Jéhovah forme bann berger pou so troupeau
“Jéhovah Li-mem donne la sagesse; connaissance ek bon jugement sorti dan so la-bouche.”—Proverbes 2:6.
1, 2. Kifer bann frere ena desir pou gagne plus responsabilité dan congregation?
Nick, ki enn ancien depuis sept an, dire: “Mo ti bien content kan mo ti nommé ancien. Mo ti considere sa privilege-la couma enn l’occasion pou servi Jéhovah encore plus. Mo ti senti ki mo ena enn dette envers Li pou tou seki Li’nn faire pou moi. Mo ti aussi envie faire maximum pou aide bann frere ek soeur dan mo congregation pareil couma lezot ancien finn aide moi.” Seulement, Nick ti tracassé aussi. Kifer? Li reponn: “Mo pa ti encore gagne 30 an kan mo ti nommé ancien, ek mo ti peur pangar mo pena capacité necessaire, couma par exemple, la sagesse ek enn bon jugement, pou mo kapav bien prend soin la congregation.”
2 Bann frere ki Jéhovah nommé couma bann ancien ena beaucoup raison pou zot content. L’apotre Paul ti faire bann ancien dan Éphèse rappel enn parmi sa bann raison-la. Li ti cite seki Jésus ti dire: “Ena plus bonheur kan donné ki kan recevoir.” (Actes 20:35) Bann frere ki assistant ministeriel ou-soit ancien ena plus l’occasion pou donne Jéhovah ek pou donne la congregation. Bann assistant ministeriel, par exemple, travail ensam avek bann ancien. Zot occupe aussi beaucoup lezot kitsoz ki prend le temps, mais ki kan-mem necessaire. Sa bann frere-la faire tou sa travail-la parski zot content Bondié ek zot content zot prochain.—Marc 12:30, 31.
3. Kifer certain hesité pou accepté bann privilege dan congregation?
3 Mais ki nou kapav dire si enn frere hesité pou vinn enn assistant ministeriel ek apré, pou vinn enn ancien, parski li pensé ki li pa ti assez qualifié? Kitfois, pareil couma Nick, sa frere-la peur pangar li pena bann qualité ki bizin pou vinn enn bon ancien. Si ou enn frere baptisé, eski ou aussi ena sa sentiment-la? Li normal ki ou pense coumsa. Jéhovah demann bann ancien pou rann compte lor fason ki zot traite so troupeau. Jésus ti dire: “Kan finn donne enn dimoune beaucoup, pou demann li beaucoup en retour; ek kan finn mette enn dimoune en charge beaucoup kitsoz, pou demann li plus ki habitué demandé.”—Luc 12:48.
4. Couma Jéhovah aide bann frere ki Li’nn etabli pou prend soin so bann serviteur?
4 Eski Jéhovah attann ki bann assistant ministeriel ek bann ancien ki Li’nn etabli, occupe zot responsabilité sans okenn l’aide? Non, Li aide zot dan bann fason pratik, pa zis pou zot kapav occupe zot responsabilité, mais aussi pou zot reussi dan sa domaine-la. Couma nou ti trouvé dan lartik avant, Jéhovah donne zot so l’esprit saint, ek grace a fruit sa l’esprit-la, zot kapav prend soin so bann serviteur avek tendresse. (Actes 20:28; Galates 5:22, 23) En plus, Jéhovah donne zot la sagesse, connaissance ek enn bon jugement. (Proverbes 2:6) Couma Li faire sa? Anou guette trois fason couma Jéhovah forme bann frere ki Li finn etabli dan la congregation pou prend soin so troupeau.
Formé par bann ancien ki ena l’experience
5. Kifer eski Pierre ek Jean ti bann bon ancien?
5 Bann juge ki ti forme partie dan Sanhédrin ti ena la sagesse sa lé-monde-la. Kan l’apotre Pierre ek l’apotre Jean ti parette devant zot, sa bann juge-la ti considere bannla couma bann dimoune ‘ki pena l’instruction ek ki ordinaire.’ Bien-sur, Pierre ek Jean ti konn lire ek ecrire, mais seulement zot pa ti’nn gagne okenn formation special par bann rabbin lor l’etude Parole Bondié. Mais kan-mem, Pierre ek Jean avek lezot disciple ti’nn montré ki zot ti bann bon enseignant. Beaucoup dimoune ki ti ecoute zot, ti vinn bann croyant. Couma eski sa bann dimoune ordinaire-la ti vinn bann enseignant extraordinaire coumsa? Kan bann juge sa la-cour-la ti fini ecoute Pierre ek Jean, zot ti “commence comprend ki [bannla] ti avek Jésus.” (Actes 4:1-4, 13) Li vrai ki zot ti’nn gagne l’esprit saint. (Actes 1:8) Mais li ti facile aussi pou comprend ki Jésus ti’nn forme zot. Mem sa bann juge ki ti aveugle lor plan spirituel-la ti remark sa! Kan Jésus ti avek so bann zapotre lor la terre, li pa ti zis montré zot couma pou rod bann nouveau disciple. Li ti aussi montré zot couma pou prend soin bann dimoune ki pou forme partie dan troupeau Jéhovah.—Matthieu 11:29; 20:24-28; 1 Pierre 5:4.
