Kifer tou bann souffrance pou disparette bientot
“Li stable couma enn roche, seki Li faire parfait.”—Deutéronome 32:4.
1, 2. (a) Kifer ou bien content l’esperance pou vive pou touletan? (b) Ki empeche certain pou croire dan sa Bondié ki faire bann promesse extraordinaire-la pou l’avenir?
Eski ou content pense la vie ki ou pou ena dan Paradi? Kitfois ou faire vision ki ou pé explore nou joli planete ek ou pé aprann tou sa quantité different kitsoz vivant ki ena lor là. Ou-soit kitfois ou mazinn satisfaction ki ou pou ena kan ou pou travail avek lezot dimoune pou prend soin la terre ek pou faire li vinn enn grand jardin. Ou-soit aussi ou pense bann talent ki ou pou developpé dan art, l’architecture, la musik, ek lezot kitsoz ki ou pa gagne le temps pou faire zordi tellement ou occupé. En tou cas, ou bien content ou l’esperance pou vive “vrai la vie” couma la Bible dire, setadir la vie couma Jéhovah ti envie pou nou, avek l’espoir pou vive pou touletan.—1 Timothée 6:19.
2 Li enn plaisir ek enn grand privilege pou partage sa l’esperance ki basé lor la Bible-la avek lezot, pa vrai? Mais beaucoup dimoune pa accepté sa l’esperance-la. Zot dire ki li pa vrai, ki li enn rêve pou bann dimoune ki croire dan tou kitsoz, mais ki sa rêve-la jamais pa pou realisé. Li possible mem ki zot trouve difficile pou croire dan sa Bondié ki’nn promette la vie eternel dan Paradi-la. Kifer? Pou certain, seki empeche zot pou croire c’est a cause le mal ki ena lor la terre. Zot pensé ki si Bondié ti existé, si Li tout-puissant ek si Li ena l’amour, alors li pa logik ki ena le mal ek souffrance lor la terre. Dapré zot, enn Bondié ki permette le mal pa kapav existé, ou-soit si Li existé, soit Li pa tout-puissant, soit Li pa interessé ar nou. Pou certain, pena pli bon l’explication ki sa. Satan finn montré ki li bien efficace pou aveuglé l’esprit bann dimoune.—2 Corinthiens 4:4.
3. Ki question difficile nou kapav aide bann dimoune pou reponn, ek kifer nou tousel ki kapav faire sa?
3 Satan ek sagesse ki ena dan sa lé-monde-la pé trompe bann dimoune. En tant ki bann Témoins de Jéhovah, nou tousel ki ena possibilité pou aide sa bann dimoune-la. (1 Corinthiens 1:20; 3:19) Nou comprend kifer beaucoup pa croire dan bann promesse la Bible. C’est parski zot pa konn Jéhovah. Kitfois zot pa konn so nom ek signification sa nom-la. Zot pa konn aussi beaucoup kitsoz, kitfois zot pa konn nanyin-mem lor so bann qualité, ni lor reputation ki Li ena pou tini so bann promesse. Nou, nou ena enn grand privilege pou ena sa connaissance-la. De temps en temps, li bon ki nou ré-guetté couma nou kapav aide bann dimoune ki dan “noirté spirituel” pou gagne reponse lor enn parmi bann question pli difficile ki bann dimoune posé: “Kifer Bondié permette le mal ek souffrance?” (Éphésiens 4:18) Premierement, nou pou guetté couma pou trouve enn bon fason pou reponn sa question-la dan enn fason efficace. Apré, nou pou examiné couma Jéhovah inn manifesté so bann qualité dan fason ki Li’nn traite sa problem ki concerne le mal-la.
Trouve enn bon fason pou reponn sa question-la
4, 5. Kan enn dimoune demann nou kifer Bondié laisse dimoune souffert, ki kitsoz kitfois nou pou bizin faire avant? Expliké.
