“To pou bizin zis dan la joie”

“To pou faire sa fête-la pou Jéhovah . . . ; oui, to pou bizin zis dan la joie.”—Deutéronome 16:15.

1. (a) Ki bann question Satan ti soulevé? (b) Ki Jéhovah ti annoncé apré rebellion Adam ek Ève?

Kan Satan ti pousse Adam ek Ève pou rebelle kont zot Createur, li ti souleve deux question bien important. Premierement, li ti pretann ki Jéhovah pa dire la verité touletan ek ki Li pa dirige l’univers dan enn bon fason. Deuxiemement, Satan ti pretann ki bann dimoune ti pou servi Bondié zis par l’interet. Dan lepok Job, li ti souleve sa deuxieme question-la dan enn fason bien clair. (Genèse 3:1-6; Job 1:9, 10; 2:4, 5) Mais, Jéhovah inn agir bien vite pou traite sa problem-la. Alors ki Adam ek Ève ti encore dan jardin Éden, Jéhovah ti annoncé couma Li ti pou reglé sa bann question-la. Li ti annoncé ki pou ena enn “descendance” ki pou vini, ki talon sa descendance-la pou blessé ek ki apré sa, li pou crase la tête Satan.—Genèse 3:15.

2. Ki renseignement Jéhovah ti donné lor fason ki Li ti pou realise prophetie ki ena dan Genèse 3:15?

² A mesure ki le temps ti passé, Jéhovah ti donne plus renseignement lor sa prophetie-la, ek coumsa Li ti montré ki finalement prophetie-la ti pou realisé vrai-mem. Par exemple, Bondié ti dire Abraham ki sa ‘descendance-la’ pou parette parmi so bann descendant. (Genèse 22:15- 18) Jacob, ti-zenfant Abraham, ti vinn papa 12 tribu Israël. En 1513 a.n.l., kan sa bann tribu-la ti vinn enn nation, Jéhovah ti donne zot la Loi mosaïk ek dapré certain parmi sa bann la-loi-la, zot ti bizin faire plusieurs fête religieux pendant l’année. L’apotre Paul ti dire ki sa bann fête-la ti coumadir ‘enn l’ombrage pou bann kitsoz ki ti pou vini.’ (Colossiens 2:16, 17; Hébreux 10:1) Dan sa bann fête-la ti ena bann kitsoz ki faire nou comprend couma projet Jéhovah en rapport avek sa Descendance-la ti pou realisé. Kan bann Israélite ti faire sa bann fête-la, ti ena enn grand la-joie en Israël. Anou examine sa bann fête-la. Sa pou fortifié nou la-foi ki Jéhovah touletan tini so bann promesse.

Descendance-la li apparette

3. Kisannla ti sa Descendance ki Bondié ti promette-la, ek couma so talon ti blessé?

³ Plus ki 4,000 an apré ki Jéhovah inn donne premier prophetie, sa Descendance ki Li ti promette-la ti vini. Kisannla li ti été? Jésus. (Galates 3:16) Jésus ti enn zom parfait; li ti reste fidel ziska la mort ek coumsa li ti montré ki bann accusation Satan ti fausse. En plus, parski Jésus pa ti ena peché, so la-mort ti enn sacrifice ki ti ena enn grand valeur. Grace a so sacrifice, Jésus inn permette ki bann descendant fidel Adam ek Ève delivré ar peché ek la mort. Kan Jésus ti mort lor enn poteau souffrance, “talon” sa Descendance ki Bondié ti promette-la ti ‘blessé.’—Hébreux 9:11-14.

4. Ki kitsoz dan le passé ti annonce sacrifice Jésus?

⁴ Jésus ti mort le 14 Nisan l’an 33 n.l.a En Israël, le 14 Nisan bann Israélite ti fête Pâque ek sa jour-la zot ti dan la joie. Chaque l’année, sa jour-la, bann famille ti prend enn repas ek zot ti mange enn jeune agneau sans defaut. Sa ti rappel zot ki role di-sang enn agneau ti joué dan delivrance bann premier-né Israélite kan l’ange la mort ti detruire tou bann premier-né égyptien le 14 Nisan l’an 1513 a.n.l. (Exode 12:1-14) Sa l’agneau-la ti represente Jésus ek l’apotre Paul ti dire lor li: “Christ nou Pâque finn sacrifié.” (1 Corinthiens 5:7) Pareil couma di-sang sa l’agneau-la ti sauve bann Israélite, di-sang ki Jésus ti versé permette beaucoup dimoune gagne delivrance.—Jean 3:16, 36.