6. Ki l’exemple Jésus ek Paul ti donné concernant formation ki bizin donne lezot?
6 Apré so resurrection, Jésus ti contigne forme bann ancien ki li ti etabli. (Révélation 1:1; 2:1–3: 22) Par exemple, li-mem personnellement ti choisir Paul ek li ti veille lor so formation. (Actes 22:6-10) Paul ti bien apprecié formation ki li ti gagné, ek li ti partage seki li ti aprann avek lezot ancien. (Actes 20:17-35) Par exemple, li ti passe beaucoup lé-temps pou forme Timothée, pou li vinn enn “zouvrier ki pena nanyin pou honté” dan service Bondié. (2 Timothée 2:15) Avek le temps, enn grand l’amitié finn developpé entre sa deux zom-la. Guette ki Paul ti ecrire lor Timothée: “Pareil couma enn zenfant avek so papa, li ti travail avek moi couma enn esclave pou faire la bonne nouvelle progressé.” (Philippiens 2:22) Paul pa ti rod faire Timothée, ni okenn lot dimoune, vinn so disciple. Au contraire, li ti encourage bann disciple pou ‘imite li pareil couma li ti imite Christ.’—1 Corinthiens 11:1.
7, 8. (a) Cite enn l’exemple ki montré bann bon resultat ki gagné kan bann ancien imite Jésus ek Paul. (b) Kan eski bann ancien bizin commence forme bann frere ki plitar kapav vinn bann assistant ministeriel ek bann ancien?
7 Bann ancien ki ena l’experience imite Jésus ek Paul, ek zot prend l’initiative pou forme bann frere baptisé. Zot aussi zot gagne bann bon resultat. Prend l’exemple Chad, ki finn grandi dan enn famille kot zis so mama ti dan la verité. Sa pa faire trop longtemps depuis ki li’nn nommé ancien. Li dire: “Pendant plusieurs l’année, beaucoup ancien experimenté finn aide moi pou progressé lor plan spirituel. Parski mo papa pa ti dan la verité, sa bann ancien-la ti prend moi bien compte ek zot ti vinn couma bann papa spirituel pou moi. Zot ti prend le temps pou forme moi dan ministere, ek plitar, enn ancien ti forme moi pou occupe bann responsabilité ki mo ti gagné dan congregation.”
8 L’exemple Chad montré ki bann ancien ki ena enn bon jugement, commence forme bann frere ki kapav enn jour vinn bann assistant ministeriel ou-soit bann ancien, bien avant-mem ki zot assez qualifié pou gagne sa bann privilege-la. Kifer? Parski la Bible dire ki bann assistant ministeriel ek bann ancien bizin ena enn bon niveau moral ek spirituel, avant zot nommé. Fodé ‘testé zot capacité avant.’—1 Timothée 3:1-10.
9. Ki responsabilité bann ancien mur ena, ek kifer?
9 Si bizin testé capacité bann frere, alors li raisonnable ki zot gagne enn formation avant. Anou prend enn l’exemple: Si enn zeleve bizin al faire enn l’examen difficile mais so bann professeur pa finn donne li okenn formation avant, eski li pou passe sa l’examen-la? Non, preské sur, li pou fail Sa montré nou ki enn formation, li necessaire. Mais, bann bon professeur pa zis forme zot bann zeleve pou passe enn l’examen. Zot aide bannla aussi pou konn servi connaissance ki zot gagné. Li pareil aussi pou bann ancien ki faire zot travail couma bizin, zot donne bann frere enn formation bien precis pou ki bannla kapav developpe bann qualité necessaire ek plitar occupe bann responsabilité dan congregation. Zot pa faire sa zis pou ki sa bann frere-la kapav nommé dan congregation, mais aussi pou zot kapav prend soin la congregation couma bizin. (2 Timothée 2:2) Bien-sur, sa bann frere-la aussi bizin faire zeffort ek travail dur pou ki zot developpe capacité necessaire pou vinn enn assistant ministeriel ou-soit enn ancien. (Tite 1:5-9) Seulement, kan bann ancien ki ena l’experience disposé pou forme bann frere ki envie gagne plus responsabilité dan congregation, sa kapav aide zot pou faire progré pli vite.
