Bann bon distraction ki faire di-bien
“Kan zot pé mangé, kan zot pé boire ou-soit n’importe ki kitsoz ki zot pé faire, faire tou pou la gloire Bondié.”—1 CORINTHIENS 10:31.
1, 2. Kifer nou kapav considere bann moment ki faire nou plaisir, couma “enn don ki Bondié donné,” mais ki l’avertissement bien franc la Bible donne nou?
LI NORMAL ki nou envie faire bann kitsoz ki faire nou plaisir. Jéhovah Li enn Bondié heureux, Li envie ki nou profite la vie ek Li’nn donne nou tou seki nou bizin pou sa. (1 Timothée 1:11; 6:17) Le roi Salomon ki ti ena beaucoup sagesse, ti ecrire: “Mo finn aprann ki pena nanyin ki pli bon . . . ki kan zot dan la joie . . . ek aussi ki tou dimoune mangé, ek boire ek satisfait parski zot finn travail dur. Sa c’est enn don ki Bondié donné.”—Ecclésiaste 3:12, 13.
2 Kan nou faire enn pause dan nou bann activité pou profite bann bon travail ki nou finn faire, sa faire nou di-bien, surtout kan nou partage sa satisfaction-la avek bann membre nou famille ou avek bann camarade. Nou kapav considere sa couma enn “don ki Bondié donné.” Bien-sur, c’est pa parski nou Createur inn donne nou sa don-la ki nou gagne droit amusé quantité nou envie. La Bible condamne bann dimoune ki boire trop beaucoup, ki mange trop beaucoup, ek ki commette l’immoralité sexuel. Bann ki pratik sa bann kitsoz-la ‘pa pou gagne royaume Bondié.’—1 Corinthiens 6:9, 10; Proverbes 23:20, 21; 1 Pierre 4:1-4.
3. Ki pou aide nou pou reste lor nou garde lor plan spirituel, ek pou pa blié grand jour Jéhovah?
3 Nou pé vive dan lepok dernier jour; a cause sa, bann chrétien bizin konn vive dan sa lé-monde pourri-la, sans imite bann mauvais kitsoz ki dimoune pé faire. (Jean 17:15, 16) Pareil couma la Bible ti annoncé, bann dimoune dan nou lepok tellement ‘content plaisir plus ki Bondié’ ki zot ‘pa prend compte’ bann signe ki montré ki “la grande tribulation” pé kosté. (2 Timothée 3:4, 5; Matthieu 24:21, 37-39) Jésus ti donne sa l’avertissement-la so bann disciple: “Faire attention ar zot-mem pou ki zot leker pa vinn lourd parski zot trop mangé ek boire, ek a cause bann tracas ki ena dan la vie; ek ki enn coup sa jour-la vinn lor zot couma enn piege.” (Luc 21:34, 35) Nou ki servi Bondié, nou bien decidé pou prend compte sa l’avertissement-la. Nou pa couma bann dimoune dan le monde ki pa prend compte Bondié. Nou, nou faire tou seki nou kapav pou reste lor nou garde lor plan spirituel, ek pou pa blié grand jour Jéhovah.—Tsephania 3:8; Luc 21:36.
4. (a) Kifer li difficile pou trouve bann bon distraction? (b) Ki conseil ki trouve en Éphésiens 5:15, 16, nou envie suive?
4 Li difficile pou rejette bann mauvais kitsoz ki ena dan sa lé-monde-la, parski Satan finn faire zot parette tellement attirant ek facile pou faire. Nou gagne surtout beaucoup difficulté kan nou envie detann nou. La plupart distraction ki ena dan le monde finn faire pou excite bann “desir la chair.” (1 Pierre 2:11) C’est pa zis dan bann l’endroit publik ki ena bann mauvais distraction, mais nou kapav aussi faire sa rente dan nou lakaz par bann livre ek magazine, par television, par Internet, ek par video. C’est pou sa ki la Bible donne sa conseil-la bann chrétien: “Faire bien attention ki zot maniere marché pa pareil couma bann dimoune ki pena okenn sagesse, mais plutot couma bann dimoune ki ena la sagesse, ek ré-acheté le temps ki bizin pou zot-mem, parski nou pé vive dan enn mauvais lepok.” (Éphésiens 5:15, 16) C’est seulement si nou suive sa conseil-la bien, ki nou kapav sur ki bann mauvais distraction pa pou tente nou, pa pou prend tou nou lé-temps, ek mem detruire nou relation avek Jéhovah, seki pou amenn nou vers la destruction!—Jacques 1:14, 15.