4 Kan enn dimoune demann nou kifer Bondié permette la souffrance, couma nou reponn li? Nou kapav tenté pou donne li dé-suite enn longue l’explication, ek commence avek seki ti passé dan jardin Éden. Dan certain cas, kitfois li bon nou faire sa. Mais selman, nou bizin faire attention. Li possible ki nou pou bizin prepare terrain avant nou reponn. (Proverbes 25:11; Colossiens 4:6) Anou considere trois point ki nou kapav servi pou aide enn dimoune avant ki nou donne li enn reponse.
5 Premierement, si sa dimoune-la bien bouleversé a cause le mal ki ena partout lor la terre, surement c’est parski soit li-mem soit bann dimoune ki li content inn passe par enn malheur. Lerla, li pou bon ki avant tou, nou montré ki nou vrai-mem comprend so la-peine. L’apotre Paul ti donne sa conseil-la bann chrétien: “Ploré avek bann ki ploré.” (Romains 12:15) Si nou montré ki nou comprend so sentiment, setadir ki nou ‘mette-nou dan so place,’ sa kapav touche li. (1 Pierre 3:8) Si li comprend ki nou interessé ar li, kitfois li pou ecoute seki nou ena pou dire li.
6, 7. Kifer li bon ki nou felicite enn dimoune sincere ki pose enn question biblik ki troublé li?
6 Deuxiemement, nou kapav felicite dimoune-la pou question ki li’nn posé. Certain dimoune pensé ki, parski sa qualité question-la tracasse-zot, sa vedir ki zot pena la foi ek respé pou Bondié. Li possible-mem ki zot pretre finn dire zot sa. Pourtant, kan enn dimoune pose enn question coumsa, sa pa vedir ki li pena la foi. Apré tou, bann dimoune fidel dan le passé ti pose sa qualité question-la. Par exemple, David ti demandé: “Ah Jéhovah, kifer to reste loin? Kifer to reste cachiette dan lepok malheur?” (Psaume 10:1) Prophete Habaqouq aussi ti demandé: “Ziska kan, ô Jéhovah, mo pou bizin criyé au secours sans ki to tendé? Ziska kan mo pou demann toi l’aide kont la violence sans ki to amenn delivrance? Kifer to faire moi trouve seki mauvais ek to contigne guette malheur? Kifer devant moi ena bann dimoune ki prend tou di-bien zot camarade ek ki faire la violence? Kifer ena bann bagarre, ek kifer ena touletan discussion?”—Habaqouq 1:2, 3.
7 Sa bann zom-la ti fidel ek zot ti ena enn grand respé pou Bondié. Eski Bondié ti reprend zot parski zot ti pose sa qualité question-la? Au contraire, Jéhovah ti trouvé ki li enn bon kitsoz pou faire ecrire zot bann question sincere dan so Parole. Zordi, enn dimoune ki bouleversé parski ena le mal partout, kitfois li faim lor plan spirituel—li bien envie gagne bann reponse ki zis la Bible kapav donné. Rappel ki Jésus ti koz en bien lor bann dimoune ki faim lor plan spirituel, ou-soit ki “reconette ki zot pauvre lor plan spirituel.” (Matthieu 5:3) Li vrai-mem enn grand privilege pou aide sa qualité dimoune-la pou trouve bonheur ki Jésus inn promette!
8. Ki bann l’enseignement finn faire bann dimoune croire ki Bondié responsable bann souffrance, ek couma nou kapav aide zot?
8 Troisiemement, kitfois nou pou bizin aide sa dimoune-la pou trouvé ki Bondié pa responsable bann mauvais kitsoz ki ena partout dan le monde. Beaucoup dimoune finn aprann ki Bondié pé dirige le monde kot nou pé vive zordi. Zot pensé ki depuis longtemps Li’nn fini decide tou seki arrive sakenn parmi nou, ek ki Li ena bann raison ki nou pa kapav expliké pou faire dimoune passe misere. Sa bann l’enseignement-la zot fausse. Zot deshonore Bondié ek faire Li passe pou responsable bann malheur ek bann souffrance ki ena dan le monde. Alors, li possible ki nou pou bizin servi Parole Bondié pou corrige sa raisonnement-la. (2 Timothée 3:16) Jéhovah Li pa chef sa lé-monde kot ena corruption-la, mais c’est Satan le Diable. (1 Jean 5:19) Jéhovah pa finn fini decidé a l’avance ki pou arrive so bann creature intelligent; Li donne sakenn liberté ek possibilité pou choisir entre seki bon ek seki mauvais, seki bien ek seki mal. (Deutéronome 30:19) Jéhovah jamais pa responsable bann mauvais kitsoz; Li ena la haine pou le mal ek Li interessé ar bann ki pé souffert a cause l’injustice.—Job 34:10; Proverbes 6:16-19; 1 Pierre 5:7.
