Reste loin ar fausse religion!
“Ala seki Jéhovah dire: ‘Sorti parmi zot, ek separé ar zot, ek arrete touche bann kitsoz malprop.’”—2 CORINTHIENS 6:17.
1. Dan ki condition beaucoup dimoune sincere été lor plan spirituel?
BEAUCOUP dimoune sincere pa konn la verité lor Bondié, ni lor l’avenir. Parski zot pa finn gagne reponse pou zot bann question spirituel, zot troublé ek zot pa koné ki pou faire. Plusieurs million dimoune esclave superstition, bann ceremonie ek bann fête ki offense nou Createur. Surement ou ena bann voisin ek bann membre ou famille ki croire dan l’enfer, dan la Trinité, zot croire ki nâme pa mort, ek dan lezot fausse l’enseignement.
2. Ki bann chef religieux finn faire, ek ki resultat sa finn amené?
2 Kisannla ki responsable si partout bann dimoune dan noir coumsa lor plan spirituel? Kitfois reponse sa question-la pou etonne nou, mais c’est bann religion ki responsable—surtout bann l’organisation ek bann chef religieux ki enseigne bann kitsoz ki contraire ar pensée Bondié. (Marc 7:7, 8) A cause sa, beaucoup dimoune croire ki zot pé adore vrai Bondié alors ki, en realité, zot pé offense Li. Fausse religion responsable sa situation bien triste-la.
3. Kisannla ki finn crée la fausse religion, ek couma la Bible decrire li?
3 Ena enn l’esprit invisible ki derriere bann fausse religion. Guette ki l’apotre Paul ti dire lor sa l’esprit-la: “Bondié sa system-la finn aveuglé l’esprit bann ki pa’lé croire, pou ki la lumiere la bonne nouvelle concernant Christ, ki zimage Bondié, pa eclaire zot.” (2 Corinthiens 4:4) “Bondié sa system-la” c’est Satan le Diable. Li-mem ki’nn crée la fausse religion. L’apotre Paul ti ecrire ki “Satan li-mem, pé contigne transforme-li couma enn ange la lumiere. Alors, li pa extraordinaire ki so bann ministre aussi pé contigne transforme-zot couma bann ministre la justice.” (2 Corinthiens 11:14, 15) Satan faire bann mauvais kitsoz parette bon ek li embete bann dimoune pou zot croire dan bann fausseté.
4. Ki la Loi mosaïk ti dire lor bann fausse prophete?
4 Nou comprend kifer la Bible bien categorik kan li condamne bann fausse religion! Par exemple, la Loi mosaïk ti mette peuple Bondié en garde kont bann fausse prophete. N’importe kisannla ki ti fann bann fausse l’enseignement ek ti encourage lezot pou adore bann fausse bondié, ‘ti bizin touye li, parski li finn encourage enn rebellion kont Jéhovah.’ Bann Israélite ti gagne l’ordre pou ‘tire seki mauvais parmi zot.’ (Deutéronome 13:1-5) Oui, Jéhovah considere la fausse religion couma enn mauvais kitsoz.—Ézékiel 13:3.
5. Ki l’avertissement nou bizin prend compte zordi?
5 Pareil couma Jéhovah, Jésus Christ ek so bann zapotre aussi ti detesté la fausse religion. Jésus ti donne sa l’avertissement-la so bann disciple: “Zot bizin mefié bann fausse prophete ki vinn kot zot dan linge bann mouton, mais endan, zot couma bann loulou vorace.” (Matthieu 7:15; Marc 13:22, 23) Paul ti ecrire ki “Bondié montré so colere depuis le ciel, kont bann zom ki pa obeir Li, ki injuste, ek ki touffe la verité.” (Romains 1:18) Li bien important ki bann vrai chrétien prend compte sa bann l’avertissement-la, ek reste loin ar bann ki touffe la verité ki sorti dan Parole Bondié, ou-soit ki fann bann fausse l’enseignement!—1 Jean 4:1.
Sauvé, sorti dan “Babylone la Grande”
6. Couma la Bible decrire “Babylone la Grande”?
6 Guetté couma dan la Bible, livre Révélation koz lor fausse religion. Li decrire li couma enn prostitué ki’nn sou ek ki ena enn grand l’influence lor beaucoup royaume ek zot peuple. Sa femme symbolik-la commette fornication avek beaucoup lé-roi ek li’nn sou ar di-sang bann vrai adorateur Bondié. (Révélation 17:1, 2, 6, 18) Li ena enn nom ki’nn ecrire lor so front ki al bien ar so conduite immoral ek degoutant. Sa nom-la c’est “Babylone la Grande, mama bann prostitué ek bann kitsoz degoutant ki ena lor la terre.”—Révélation 17:5.