‘Bann premier recolte parmi bann mort’

5, 6. (a) Kan eski Jésus ti ressuscité, ek couma sa ti representé dan la Loi? (b) Couma resurrection Jésus ti permette ki Genèse 3:15 realisé?

⁵ Troisieme jour apré so la-mort, Jésus ti ressuscité pou ki li kapav presente so Papa, valeur so sacrifice. (Hébreux 9:24) So resurrection ti representé par seki ti passé pendant enn lot fête en Israël. Lendemain 14 Nisan, le 15 Nisan, fête Gateau sans levain ti commencé. Enn jour apré, le 16 Nisan, bann Israélite ti faire enn paquet avek bann premier l’orge ki zot ti recolté. L’orge ti premier recolte ki ti faire en Israël. Zot ti donne sa paquet l’orge-la enn pretre ek li ti bizin balance sa a-droite a-gauche devant Jéhovah. (Lévitique 23:6-14) Li interessant ki c’est sa date-la-mem, en l’an 33 n.l., ki Jéhovah ti ressuscite Jésus, so “temoin fidel ki dire la verité.” Par sa action-la, Li’nn empeche Satan faire Jésus arrete existé net. Le 16 Nisan l’an 33 n.l., kan Jéhovah ti ressuscite Jésus, Li ti faire li vinn enn creature spirituel immortel.—Révélation 3:14; 1 Pierre 3:18.

⁶ Jésus ti vinn “bann premier recolte parmi bann ki’nn dormi dan la mort.” (1 Corinthiens 15:20) Li ti different avek bann dimoune ki ti ressuscité avant, parski li, li pa ti ré-mort encore. Au contraire, li ti monte dan le ciel ek li ti assize dan coté droite Jéhovah. Là, li ti attann ziska ki li vinn le Roi dan Royaume celeste Jéhovah. (Psaume 110:1; Actes 2:32, 33; Hébreux 10:12, 13) Depuis ki li’nn vinn le Roi, asterla Jésus kapav crase la tête Satan ek detruire li net ek detruire aussi so descendance.—Révélation 11:15, 18; 20:1-3, 10.

Plus membre dan descendance Abraham

7. Ki ti passé pendant fête des Semaines?

⁷ Jésus ti sa Descendance ki Bondié ti promette en Éden-la ek c’est par li-mem ki Jéhovah pou “detruire seki Satan finn faire.” (1 Jean 3:8) Mais kan Jéhovah ti koz avek Abraham, Li ti montré ki sa “descendance” ki pou parette parmi so bann descendant-la pa pou zis enn sel dimoune. Li pou “pareil couma bann zetoile ki dan le ciel ek couma bann la-grain di-sable ki dan bord la mer.” (Genèse 22:17) Ti ena enn lot fête en Israël ki permette pou identifié bann lezot membre sa ‘descendance-la.’ Cinquante jour apré le 16 Nisan, bann Israélite ti faire fête des Semaines. La Loi ti dire lor sa fête-la: “A partir lendemain septieme sabbat, zot bizin compte cinquante jour, ek lerla zot bizin presente Jéhovah enn nouveau offrande la grain. Depuis kot zot, zot bizin amenn deux di-pain couma enn offrande balancé. Bizin faire sa deux di-pain-la avek deux dixieme épha la-farine fin ek pur. Zot bizin mette levain dan so la-pate avant zot cuit li, ek sa-mem pou bann premier fruit mur pou Jéhovah.”b—Lévitique 23:16, 17, 20.

8. Ki l’evenement special ti arrivé jour la Pentecôte l’an 33 n.l.?

⁸ Kan Jésus ti lor la terre, ti appel fête des Semaines, la Pentecôte (enn mot ki vedir “cinquantieme” en grec). Jour la Pentecôte l’an 33 n.l., pli Grand Pretre, setadir Jésus Christ ki ti ressuscité, ti envoye l’esprit saint lor enn ti group 120 disciple ki ti rassemblé dan Jérusalem. C’est coumsa ki sa bann disciple-la ti vinn bann chrétien oint, bann garson Bondié ek bann frere Jésus Christ. (Romains 8:15-17) Zot ti vinn enn nouveau nation, “Israël Bondié.” (Galates 6:16) Au commencement zot ti enn ti group, mais a la fin, ti pou ena 144,000 chrétien oint dan sa nation-la.—Révélation 7:1-4.

