Question bann lecteur
Eski ti ena zis deux tablette ros dan l’arche de l’alliance, ou-soit ti ena encore lezot kitsoz ladan?
En 1026 a.n.l., ti faire l’inauguration temple Salomon. Sa lepok-la, “pa ti ena nanyin dan l’Arche apart sa deux tablette ki Moïse ti donné, en Horeb, kan Jéhovah ti faire enn l’alliance avek bann Israélite, letan zot ti pé sorti l’Égypte.” (2 Chroniques 5:10) Mais, sa pa ti touletan coumsa.
“Dan troisieme mois apré ki bann Israélite ti quitte l’Égypte,” zot ti rente dan desert Sinaï. (Exode 19:1, 2) Apré sa, Moïse ti al lor montagne Sinaï ek là, li ti gagne deux tablette la Loi. Li raconté: “Alors mo’nn retourné ek mo’nn desann lor montagne ek apré sa, mo’nn mette sa deux tablette-la dan l’arche ki mo ti faire, pou ki zot reste là, pareil couma Jéhovah ti’nn donne moi l’ordre pou faire.” (Deutéronome 10:5) Sa l’arche-la ti enn coffre temporaire ki Jéhovah ti demann Moïse faire, pou mette sa bann tablette la Loi-la. (Deutéronome 10:1) Mais, c’est plitar ki l’arche de l’alliance li-mem, ti’nn paré vers la fin l’année 1513 a.n.l.
Pa trop longtemps apré zot delivrance en Égypte, bann Israélite ti’nn commence plaigné concernant mangé. Alors Jéhovah ti donne zot la manne. (Exode 12:17, 18; 16:1-5) C’est là kot Moïse ti dire Aaron: “Prend enn pot, ek rempli li avek enn omer la manne ek pose sa devant Jéhovah couma enn kitsoz ki bizin gardé dan tou zot generation.” La Bible dire: “Alors, pareil couma Jéhovah ti demann Moïse, Aaron ti depose sa devant Témoignage [enn place kot ti garde bann document important], couma enn kitsoz ki bizin gardé.” (Exode 16:33, 34) Sans doute Aaron ti ramasse la manne dan enn pot sa lepok-la mem, mais seulement, ti bizin attann ki Moïse fini termine l’Arche ek mette bann tablette ladan, pou ki Aaron kapav depose sa pot-la devant Témoignage.
Pareil couma nou’nn remarké, Moïse ti’nn construire l’arche de l’alliance vers la fin 1513 a.n.l. C’est bien apré, kan Qorah ek lezot ti rebellé ki ti’nn mette baton Aaron dan l’Arche. L’apotre Paul mentionné ki ti ena ‘pot en or avek la manne ladan ek baton Aaron ki ti bourgeonné, ek bann tablette l’alliance dan l’arche.’—Hébreux 9:4.
La manne ti enn disposition ki Jéhovah ti’nn prend pou nourri bann Israélite pendant 40 an ki zot ti dan desert. Kan ‘zot ti commence mange seki zot ti recolté dan pays’ ki ti promette zot, Jéhovah ti arrete donne zot la manne. (Josué 5:11, 12) Ti ena enn raison kifer ti mette baton Aaron dan l’arche de l’alliance—sa ti enn signe ou-soit enn preuve kont enn generation rebelle. Nou kapav comprend par la, ki baton Aaron ti’nn reste là pendant au moins sa lé-temps ki bann Israélite ti passé dan desert-la. Dan sa cas-la, li possible ki ti’nn retire baton Aaron ek pot en or avek la manne ladan dan l’arche de l’alliance enn tipé apré ki zot ti rente dan la Terre promise ek enn tipé avant l’inauguration temple Salomon.