Vrai spiritualité—Couma ou kapav trouve sa?

L’APOTRE PAUL ti ecrire: “Kan pense bann kitsoz charnel, sa vedir la mort, mais kan pense bann kitsoz spirituel, sa vedir la vie ek la paix.” (Romains 8:6) Par sa bann parole-la, l’apotre Paul ti pé montré ki enn dimoune li spirituel pa zis par preference ou-soit parski li ena enn certaine tendance naturel. En realité, c’est enn question la vie ek la mort. Mais couma eski enn dimoune spirituel gagne “la vie ek la paix”? Dapré la Bible, sa dimoune-la en paix asterla—avek li-mem ek avek Bondié—ek li pou gagne la vie eternel dan l’avenir. (Romains 6:23; Philippiens 4:7) Li pa etonnant ki Jésus ti dire: “Heureux bann ki reconette ki zot pauvre lor plan spirituel”!—Matthieu 5:3.

Deja si ou pé lire sa magazine-la, sa montré ki ou interessé avek bann kitsoz spirituel ek sa li enn bon kitsoz. Mais parski sakenn ena so l’idée lor spiritualité, ou kapav demann-ou: ‘Ki été vrai spiritualité? Couma ou kapav arrivé gagne sa?’

“Pensée Christ”

L’apotre Paul ti montré l’importance pou interessé ar bann kitsoz spirituel ek bann bienfait ki gagné grace a sa. Mais li ti ena plus ki sa pou dire lor seki vrai spiritualité été. Li ti explik bann chrétien ki ti reste dan ancien la ville Corinthe, difference ki ena entre enn dimoune charnel, setadir enn dimoune ki obeir bann desir so lekor, ek enn dimoune spirituel, setadir enn dimoune ki bien content bann kitsoz spirituel. Paul ti ecrire: “Enn dimoune charnel pa gagne bann kitsoz ki l’esprit Bondié donné, parski pou li, sa bann kitsoz-la, zot bet.” Parkont, Paul ti expliké ki enn dimoune spirituel, li ena “pensée Christ.”—1 Corinthiens 2:14-16.

Enn dimoune ki ena “pensée Christ,” en gros c’est enn dimoune ki ena mem “l’etat d’esprit ki Jésus Christ aussi ti ena.” (Romains 15:5; Philippiens 2:5) Sa vedir ki enn dimoune spirituel pense couma Jésus pensé ek marche lor so trace. (1 Pierre 2:21; 4:1) Plus enn dimoune pense pareil couma Jésus, plus li pou ena enn bon spiritualité ek plus li pou vinn pré ar “la vie ek la paix.”—Romains 13:14.

Couma nou kapav aprann konn “pensée Christ”

Mais pou ki enn dimoune ena pensée Christ, d’abord li bizin konn so pensée. Alors, premier kitsoz ki li bizin faire pou developpe spiritualité, c’est aprann konn fason pensé Jésus. Mais couma ou kapav arrivé konn pensée enn dimoune ki’nn vive lor la terre ena 2,000 an? Reflechi, par exemple, couma ou’nn aprann concernant bann personnage ki’nn marque l’histoire ou pays? Surement kan ou’nn lire seki’nn ecrire lor zot. Li pareil pou Jésus. Enn fason important ki nou kapav aprann konn pensée Christ, c’est kan nou lire enn recit ki’nn ecrire lor li.—Jean 17:3.

Ena quatre recit bien vivant ki’nn ecrire lor Jésus. C’est bann l’Evangile ki’nn ecrire par Matthieu, Marc, Luc ek Jean. Si nou lire sa bann recit-la, sa pou aide nou pou comprend fason pensé Jésus, so bann sentiment profond, ek seki ti pousse li pou agir. Kan ou prend le temps pou reflechi lor seki ou lire concernant Jésus, ou kapav gagne enn l’idée lor ki qualité dimoune Jésus ti été. Mem si ou pensé ki ou deja enn disciple Jésus, si ou lire ek reflechi lor la vie Jésus, sa pou aide ou pou “contigne grandi dan connaissance nou Seigneur ek Sauveur Jésus Christ ek dan so faveur ki personne pa merité.”—2 Pierre 3:18.

Anou garde sa dan nou l’esprit ek anou examine certain passage l’Evangile pou nou trouvé ki kitsoz ki ti faire Jésus enn dimoune spirituel. Lerla, demann ou-mem couma ou kapav imite model ki li’nn laissé pou nou.—Jean 13:15.

