Zot finn né dan enn nation ki Bondié ti choisir

“C’est toi ki Jéhovah to Bondié finn choisir pou vinn so peuple.” —DEUTÉRONOME 7:6.

1, 2. Ki bann action extraordinaire Jéhovah ti faire pou so peuple, ek ki nouveau relation bann Israélite finn ena avek Bondié?

EN 1513 a.n.l., Jéhovah finn commence ena enn nouveau relation avek so bann serviteur lor la terre. Sa l’année-la, Li ti abaisse enn puissance mondial ek Li ti delivré bann Israélite ki ti esclave en Égypte. Kan Li ti faire sa, Li ti vinn zot Sauveur ek zot Proprietaire. Avant sa, Bondié ti dire Moïse: “Dire bann garson Israël, ‘Mo-mem Jéhovah, ek vrai-mem mo pou tire fardeau ki bann Égyptien inn mette lor [zot] ek mo pou delivré zot dan zot esclavage, ek mo pou ré-amenn zot par la force mo lé-bras ek par bann grand jugement. Oui, mo pou faire zot vinn mo peuple, ek vrai-mem mo pou vinn zot Bondié.’ ”—Exode 6:6, 7, bann note; 15:1-7, 11.

² Enn tipé apré ki zot ti sorti dan L’Égypte, bann Israélite ti faire enn l’alliance avek zot Bondié, Jéhovah. Au lieu ki Li ti zis traite avek bann dimoune lor plan individuel, ou-soit avek bann famille ou-soit avek plusieurs famille ensam, asterla, Jéhovah ti pou ena enn peuple organisé, enn nation, lor la terre. (Exode 19:5, 6; 24:7) Li ti donne so peuple bann la-loi ki ti pou dirige zot dan zot la-vie toulé-jour, mais pli important encore, sa ti pou dirige zot dan zot l’adoration. Moïse ti dire zot: “Ki grand nation ki ena zot bann bondié pré kot zot, pareil couma [nou, nou ena] Jéhovah nou Bondié ki là chaque fois ki nou appel Li? Ek ki grand nation ki ena bann l’ordre ki droite ek bann jugement, pareil couma tou sa la-loi ki mo pé mette devant zot-la?”—Deutéronome 4:7, 8.

Zot finn né dan enn nation ki ti bann temoin

3, 4. Pou ki raison important Israël ti existé couma enn nation?

³ Plusieurs siecle plitar, par so prophete Isaïe, Jéhovah ti rappel bann Israélite enn raison important kifer zot ti existé couma enn nation. Isaïe ti dire: “Guette seki Jéhovah to Createur ti dire [toi], Jacob, ek Celui ki’nn forme toi, Israël: ‘Pa bizin peur, parski mo finn ré-acheté toi. Mo finn appel toi par to nom. To pou moi. Parski mo-mem Jéhovah to Bondié, le Saint d’Israël, to Sauveur. . . . Amenn mo bann garson ki’nn al loin, ek mo bann tifi ki’nn al ziska dan boute la terre, tou bann ki porte mo nom ek ki mo finn crée pou mo prop la-gloire, ek ki mo finn formé, oui, ki mo finn faire. Zot mo bann temoin,’ c’est seki Jéhovah dire, ‘mo serviteur ki mo finn choisiré, . . . le peuple ki mo finn formé pou moi, pou ki zot raconte mo louange.’ ”—Isaïe 43:1, 3, 6, 7, 10, 21.

⁴ En tant ki le peuple ki porte nom Jéhovah, bann Israélite ti pou rann temoignage lor so souveraineté devant bann nation. Zot ti pou vinn enn peuple ‘ki’nn crée pou la gloire Jéhovah.’ Zot ti pou ‘raconte louange Jéhovah.’ Zot ti pou raconté couma plusieurs fois, Jéhovah inn delivré zot dan enn fason extraordinaire, ek coumsa, zot ti pou glorifié so saint nom. En fait, zot ti pou vinn enn nation bann temoin pou Jéhovah.

