Circoncision—Eski li enn signe ki enn dimoune li enn zom?

DAN beaucoup pays, bann dimoune circonci bann ti garson kan zot encore tibaba a cause l’hygiene. Dan lezot pays, li pa necessaire ki circonci ni bann ti garson ni bann missié. Mais pou certain, par exemple pou bann juif ek bann musulman, circoncision li pa zis enn question l’hygiene, li ena enn signification religieux.

Mais dan certain tribu, kan enn garson vinn enn jeune homme, ena certain ceremonie ki faire en rapport avek circoncision. En principe, bann parent envoye zot garson dan enn lekol kot enseigne bann coutume traditionnel ek la-bas faire circoncision avek li ek garde li separé ar la societé pendant plusieurs semaine ziska ki li bien. Pendant sa lé-temps-la, sa garson-la bizin suive bann coutume precis ek li aprann pou vinn enn zom. Eski sa qualité circoncision-la li necessaire pou prouvé ki enn garson inn vinn enn zom? Anou guetté ki la Bible dire lor seki Bondié pensé lor sa sujet-la.—Proverbes 3:5, 6.

Couma Bondié considere circoncision

Dan lepok longtemps, certain peuple, par exemple bann Égyptien, ti pratik circoncision, setadir zot ti coupe prépuce, ou-soit sa la-peau ki recouvert boute l’organe sexuel masculin-la. Mais Abraham pa ti né dan sa qualité culture-la. Avredir, li pa ti circonci pendant enn bon partie so la-vie. En plus, pendant sa lepok-la, li ti montré ki li ti enn zom ki ti ena bien courage. Avek enn ti group zom, li ti poursuive bann l’armée quatre lé-roi ki ti’nn prend so neveu Lot couma prisonnier, ek li ti gagne la victoire lor zot. (Genèse 14:8-16) Apepré 14 an plitar, Bondié ti donne Abraham l’ordre pou faire li-mem circonci ek pou circonci tou bann zom ki ti ena dan so lakaz. Kifer Bondié ti demann Abraham faire sa?

Li clair ki sa pa ti enn signe ki Abraham ti pé sorti dan l’enfance pou li vinn enn zom. Sa lepok-la li ti ena 99 an! (Genèse 17:1, 26, 27) Bondié ti dire li kifer Li ti donne sa commandement-la: “Zot bizin faire-zot circonci dan la chair zot prépuce, ek sa bizin servi couma enn signe pou l’alliance ki ena entre moi ek zot.” (Genèse 17:11) Dan sa l’alliance ki Bondié ti faire avek Abraham-la, ti ena aussi promesse Bondié ki “tou bann famille ki lor la terre” pou gagne bann grand benediction a travers Abraham. (Genèse 12:2, 3) Alors, pou Bondié, pa circoncision ki montré ki enn missié vrai-mem enn zom. Ti faire circoncision pou montré ki enn missié ti enn Israélite, enn parmi bann descendant Abraham ki ti ena enn grand privilege parski “finn confié zot bann declaration sacré ki Bondié inn dire.”—Romains 3:1, 2.

Avek le temps, kan nation Israël ti rejette vrai Descendance Abraham, Jésus Christ, zot ti montré ki zot pa ti merite ki confié zot sa responsabilité-la. Alors Bondié ti rejette zot, ek mem si zot ti circonci sa ti nepli ena okenn signification pou Bondié. Mais, dan premier siecle nou lepok, certain chrétien ti insisté ki Bondié ti encore pé demann bann dimoune pou circonci. (Actes 11:2, 3; 15:5) A cause sa l’apotre Paul ti envoye Tite pou “reglé bann kitsoz ki pa ti pé marche bien” dan plusieurs congregation. Concernant enn parmi bann kitsoz ki pa ti pé marche bien, Paul ti ecrire sa bann parole-la pou Tite: “Ena beaucoup ki pena okenn discipline, ki dire bann kitsoz dan vide, ek ki trompe l’esprit lezot, surtout bann ki attaché ar circoncision. Fodé ferme zot la-bouche, parski sa bann dimoune-la contigne bouleverse bann famille entier kan zot enseigne bann kitsoz ki zot pa ti bizin enseigné, pou gagne enn profit malhonnete.”—Tite 1:5, 10, 11.