7, 8. Couma la fausse religion finn vinn enn prostitué ek ki resultat sa finn amené?
7 Seki la Bible dire lor Babylone la Grande applik bien ar tou bann fausse religion ki ena dan le monde. Zordi ena plusieurs millier religion. Mem si zot tou pa groupé ensam dan enn sel organisation, zot ena mem l’objectif ek zot agir pareil. Pareil couma sa femme immoral ki’nn decrire dan livre Révélation-la, fausse religion ena enn grand l’influence lor bann gouvernement. Li ressemblé enn femme ki pa fidel ar bann voeu ki li’nn faire kan li’nn marié. Li’nn vinn couma enn prostitué parski li’nn faire bann alliance politik avek beaucoup gouvernement. Disciple Jacques ti ecrire: “Femme adultere, eski zot pa koné ki seki camarade ar le monde, li l’ennemi ar Bondié? Alors, n’importe kisannla envie vinn camarade ar le monde, pé faire li-mem vinn l’ennemi ar Bondié.”—Jacques 4:4.
8 Parski bann fausse religion finn mele-zot ar la politik, sa finn faire beaucoup dimoune souffert. Xolela Mangcu, enn expert africain lor la politik, ti dire ki “dan l’histoire bann dimoune lor la terre, finn ena beaucoup massacre, parski la religion finn melé ar la politik.” Pa trop longtemps, enn la-gazette ti dire: “Zordi, la religion responsable bann la-guerre pli dangereux ki ena, kot pli beaucoup dimoune mort.” Plusieurs million dimoune finn mort dan bann la-guerre ki la religion finn soutenir. Babylone la Grande finn mem persecute ek touye bann vrai adorateur Bondié. Li finn coumadir sou ar zot di-sang.—Révélation 18:24.
9. Couma livre Révélation faire nou koné ki Jéhovah detesté la fausse religion?
9 Kan nou lire dan la Bible seki pou arrive Babylone la Grande, sa faire nou comprend ki Jéhovah detesté la fausse religion. Révélation 17:16 dire: “Sa dix corne ki to finn trouvé-la, ek la bête sauvage, zot pou detesté sa prostitué-la, ek zot pou detruire li ek pou mette li touni; zot pou mange so la-chair ek pou brule li dan difé ziska ki li fini net.” Premierement, enn gros bête sauvage touye sa prostitué-la ek mange so la-chair. Apré sa, brule tou seki resté ar li. Couma sa vision-la montré, bientot bann gouvernement ki ena dan le monde pou tourne-zot kont la fausse religion. C’est Bondié ki pou pousse zot pou faire sa. (Révélation 17:17) Babylone la Grande, setadir tou bann fausse religion ki ena lor la terre pou detruire. “Jamais pa pou retrouve li encore.”—Révélation 18:21.
10. Couma eski nou bizin considere la fausse religion?
10 Couma bann vrai adorateur Jéhovah bizin considere Babylone la Grande? Dan enn fason bien clair, la Bible donne sa l’ordre-la: “Sorti ladan, mo peuple, si zot pa envie participe dan so bann peché, ek si zot pa envie gagne enn part dan so bann malheur.” (Révélation 18:4) Tou seki envie sapé, bizin sorti dan la fausse religion avant ki li trop tard. Kan Jésus ti lor la terre, li ti dire ki dan dernier jour, beaucoup dimoune pou zis pretann ki zot pé suive li. (Matthieu 24:3-5) Li dire sa bann dimoune-la: “Jamais mo ti konn zot! Sorti devant moi, allé, zot ki pratik seki kont la Loi [Bondié].” (Matthieu 7:23) Zordi, Jésus Christ inn vinn le Roi dan Royaume Bondié, ek li finn rejette la fausse religion.
Couma nou kapav reste loin ar fausse religion?