Spiritualité ek “fruit l’esprit”

Luc, enn ecrivain l’Evangile, ti dire ki Bondié ti envoye so l’esprit saint lor Jésus ler li ti baptisé ek ki Jésus “ti rempli ar l’esprit saint.” (Luc 3:21, 22; 4:1) Jésus li, li ti faire so bann disciple bien comprend l’importance pou laisse l’esprit saint Bondié, ou-soit So ‘la-force actif,’ guide zot. (Genèse 1:2; Luc 11:9-13) Kifer sa bien important? Parski l’esprit Bondié ena pouvoir pou transforme maniere ki enn dimoune pensé pou faire li pense pareil couma Jésus. (Romains 12:1, 2) L’esprit saint produire bann qualité couma “l’amour, la joie, la paix, patience, bienveillance, bonté, la foi, douceur, maitrise de soi.” La Bible appel sa bann qualité-la “fruit l’esprit” ek sa-mem ki faire nou koné si enn dimoune vrai-mem spirituel. (Galates 5:22, 23) Alors, nou kapav zis dire ki enn dimoune ki spirituel, c’est enn dimoune ki guidé par l’esprit Bondié.

Jésus ti manifesté fruit l’esprit toute longue so ministere. Par fason ki li ti agir envers bann dimoune ki lezot ti considere couma bann dimoune ki pli bas dan la societé, nou kapav remark bien bann qualité couma l’amour, la bienveillance ek la bonté. (Matthieu 9:36) Guette par exemple seki l’apotre Jean raconté. Nou lire: “Alors ki [Jésus] ti pé passé, li ti trouve enn missié ki ti aveugle depuis so naissance.” Bann disciple Jésus aussi ti trouve sa missié-la mais zot ti trouve li couma enn dimoune ki’nn faire peché. Zot ti demandé: “Kisannla ki’nn faire peché, sa missié-la ou-soit so bann parent?” Bann voisin aussi ti trouve sa missié-la, mais zot ti trouve zis enn dimoune ki ti pé demann charité. Zot ti dire: “Pa sa missié ki ti habitué assizé ek demann charité-la, sa?” Mais Jésus li, li ti trouve sa missié aveugle-la couma enn dimoune ki ti bizin l’aide. Li ti koz avek li ek li ti gueri li.—Jean 9:1-8.

Dapré sa recit-la, ki nou aprann concernant pensée Christ? Premierement, Jésus pa ti meprise bann ti-dimoune mais li ti traite zot avek beaucoup compassion. Deuxiemement, li ti faire kitsoz pou aide lezot. Eski ou pensé ou pé suive sa model ki Jésus inn laissé-la? Eski ou considere bann dimoune pareil couma Jésus ti considere zot ek ou donne zot l’aide ki zot bizin pou ameliore zot la-vie ek donne zot enn l’espoir pou enn l’avenir ki pli bon? Ou-soit eski ou ena tendance pou faire preference pou bann dimoune ki important ek pou meprise bann lezot? Si ou considere bann dimoune pareil couma Jésus ti considere zot, ou pé vrai-mem suive l’exemple Jésus.—Psaume 72:12-14.

Spiritualité ek la priere

Bann recit l’Evangile montré ki Jésus ti prié Bondié souvent. (Marc 1:35; Luc 5:16; 22:41) Pendant so ministere lor la terre, Jésus ti reserve le temps expré pou li prié. Matthieu raconté: “Apré ki li ti renvoye la foule, [Jésus] ti al dan montagne, li tousel pou prié.” (Matthieu 14:23) C’est sa bann moment ki Jésus ti passé trankil pou koz avek so Papa dan le ciel, ki ti donne li courage. (Matthieu 26:36-44) Zordi, bann dimoune ki spirituel zot aussi zot rod bann l’occasion pou koz avek Bondié. Zot faire sa parski zot koné ki sa pou fortifié zot relation avek zot Createur ek pou aide zot pou pense plus couma Jésus.

Souvent Jésus ti passe bann longue period le temps pou prié. (Jean 17:1-26) Par exemple, avant ki li ti choisir sa 12 dimoune ki ti pou vinn so bann zapotre-la, Jésus ti “al dan montagne pou prié, ek li ti passe la nuit entier pou prié Bondié.” (Luc 6:12) Mem si kitfois zot pa passe toute la-nuit pou prié, bann dimoune ki spirituel suive l’exemple Jésus. Avant zot prend bann grand decision dan zot la-vie, zot prend bien le temps pou prié Bondié, pou rod direction l’esprit saint pou zot faire bann choix ki pou ameliore zot spiritualité.