9, 10. Couma congregation bann chrétien oint ti representé pendant fête la Pentecôte?

⁹ Congregation bann chrétien oint ti representé par deux di-pain ki ti ena levain ek ki ti balancé devant Jéhovah, chaque Pentecôte. Kifer ti mette levain kan ti prepare sa deux di-pain-la? Dan la Bible, levain represente peché. Sa vedir ki bann chrétien oint ti pou encore ena peché ki zot finn herité, en zot. Mais seulement zot ti pou kapav prié Jéhovah lor base sacrifice Jésus Christ. (Romains 5:1, 2) Mais kifer deux di-pain? Kitfois sa ti annoncé ki finalement bann chrétien oint ti pou sorti dan deux group: parmi bann Juif ek plitar parmi bann non-Juif.—Galates 3:26-29; Éphésiens 2:13-18.

¹⁰ Bann Israélite ti servi bann premier recolte di-blé pou faire sa deux di-pain ki zot ti offert jour la Pentecôte-la. Li pareil aussi avek bann chrétien oint, la Bible appel zot “enn qualité premier recolte parmi so bann creature.” (Jacques 1:18) Zot-mem bann premier ki’nn gagne pardon pou zot peché lor base sacrifice Jésus. Grace a sa, zot pou gagne la vie immortel dan le ciel kot zot pou règne avek Jésus dan so Royaume. (1 Corinthiens 15:53; Philippiens 3:20, 21; Révélation 20:6) C’est dan sa position-la ki bientot, zot pou “dirige bann [nation] avek enn bar ferraille” ek zot pou trouve ‘Satan crasé enba zot lipié.’ (Révélation 2:26, 27; Romains 16:20) L’apotre Jean ti dire: “C’est bann ki contigne suive l’Agneau n’importe kot li allé. Finn acheté zot parmi bann dimoune, couma bann premier recolte pou Bondié ek pou l’Agneau.”—Révélation 14:4.

Enn jour ki ti mette l’accent lor delivrance

11, 12. (a) Ki ti passé jour Propitiation? (b) Ki bienfait bann Israélite ti gagné kan ti offert sacrifice enn taureau ek deux bouc?

¹¹ Dixieme jour Éthanim (plitar ti appel sa mois-la Tishri),c bann Israélite ti faire enn fête ki ti montré couma bann bienfait sacrifice Jésus pou appliké. Sa jour-la, le peuple entier ti rassemblé ensam pou jour Propitiation, ek bann pretre ti offert bann sacrifice pou couvert zot peché.—Lévitique 16:29, 30.

¹² Jour Propitiation, grand pretre ti sacrifié enn jeune taureau. Li ti prend inpé di-sang ek li ti rente dan Très-Saint, là li ti fann sa di-sang-la sept fois devant couverture l’Arche de l’alliance. Dan enn sens, li ti offert sa di-sang-la devant Jéhovah. Sa offrande-la ti concerne peché grand pretre ek “so famille,” ek peché bann sous-pretre ek bann Lévite. Apré sa, grand pretre ti prend deux bouc; li ti sacrifié enn bouc couma enn sacrifice pou peché “le peuple.” Li ti prend inpé di-sang sa bouc-la ek li ti fann sa aussi devant couverture l’Arche de l’alliance dan Très-Saint. Apré, grand pretre ti pose so la-main lor la tête deuxieme bouc-la ek li ti confesse peché bann Israélite. Lerla, ti largue sa bouc-la dan desert pou ki dan enn fason symbolik, li sarié peché nation Israël.—Lévitique 16:3-16, 21, 22.