5. Kifer nou kapav dire ki Israël ti enn nation ki ti voué ar Jéhovah?

⁵ Dan 11^eme siecle a.n.l, le roi Salomon ti montré ki Jéhovah ti faire Israël vinn enn nation ki separé ar lezot nation. Dan enn la-priere ki li ti faire, li ti dire: “To-mem ki finn separe zot ar tou bann peuple lor la terre, pou zot vinn to l’heritage.” (1 Rois 8:53) Chaque Israélite aussi ti ena enn relation special avek Jéhovah. Moïse ti dire zot: “Zot, zot bann garson Jéhovah, zot Bondié. . . . Parski to enn peuple ki saint pou Jéhovah to Bondié.” (Deutéronome 14:1, 2) Alors, li pa ti necessaire ki bann jeune Israélite voué zot la-vie ar Jéhovah. Zot ti né couma bann membre enn peuple ki ti voué ar Bondié. (Psaume 79:13; 95:7) Chaque nouveau generation ti gagne l’enseignement dapré bann la-loi ki Jéhovah ti donné, ek zot ti obligé garde sa bann la-loi-la a cause l’alliance ki ti ena entre Israël ek Jéhovah.—Deutéronome 11:18, 19.

Zot ti libre pou faire bann choix

6. Ki choix chaque Israélite ti bizin faire?

⁶ Mem si bann Israélite ti né dan enn nation ki ti voué ar Jéhovah, sakenn ti bizin prend so prop decision pou servi Bondié. Avant ki zot ti rente dan la Terre promise, Moïse ti dire zot: “Zordi, mo prend le ciel ek la terre couma bann temoin kont toi, ki mo finn mette la vie ek la mort devant toi, benediction ek malediction; ek to bizin choisir la vie pou ki to contigne vive, toi ek to descendance, kan to content Jéhovah to Bondié, kan to ecoute so la-voix ek to reste attaché ar Li; parski Li-mem to la-vie ek longueur to bann jour, pou ki to reste lor la terre ki Jéhovah ti faire serment pou donne to bann ancetre, Abraham, Isaac, ek Jacob.” (Deutéronome 30:19, 20) Alors, chaque Israélite ti bizin choisir pou content Jéhovah, pou ecoute so la-voix ek pou reste attaché ar Li. Fason ki sakenn ti pou servi liberté ki li ena pou prend so prop decision, ti pou amenn soit bann bon consequence ou-soit bann mauvais consequence.—Deutéronome 30:16-18.

7. Ki ti arrivé apré la mort bann ki ti vive dan lepok Josué?

⁷ Si nou examine seki finn passé pendant period bann juge, nou kapav comprend bien ki arrivé kan bann dimoune montré-zot fidel ou-soit infidel envers Jéhovah. Zis avant ki sa period-la commencé, bann Israélite ti suive bon l’exemple Josué, ek zot ti gagne bann benediction. “Le peuple ti contigne servi Jéhovah pendant tou bann jour Josué ek pendant tou bann jour bann ancien ki ti contigne vive apré Josué ek ki ti’nn trouve tou bann grand kitsoz ki Jéhovah ti faire pou Israël.” Mais, enn tipé lé-temps apré la mort Josué, “enn lot generation finn levé, ek bannla pa ti konn Jéhovah, ni bann kitsoz ki Li ti’nn faire pou Israël. Ek bann Israélite finn commence faire seki mauvais devant Jéhovah.” (Juges 2:7, 10, 11) Sa nouveau generation-la pa ti ena l’experience. Zot pa ti apprecié l’heritage ki zot ti gagné pou forme partie enn nation ki ti voué ar Jéhovah zot Bondié, ki ti faire bann action extraordinaire pou so peuple dan le passé. —Psaume 78:3-7, 10, 11.

Zot ti bizin garde promesse ki zot ti’nn faire ar Jéhovah

8, 9. (a) Ki l’occasion bann Israélite ti ena pou montré ki zot finn voué zot la-vie ar Jéhovah? (b) Ki bienfait, bann dimoune ki ti faire bann sacrifice volontaire ti pou gagné?

