Watchtower BIBLIOTEK LOR INTERNET
Watchtower
BIBLIOTEK LOR INTERNET
Kreol Morisien
  • LABIB
  • PIBLIKASION
  • RENION
  • w07 1/2 p. 24-32
  • Contigne toujours augmente ou reconnaissance

Pena video ki disponib pou seki ou finn swazir.

Sori, enn erer inn anpes sa video-la zwe.

  • Contigne toujours augmente ou reconnaissance
  • La Tour de Garde pé annonce Royaume Jéhovah—2007
  • Soutit
  • Lor Mem Size
  • Apprecié privilege pou konn la verité ki ena dan la Bible
  • Bann dimoune reconnaissant pé vinn dan coté Bondié
  • Nou reconnaissant ki nou “equipé pou tou bon travail”
  • Servi livre Ki la Bible enseigné? dan enn fason efficace
  • Contigne augmente ou reconnaissance
  • Kifer Nou Bizin Exprim Nou Rekonesans?
    Latour Degard Pe Anons Rwayom Zeova (Edision Letid)—2019
  • Jéhovah, Li enn Bondié ki ena reconnaissance
    La Tour de Garde pé annonce Royaume Jéhovah—2007
La Tour de Garde pé annonce Royaume Jéhovah—2007
w07 1/2 p. 24-32

Contigne toujours augmente ou reconnaissance

“To bann pensée ena vrai-mem beaucoup valeur . . . ! Ah Bondié, zot vrai-mem enn grand quantité!”—Psaume 139:17.

1, 2. Kifer nou bizin apprecié Parole Bondié, ek couma David ti exprime so l’amour pou sa?

SA TI enn grand decouverte! Kan ti pé repare temple Jéhovah dan Jérusalem, grand pretre Hilqia ti trouve “livre la loi Jéhovah ki’nn donné par la main Moïse,” surement copie original ki ti’nn completé apepré 800 an avant! Eski ou kapav maziné ki sentiment le roi Yoshiya, ki ti ena la crainte pou Bondié, ti ena, kan ti mette sa livre-la devant li? Sa livre-la ti ena beaucoup valeur pou li ek de-suite li ti faire Shaphân, so secretaire, lire sa fort.—2 Chroniques 34:14-18.

2 Zordi, plusieurs million dimoune kapav lire Parole Bondié, soit en entier ou-soit en partie. Mais mem si beaucoup dimoune kapav gagne la Bible avek facilité, eski sa vedir ki li’nn perdi so valeur ek ki li ena moins l’importance? Non! En realité, dan la Bible ena bann pensée Bondié Tout-Puissant, ek Li finn faire ecrire sa pou nou profit. (2 Timothée 3:16) David ti exprime bann sentiment ki li ti ena pou Parole Bondié kan li ti ecrire: “To bann pensée ena vrai-mem beaucoup valeur pou moi! Ah Bondié, zot vrai-mem enn grand quantité!”—Psaume 139:17.

3. Couma nou koné ki David ti enn dimoune bien spirituel?

3 David ti ena reconnaissance pou Jéhovah, pou so Parole ek pou bann disposition ki Li ti prend pou vrai l’adoration. Jamais sa l’appreciation-la pa ti diminué. David ti dire seki li ti ressenti dan bann joli psaume ki li ti ecrire. Par exemple, dan Psaume 27:4 li ti dire: “Mo finn demann Jéhovah enn kitsoz—c’est sa-mem ki mo pou rodé: Ki mo reste dan lakaz Jéhovah toulé-jour ki mo vive, pou admire charme ki Jéhovah ena ek pou guette so temple avek admiration.” En hébreux, l’expression “guette avek admiration” vedir contigne guetté, examine bien, guette avek plaisir. Oui, David ti enn dimoune bien spirituel; li ti ena reconnaissance pou bann disposition spirituel ki Jéhovah ti prend, ek li ti bien apprecié tou la-verité spirituel ki Jéhovah ti faire koné. Li’nn laisse enn bon l’exemple ki nou kapav imité!—Psaume 19: 7-11.

