruire sa vié system-la ek bann dimoune ki soutenir li. Lerla Royaume messianik pou dirige bann kitsoz ki concerne la terre, seki pou amenn bann condition paradi pareil couma ti annoncé. Pou nepli ena maladie ek la mort, ek bann dimoune ki’nn mort pou ressuscité pou vive lor la terre. Sa c’est bann kitsoz extraordinaire ki bann ki reconette signe ki identifié nou lepok, pé attann. Eski li pa pou enn bon kitsoz pou aprann konn plus lor sa signe-la ek seki nou bizin faire pou kapav gagne la vie sauve kan la fin sa system-la vini? Surement, chaque dimoune bizin prend sa compte tout suite, pa vrai?—Jean 17:3.
[L’encadré, page 4]
Jésus ti annoncé ki enn quantité l’evenement ensam ti pou forme enn signe ki nou ti pou kapav trouvé n’importe kot-sa nou été lor la terre
[L’encadré, page 6]
Eski ou trouve enn signe composé ki pé arrivé partout lor la terre?
[L’encadré, page 6]
BANN SIGNE DERNIER JOUR
La guerre couma jamais finn ena.—Matthieu 24:7; Révélation 6:4
La famine.—Matthieu 24:7; Révélation 6:5, 6, 8
Bann l’epidemie.—Luc 21:11; Révélation 6:8
Desobeissance la loi ki augmenté.—Matthieu 24:12
Bann tremblement de terre.—Matthieu 24:7
Lé-temps critik ki difficile pou supporté.—2 Timothée 3:1
Enn grand l’amour pou l’argent.—2 Timothée 3:2
Bann zenfant pa ecoute zot parent.—2 Timothée 3:2
Enn mank l’affection naturel.—2 Timothée 3:3
Content plaisir plutot ki content Bondié.—2 Timothée 3:4
Enn mank maitrise de soi.—2 Timothée 3:3
Pena l’amour pou seki bien.—2 Timothée 3:3
Pa prend compte danger ki pé vini.—Matthieu 24:39
Bann moqueur pa’lé croire ki nou pé vive dan dernier jour.—2 Pierre 3:3, 4
Royaume Bondié pé preché partout lor la terre.—Matthieu 24:14
[Remerciement photo page 5]
Bann soldat Premier Guerre mondial: Sorti dan livre The World War—A Pictorial History, 1919; enn famille pauvre: AP Photo/Aijaz Rahi; enn garson ki gagne polio: © WHO/P. Virot