⁸ Jéhovah ti donne so peuple bann l’occasion pou vive dapré promesse ki zot ti faire en tant ki nation. Par exemple, dan so la-Loi, ti ena enn system sacrifice ou-soit offrande. Certain sacrifice ti obligatoire, alors ki lezot ti volontaire. (Hébreux 8:3) Parmi bann sacrifice volontaire ti ena bann holocauste, setadir bann sacrifice kot ti brule zanimo, ti ena aussi offrande bann la-grain, ek bann sacrifice communion. Bann Israélite ti presente Jéhovah sa bann don-la pou gagne so faveur ek pou remercié Li.—Lévitique 7:11-13.

⁹ Sa bann sacrifice volontaire-la ti faire Jéhovah plaisir. Concernant bann holocauste ek offrande bann la-grain, la Bible dire ki zot ti “enn l’odeur ki ti faire Jéhovah plaisir.” (Lévitique 1:9; 2:2) Kan bann pretre ti faire enn sacrifice communion, zot ti offert Jéhovah di-sang ek la graisse. Apré sa, ensam avek dimoune ki ti offert sa sacrifice-la, zot ti mange enn partie la viande-la. Dan enn fason symbolik, sa repas-la ti represente la paix ki ti ena entre zot ek Jéhovah. La Loi ti dire: “Ek si zot faire enn sacrifice communion pou Jéhovah, zot bizin faire sa sacrifice-la pou gagne faveur pou zot-mem.” (Lévitique 19:5) Par zot naissance, tou bann Israélite ti voué ar Jéhovah. Mais bann ki ti faire bann sacrifice volontaire, ti montré ki zot relation avek Jéhovah ti ena enn grand valeur pou zot; zot ti ‘gagne faveur pou zot-mem’ ek zot ti gagne beaucoup benediction.—Malaki 3:10.

10. Dan lepok Isaïe ek Malaki, couma eski Jéhovah finn montré ki Li pa ti apprecié ditou seki bann Israélite ti faire?

¹⁰ Mais bien souvent, nation Israël ki ti voué ar Jéhovah, pa ti montré-li fidel. Par so prophete Isaïe, Jéhovah ti dire zot: “To pa finn amenn mouton to bann holocauste pou moi, ek to pa finn glorifié moi avek to bann sacrifice. Mo pa finn oblige toi pou servi moi avek enn don.” (Isaïe 43:23) En plus, bann sacrifice ki zot pa ti faire volontairement avek l’amour, pa ti ena okenn valeur devant Jéhovah. Par exemple, 300 an apré Isaïe, dan lepok Malaki, bann Israélite ti offert bann zanimo ki ti ena defaut. Alors, Malaki ti dire zot: “ ‘Zot pa faire moi plaisir ditou,’ Jéhovah chef bann l’armée finn dire, ‘ek zot bann offrande pa faire moi plaisir ditou.’ . . . ‘Zot finn amenn seki zot finn rasse par force, enn zanimo ki boité, ek enn zanimo malade; oui zot finn amenn sa couma enn offrande. Eski mo kapav apprecié seki zot finn amené?’ ”—Malaki 1:10, 13; Amos 5:22.

Jéhovah inn rejette enn nation ki ti voué ar Li

11. Ki l’occasion Israël ti gagné?

¹¹ Kan bann Israélite ti vinn enn nation voué ar Jéhovah, Jéhovah Li-mem ti promette zot: “Si zot obeir tou seki mo dire zot faire, ek zot garde mo l’alliance, lerla vrai-mem zot pou vinn mo di-bien special parmi tou bann lezot peuple, parski la terre entier pou moi. Ek zot, zot pou vinn enn royaume bann pretre ek enn nation saint pou moi.” (Exode 19:5, 6) Messie ki Bondié ti promette ti pou apparette parmi zot ek donne zot en premier, l’occasion pou vinn bann membre Royaume Bondié. (Genèse 22:17, 18; 49:10; 2 Samuel 7:12, 16; Luc 1:31- 33; Romains 9:4, 5) Mais la plupart bann Israélite pa finn vive dapré sa promesse ki zot ti’nn faire-la. (Matthieu 22:14) Zot ti rejette le Messie ek zot ti mem touye li.—Actes 7:51-53.