Jésus ti aussi prié avek beaucoup sincerité, ek nou bizin imite li dan sa domaine-la kan nou prié. Remarké seki Luc raconté concernant fason ki Jésus ti prié sa soir zis avant li mort-la. “Li ti ressenti enn grand l’angoisse, ek li ti contigne prié avek plus sincerité encore; ek so transpiration ti vinn couma bann goutte di-sang ki ti pé tombe enba.” (Luc 22:44) Jésus ti deja prié avek sincerité avant sa, mais dan sa l’occasion-la, li ti pé faire face ar l’epreuve ki ti pli difficile dan so la-vie lor la terre. Alors li ti prié “avek plus sincerité encore”—ek Bondié ti ecoute so la-priere. (Hébreux 5:7) Bann dimoune spirituel suive l’exemple Jésus. Kan zot faire face ar bann l’epreuve ki bien difficile, zot prié Bondié “avek plus sincerité encore” pou demann Li so l’esprit saint, so direction ek so soutien.

Li clair ki Jésus ti enn dimoune ki ti faire beaucoup la-priere. Alors li pa etonnant ki so bann disciple ti envie imite li dan sa domaine-la. A cause sa-mem, zot ti demann li: “Seigneur, montré nou couma nou bizin prié.” (Luc 11:1) Li pareil zordi aussi. Bann ki apprecié bann kitsoz spirituel ek ki envie ki l’esprit saint Bondié guide zot, suive l’exemple Jésus dan fason ki zot prié Bondié. Vrai spiritualité ek la priere marche ensam.

Spiritualité ek predication la bonne nouvelle

L’Evangile Marc raconté couma enn fois Jésus ti gueri beaucoup dimoune malade, ek li ti faire sa ziska tard dan la nuit. Boner lendemain gramatin kan li ti pé prié li tousel, so bann zapotre ti vinn dire li ki beaucoup dimoune ti pé rod li, kitfois parski zot ti pé envie ki li gueri zot. Mais Jésus ti dire zot: “Anou al enn lot place, dan bann grand village ki pré, pou ki mo kapav preché la-bas aussi.” Li ti expliké kifer kan li ti dire: “C’est pou sa raison-la ki mo finn sorti.” (Marc 1:32-38; Luc 4:43) Mem si gueri bann dimoune ti enn kitsoz important pou Jésus, preche la bonne nouvelle lor Royaume Bondié ti so mission principal.—Marc 1:14, 15.

Zordi nou encore toujours kapav reconette bann ki ena pensée Christ: zot koz lor Royaume Bondié avek lezot. Jésus ti donne sa commandement-la ar tou bann ki envie vinn so disciple: “Alors allé ek faire bann disciple parmi bann dimoune dan tou bann nation, . . . enseigne zot pou suive tou bann commandement ki mo’nn donne zot.” (Matthieu 28:19, 20) En plus, Jésus ti annoncé: “Ek sa bon nouvel lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.” (Matthieu 24:14) Parole Bondié montré ki c’est grace a pouvoir l’esprit saint ki reussi faire travail predication. Alors, kan enn dimoune participe dan sa travail-la avek zèle, sa li enn signe ki li spirituel vrai-mem.—Actes 1:8.

C’est grace a zeffort ki bann million dimoune pé faire ensam ki kapav preche message Royaume Bondié partout lor la terre. (Jean 17:20, 21) Bann ki participe dan sa travail-la, fodé pa ki zot zis spirituel mais fodé aussi ki zot bien organisé lor plan mondial. Eski ou kapav identifié sa peuple ki pé suive trace Jésus-la ek ki pé preche la bonne nouvelle lor Royaume Bondié partout dan le monde?

Eski ou trouvé ki ou enn dimoune spirituel?

Bien sur, ena lezot kitsoz ki kapav faire nou koné si enn dimoune li spirituel, mais eski ou trouvé ki ou rempli bann condition ki montré ki ou enn dimoune spirituel? Pou ou koné, demann ou-mem: ‘Eski mo lire Parole Bondié, la Bible, regulierement, ek mo reflechi lor seki mo lire? Eski mo manifesté fruit l’esprit dan mo la-vie? Eski mo prié touletan? Eski mo envie joinde ensam avek bann dimoune ki pé preche la bonne nouvelle lor Royaume Bondié partout lor la terre?’

Si ou examine ou-mem dan enn fason honnete, sa pou aide ou pou konn degré ou spiritualité. Nou encourage ou pou faire seki bizin asterla pou ki ou kapav gagne “la vie ek la paix.”—Romains 8:6; Matthieu 7:13, 14; 2 Pierre 1:5-11.

[L’encadré, page 5]

ENN DIMOUNE KI SPIRITUEL

◆ Li ena l’amour pou Parole Bondié

◆ Li manifesté fruit l’esprit

◆ Li prié Bondié regulierement ek avek sincerité

◆ Li partage la bonne nouvelle lor Royaume Bondié avek lezot