13. Couma bann action ki ti faire pendant jour Propitiation, ti represente role ki Jésus ena?

¹³ Tou sa bann action-la represente fason ki Jésus Christ, pli Grand Pretre, servi valeur so prop di-sang pou ki bann dimoune gagne pardon zot peché. Valeur sa di-sang-la li appliké premierement ar bann 144,000 chrétien oint ki couma enn “lakaz spirituel,” ek sa permette Bondié pou declare zot juste ek considere zot couma bann dimoune pur. (1 Pierre 2:5; 1 Corinthiens 6:11) Sa ti representé par sacrifice sa taureau-la. Grace a sa, zot kapav gagne zot l’heritage dan le ciel. Deuxiemement, valeur di-sang Jésus appliké ar plusieurs million dimoune ki ena la foi en Jésus. Sa ti representé par sacrifice sa bouc-la. Jéhovah pou beni zot kan li pou donne zot la vie eternel lor la terre, enn l’heritage ki Adam ek Ève inn perdi. (Psaume 37:10, 11) Lor base di-sang ki li’nn versé, Jésus sarié peché le monde entier, pareil couma dan enn fason symbolik, deuxieme bouc-la ti sarié peché bann Israélite kan li ti al dan desert.—Isaïe 53:4, 5.

Zot ti dan la joie devant Jéhovah

14, 15. Ki ti arrivé pendant fête des Huttes, ek ki sa ti rappel bann Israélite?

¹⁴ Apré jour Propitiation, bann Israélite ti celebré fête des Huttes, fête pli joyeux ki bann Juif ti faire dan l’année. (Lévitique 23:34-43) Ti faire sa fête-la a partir le 15 ziska le 21 Éthanim, ek li ti fini par enn grand l’assemblée sacré ki ti ena le 22. Sa fête-la ti montré la fin recolte ek li ti enn l’occasion kot bann Israélite ti remercié Bondié pou so grand bonté envers zot. A cause sa, Jéhovah ti dire zot: “Jéhovah to Bondié pou beni toi dan tou to bann produit ek dan tou seki to faire; oui to pou bizin zis dan la joie.” (Deutéronome 16:15) Surement ki pendant sa fête-la ti ena enn grand la-joie parmi bann Israélite!

¹⁵ Pendant sa fête-la, bann Israélite ti reste dan bann hutte pendant sept jour. Sa ti rappel zot ki pendant enn lepok, zot ti reste dan bann hutte dan desert. Sa fête-la ti donne zot l’occasion pou bien reflechi couma Jéhovah ti prend zot soin couma enn papa. (Deutéronome 8:15, 16) Tou dimoune, ki li riche ou-soit misere, ti reste dan mem qualité hutte. Alors, sa ti rappel bann Israélite ki pendant sa fête-la zot tou ti egal. —Nehémia 8:14-16.

16. Ki fête des Huttes ti representé?

¹⁶ Fête des Huttes ti enn fête recolte ki ti bien joyeux ek li represente enn lot qualité recolte ki bien joyeux: rassemblement bann dimoune ki ena la foi en Jésus Christ. Sa rassemblement-la ti commencé la Pentecôte l’an 33 n.l. kan 120 disciple Jésus ti gagne l’esprit saint pou forme partie dan enn group “bann pretre ki saint.” Pareil couma bann Israélite ti vive dan bann hutte pendant zis dé-trois jour, bann oint koné ki dan sa mauvais lé-monde-la, zot zis bann “habitant temporaire.” Zot l’esperance c’est al vive dan le ciel. (1 Pierre 2:5, 11) Sa recolte bann chrétien oint-la pré pou fini dan lepok “dernier jour” alors ki pé rassemblé bann dernier membre 144,000.—2 Timothée 3:1.

17, 18. (a) Couma nou koné ki apart bann chrétien oint, pou ena lezot dimoune ki pou profite sacrifice Jésus? (b) Kisannla zordi pé gagne bann bienfait ar seki fête des Huttes representé, ek kan eski sa fête-la pou arrive so point pli important?

¹⁷ Li interessant pou remarké ki dan le passé, pendant sa fête-la ti sacrifié 70 taureau. (Nombres 29:12-34) Chiffre 70 c’est 7 multiplié par 10, ek sa deux chiffre-la dan la Bible represente seki parfait dan domaine celeste ek terrestre. Alors, bann chrétien fidel ki sorti dan toulé 70 famille ki descendant Noé, pou profite sacrifice Jésus. (Genèse 10:1-29) En accord avek sa, dan nou lepok finn ena beaucoup lezot dimoune ki finn joinde ensam dan sa rassemblement-la; parmi ena aussi bann dimoune ki sorti dan lezot nation, ki ena la foi en Jésus, ek ki ena l’esperance pou vive dan paradi lor la terre.