12. Ki Jésus ti dire pou montré ki Jéhovah ti rejette Israël, nation ki ti voué ar Li?

¹² Dé-trois jour avant li mort, Jésus ti dire bann chef religieux juif: “Eski jamais zot pa finn lire dan bann l’Écriture: ‘Roche ki bann mason finn rejeté, sa-mem finn vinn roche principal ki tini tou lezot roche. C’est Jéhovah ki finn faire sa, ek sa li enn kitsoz extraordinaire devant nou lizié’? Ala kifer mo dire zot, pou tire royaume Bondié ar zot ek pou donne sa enn nation ki pou rapporte bann fruit.” (Matthieu 21:42, 43) Pou montré ki Jéhovah ti rejette zot en tant ki nation ki ti voué ar Li, Jésus ti dire: “Jérusalem, Jérusalem, la ville ki touye bann prophete ek ki lapide bann ki [Bondié] envoye kot li,—comié fois mo ti envie rassemblé to bann zenfant, pareil couma enn poule rassemblé so bann ti-poussin enba so lezel! Mais zot, zot pa ti oulé. Guetté! [Bondié pou] abandonne zot lakaz.”—Matthieu 23:37, 38.

Enn nouveau nation voué ar Jéhovah

13. Ki prophetie Jéhovah ti annoncé dan lepok Jérémie?

¹³ Dan lepok Jérémie, Jéhovah ti annonce enn nouveau kitsoz concernant so peuple. Nou lire: “ ‘Guetté! Ala bann jour pé vini,’ sa-mem seki Jéhovah pé dire, ‘ek vrai-mem mo pou faire enn nouveau l’alliance avek lakaz Israël ek avek lakaz Juda; pa pareil couma l’alliance ki mo ti faire avek zot bann grand dimoune, jour ki mo ti trappe zot la-main pou tire zot dan l’Égypte, “mo l’alliance ki zot finn cassé malgré ki mo ti zot proprietaire ek zot mari,” sa-mem seki Jéhovah pé dire.’ ‘Parski ala l’alliance ki mo pou faire avek lakaz Israël apré sa bann jour-la,’ sa-mem seki Jéhovah pé dire. ‘Mo pou mette mo la-loi dan zot, ek mo pou ecrire li dan zot leker. Ek mo pou vinn zot Bondié, ek zot pou vinn mo peuple.’ ”—Jérémie 31:31-33.

14. Kan nouveau nation ki’nn voué ar Jéhovah inn prend naissance, ek lor ki kitsoz sa ti basé? Ki sa nouveau nation-la?

¹⁴ Fondation sa nouveau l’alliance-la finn posé en l’an 33 n.l. kan Jésus inn mort ek plitar kan li’nn presente valeur so sacrifice ar so Papa. (Luc 22:20; Hébreux 9:15, 24-26) Mais, sa nouveau l’alliance-la inn commence fonctionné kan Jéhovah inn envoye so l’esprit saint pendant la Pentecôte l’an 33 n.l., ek kan enn nouveau nation, setadir “Israël Bondié,” finn prend naissance. (Galates 6:16; Romains 2:28, 29; 9:6; 11:25, 26) Kan li ti pé ecrire bann chrétien, l’apotre Pierre ti dire: “Zot ‘enn race ki [Bondié] finn choisir, enn group pretre ek lé-roi, enn nation saint, enn peuple ki pou vinn enn di-bien special, pou ki zot annonce bann qualité’ sa kikenn ki finn tire zot dan noirté-la ek finn faire zot vinn dan so la-lumiere extraordinaire. Parski avant, zot pa ti enn peuple, mais asterla zot peuple Bondié.” (1 Pierre 2:9, 10) Relation special ki ti ena entre Jéhovah ek nation Israël lor la terre, ti fini. Enn l’an 33 n.l., Jéhovah ti retire so faveur lor nation Israël ek Li finn donne sa Israël spirituel, setadir congregation chrétienne, “enn nation ki pou rapporte bann fruit” Royaume messianik.—Matthieu 21:43.