9. Ki certain zouti “l’esclave fidel et avisé” inn donne nou pou aide bann dimoune comprend kifer Bondié permette souffrance?
9 Enn fois ki ou finn pose enn base, surement ou pou trouvé ki dimoune-la disposé pou aprann kifer Bondié permette ki souffrance contigné. Pou aide ou, “l’esclave fidel et avisé” finn faire beaucoup publication. (Matthieu 24:45-47) Par exemple, dan l’assemblée district 2005, “L’obeissance pou Bondié,” enn tract ki appel Tou souffrance pou disparette bientot! ti sorti. Si ena sa tract-la dan ou langue, kifer ou pa lire li pou koné ki li dire? Dan livre Ki la Bible enseigné vrai-mem?, ki nou ena zordi dan 157 langue, ena aussi enn chapitre ki examine sa question important-la. Servi bien sa bann zouti-la. Zot explik bien bann l’evenement ki la Bible raconté en rapport avek question ki ti soulevé en Éden concernant droit ki Jéhovah ena pou dirige l’univers, ek kifer Jéhovah ti traite sa problem-la couma Li ti’nn faire. Pa blié aussi ki, kan ou koz sa sujet-la avek enn dimoune, ou pé aide li pou gagne connaissance pli important ki kapav ena. C’est connaissance lor Jéhovah ek lor so bann qualité extraordinaire.
Attire l’attention lor bann qualité ki Jéhovah ena
10. Ki beaucoup dimoune trouve difficile pou comprend lor raison kifer Bondié permette souffrance, ek ki connaissance kapav aide zot?
10 Kan ou aide bann dimoune pou comprend kifer Jéhovah inn permette ki bann dimoune dirige zot par zot-mem enba l’influence Satan, essaye attire zot l’attention lor bann qualité extraordinaire ki Jéhovah ena. Beaucoup dimoune koné ki Bondié ena enn grand pouvoir; zot habitué tann lezot appel Li Bondié Tout-Puissant. Mais kitfois zot trouve sa difficile pou comprend kifer Li pa servi so grand pouvoir pou faire l’injustice ek souffrance disparette enn fois. Li possible ki zot pa comprend bien bann lezot qualité Jéhovah, couma par exemple so justice, so sagesse, so l’amour ek ki Li enn Bondié ki saint. Jéhovah manifesté sa bann qualité-la dan enn fason parfait ek bien equilibré. A cause sa, la Bible dire: “Seki Li faire, parfait.” (Deutéronome 32:4) Couma ou kapav attire l’attention lor sa bann qualité-la kan ou pé reponn bann question ki souvent bann dimoune pose-zot lor sa sujet-la? Anou prend dé-trois l’exemple.
11, 12. (a) Kifer pa ti ena okenn possibilité ki Adam ek Ève gagne pardon kan zot ti faire peché? (b) Kifer Jéhovah pa pou tolere peché pou touletan?
11 Eski Jéhovah pa ti kapav zis pardonne Adam ek Ève? Dan zot cas, pa ti ena okenn possibilité pou gagne pardon. Adam ek Ève ti parfait, alors zot ti bien koné ki zot ti pé faire. Zot ti choisir pou rejette droit ki Jéhovah ena pou dirige l’univers ek zot ti accepté ki Satan dirige zot dan place Jéhovah. Nou pa etonné ki sa bann rebelle-la pa ti montré ditou ki zot ti repenti. Pourtant, kan bann dimoune demandé kifer Jéhovah pa ti pardonne zot, kitfois zot pé demann-zot kifer Jéhovah pa ti moins severe avek so bann principe ek tolere l’existence peché ek rebellion. Reponse sa question-la ena enn lien avek personnalité Jéhovah—Li enn Bondié ki saint.—Exode 28:36; 39:30.