¹⁸ Dan enn vision, l’apotre Jean ti trouve sa rassemblement ki pé faire dan nou lepok-la. Avant, li ti tann enn ange annoncé ki bann dernier membre 144,000 pé scellé. Apré, li ti trouve “enn grand la-foule, ki personne pa ti kapav compté,” ki pé debouté devant Jéhovah ek Jésus avek bann “branche palmier dan zot la-main.” Bann membre la grande foule “sorti dan la grande tribulation” ek zot pé rente dan le monde nouveau. Zot aussi asterla, zot zis bann habitant temporaire dan sa vié system-la, ek zot pé attann avek confiance lepok kan “l’Agneau . . . pou prend zot soin ek pou guide zot vers bann la-source de l’eau la vie.” Dan sa lepok-la “Bondié pou souye tou larme dan zot lizié.” (Révélation 7:1-10, 14-17) Dan so realisation final, fête des Huttes pou arrive so point pli important a la fin règne Jésus Christ, setadir apré mille an, kan la grande foule ek bann dimoune ki pou ressuscité pou gagne la vie eternel.—Révélation 20:5.

19. Ki bienfait nou gagné kan nou examine bann fête ki ti faire longtemps en Israël?

¹⁹ Kan nou medite lor signification bann fête ki ti faire longtemps en Israël, nou aussi nou kapav “zis dan la joie.” Nou content ki a travers sa bann fête-la Jéhovah finn annoncé couma prophetie ki Li ti donné en Éden ti pou realisé, ek nou extra content kan nou trouve li realisé l’etape par l’etape dan nou lepok. Zordi, nou koné ki Descendance ki mentionné dan sa prophetie-la finn fini vini, ek ki li ti blessé dan so talon. Asterla, Jésus lé-Roi dan le ciel. En plus, la plupart membre 144,000 finn fini prouve zot fidelité ziska la mort. Ki resté encore pou realisé? Comié lé-temps resté pou ki sa prophetie-la realise net? Nou pou examine sa bann question-la dan prochain lartik.

[Note]

Eski ou kapav expliké?

• Ki sa l’agneau ki bann Juif ti servi pendant Pâque-la ti representé?

• Ki rassemblement fête la Pentecôte ti representé?

• Couma seki ti passé pendant jour Propitiation montré fason ki sacrifice Jésus appliké?

• Dan ki fason rassemblement bann chrétien ti representé par fête des Huttes?

[L’encadré, page 24 ek 25]

(guette publication)

Pâque

14 Nisan

Evenement

Touye l’agneau pou Pâque

Li Represente

Sacrifice Jésus

Fête Gateau sans levain (15-21 Nisan)

15 Nisan

Evenement

Sabbat

16 Nisan

Evenement

Offrande l’orge

Li Represente

Resurrection Jésus

50 jour

Fête Semaines (Pentecôte)

6 Sivân

Evenement

Offrande deux di-pain

Li Represente

Jésus presente so bann frere oint ar Jéhovah

Jour Propitiation

10 Tishri

Evenement

Offrande enn taureau ek deux bouc

Li Represente

Jésus offert valeur so di-sang pou tou dimoune

Fête huttes (Fête Recolte, Fête Tabernacle)

15-21 Tishri

Evenement

Bann Israélite ti content pou reste dan hutte ek kan ti ena recolte; ti offert 70 taureau

Li Represente

Rassemblement bann chrétien oint ek la grande foule

[Zimage, page 23]

Pareil couma di-sang l’agneau ki ti servi pendant Pâque, di-sang Jésus permette beaucoup dimoune gagne la vie sauve

[Zimage, page 24]

Bann premier recolte l’orge ki ti offert le 16 Nisan ti represente resurrection Jésus

[Zimage, page 25]

Sa deux di-pain ki ti offert jour la Pentecôte-la ti represente congregation bann chrétien oint

[Zimage, page 26]

Fête des Huttes ti represente enn recolte joyeux: rassemblement bann chrétien oint ek enn “grand la-foule” ki sorti dan tou bann nation