Apprecié privilege pou konn la verité ki ena dan la Bible

4. Kifer Jésus ti “rempli ar la joie dan l’esprit saint”?

4 Pou nou comprend Parole Bondié, li pa necessaire ki nou ena enn grand l’intelligence, ni ki nou enn ena grand l’education ki gagné dan le monde, ki encourage bann dimoune pou ena l’orgueil. Au contraire, sa depann lor faveur ki personne pa merité, ki Jéhovah donne bann dimoune ki humble, sincere, ek ki reconette ki zot pauvre lor plan spirituel. (Matthieu 5:3; 1 Jean 5:20) Kan Jésus ti reflechi ki nom certain dimoune imparfait finn ecrire dan le ciel, “li ti rempli ar la joie dan l’esprit saint, ek li ti dire: ‘Mo loué toi devant tou dimoune, Papa, Seigneur le ciel ek la terre, parski to finn bien cachiette sa bann kitsoz-la ar bann dimoune ki ena la sagesse ek ar bann intellectuel, ek to finn faire bann ti-baba konn sa.’ ”—Luc 10:17-21.

5. Kifer bann disciple Jésus pa ti bizin considere bann verité ki Bondié ti revelé lor so Royaume, couma enn kitsoz banal?

5 Apré ki Jésus ti faire sa la-priere sincere-la, li ti tourne vers so bann disciple ek li dire: “Heureux bann lizié ki trouve bann kitsoz ki zot pé trouvé. Parski mo dire zot: Beaucoup prophete ek lé-roi ti envie trouve bann kitsoz ki zot pé trouvé, mais zot pa finn trouve sa, ek zot ti envie tann bann kitsoz ki zot pé tendé, mais zot pa finn tann sa.” Oui, Jésus ti pé encourage so bann disciple pou pa considere bann verité ki Bondié ti faire zot koné lor so Royaume, couma enn kitsoz banal. Bondié pa ti faire so bann serviteur ki ti vive dan le passé konn sa. Ek Li pa ti revele sa ar bann ‘ki ti ena la sagesse ek bann intellectuel’ dan lepok Jésus!—Luc 10:23, 24.

6, 7. (a) Ki bann raison nou ena pou apprecié la verité ki Bondié faire nou koné? (b) Ki difference nou trouvé zordi entre vrai religion ek fausse religion?

6 Dan nou lepok, nou ena encore plus raison pou nou reconnaissant pou la verité ki Bondié faire nou koné. Kifer? Parski Jéhovah inn servi “l’esclave fidel et avisé” pou faire so bann serviteur comprend pli bien so Parole. (Matthieu 24:45; Daniel 12:10) Concernant lepok la fin, prophete Daniel ti ecrire: “Beaucoup pou rod par-ci par-là, ek vrai connaissance pou en abondance.” (Daniel 12:4) Eski ou pa d’accord ki zordi, connaissance lor Bondié li “en abondance” ek ki bann serviteur Jéhovah zot bien nourri lor plan spirituel?

7 Nou trouve enn grand difference entre prosperité spirituel ki ena parmi bann serviteur Bondié ek confusion ki ena dan bann religion Babylone la Grande! A cause sa, beaucoup dimoune ki finn perdi l’espoir ou-soit ki finn degouté ar bann fausse religion, pé tourne vers vrai l’adoration. Zot “pa envie participe avek [Babylone la Grande] dan so bann peché” ni “gagne enn part dan so bann malheur.” Jéhovah ek so bann serviteur invite tou sa bann dimoune-la pou vinn dan vrai congregation chrétien.—Révélation 18:2-4; 22:17.

Bann dimoune reconnaissant pé vinn dan coté Bondié

8, 9. Couma bann parole Haggaï 2:7 pé realisé zordi?

8 Concernant so temple spirituel kot bann dimoune adore Li, Jéhovah ti annoncé: “Mo pou sakouye tou bann nation, ek bann kitsoz desirable dan tou bann nation, pou bizin rentré; ek mo pou rempli sa lakaz-la ar la gloire.” (Haggaï 2:7) Sa prophetie extraordinaire-la finn konn enn realisation dan lepok Haggaï, kan enn reste Israélite ti retourne Jérusalem pou reconstruire temple Jéhovah. Zordi, sa prophetie Haggaï-la pé konn enn lot realisation en rapport avek grand temple spirituel Jéhovah.

