Attann jour Jéhovah avek l’endurance
“Ajoute . . . ar zot la-foi . . . l’endurance.”—2 PIERRE 1:5, 6.
1, 2. Ki été l’endurance, ek kifer bann chrétien bizin l’endurance?
GRAND jour Jéhovah, li bien pré. (Yoël 1:15; Tsephania 1:14) Parski nou bann chrétien ki determiné pou garde nou l’integrité, nou attann avek impatience sa lé-temps kot Jéhovah pou justifié droit ki Li ena pou dirigé. Entre-temps, a cause nou la-foi, nou bizin faire face ar la haine, critik, persecution ek la mort. (Matthieu 5:10-12; 10:22; Révélation 2:10) Alors nou bizin ena l’endurance, setadir capacité pou resisté kont bann difficulté. L’apotre Pierre donne nou sa conseil-la: “Ajoute . . . ar zot la-foi . . . l’endurance.” (2 Pierre 1:5, 6) Nou bizin l’endurance parski Jésus ti dire: “Seki enduré ziska la fin, li-mem ki pou sapé.”—Matthieu 24:13.
2 Dan nou la-vie nou gagne bann problem: nou malade, nou chagrin parski nou’nn perdi enn kikenn ki nou content, ek nou passe par lezot l’epreuve encore. Satan ti pou content si nou ti perdi nou la-foi, pa vrai? (Luc 22:31, 32) Avek l’aide Jéhovah, nou kapav endure different l’epreuve. (1 Pierre 5:6-11) Beaucoup frere ek soeur inn vive bann l’experience ki montré ki nou kapav attann jour Jéhovah avek l’endurance sans perdi nou la-foi. Anou examine certain sa bann l’experience-la.
Maladie pa finn arrete zot
3, 4. Donne enn l’exemple ki montré ki nou kapav servi Jéhovah fidelement mem si nou malade.
3 Dan nou lepok, Bondié pa faire mirak pou gueri nou, mais Li donne nou la force pou supporte nou maladie. (Psaume 41:1-3) Sharon ti dire: “Dan mo souvenir, fauteuil roulant inn toujours mo compagnon. Depuis mo naissance, paralysie cerebral finn empeche moi konn bann la-joie ki bann zenfant gagné.” Kan Sharon inn konn Jéhovah ek bann promesse ki Li’nn faire concernant enn la-santé ki parfait, sa finn donne li enn l’espoir. Mem si li gagne problem pou kozé ek pou marché, li trouve la joie dan so ministere. Sa faire 15 an ki li ti dire: “Mo la-santé kitfois pou contigne deterioré, mais mo confiance en Jéhovah ek mo relation avek Li, zot mo bann ‘gilet sauvetage.’ Mo vrai-mem bien content pou forme partie dan peuple Jéhovah ek pou beneficié So soutien lor ki mo kapav compté touletan!”
4 L’apotre Paul ti conseil bann chrétien dan Thessalonique pou “koz dan enn fason ki pou encourage bann ki deprimé.” (1 Thessaloniciens 5:14) Kan enn dimoune pa reussi faire seki li envie ou-soit gagne seki li pé attann, sa li enn kitsoz ki kapav faire li gagne depression. En 1993, Sharon ti ecrire: “Mo ti ena sentiment ki mo pa ti kapav faire nanyin ek lerla . . . mo ti tombe dan enn depression grave pendant trois an. . . . Bann ancien ti encourage moi ek ti donne moi conseil. . . . Grace a La Tour de Garde, Jéhovah inn aide nou pou comprend ki été depression grave. Oui, Jéhovah prend soin so peuple ek Li comprend seki nou ressenti.” (1 Pierre 5:6, 7) Sharon encore pé servi Bondié ziska ler alors ki li pé attann grand jour Jéhovah.