10, 11. Couma bann ancien kapav forme bann frere pou gagne plus privilege?
10 Ki bann ancien experimenté kapav faire pou forme lezot, pou ki lerla bannla kapav occupe bann responsabilité dan congregation? Premierement, bann ancien bizin interessé ar bann frere dan congregation—travail avek zot regulierement dan predication ek aide zot pou “konn servi parole la verité couma bizin.” (2 Timothée 2:15) Bann ancien ki ena maturité prend le temps pou koz avek bann frere lor la joie ki gagné kan servi lezot. Zot koz aussi lor satisfaction ki zot gagné zot-mem kan zot fixé bann l’objectif spirituel ek kan zot reussi realise sa. Zot donne aussi bann suggestion precis lor fason ki enn frere kapav progressé pou vinn enn “l’exemple pou troupeau [Bondié].”—1 Pierre 5:3, 5.
11 Kan enn frere inn nommé assistant ministeriel, bann ancien ki ena la sagesse pou contigne forme li. Bruce, enn frere ki ancien depuis apepré 50 an, dire: “Mo content assize avek enn frere ki’nn fek nommé assistant ministeriel ek ré-guette avek li bann instruction ki l’esclave fidel et avisé donné. Nou lire aussi tou bann instruction ki en rapport avek responsabilité ki li finn gagné dan congregation, ek mo content travail ensam avek li ziska ki li bien konn faire sa travail-la.” Kan enn assistant ministeriel finn gagne inpé l’experience, bann ancien kapav aussi forme li pou faire bann visite pastoral. Apré, Bruce dire: “Kan mo prend enn assistant ministeriel avek moi pou al faire enn visite pastoral, mo aide li pou choisir bann verset la Bible ki pou encourage ek motive sa dimoune ou-soit sa famille ki nou pou al visité-la. Pou ki enn assistant ministeriel vinn enn bon ancien, li bien important ki li bien konn servi la Bible pou touche leker bann dimoune.”—Hébreux 4:12; 5:14.
12. Couma bann ancien experimenté kapav forme bann ancien ki’nn fek nommé?
12 Bann ancien ki’nn fek nommé aussi kapav gagne beaucoup bienfait si zot contigne gagne formation. Nick, ki nou ti mentionné avant, dire: “Formation ki mo ti gagné, surtout par deux ancien ki pli agé, ti bien aide moi. En general, sa bann frere-la ti bien koné ki bizin faire dan enn certain situation. Mais zot ti toujours ecoute moi avek patience ek zot ti prend compte mo l’opinion—mem si zot pa ti d’accord avek seki mo ti pensé. Mo ti aprann beaucoup kan mo ti observé couma zot ti traite bann frere ek soeur avek humilité ek respé. Sa bann ancien-la ti bien faire moi comprend ki li necessaire pou konn servi la Bible couma bizin kan mo traite bann problem ou-soit kan mo donne enn l’encouragement.”
Formé par Parole Bondié
13. (a) Ki enn frere bizin pou li vinn enn bon ancien? (b) Kifer Jésus ti dire: “Mo pa enseigne mo prop pensée”?
13 Dan la Bible, ena bann la-loi, bann principe, ek bann l’exemple ki bann ancien bizin, pou zot kapav vinn enn kikenn ki “bien qualifié, bien equipé pou tou bon travail.” (2 Timothée 3:16, 17) Li possible ki enn frere inn gagne enn bon l’education dan lekol, mais c’est so connaissance lor la Bible ek fason ki li applik sa connaissance-la, ki pou aide li pou vinn enn bon ancien. Prend l’exemple Jésus. Li ti ena pli grand connaissance, pli grand discernement, ek pli grand sagesse ki n’importe ki ancien ki’nn existé lor la terre. Pourtant, li pa ti compte lor so prop sagesse kan li ti enseigne bann serviteur Jéhovah. Li ti dire: “Mo pa enseigne mo prop pensée, mais plutot bann pensée sa kikenn ki finn envoye moi-la.” Kifer Jésus ti dire ki li enseigne bann pensée so Papa? Li ti dire: “Enn kikenn ki enseigne so prop pensée, pé rod so prop la-gloire.”—Jean 7:16, 18.