9 Ena plusieurs million dimoune ki’nn fini vinn dan temple symbolik Jéhovah pou adore Li avek “l’esprit ek la verité.” Ek toulé-l’année, plus ki 200,000 dimoune ki la Bible decrire couma “bann kitsoz desirable dan tou bann nation” pé contigne vinn dan sa temple spirituel-la. (Jean 4:23, 24) Par exemple, rapport mondial pou l’année service 2006 montré ki finn ena 248,327 dimoune ki finn prend bapteme pou montré ki zot finn voué zot la-vie ar Jéhovah. Chaque jour en moyenne finn ena 680 nouveau disciple! Zot l’amour pou la verité ek zot desir pou servi Jéhovah couma bann proclamateur so Royaume montré ki c’est vrai-mem Bondié ki finn attire zot.—Jean 6:44, 65.

10, 11. Raconte enn l’experience ki montré couma bann dimoune inn commence apprecié la verité ki ena dan la Bible.

10 Beaucoup parmi sa bann dimoune-la finn attiré ar la verité parski zot finn comprend ki ena enn “difference entre enn bon dimoune ek enn mauvais dimoune, entre enn dimoune ki servi Bondié ek enn dimoune ki pa finn servi Li.” (Malaki 3:18) Prend l’exemple Wayne ek Virginia, enn couple ki ti protestant. Zot ti ena beaucoup question mais zot pa ti gagne okenn reponse. Zot ti detesté la guerre ek zot ti bouleversé kan zot ti trouve bann pretre beni bann soldat ek bann zarme. Kan sa couple-la ti commence vinn vié, bann lezot dimoune dan zot religion ti commence ignore zot, mem si pendant plusieurs l’année Virginia ti enseigne catechisme dan dimanche. Zot dire: “Personne pa ti vinn visite nou, ni ti interessé ar nou lor plan spirituel. Nou religion ti interessé zis avek nou l’argent. Nou ti senti-nou perdi.” Zot ti encore plus bouleversé kan zot religion ti commence tolere l’homosexualité.

11 Pendant sa lé-temps-la, ti-zenfant Wayne ek Virginia, ek apré, zot tifi ti vinn Témoins de Jéhovah. Mem si Wayne ek Virginia pa ti content au commencement, plitar zot ti change zot l’attitude ek zot ti accepté pou etudié la Bible. Wayne dire: “Dan trois mois seulement, nou finn aprann plus lor la Bible ki seki nou finn aprann pendant 70 an! Jamais nou ti koné ki Bondié appel Jéhovah, ek nou pa ti konn nanyin lor Royaume Bondié ek lor Paradi ki pou ena lor la terre.” Sa couple sincere-la pa ti tardé pou commence assisté reunion ek preché. Virginia dire: “Nou envie faire tou dimoune konn la verité.” Toulé-deux ti prend bapteme en 2005, alors ki zot ti ena apepré 80 an. Zot dire: “Nou finn trouve bann vrai chrétien ek nou senti-nou couma dan enn famille.”

Nou reconnaissant ki nou “equipé pou tou bon travail”

12. Ki Jéhovah toujours donne so bann serviteur, ek ki nou bizin faire pou reussi?

12 Jéhovah toujours aide so bann serviteur pou faire so volonté. Par exemple, Noé ti gagne bann l’instruction bien clair ek precis pou construire l’arche, ek sa travail-la ti bizin bon premier coute-mem! Ek li ti bon. Kifer? Parski Noé ti “faire dapré tou seki Bondié ti’nn donne li l’ordre pou faire. Li ti faire exactement seki finn dire li faire.” (Genèse 6:14-22) Zordi aussi, Jéhovah bien equipe so bann serviteur pou faire so volonté. Oui, nou priorité c’est pou preche la bonne nouvelle lor Royaume Bondié ki finn etabli, ek pou aide bann dimoune ki digne pou vinn bann disciple Jésus Christ. Ek pareil couma Noé, nou pou reussi si nou obeir Jéhovah. Nou bizin obeir ek suive direction ki Jéhovah donne nou a travers so Parole ek so l’organisation.—Matthieu 24:14; 28:19, 20.

13. Par ki moyen Jéhovah forme nou?

13 Pou nou kapav faire sa travail-la, nou bizin aprann pou ‘servi couma bizin’ nou principal zouti—Parole Bondié—ki “utile pou enseigné, pou corrigé, pou mette bann kitsoz en ordre, pou discipliné dan la justice, pou ki dimoune ki servi Bondié kapav bien qualifié, bien equipé pou tou bon travail.” (2 Timothée 2:15; 3:16, 17) Pareil couma dan premier siecle, Jéhovah donne nou enn bon formation a travers la congregation. Zordi, dan 99,770 congregation dan le monde entier, chaque semaine ena Lekol ministere theocratik ek reunion service ki aide nou dan nou ministere. Eski ou montré ou reconnaissance pou sa bann reunion important-la kan ou assisté zot regulierement ek kan ou mette en pratik seki ou aprann?—Hébreux 10:24, 25.