5. Ki preuve nou ena ki bann chrétien kapav endure enn grand stress?
5 Certain chrétien souffert enn grand stress a cause seki zot inn vive dan le passé. Harley ti participe dan bann la-guerre violent pendant Deuxieme Guerre mondial ek li ti gagne bann cauchemar kot li ti trouve-li pé laguerre. Dan so sommeil, li ti criyé: “Faire attention! Faire attention!” Kan li ti levé, li ti mouillé net tellement li ti transpiré. Mais li ti kapav vive enn la-vie ki en accord avek bann conseil ki Bondié donné, ek avek le temps so bann cauchemar ti diminué ek zot ti nepli mauvais sa quantité-la.
6. Couma enn frere ti faire face avek bann problem emotionnel?
6 Enn chrétien ti gagne enn maladie ki appel trouble bipolaire de l’humeur ek li ti trouve sa bien difficile pou preché porte-en-porte. Mais li ti persisté parski li ti realisé ki predication vedir la vie pou li ek pou bann ki ecouté. (1 Timothée 4:16) Parfois li pa ti mem kapav mem envoye so la-main pou pese sonnette, mais li ti dire: “Apré enn moment, mo ti reussi control-moi, al vers prochain la porte ek essaye encore. Mo finn garde enn assez bon spiritualité parski mo’nn contigné participe dan predication.” Li ti bien difficile aussi pou sa frere-la assisté bann reunion, mais li ti sur ki frequentation bann frere ek soeur important. Alors, li ti faire zeffort ki ti bizin pou li kapav là dan reunion.—Hébreux 10:24, 25.
7. Mem si certain peur pou kozé en publik ou-soit pou assisté enn reunion, couma zot montré zot l’endurance?
7 Certain chrétien ena bann phobie, setadir zot bien peur certain situation ou-soit kitsoz. Par exemple, zot kapav bien peur pou kozé en publik ou-soit mem pou assisté enn reunion. Maziné couma li bien difficile pou zot pou faire enn commentaire dan reunion ou-soit pou faire enn devoir dan Lekol ministere theocratik! Pourtant zot pé enduré, ek zot presence ek zot participation vrai-mem encourage nou.
8. Ki surtout aide enn dimoune kan li gagne bann problem lor plan affectif ?
8 Kan enn dimoune gagne bann problem lor plan affectif, si li reposé plus, sa kapav aide li. Kitfois, li bon ki li al guette enn docteur. Mais seki surtout kapav bien aide li, c’est kan li compte lor Jéhovah dan la priere. Psaume 55:22 dire: “Jette to fardeau lor Jéhovah Li-mem, ek Li-mem Li pou soutenir toi. Jamais Li pa pou laisse enn kikenn droite, tombé.” Alors faire tou ou possible pou ‘faire Jéhovah confiance avek tou ou leker.’—Proverbes 3:5, 6.
Couma endure enn deuil
9-11. (a) Ki kapav aide nou pou supporte nou chagrin kan enn kikenn ki nou content mort? (b) Couma l’exemple Anne kapav aide nou pou endure enn deuil?
9 Kan la mort separe bann membre enn famille, sa la-perte-la faire zot gagne enn grand chagrin. Abraham ti ploré kan Sara, so madame ki li ti bien content ti mort. (Genèse 23:2) Mem Jésus ki ti parfait “pa ti kapav tini, so larme ti coulé” kan so camarade Lazare ti mort. (Jean 11:35) Alors li normal ki ou chagrin kan enn kikenn ki ou content mort. Mais bann chrétien koné ki pou ena resurrection. (Actes 24:15) Alors zot pa “chagrin pareil couma bann lezot dimoune ki pena okenn l’esperance.”—1 Thessaloniciens 4:13.
10 Couma nou kapav faire face ar deuil? Kitfois enn l’exemple pou kapav aide nou dan sa domaine-la. Normalement nou pa chagrin pendant beaucoup lé-temps kan enn camarade parti, parski nou attann pou retrouve li kan li retourné. Kan nou considere la mort enn chrétien fidel dan sa fason-la, sa kapav diminué nou chagrin parski nou koné ki li pou ressuscité.—Ecclésiaste 7:1.