11. Ki nou bizin faire pou reste loin ar fausse religion?
11 Bann vrai chrétien reste loin ar la fausse religion, ek zot rejette so bann fausse l’enseignement aussi. Sa vedir ki nou pa guette bann program religieux ki passé dan television, ni ecoute zot dan radio, ni lire bann livre religieux ki koz menti lor Bondié ek lor so Parole. (Psaume 119:37) Nou montré ki nou ena la sagesse kan nou pa participe dan bann reunion ou-soit bann fête ki organisé par n’importe ki l’organisation ki ena enn rapport avek la fausse religion. En plus, nou pa soutenir la fausse religion dan okenn fason. (1 Corinthiens 10:21) Kan nou faire sa, nou protegé kont bann dimoune ki kapav ‘entraine nou couma zot victime, par moyen bann philosophie ek par bann kitsoz ki trompe dimoune ek ki dan vide, par tradition bann zom, par bann kitsoz ki le monde enseigné, ek pa par Christ.’—Colossiens 2:8.
12. Couma enn kikenn kapav coupe tou contact avek enn fausse religion?
12 Si enn dimoune envie vinn enn Témoin de Jéhovah, mais li deja enn membre ki’nn enregistré dan enn fausse religion, ki li bizin faire? En general, li kapav envoye enn lettre pou dire ki li nepli envie forme partie dan sa religion-la. Li bien important ki sa dimoune-la faire tou seki li kapav pou ki dan okenn fason, la fausse religion pa contamine li lor plan spirituel. Si li envie vinn enn Témoin de Jéhovah, so bann action bizin montré bann membre so ancien religion ek tou dimoune en general, ki li finn coupe tou contact avek religion kot li ti été avant.
13. Ki conseil la Bible donne nou lor l’importance pou reste loin ar fausse religion?
13 L’apotre Paul ti ecrire: “Pa forme enn l’attachement ki pa allé, avek bann non-croyant. Parski ki rapport ena entre la justice ek l’injustice? Ou-soit, ki rapport ena entre la lumiere ek noirté? En plus, ki l’accord ena entre Christ ek Bélial? Ou-soit, ki part enn dimoune fidel ena avek enn non-croyant? Ki l’accord ena entre temple Bondié avek bann zidole? . . . Ala seki Jéhovah dire: ‘Sorti parmi zot, ek separé ar zot, ek arrete touche bann kitsoz malprop.’ ” (2 Corinthiens 6:14-17) Nou obeir sa l’ordre-la kan nou reste loin ar fausse religion. Mais dapré sa l’ordre-la, eski nou bizin reste loin aussi ar bann dimoune ki dan enn fausse religion?
“Contigne marche avek sagesse”
14. Eski nou bizin coupe tou contact avek bann dimoune ki dan fausse religion? Expliké.
14 Eski bann adorateur Jéhovah bizin coupe tou contact avek bann dimoune ki dan enn fausse religion? Eski nou bizin evite net bann dimoune ki pa dan mem religion ki nou? Non. Deuxieme pli grand commandement dire: “To bizin content to prochain couma to-mem.” (Matthieu 22:39) Nou montré nou l’amour pou nou prochain kan nou preche la bonne nouvelle lor Royaume Bondié avek zot. Ek aussi kan nou etudié la Bible avek zot ek explik zot kifer li important pou reste loin ar la fausse religion.
15. Ki sa vedir “pa faire partie dan le monde”?
15 Li vrai ki nou preche la bonne nouvelle avek nou prochain, mais parski nou bann disciple Jésus, nou “pa faire partie dan le monde.” (Jean 15:19) Sa mot ‘le monde-la’ vedir tou bann dimoune en general ki loin ar Bondié. (Éphésiens 4:17-19; 1 Jean 5:19) Nou separé ar sa lé-monde-la parski nou rejette so bann l’attitude, so bann parole, ek so conduite ki offense Jéhovah. (1 Jean 2:15-17) Dan 1 Corinthiens 15:33 nou lire ki bann “mauvais frequentation gate bann bon l’habitude.” En accord avek sa principe-la, nou evite vinn bann bon camarade avek bann dimoune ki pa vive en accord avek bann principe la Bible. Pou nou pa faire partie dan le monde, nou bizin pa gagne ‘okenn tache ar sa lé-monde-la.’ (Jacques 1:27) Mais, pou nou separé ar le monde, sa pa vedir ki nou bizin coupe tou contact avek bann dimoune dan le monde.—Jean 17:15, 16; 1 Corinthiens 5:9, 10.
16, 17. Couma bann chrétien bizin traite bann dimoune ki pa konn la Bible?