5. Ki kitsoz ki faire nou plus heureux?
5 Bann chrétien amenn enn la-vie bien rempli, c’est pou sa ki parfois zot senti ki zot bizin detann-zot. Ecclésiaste 3:4 dire ki ena “enn lé-temps pou riyé” ek “enn lé-temps pou sauté.” Sa vedir ki dapré la Bible, kan nou pé detann nou, nou pa pé perdi nou lé-temps. Mais seulement kan nou detann-nou, sa bizin faire nou di-bien. Fodé pa ki bann distraction mette nou spiritualité en danger ou-soit empeche nou faire nou bann activité spirituel. Bann chrétien ki ena maturité koné par l’experience ki c’est surtout kan zot donne lezot ki zot plus heureux. Zot mette volonté Jéhovah en premier dan zot la-vie, ek zot gagne enn vrai “soulagement pou zot nâme,” parski zot accepté pou prend joug Jésus lor zot.—Matthieu 11:29, 30; Actes 20:35.
Couma choisir bann bon distraction?
6, 7. Ki kapav aide ou pou decidé si enn distraction bon ou-soit non?
6 Couma nou kapav koné si enn certain distraction bon pou bann chrétien? Bann parent là pou guide zot bann zenfant, ek bann ancien aussi kapav donne nou bann conseil kan li necessaire. Mais en realité, li pa ti bizin necessaire ki lezot dire nou ki tel livre, film, joué, dansé, ou-soit chanté, pa bon. Parski Paul ti dire ki ‘bann dimoune ki ena maturité . . . grace a la pratik, developpe zot capacité pou faire difference entre seki bon ek seki mauvais.’ (Hébreux 5:14; 1 Corinthiens 14:20) La Bible donne nou bann principe ki kapav guide nou. Nou ena aussi nou conscience ki finn formé par Parole Bondié, ki pou aide nou si nou ecoute li.—1 Timothée 1:19.
7 Jésus ti dire ki nou kapav “reconette enn pié par so fruit.” (Matthieu 12:33) Si enn distraction produire enn fruit pourri couma l’amour pou la violence, pou l’immoralité, ou-soit pou spiritisme, nou bizin rejette li. Nou pou rejette aussi enn distraction ki mette en danger la vie ou la santé enn dimoune, ou-soit si sa faire nou gagne bann problem l’argent, sa decourage nou, ou-soit faire lezot tombé lor plan spirituel. L’apotre Paul ti averti nou ki c’est enn peché si nou blesse conscience enn frere. Li ti ecrire: “Kan zot faire peché dan sa fason-la kont zot bann frere, ek blesse zot conscience ki faible, zot pé faire peché kont Christ. Alors, si enn mangé faire mo frere tombé lor plan spirituel, jamais mo pa pou mange la viande encore, pou ki mo pa faire mo frere tombé lor plan spirituel.”—1 Corinthiens 8:12, 13.
8. Ki danger ena dan bann video game?
8 Zordi, bann magasin rempli ar video game, ar bann film lor video ou-soit lor DVD. Pa tou sa bann distraction-la ki pou faire nou di-tort, mais pli allé, ena bann kitsoz ladan ki la Bible condamné. Nou pa kapav dire ki pena nanyin mauvais kan enn joué pousse nou pou faire semblant touyé, blessé, ek faire bann kitsoz bien immoral! Jéhovah detesté bann dimoune ki “content la violence.” (Psaume 11:5; Proverbes 3:31; Colossiens 3:5, 6) Ek si enn joué pousse ou pou vinn enn kikenn ki touletan envie gagne plus, pou vinn agressif, ki fatigue ou mentalement, ou-soit ki faire ou perdi beaucoup lé-temps, alors ou bizin reconette ki sa pé mette en danger ou spiritualité, ek ou bizin faire bann changement dé-suite.—Matthieu 18:8, 9.
Couma nou kapav detann-nou dan bann bon fason?
9, 10. Kan nou reflechi enn tipé ek nou faire zeffort, couma sa permette nou pou trouve bann bon distraction?
9 Parfois, bann chrétien demandé: “Ki qualité distraction ki bon? La plupart distraction ki ena dan sa lé-monde-la, zot contraire ar bann principe la Bible.” Ou kapav trouve bann bon distraction, mais seulement ou bizin faire zeffort. Sa demann enn tipé reflexion ek enn bon preparation, surtout par bann parent. Par exemple, beaucoup content detann-zot en famille ek avek bann frere ek soeur dan congregation. Eski sa pa faire nou di-bien kan nou mange enn bon repas ensam ek nou koz lor seki’nn passé dan la journée ou-soit lor enn sujet biblik? Nou kapav aussi faire bann pique-nique, bann joué approprié, al campé, ou-soit faire bann la-marche. Tou sa bann distraction-la kapav donne nou satisfaction ek faire nou content.