11 Si nou compte net lor “Bondié ki donne tou consolation,” sa pou aide nou pou endure nou deuil. (2 Corinthiens 1:3, 4) Kan nou reflechi lor l’exemple Anne, enn veuve ki ti vive dan premier siecle, sa aussi pou kapav aide nou. Li ti vinn veuve zis apré sept an mariage. Mais kan li ti ena 84 an, li ti encore toujours pé offert Jéhovah enn service sacré dan temple. (Luc 2:36-38) Enn la-vie bien devoué coumsa ti surement aide li pou faire face ar so chagrin ek aussi pou ki li pa senti-li tousel. Kan nou participe regulierement dan bann l’activité theocratik, parmi ena predication aussi, sa kapav aide nou pou endure bann consequence sa la-perte-la.
Couma faire face ar different l’epreuve
12. Ki l’epreuve certain chrétien inn enduré dan zot la-vie familial?
12 Certain chrétien bizin endure bann l’epreuve dan zot la-vie familial. Par exemple, si enn conjoint commette l’adultere, sa kapav ena bann consequence ki pese lourd lor so famille! A cause sa choque ek chagrin ki li gagné-la, kitfois sa conjoint innocent-la pa kapav dormi, li ploré facilement ek li difficile pou li arrete ploré. Mem enn ti travail kapav vinn tellement stressant pou li ki erreur ou-soit accident kapav arrivé. Kitfois li kapav mem perdi l’appetit, li vinn maigre ek li affecté lor plan affectif. Kitfois li difficile pou li participe dan bann l’activité theocratik. Maziné aussi ki quantité bann zenfant kapav affecté!
13, 14. (a) Ki l’encouragement nou gagné dan la priere ki Salomon ti faire pou l’inauguration temple? (b) Kifer nou prié pou gagne l’esprit saint?
13 Kan nou passe par sa qualité l’epreuve-la, Jéhovah donne nou l’aide ki nou bizin. (Psaume 94:19) Bondié ecoute la priere so peuple pareil couma la priere ki le roi Salomon ti faire pou l’inauguration temple Jéhovah, montré. Salomon ti prié Bondié ek li ti dire: “N’importe ki la-priere, n’importe ki faveur ki enn dimoune ou-soit ki tou to peuple Israël demandé, parski sakenn konn so la-peine dan so leker, ek vrai-mem zot leve zot la-main vers sa lakaz-la, alors toi ki dan le ciel, l’endroit fixe kot to resté, mo demann toi ecoute zot ek to bizin pardonné, agir ek rann sakenn dapré tou seki li faire parski to konn so leker (parski to tousel ki konn bien leker bann dimoune); pou ki zot ena la crainte pou toi toulé-jour ki zot vive lor sa la-terre ki to’nn donne nou bann ancetre-la.”—1 Rois 8:38-40.
14 Sa kapav aide nou surtout si nou contigne prié pou gagne l’esprit saint. (Matthieu 7:7-11) Dan fruit l’esprit, ena aussi bann qualité couma la joie ek la paix. (Galates 5:22, 23) Nou vrai-mem senti enn soulagement kan nou Papa ki dan le ciel reponn nou bann la-priere! Lerla, la joie remplace chagrin, ek la paix remplace tracas.
15. Cite bann verset la Bible ki kapav aide nou pou soulage nou kan nou tracassé.
15 Kan nou bizin endure enn grand stress, li normal ki nou inpé tracassé. Mais nou kapav diminué certain tracas si nou mazinn sa bann parole Jésus-la: “Arrete tracasse-zot pou zot nâme, ki zot pou mangé, ou-soit ki zot pou boire, ou-soit pou zot lekor, ki linge zot pou metté. . . . Alors, avant tou kitsoz, contigne rod le royaume ek justice [Bondié], ek zot pou gagne aussi tou sa bann lezot kitsoz-la.” (Matthieu 6:25, 33, 34) L’apotre Pierre encourage nou pou ‘jette tou nou tracas lor Bondié, parski Li interessé ar nou.’ (1 Pierre 5:6, 7) Li bien ki nou faire bann zeffort pou reglé enn problem. Mais apré ki nou’nn faire seki nou kapav, si nou contigne laisse sa problem-la tracasse nou, sa pa pou aide nou. Parkont, c’est la priere ki kapav aide nou. Enn psalmiste ti chanté: “Mette tou dan la main Jéhovah, compte lor Li, ek Li-mem ki pou agir.”—Psaume 37:5.