16 Mais alors, couma eski nou bizin traite bann dimoune ki pa konn la Bible? Kan l’apotre Paul ti ecrire congregation Colosses, li ti dire zot: “Contigne marche avek sagesse envers bann ki en dehors [congregation], ek ré-acheté le temps favorable pou zot-mem. Fodé ki zot parole toujours agreable, assaisonné ar di-sel, pou ki zot koné couma pou reponn chaque dimoune.” (Colossiens 4:5, 6) L’apotre Pierre ti ecrire: “Dan zot leker, donne Christ la gloire couma zot Seigneur, toujours pré pou defann-zot devant tou dimoune ki demann zot enn l’explication lor zot l’esperance, mais faire li avek douceur ek enn grand respé.” (1 Pierre 3:15) Paul ti conseil bann chrétien “pou pa koz personne en mal, pou pa rod la guerre, pou vinn bann dimoune raisonnable, pou montré la douceur envers tou dimoune.”—Tite 3:2.
17 En tant ki Témoins de Jéhovah, nou faire tou pou pa montré-nou dur ou-soit vantard envers lezot. Et surtout, nou pa servi bann parole blessant pou koz lor bann dimoune dan lezot religion. Au contraire, nou ena tact, mem si enn dimoune dan predication, enn voisin, ou-soit enn collegue travail, li mauvais ou-soit li koz brite avek nou.—Colossiens 4:6; 2 Timothée 2:24.
“Contigne rappel bann parole ki faire gagne la vie”
18. Dan ki condition spirituel bien triste bann ki finn retourne dan fausse religion été?
18 Li bien triste pou trouve enn dimoune ki finn gagne enn connaissance lor la Bible, retourne dan fausse religion! La Bible montré ki consequence sa ena. Li dire: “Oui, si apré ki zot finn delivré ar bann mauvais kitsoz ki ena dan le monde grace a enn connaissance exact lor nou Seigneur ek Sauveur Jésus Christ, zot retourne encore dan sa bann kitsoz-la, ek zot laisse sa domine-zot, zot condition final finn vinn pli pire ki au commencement. . . . Finn arrive zot seki sa proverbe-la dire: ‘Enn li-chien inn retourne ar so prop vomi, ek enn cochon ki finn lavé, finn ré-al baigne dan la boue.’ ”—2 Pierre 2:20-22.
19. Kifer li important ki nou faire attention ar tou seki kapav mette nou spiritualité en danger?
19 Nou bizin faire bien attention ar tou seki kapav mette nou spiritualité en danger. Ena beaucoup kitsoz dangereux ki menace nou spiritualité zordi! L’apotre Paul ti donne sa l’avertissement-la: “Parole inspiré bien clair kan li dire ki dan lepok ki pou vini, certain pou abandonne la foi, ek zot pou ecoute bann fausse parole inspiré ek l’enseignement bann demon.” (1 Timothée 4:1) Zordi, nou pé vive sa ‘lepok ki pou vini-la.’ Li kapav arrivé ki bann ki pa reste loin ar fausse religion, zot ‘balloté coumadir par bann vague, ek zot laisse tou sorte qualité l’enseignement sarié [zot] parsi-parla, ek bann zom ki faire tou sorte qualité trik embete [zot].’—Éphésiens 4:13, 14.
20. Couma eski nou kapav protege nou-mem kont l’influence la fausse religion?
20 Couma eski nou kapav protege nou-mem kont l’influence la fausse religion? Mazinn tou seki Jéhovah inn donne nou. Nou ena so Parole, la Bible. (2 Timothée 3:16, 17) Jéhovah finn servi aussi “l’esclave fidel et avisé” pou donne nou enn grand quantité mangé lor plan spirituel. (Matthieu 24:45) A mesure ki nou progressé dan la verité, eski nou pa envie developpe enn grand desir pou ‘nourriture solid, ki pou bann dimoune ki ena maturité’? Eski nou pa envie assisté reunion kot nou aprann bann verité lor la Bible? (Hébreux 5:13, 14; Psaume 26:8) Anou determiné pou profite bien tou bann disposition ki Jéhovah inn prend pou ki nou kapav “contigne rappel model bann parole ki faire gagne la vie,” ki nou finn tendé. (2 Timothée 1:13) Lerla, nou pou kapav reste loin ar fausse religion.
Ki ou finn aprann?
• Ki été “Babylone la Grande”?
• Ki nou bizin faire pou reste loin ar la fausse religion?
• Kont ki danger nou bizin protege nou spiritualité?
[Zimage, page 14]
Eski ou koné kifer la Bible decrire “Babylone la Grande” couma enn femme immoral?
[Zimage, page 15]
“Babylone la Grande” pou detruire
[Zimage, page 17]
Nou montré la “douceur ek enn grand respé” envers bann dimoune ki pa dan mem religion ki nou