Conseil ki Paul ti donné encore toujours appliké. Zordi li pou surement contraire avek seki la Bible dire si enn vrai chrétien demann ki circonci zenfant enn lot dimoune. Au lieu ki li “veille zaffaire lezot,” enn chrétien laisse bann parent prend sa qualité decision personnel-la. (1 Pierre 4:15) En plus, Paul ti gagne inspiration pou ecrire concernant circoncision ki la Loi Moïse ti demann pou faire. Li ti dire: “Eski kikenn inn gagne l’appel alors ki li ti circonci? Pa bizin li vinn enn dimoune ki pa circonci. Eski kikenn inn gagne l’appel alors ki li pa ti enn dimoune circonci? Pa bizin ki li faire-li circonci. Ki enn dimoune circonci ou-soit non, sa pa vedir nanyin, mais seki important, c’est observe bann commandement Bondié. Laisse sakenn reste couma li ti été kan li ti gagne so l’appel.”—1 Corinthiens 7:18-20.

Ki nou kapav dire lor bann “lekol circoncision”?

Mais ki arrivé si bann parent chrétien decide pou faire circonci zot bann garson? Eski sa pou en accord avek seki la Bible dire si bann parent envoye zot bann garson dan sa bann lekol ki nou ti mentionné dan commencement sa lartik-la? Dan sa bann lekol-la pa faire zis l’operation circoncision, ena lezot kitsoz encore ki impliké. Pendant plusieurs semaine, sa zenfant-la pou touletan ensam avek bann garson ek bann professeur ki pa adore Jéhovah. Beaucoup kitsoz ki enseigné dan sa bann lekol-la, zot contraire ar bann principe biblik ki enn niveau bien elevé. La Bible donne sa l’avertissement-la: “Bann mauvais frequentation gate bann bon l’habitude.”—1 Corinthiens 15:33.

Pli allé, li enn danger aussi lor plan physik pou al dan sa bann lekol-la. En 2003, South African Medical Journal ti donne sa l’avertissement-la: “Sa l’année-la encore, circoncision finn ena bann resultat ki faire peur; a travers le monde tou bann grand service l’information inn koz lor bann la-mort ek bann cas kot inn coupe bann zenfant bonavini. . . . En fait, beaucoup parmi sa bann lekol ki soit-disant appel ‘bann lekol circoncision’ zot bann fausse lekol, ek zot kapav touye dimoune.”

En plus danger physik ki kapav arrive enn jeune, ena enn danger spirituel ki pli grand encore. Bann l’enseignement ek bann pratik ki ena dan sa bann lekol-la, zot ena enn rapport direct avek spiritisme ek l’adoration bann ancetre. Par exemple, au lieu zot reconette ki finn ena bann dommage physik parski bann dimoune ki faire circoncision pa’nn faire attention ek finn ena enn manque l’hygiene, beaucoup dimoune croire ki sa finn arrivé parski finn jette enn sort lor sa dimoune-la ou-soit parski bann ancetre ki’nn mort pa content. Concernant bann rapport avek fausse religion, la Bible dire: “Pa mette zot ensam enba mem joug avek bann ki pena mem croyance ki zot, parski sa pa egal. Parski ki rapport ena entre la justice ek l’injustice? Ou-soit ki ena ki pareil entre la lumiere ek noirté? . . . Jéhovah dire: ‘A cause sa, sorti parmi zot, separé ar zot, ek arrete touche bann kitsoz impur’; ‘ek mo pou accueil zot.’ ” (2 Corinthiens 6:14-17) Kan nou prend sa conseil-la en consideration, nou trouvé ki li pa pou enn decision sage ditou ki bann parent chrétien envoye zot bann garson dan enn lekol circoncision.

Ki kitsoz faire enn chrétien enn zom vrai-mem?

Ki enn chrétien circonci ou-soit non, c’est pa sa ki prouvé ki li enn zom. Pou bann vrai chrétien, seki pli important c’est pou faire Bondié plaisir, pa pou “ena enn bon l’apparence dan la chair.”—Galates 6:12.

Mais pou faire Bondié plaisir, enn chrétien bizin ‘circonci so leker.’ (Deutéronome 10:16; 30:6; Matthieu 5:8) Circoncision leker pa faire avek enn couteau, mais enn chrétien faire sa circoncision-la kan li rejette bann mauvais desir ek bann pensée rempli ar l’orgueil, couma par exemple croyance ki circoncision dan la chair faire enn dimoune vinn pli superieur ki lezot. C’est kan li endure bann l’epreuve ek li reste “ferme dan la foi,” ki enn chrétien montré ki li enn zom ki li circonci ou-soit non.—1 Corinthiens 16:13; Jacques 1:12.