16, 17. (a) Kifer nou pa debarrassé ar tou tracas? (b) Ki nou pou koné si nou applik Philippiens 4:6, 7?
16 Paul ti ecrire: “Pa tracassé pou okenn kitsoz, mais dan tou kitsoz, par la priere, supplication avek bann remerciement, demann Bondié seki zot bizin; ek la paix ki Bondié donné ek ki pli grand ki tou pensée, pou protege zot leker ek zot l’esprit, par moyen Jésus Christ.” (Philippiens 4:6, 7) Bien sur, li impossible ki bann descendant Adam ki imparfait pa gagne okenn tracas. (Romains 5:12) Bann femme hittite avek ki Esaü ti marié ‘ti rann la vie Isaac ek Rébecca, bann parent Esaü, amer.’ Pourtant Isaac ek Rébecca ti bann serviteur Jéhovah. (Genèse 26:34, 35) Bann chrétien couma Timothée ek Trophime surement ti gagne tracas a cause zot la-santé. (1 Timothée 5:23; 2 Timothée 4:20) Paul ti tracassé pou so bann compagnon chrétien. (2 Corinthiens 11:28) Mais ‘Sa kikenn ki ecoute la priere-la,’ Li touletan là pou bann ki content Li.—Psaume 65:2.
17 Alors ki nou pé attann jour Jéhovah, nou ena soutien ek consolation ki sorti kot sa ‘Bondié ki donne la paix-la.’ (Philippiens 4:9) Jéhovah Li enn Bondié ki “ena misericorde ek compassion,” Li ‘bon ek Li disposé pou pardonné,’ ek “Li rappel ki nou finn faire ar la poussiere.” (Exode 34:6; Psaume 86:5; 103:13, 14) Alors anou ‘demann Li seki nou bizin’ parski lerla nou pou gagne ‘la paix ki Bondié donné,’ setadir enn tranquillité ki dimoune pa kapav comprend.
18. Pareil couma Job 42:5 dire, couma eski li possible pou nou “trouve” Bondié?
18 Kan nou gagne reponse pou nou bann la-priere, nou koné ki Bondié avek nou. Apré ki Job ti’nn endure bann l’epreuve, li ti dire: “Par seki lezot finn dire, mo’nn tann koz lor toi [Jéhovah], mais asterla mo pé trouve toi avek mo prop lizié.” (Job 42:5) Nou l’intelligence, nou la-foi ek nou reconnaissance kapav aide nou pou reflechi lor bann fason ki Jéhovah agir avek nou, ek lerla nou kapav “trouve” Li couma jamais nou’nn trouve Li avant. Sa qualité relation intime avek Jéhovah-la vrai-mem faire nou gagne la paix dan nou leker ek dan nou l’esprit!
19. Ki pou arrivé si nou ‘jette tou nou tracas lor Jéhovah’?
19 Si nou ‘jette tou nou tracas lor Jéhovah,’ nou pou kapav endure bann l’epreuve avek enn tranquillité dan nou, tranquillité ki pou protege nou leker ek nou l’esprit. Dan fond nou leker symbolik, nou pou liberé ar l’angoisse, la peur, ek panik. Nou l’esprit pa pou fatigué parski nou tracassé ou-soit parski nou pa koné ki nou pou faire.
20, 21. (a) Ki preuve l’exemple Étienne donne nou concernant tranquillité ki nou kapav ressenti kan nou gagne persecution? (b) Cite enn l’exemple modern kot enn chrétien ti ena sa sentiment-la kan li ti passe par bann l’epreuve.