14. Couma bann serviteur Jéhovah montré zot reconnaissance pou privilege ki zot ena pou servi Bondié? (Faire bann commentaire lor rapport mondial ki trouve dan page 27-30.)

14 Plusieurs million serviteur Bondié dan le monde entier pé faire tou seki zot kapav dan service Jéhovah ek zot pé montré zot reconnaissance pou formation ki zot gagné. Par exemple, pendant l’année service 2006, 6,741,444 proclamateur ti passe enn total 1,333,966,199 l’heure dan tou l’aspect nou ministere, ek zot ti conduire 6,286,618 l’etude la Bible. Sa c’est zis dé-trois detail encourageant ki nou trouvé dan rapport mondial. Nou invite ou pou bien examine sa rapport-la, sa pou encourage ou, pareil couma nou bann frere dan premier siecle ti bien encouragé kan zot ti tann bann rapport lor l’accroissement ki ti ena dan predication, dan zot lepok.—Actes 1:15; 2:5-11, 41, 47; 4:4; 6:7.

15. Kifer fodé ki personne pa senti-li decouragé concernant service ki li pé donne Jéhovah avek tou so nâme?

15 Chaque l’année, ena beaucoup louange ki monte vers Jéhovah. Sa montré ki so bann serviteur ena enn grand reconnaissance pou privilege ki zot ena pou konn Jéhovah ek pou rann temoignage lor Li. (Isaïe 43:10) Li vrai ki nou kapav compare bann louange certain parmi nou bann frere ek soeur ki agé, ki malade ou-soit ki handicapé, ar deux ti piece la-monnaie sa veuve dan lepok Jésus-la. Mais fodé jamais nou blié ki Jéhovah ek so Garson bien apprecié tou bann ki servi Bondié avek tou zot nâme ek ki pé faire tou seki zot kapav.—Luc 21:1-4; Galates 6:4.

16. Ki bann zouti Bondié finn donne nou?

16 A part ki Jéhovah forme nou dan nou ministere, a travers so l’organisation, Li aussi equipe nou avek bann bon zouti. Dan le passé, nou ti ena livre La vérité qui conduit à la vie éternelle, Vous pouvez vivre éternellement sur une terre qui deviendra un paradis, Konesans Ki Amenn ver Lavi pu Tuletan, ek fek-la nou finn gagne livre Ki la Bible enseigné vrai-mem? Bann ki vrai-mem apprecié sa bann livre-la, servi sa bien dan zot ministere.

Servi livre Ki la Bible enseigné? dan enn fason efficace

17, 18. (a) Ki partie dan livre Ki la Bible enseigné? ou content servi dan predication? (b) Ki remark enn surveillant circonscription inn faire lor livre Ki la Bible enseigné?

17 Avek so 19 chapitre, so l’appendice bien detaillé, so langage clair ek simple, livre Ki la Bible enseigné vrai-mem? li enn benediction pou nou ministere. Par exemple, chapitre 12 koz lor “Couma vive dan enn fason ki faire Bondié plaisir?” Sa chapitre-la explik enn etudiant la Bible couma li kapav vinn enn camarade Bondié, enn kitsoz ki beaucoup dimoune jamais pa ti mem pensé possible. (Jacques 2:23) Ki bann dimoune pensé lor sa livre-la?

18 Enn surveillant circonscription en Australie dire ki livre Ki la Bible enseigné? “attire bann dimoune dé-suite, ek faire zot rente dan conversation bien vite.” Li ajouté ki sa livre-la tellement facile pou servi, ki sa “inn redonne beaucoup proclamateur confiance ek la joie dan zot ministere. Li pa etonnant ki certain appel sa livre-la enn ti bijou en or!”

19-21. Raconte certain l’experience ki montré valeur livre Ki la Bible enseigné?