14. Couma bann ancien kapav evité rod zot prop la-gloire?
14 Bann ancien ki fidel pa essaye rod zot prop la-gloire. Kan zot donne bann conseil ek bann l’encouragement, zot base-zot lor Parole Bondié, pa lor zot prop sagesse. Zot comprend ki travail enn ancien, c’est pou aide bann membre la congregation pou ena “pensée Christ,” pa pensée bann ancien. (1 Corinthiens 2:14-16) Par exemple, ki pou arrivé si enn ancien ki pé aide enn couple pou reglé bann problem familial, base so conseil lor so prop l’experience, plutot ki lor bann principe la Bible ek lor bann renseignement ki “l’esclave fidel et avisé” donne nou? (Matthieu 24:45) Li possible ki so conseil trop influencé par bann coutume local ek ki li base-li lor so prop l’experience ki limité. Li vrai ki pa tou coutume ki mauvais, ek aussi li possible ki sa ancien-la ena l’experience dan la vie. Mais bann frere ek soeur pou tire plus profit kan bann ancien encourage zot pou ecoute la voix Jésus, ek seki Jéhovah dire dan so Parole, plutot ki zot ecoute seki bann dimoune pensé, ou-soit ki zot suive bann coutume local.—Psaume 12:6; Proverbes 3:5, 6.
Formé par “l’esclave fidel et avisé”
15. Ki travail Jésus ti donne “l’esclave fidel et avisé”? Cite enn raison kifer l’esclave fidel inn gagne bann bon resultat.
15 Bann ancien couma l’apotre Pierre, l’apotre Jean, ek l’apotre Paul ti membre dan sa group dimoune ki Jésus ti appel “l’esclave fidel et avisé.” Sa esclave-la, c’est bann frere oint Jésus ki lor la terre, ek ki ena l’espoir pou al règne avek li dan le ciel. (Révélation 5:9, 10) Pendant lepok dernier jour ki nou pé vive asterla, bann frere Christ ki encore lor la terre, finn diminué. Mais travail ki Jésus inn donne zot pou faire, setadir pou preche la bonne nouvelle lor Royaume Bondié avant la fin vini, finn developpe beaucoup plus ki avant. Mais kan-mem, l’esclave fidel finn gagne bann bon resultat! Kifer? Enn parmi bann raison, c’est parski zot finn forme bann membre “lezot brebis” pou aide zot dan travail predication ek l’enseignement. (Jean 10:16; Matthieu 24:14; 25:40) Zordi, pli grand partie sa travail-la pé faire par bann membre lezot brebis, ki bien fidel.
16. Couma l’esclave fidel forme bann frere ki’nn nommé dan congregation?
16 Couma eski l’esclave fidel pé donne sa formation-la? Dan premier siecle, bann representant l’esclave fidel et avisé ti gagne permission pou forme bann ancien ek pou etabli zot dan bann congregation. Ek sa bann ancien-la en retour, ti forme bann membre congregation. (1 Corinthiens 4:17) Zordi aussi pareil. College central—sa ti group ancien oint ki represente l’esclave fidel-la—donne permission so bann representant pou forme bann assistant ministeriel ek bann ancien ek pou etabli zot dan plusieurs millier congregation ki existé dan le monde entier. En plus, College central organise bann lekol pou forme bann membre comité filiale, bann surveillant itinerant, bann ancien, ek bann assistant ministeriel pou zot kapav prend soin peuple Jéhovah dan pli bon fason possible. Zot gagne lezot instruction dan bann lettre, dan bann lartik La Tour de Garde, ek dan lezot publication, couma livre Organisés pour faire la volonté de Jéhovah.a
17. (a) Couma eski Jésus finn montré ki li ena enn grand confiance dan l’esclave fidel et avisé? (b) Couma bann ancien kapav montré ki zot ena confiance dan l’esclave fidel et avisé?
17 Tellement Jésus ti ena enn grand confiance dan l’esclave fidel, ki li ti mette sa l’esclave-la en charge “tou so bann di-bien”—setadir, tou so bann di-bien spirituel ki lor la terre. (Matthieu 24:47) Bann ancien ki finn etabli dan congregation montré ki zot aussi zot ena confiance dan l’esclave fidel, kan zot applik tou bann instruction ki zot gagné ar College central. Oui, kan bann ancien forme lezot frere, kan zot laisse Parole Bondié forme zot, ek kan zot applik formation ki zot gagné par l’esclave fidel et avisé, zot favorise l’unité dan bann congregation. Nou bien reconnaissant ki Jéhovah finn forme bann zom ki prend bien soin chaque membre dan congregation!
[Note]
a Publié par bann Témoins de Jéhovah.
Couma ou pou reponn?
• Couma eski bann ancien ki ena maturité forme lezot?
• Kifer bann ancien pa enseigne zot prop pensée?
• Couma ek kifer bann ancien montré ki zot ena confiance dan l’esclave fidel et avisé?
[Zimage, page 24, 25]
Bann ancien forme bann jeune frere dan congregation
[Zimage, page 26]
“L’esclave fidel et avisé” donne beaucoup formation bann ancien