12 Dan plusieurs centaine verset, la Bible mette l’accent ki Jéhovah Li saint. Malheureusement, pena beaucoup dimoune dan sa lé-monde pourri-la ki comprend sa qualité-la. Jéhovah Li pur, Li saint, ek Li separé ar tou peché. (Isaïe 6:3; 59:2) Li’nn prend enn disposition pou efface peché ek pou faire li disparette net, sa vedir ki Li pa pou tolere li pou touletan. Si Jéhovah ti disposé pou tolere peché touletan, nou pa ti pou ena okenn l’espoir pou l’avenir. (Proverbes 14:12) Dan l’heure ki Li’nn fixé, Jéhovah pou ré-amenn tou so creation dan enn l’etat kot zot tou pou saint. Nou kapav sur ki sa pou arrivé parski c’est volonté sa Kikenn ki Saint-la.
13, 14. Kifer Jéhovah ti choisir pou pa detruire bann rebelle dan jardin Éden?
13 Eski Jéhovah pa ti kapav zis detruire bann rebelle-la dan jardin Éden ek recommence tou? Pena doute ki Jéhovah ti ena pouvoir pou faire sa; bientot Li pou servi sa pouvoir-la pou detruire tou bann mauvais dimoune. Certain kapav demandé: ‘Mais kifer Li pa ti faire sa kan ti ena zis trois rebelle dan l’univers? Eski sa pa ti pou empeche peché fann partout ek tou sa consequence ki sa inn amené dan le monde-la?’ Kifer Jéhovah pa finn choisir sa solution-la? Deutéronome 32:4 dire: “Dan tou seki Li faire ena la justice.” La justice ena enn grand l’importance pou Jéhovah. En realité, “Jéhovah content la justice.” (Psaume 37:28) A cause so l’amour pou la justice, Li pa ti detruire bann rebelle dan jardin Éden. Kifer nou dire sa?
14 Kan Satan ti rebellé, sa ti souleve enn question lor droit ki Jéhovah ena pou dirige l’univers. La justice ki Jéhovah ena ti demann enn reponse ki basé lor la justice pou reglé sa question-la. Si Li ti touye sa bann rebelle-la dé-suite, mem si zot ti merité, sa pa ti pou reponn sa question-la couma bizin. Li vrai ki sa ti pou montré encore plus ki Jéhovah ena pouvoir, mais c’est pa so pouvoir ki Satan ti mette en doute. En plus, Jéhovah ti faire Adam ek Ève konn so projet. Zot ti bizin gagne bann zenfant, rempli la terre, ek ena enn control lor li, ek lor tou lezot creation ki ti trouve lor la terre. (Genèse 1:28) Si Jéhovah ti detruire Adam ek Ève, projet ki Li ti faire koné concernant bann dimoune, pa ti pou reussi. Jamais la justice Jéhovah ti pou permette enn kitsoz coumsa arrivé, parski so projet toujours realisé.—Isaïe 55:10, 11.
15, 16. Couma nou kapav aide bann dimoune ki propose bann “solution” pou question ki ti soulevé dan jardin Éden?
15 Eski ena enn kikenn ki ti pou kapav traite sa rebellion-la avek plus sagesse ki Jéhovah? Li possible ki certain dimoune propose zot prop “solution” pou rebellion ki ti ena dan jardin Éden. Mais kan zot faire sa, eski zot pa pé pretann ki zot pli koné ki Jéhovah dan ki fason ti kapav reglé sa situation-la? Kitfois zot pena bann mauvais l’intention, mais zot pa comprend couma Jéhovah agir ek zot pa konn so grand sagesse. Dan lettre ki l’apotre Paul ti ecrire bann chrétien dan Rome, li ti examine en profondeur sagesse Bondié ek aussi So “saint secret.” Sa ‘saint secret-la,’ li concerne projet ki Jéhovah ena pou servi Royaume messianik pou pardonne peché bann dimoune fidel ek pou sanctifié So nom ki saint. Ki Paul ti pensé lor sagesse sa Bondié ki ti faire sa projet-la? Li ti tire sa conclusion-la a la fin so lettre: “Pou Bondié, ki tousel sage, la gloire pou touletan, a travers Jésus Christ. Amen.”—Romains 11:25; 16:25-27.