10 Enn ancien ek so madame ki finn elevé trois zenfant dire: “Kan nou bann zenfant ti encore jeune, nou ti demann zot ki coté zot ti envie ki nou al passe vacance. Parfois nou ti laisse enn zenfant invite enn bon camarade pou vinn avek nou, ek sa ti faire nou vacance encore plus agreable. Kan ti ena bann evenement important dan la vie nou bann zenfant, nou ti faire bann kitsoz special. Parfois nou ti invite certain famille ek bann camarade ki dan congregation. Nou ti organise bann barbecue, ek nou ti faire bann joué. Nou ti al faire bann sorti dan montagne ek sa ti donne nou l’occasion pou aprann lor creation Jéhovah.”
11, 12. (a) Couma ou kapav faire lezot profite bann bon moment ensam avek ou? (b) Ki qualité distraction beaucoup chrétien pa pou blié jamais?
11 Eski ou-mem personnellement, ou-soit en tant ki famille, ou kapav invite lezot kan ou organisé pou passe bann bon moment ensam? Kitfois dan congregation ena ki bizin l’encouragement, par exemple enn veuve, enn celibataire, ou-soit enn kikenn ki pé elevé so zenfant tousel. (Luc 14:12-14) Ou kapav aussi invite certain nouveau ki pé commence vinn reunion, mais bien-sur faire attention ki ou pa expose lezot ar enn mauvais l’influence. (2 Timothée 2:20, 21) Si li difficile pou certain ki handicapé pou sorti kot zot, kitfois ou kapav prepare enn repas ek al kot zot pou partage sa ensam.—Hébreux 13:1, 2.
12 Beaucoup chrétien pa finn blié le temps ki zot inn passé kot enn lot chrétien, kot zot finn mange enn ti-mangé ensam. Là, zot inn tann lezot raconté couma zot inn konn la verité, ek seki’nn aide zot pou reste fidel envers Jéhovah. Dan bann moment coumsa, kapav koz lor bann sujet biblik ek invite zot tou pou participé, mem bann zenfant. Sa bann conversation-la kapav bien encourageant, ek personne pa pou senti-li mal a l’aise ou-soit embarrassé.
13. Couma eski Jésus ek Paul ti donne enn bon l’exemple concernant l’hospitalité?
13 Jésus ti donne enn bon l’exemple kan li ti montré l’hospitalité ek kan li ti accepté l’hospitalité. Li ti toujours profite sa bann l’occasion-la pou faire lezot gagne bann bienfait lor plan spirituel. (Luc 5:27-39; 10:42; 19:1-10; 24:28-32) So bann disciple ti suive so l’exemple. (Actes 2:46, 47) L’apotre Paul ti ecrire: “Mo bien envie trouve zot pou ki mo partage avek zot bann don spirituel pou ki zot kapav tini ferme; ou-soit plutot ki sakenn gagne enn l’encouragement par la foi so camarade, par zot la-foi ek par mo la-foi.” (Romains 1:11, 12) Li bizin aussi pareil kan nou detann-nou ensam, sa bizin enn l’encouragement pou sakenn parmi nou.—Romains 12:13; 15: 1, 2.
Bann rappel ek bann danger
14. Kifer li pa conseillé ki ena beaucoup dimoune kan nou organise enn fête ou-soit enn sorti?
14 Kan nou organise enn fête ou-soit enn sorti, li bon ki nou pa invite trop beaucoup dimoune. Kifer? Parski kan ena beaucoup dimoune, li vinn difficile pou veillé ki tou pé passe bien. Dan bann moment kan pena okenn activité spirituel, dé-trois famille kapav decidé pou organise enn pique-nique ensam, ou-soit pou joué ensam, sans ki ena l’esprit competition. Kan bann ancien, assistant ministeriel, ou-soit lezot chrétien mur present, zot pou ena enn bon l’influence, ek sa bann moment-la pou faire nou encore plus di-bien.
15. Kifer kikenn ki organise n’importe ki distraction, ena responsabilité pou veillé ki tou passe bien?
15 Li bien important ki bann ki organise enn fête, enn sorti ou-soit n’importe ki lezot distraction, veillé ki tou passe bien. Kitfois ou content montré ou l’hospitalité envers lezot, mais surement ou pou bien chagrin si ou aprann ki, a cause ou negligence, enn invité finn decouragé par enn kitsoz ki finn passé dan ou lakaz. Reflechi lor seki Deutéronome 22:8 dire. Enn Israélite ki ti monte enn lakaz ti bizin mette enn muraille tout autour la-haut lor so lakaz. Souvent kan li ti ena bann invité, zot ti al assize la-haut lor lakaz. Kifer li ti bizin mette sa muraille-la? Deutéronome dire: “Pou ki to pa coupable si enn kikenn sape la-haut tombé.” Li pareil aussi kan nou ena bann invité. Sans ki nou mette bann limite deraisonnable, nou pou faire tou pou protege zot lor plan physik ek spirituel.