20 Bann dimoune ti trouvé ki Étienne, enn disciple, ti ena sa tranquillité-la kan li ti passe par enn grand l’epreuve ki ti testé so la-foi. Avant ki li ti donne enn dernier temoignage, tou bann ki ti dan Sanhédrin “ti trouvé ki so figure ti pareil couma figure enn ange.” (Actes 6:15) Li ti parette calme, pareil couma enn ange, enn messager Bondié. Apré ki Étienne ti dire ki c’est zot-mem ki ti responsable la mort Jésus, bann juge-la “ti senti-zot blessé ziska dan zot leker ek zot ti commence grince lé-dent kont li.” Étienne ti “rempli ar l’esprit saint” ek “li ti contigne guette le ciel ek li ti trouve la gloire Bondié ek aussi Jésus ki ti pé deboute dan coté droite Bondié.” Sa vision-la ti donne Étienne la force pou reste fidel ziska la mort. (Actes 7:52-60) Mem si nou pa gagne okenn vision, Bondié kapav donne nou sa tranquillité-la kan nou passe par persecution.
21 Guette seki certain chrétien ti ressenti kan bann Nazi ti condamne zot a mort pendant Deuxieme Guerre mondial. Kan li ti raconte so l’experience devant la cour, enn chrétien ti dire: “Zot ti condamne moi a mort. Mo ti ecouté ek apré ki mo ti dire sa bann parole-la, ‘Reste fidel ziska la mort,’ ek dé-trois lezot parole ki nou Seigneur ti dire, tou ti fini. . . . Mais sa pa important asterla. Parski zot pa kapav mazinn la paix ek tranquillité ki mo ressenti!” Enn jeune chrétien ki ti pé attann ki decapite li, ti ecrire so bann parent sa bann parole-la: “Minuit inn fini passé. Mo encore ena le temps pou change mo decision. Mais eski mo pou kapav heureux encore dan sa lé-monde-la apré ki mo’nn renié nou Seigneur? Non jamais. Mais asterla zot ena l’assurance ki mo pé quitte sa lé-monde-la dan la joie ek dan la paix.” Pena doute ki Jéhovah soutenir so bann serviteur ki fidel.
Ou kapav enduré!
22, 23. Ki ou kapav sur alors ki ou attann jour Jéhovah avek l’endurance?
22 Kitfois ou pena pou faire face ar certain situation difficile ki nou finn examiné. Pourtant, Job ki ti ena la crainte pou Bondié ti ena raison kan li ti dire: “Enn dimoune ki enn femme inn donne naissance, vive pou enn tigit lé-temps, ek so la-vie rempli ar difficulté.” (Job 14:1) Kitfois ou enn parent ki pé lutté pou enseigne ou zenfant dapré la Bible. Zot bizin endure bann l’epreuve dan lekol, mais ou content kan zot tini ferme pou Jéhovah ek pou so bann principe ki juste, pa vrai? Kitfois ou pé passe par bann problem ek bann tentation dan ou travail. Mais ou kapav endure sa bann situation-la ek lezot encore parski ‘chaque jour, Jéhovah sarié ou fardeau pou ou.’—Psaume 68:19.
23 Ou kapav pensé ki ou enn ti-dimoune ordinaire, mais pa blié ki Jéhovah jamais pa pou blié seki ou’nn faire ek l’amour ki ou’nn montré pou so nom ki sacré. (Hébreux 6:10) Ou kapav endure bann l’epreuve ki testé ou la-foi, avek l’aide Jéhovah. Alors kan ou prié ek kan ou faire plan pou l’avenir, toujours prend compte volonté Bondié. Lerla ou kapav sur ki ou pou gagne benediction Bondié ek so soutien alors ki ou attann jour Jéhovah avek l’endurance.
Couma ou pou reponn?
• Kifer bann chrétien bizin l’endurance?
• Ki kapav aide nou pou endure maladie ek deuil?
• Couma la priere aide nou pou endure bann l’epreuve?
• Kifer nou kapav attann jour Jéhovah avek l’endurance?
[Zimage, page 17]
Kan nou compte lor Jéhovah, sa aide nou pou endure deuil