16 Paul ti comprend ki Jéhovah Li “tousel sage”—personne pena pli grand sagesse ki Li dan l’univers. Pena okenn dimoune imparfait ki kapav reglé n’importe ki problem ki existé pli bien ki Bondié, alors couma eski li pou kapav reglé problem pli difficile ki sagesse Bondié finn ena pou reglé? Alors, nou bizin aide bann dimoune pou ena enn grand respé, pareil couma nou, nou ena envers sa Bondié ki ena ‘sagesse dan so leker-la.’ (Job 9:4) Plus nou comprend sagesse Jéhovah, plus nou pou ena confiance ki c’est Li tousel ki kapav reglé bann problem pli bien.—Proverbes 3:5, 6.
Prend compte pli grand qualité ki Jéhovah ena
17. Kan bann dimoune comprend pli bien l’amour Jéhovah, couma sa kapav aide zot?
17 “Bondié Li l’amour.” (1 Jean 4:8) C’est par sa bann parole-la ki la Bible montré nou ki pli grand qualité Jéhovah. C’est aussi enn qualité ki pli attirant ki tou lezot qualité ek ki rassure bann dimoune ki bouleversé kan zot trouve le mal partout lor la terre. Jéhovah inn montré l’amour dan tou seki Li’nn faire kan Li’nn traite consequence terrible ki peché inn amené lor so creation. L’amour ti pousse Jéhovah pou donne enn l’espoir bann descendant Adam ek Ève, ek Li ti donne zot enn moyen pou approche Li ek pou ena bann bon relation avek Li. L’amour ti pousse Bondié pou donne enn ranson ki ti pou permette Li pardonne bann peché net, ek pou faire bann dimoune vinn parfait ek gagne la vie eternel. (Jean 3:16) L’amour ti aussi pousse Bondié pou ena patience envers bann dimoune en general, ek donne maximum dimoune possibilité pou rejette Satan ek pou choisir Jéhovah couma zot Chef.—2 Pierre 3:9.
18. Ki connaissance nou content pou ena, ek ki nou pou examiné dan prochain lartik?
18 Kan enn pretre ti adresse-li ar enn group dimoune ki ti rassemblé pou commemore enn grand l’attak terrorist, li ti dire: “Nou pa koné kifer Bondié permette le mal ek souffrance.” Li bien triste, pa vrai? Eski nou pa content ki nou, nou comprend kifer? (Deutéronome 29:29) Parski Jéhovah Li sage, Li juste, ek Li ena l’amour, nou koné ki bientot Li pou faire tou souffrance disparette lor la terre. En realité, Li’nn promette nou ki Li pou faire sa. (Révélation 21:3, 4) Mais ki l’espoir ena pou tou bann dimoune ki’nn mort pendant bann siecle? Eski fason ki Jéhovah inn traite question ki ti soulevé en Éden, inn laisse zot sans okenn l’espoir? Non. L’amour inn pousse Li pou prend bann disposition pou zot aussi, grace a resurrection. C’est sa sujet-la ki nou pou examiné dan prochain lartik.
Couma ou pou reponn?
• Ki nou kapav dire enn dimoune ki demandé kifer Bondié permette la souffrance?
• Couma fason ki Jéhovah inn traite bann rebelle en Éden montré ki Li saint ek Li ena la justice?
• Kifer nou bizin aide bann dimoune pou comprend pli bien l’amour Jéhovah?
[Zimage, page 15]
Faire tou pou aide bann dimoune ki bouleversé par souffrance ki ena dan le monde
[Zimage, page 17]
David ek Habaqouq ki ti fidel, ti pose Bondié bann question sincere