16. Ki precaution nou bizin prend si nou servi lalkol pendant enn fête?
16 Si servi lalkol pendant enn fête, bizin faire sa avek beaucoup precaution. Beaucoup chrétien finn prend decision pou servi lalkol zis si zot kapav veille personnellement lor seki zot bann invité pé mangé ek pé boire. Fodé pa ki nou permette enn kitsoz arrivé ki pou kapav faire lezot tombé lor plan spirituel ou-soit ki kapav tente enn kikenn pou boire plus ki bizin. (Éphésiens 5:18, 19) Kitfois, pou bann different raison certain invité pou decidé pou pa boire lalkol. Dan beaucoup pays, bann dimoune enba enn certain l’age pa gagne droit boire lalkol, ek bann chrétien obeir la loi César, mem si zot pensé ki sa la-loi-la trop severe.—Romains 13:5.
17. (a) Kifer li bien important ki enn kikenn ki organise enn fête, bien choisir la musik ki pou joué? (b) Si ena dansé pendant enn fête, ki limite bann chrétien bizin respecté?
17 Kikenn ki organise enn fête, pou veille bien ki la musik, bann danse ou-soit n’importe ki lezot l’amusement, zot en accord avek bann principe la Bible. Sakenn ena so gout lor la musik ek ena tou sorte qualité la musik zordi. Mais pa blié ki beaucoup la musik zordi encourage l’esprit rebellion, l’immoralité sexuel ek la violence. A cause sa, li important ki nou bien choisir la musik ki nou pou joué. Sa pa vedir ki enn la musik li bizin douce pou li bon. Mais fodé pa aussi ki li sensuel, vulgaire, faire beaucoup tapage, ek ena enn battement ki casse zoreille. Faire bien attention pou pa laisse enn kikenn ki pa comprend l’importance pou joué la musik dan enn volume raisonnable, choisir ou-soit joué la musik dan ou place. Bien-sur, li clair aussi ki enn chrétien pa pou danse dan enn fason kot li faire bann mouvement indecent avek so lekor.—1 Timothée 2:8-10.
18. Couma bann parent kapav protege zot zenfant kan zot veille bien ki qualité fête bannla allé?
18 Bann parent chrétien bizin faire enn devoir pou koné ki qualité kitsoz pou ena dan bann fête kot zot zenfant invité. La plupart du temps, li bon ki zot accompagne zot zenfant. Malheureusement, certain parent finn permette zot zenfant al dan bann fête kot personne pa ti veillé ki tou passe bien. Certain ki ti dan sa bann fête-la finn commette l’immoralité ou-soit finn ena enn conduite ki pa bon. (Éphésiens 6:1-4) Mem bann adolescent ki inpé pli grand ek ki finn montré ki kapav faire zot confiance, zot toujours bizin gagne l’aide pou “rejette bann desir la jeunesse.”—2 Timothée 2:22.
19. Ki kapav aide nou pou concentré lor seki nou bizin rodé en premier?
19 Kan de temps en temps nou profite bann distraction ki faire nou di-bien, sa kapav rann nou la-vie pli agreable. Jéhovah pa prive nou sa plaisir-la. Mais nou bizin rann-nou compte ki c’est pa bann distraction ki pou permette nou ramasse bann tresor spirituel dan le ciel. (Matthieu 6:19-21) Jésus ti faire so bann disciple comprend ki seki pli important dan la vie, c’est ‘avant tou kitsoz, rod royaume Bondié ek so justice,’ pa seki nou mangé ek boire ou-soit bann linge ki nou metté. Sa c’est ‘bann kitsoz ki bann nation contigne rodé touletan.’—Matthieu 6:31-34.
20. Ki benediction bann ki servi Jéhovah avek fidelité kapav attann?
20 Oui, ‘kan nou pé mangé, boire ou-soit n’importe ki kitsoz ki nou pé faire,’ anou faire “tou pou la gloire Bondié.” Anou remercié Li pou tou bann bon kitsoz ki Li donne nou, ki nou kapav profité sans abusé. (1 Corinthiens 10:31) Pena beaucoup lé-temps encore pou la terre vinn enn paradi. Kan sa pou arrivé, nou pou gagne beaucoup l’occasion pou profite tou seki Jéhovah donne nou, ensam avek bann ki respecté so bann principe ki droite.—Psaume 145:16; Isaïe 25:6; 2 Corinthiens 7:1.
Eski ou rappel?
• Kifer li difficile pou bann chrétien trouve bann bon distraction zordi?
• Cite certain forme distraction ki bann famille chrétien finn apprecié.
• Mem si nou finn choisir bann bon distraction, ki bann rappel ek bann danger fodé pa nou blié?
[Zimage, page 24]
Nou bizin choisir bann distraction ki produire bann bon resultat
[Zimage, page 25]
Ki qualité distraction bann chrétien rejeté?