19 Enn madame en Guyana ti dire enn frere pionnier ki ti tape so la-porte: “C’est surement Bondié ki finn envoye ou.” Missié avek ki sa madame-la ti pé resté, ti’nn fek quitte li avek so deux zenfant. Pionnier-la ti ouvert livre Ki la Bible enseigné dan chapitre 1 ek li ti lire paragraphe 11 enba sous titre “Ki Bondié ressenti devant sa l’injustice ki nou bizin supporté-la?” Pionnier-la raconté: “Sa ti touche li beaucoup. En realité, li ti bizin levé, ek li ti al par derriere dan so laboutik ek li’nn bien ploré.” Sa madame-la ti accepté pou etudié la Bible regulierement avek enn soeur, ek li pé contigne progressé.

20 José, ki reste en Espagne, ti perdi so madame dan enn accident. Li ti rod consolation dan la drogue, ek li ti aussi suive enn traitement avek bann psychologue. Mais bann docteur pa ti kapav reponn question ki ti plus fatigue José: “Kifer Bondié finn permette ki mo madame mort?” Enn jour, José ti joinde Francesc ki ti travail dan mem compagnie ki li. Francesc ti propose li pou examine chapitre 11, “Kifer Bondié laisse dimoune souffert?” dan livre Ki la Bible enseigné? Bann l’explication ki basé lor la Bible ek l’exemple enn professeur ek so zeleve ki ena dan sa chapitre-la, ti bien touche José. Li ti commence etudié regulierement, li ti assisté enn l’assemblée circonscription, ek zordi li pé assisté bann reunion dan la Salle du Royaume.

21 Roman, enn businessman ki vive en Pologne ek ki ena 40 an, ti toujours ena respé pou Parole Bondié. Mais parski li ti bien occupé avek so travail, li pa ti faire bann grand progré dan so l’etude la Bible. Kan mem, li ti assisté enn l’assemblée district ek là, li ti gagne livre Ki la Bible enseigné? Apré sa, li ti faire bann grand progré. Li dire: “Avek sa livre-la, coumadir tou bann l’enseignement principal la Bible inn vinn ensam pou forme enn zimage complete pareil couma dan enn puzzle.” Zordi, Roman pé etudié la Bible regulierement, ek li pé faire bann bon progré.

Contigne augmente ou reconnaissance

22, 23. Couma nou kapav contigne montré nou reconnaissance pou l’esperance ki Bondié inn mette devant nou?

22 Dan l’assemblée district “Delivrance pé approché!” ti expliké ki bann vrai chrétien pé attann avek impatience “delivrance eternel” ki Jéhovah inn promette, enn delivrance ki’nn vinn possible grace a di-sang ki Jésus inn versé. Pli bon fason pou montré tou nou reconnaissance pou sa grand l’esperance-la c’est kan nou contigne purifié nou-mem ek “efface bann action inutile . . . pou ki nou kapav offert Bondié enn service sacré.”—Hébreux 9:12, 14.

23 Zordi, plus ki six million proclamateur pé enduré fidelement dan service Bondié alors ki le monde pé encourage bann dimoune pou guette zot-mem avant. Sa li vrai-mem enn mirak! C’est aussi enn preuve ki bann serviteur Jéhovah bien apprecié privilege ki zot ena pou servi Bondié. Zot koné ki zot “la-peine pa dan vide devant nou Seigneur.” Anou faire tou seki nou kapav pou ki sa reconnaissance-la contigne augmenté!—1 Corinthiens 15:58; Psaume 110:3.

Couma ou pou reponn?

• Ki nou aprann ar enn psalmiste lor reconnaissance ki nou bizin ena envers Bondié ek bann disposition spirituel ki Li prend?

• Couma bann parole ki trouve dan Haggaï 2:7 pé realisé zordi?

• Couma Jéhovah equipe so bann serviteur pou servi Li dan enn fason efficace?

• Ki ou kapav faire pou montré ou reconnaissance pou bonté Jéhovah?

[Tableau page 27-30]

RAPPORT MONDIAL BANN TÉMOINS DE JÉHOVAH POU L’ANNÉE SERVICE 2006

[Zimage, page 31]

Jéhovah bien equipe nou pou faire so volonté

    Piblikasion Kreol Morisien (2000-2025)
    Dekoneksion
    Koneksion
    • Kreol Morisien
    • Partaze
    • Preferans
    • Copyright © 2025 Watch Tower Bible and Tract Society of Pennsylvania
    • Linformasion Legal
    • Prinsip Konfidansialite
    • Reglaz Konfidansialite
    • JW.ORG
    • Koneksion
    Partaze