Voué personnellement ar Jéhovah

15. Jour la Pentecôte l’an 33 n.l., ki bapteme Pierre ti encourage bann ki ti pé ecoute li pou prend?

¹⁵ A partir la Pentecôte l’an 33 n.l., chaque dimoune, ki li enn Juif ou-soit enn non-Juif, ti bizin voué so la-vie personnellement ar Jéhovah ek baptisé “au nom du Père, du Fils ek l’esprit saint.”a (Matthieu 28:19) Sa jour-la, l’apotre Pierre ti dire bann Juif ek bann ki ti converti pou vinn Juif: “Repenti, ek ki sakenn parmi zot baptisé au nom Jésus Christ pou gagne pardon zot peché, ek zot pou gagne don l’esprit saint gratuit.” (Actes 2:38) Bann Juif ek bann ki ti converti pou vinn Juif, ti bizin montré par zot bapteme ki zot finn voué zot la-vie ar Jéhovah, mais aussi ki zot finn accepté Jésus couma moyen ki Jéhovah servi pou pardonne zot bann peché. Zot ti bizin reconette ki Jésus li-mem Grand Pretre ki Jéhovah inn etabli, li-mem zot Chef, ek li-mem chef congregation.—Colossiens 1:13, 14, 18.

16. Dan lepok Paul, couma eski bann ki ti bien disposé, bann Juif ek bann non-Juif toulé-deux, ti vinn bann membre Israël spirituel?

¹⁶ Plusieurs l’année plitar, l’apotre Paul ti dire: “Ar bann ki Damas d’abord ek ar bann ki Jérusalem, ek partout dan pays Judée ek ar bann nation, mo finn amenn message ki zot bizin repenti ek tourne vers Bondié kan zot faire bann action ki montré ki zot finn repenti.” (Actes 26:20) Paul ti convaink bann dimoune, ki zot ti Juif ou bien bann non-Juif, ki Jésus li-mem ti Christ, le Messie. Apré sa, li ti aide zot ziska ki zot voué zot la-vie ek faire zot baptisé. (Actes 16:14, 15, 31-33; 17:3, 4; 18:8) Sa bann nouveau disciple-la ti vinn bann membre Israël spirituel, letan zot ti tourne-zot vers Bondié.

17. Ki kitsoz Jéhovah pré pou confirmé, ek ki lot travail pé faire rapidement?

¹⁷ Jéhovah pré pou fini confirme bann dernier membre Israélite spirituel. Kan sa pou fini, sa “quatre ange” ki pé kal bann di-vent destruction ‘grande tribulation-la,’ pou gagne l’autorisation pou largue zot. Entre temps, ‘la grande foule’ ki ena l’espoir pou vive pou touletan lor la terre, pé rassemblé rapidement. Sa bann ‘lezot brebis-la,’ finn choisir volontairement pou ena la foi dan “di-sang l’Agneau.” Ek zot prend bapteme pou montré ki zot finn voué zot la-vie ar Jéhovah. (Révélation 7:1-4, 9-15; 22:17; Jean 10:16; Matthieu 28:19, 20) Parmi zot ena beaucoup jeune ki finn grandi dan enn famille chrétien. Si ou enn jeune dan sa situation-la, nou sur ki ou pou interessé pou lire prochain lartik.

[Note]

Revision

• Kifer li pa ti necessaire ki bann jeune Israélite voué zot la-vie ar Jéhovah?

• Couma bann Israélite ti kapav montré ki zot ti vive en accord avek promesse ki zot ti’nn faire?

• Kifer eski Jéhovah ti rejette Israël en tant ki nation ki ti voué ar Li, ek couma Li finn remplace li?

• A partir la Pentecôte 33 n.l., ki bann Juif ek bann non-Juif ti bizin faire pou vinn bann membre Israël spirituel?

[Zimage, page 23]

Bann jeune israélite ti né couma bann membre enn nation ki Bondié ti choisir

[Zimage, page 25]

Chaque Israélite ti bizin prend so prop decision pou servi Bondié ou-soit non

[Zimage, page 25]

Bann Israélite ti gagne l’occasion pou montré zot l’amour pou Jéhovah kan zot ti faire bann offrande volontaire

[Zimage, page 27]

A partir la Pentecôte 33 n.l., bann disciple Christ ti bizin voué-zot personnellement ar Bondié ek montré sa par zot bapteme