Parole Jéhovah vivant

ENN dictionnaire dire: “Livre Daniel li enn parmi bann livre ki pli interessant dan la Bible. . . So bann page rempli avek bann verité eternel.” (Holman Illustrated Bible Dictionary) Recit Daniel commencé en 618 a.n.l. kan Neboukadnetsar, le roi Babylone vinn Jérusalem ek entoure sa la-ville-la, ek li amenn “certain parmi bann garson Israël” en captivité dan Babylone. (Daniel 1:1-3) Parmi ena Daniel ki jeune, kitfois li encore adolescent. A la fin livre-la, Daniel encore toujours dan Babylone. Asterla Daniel ena preské 100 an ek Bondié faire li sa promesse-la: “To pou reposé, mais to pou levé pou gagne to part kan la fin bann jour vini.”—Daniel 12:13.

Premier partie livre Daniel presenté dan l’ordre ki bann kitsoz arrivé ek coumadir enn dimoune ki pé observe la situation ki pé raconte sa. Dernier partie, c’est Daniel li-mem ki raconté. Sa livre-la inn ecrire par Daniel ek ladan ena bann prophetie concernant bann puissance mondial—kan zot commence dirigé ek kan zot tombé, le temps kan Messie pou vini, ek bann l’evenement ki pé arrivé dan nou lepok.a Prophete Daniel ki dan l’age ré-guette so longue la-vie ek raconte bann l’evenement ki encourage nou pou vinn bann zom ek bann femme ki garde nou l’integrité envers Bondié. Message Daniel li vivant ek li puissant.—Hébreux 4:12.

KI NOU APRANN DAN PARTIE KI RACONTE BANN KITSOZ DAN L’ORDRE KI ZOT ARRIVÉ?

(Daniel 1:1–6:28)

Nou en 617 a.n.l. Daniel ek so trois jeune camarade, Shadrak, Méshak ek Abed-Négo, zot dan la cour le roi Babylone. Pendant sa trois mois ki zot gagne formation pou vive dan la cour royal-la, sa bann jeune-la garde zot l’integrité envers Bondié. Huit an plitar, le roi Neboukadnetsar gagne enn rêve ki enn mystere. Daniel faire le roi konn sa rêve ki li’nn gagné-la ek li aussi expliké ki sa vedir. Le roi reconette ki Jéhovah, Li “enn Bondié tou bann bondié, enn Seigneur tou bann lé-roi ek enn Kikenn ki faire konn bann secret.” (Daniel 2:47) Mais pa trop longtemps apré sa, li parette ki li’nn blié sa leson-la. Kan trois camarade Daniel refuse pou adore enn zimage geant, le roi faire jette zot dan enn four difé. Vrai Bondié sap toulé-trois, ek Neboukadnetsar obligé reconette ki “pena okenn lot bondié ki kapav amenn delivrance couma sannla-la.”—Daniel 3:29.

Neboukadnetsar gagne enn lot rêve ki ena enn signification. Li trouve enn pié ki extra grand ek li tann enn l’ordre pou coupe pié-la pou empeche li contigne poussé. Daniel faire koné ki sa rêve-la vedir. Sa rêve-la realisé en partie kan Neboukadnetsar vinn fou ek plitar li retourne normal. Plusieurs dizaine l’année plitar, le roi Belshatsar faire enn grand fête pou bann grand personnage dan so royaume ek sans okenn respé, li servi bann recipient ki so papa ti’nn prend dan temple Jéhovah. Sa mem la-nuit-la, Belshatsar trouve la mort ek Darius le Mède gagne so royaume. (Daniel 5:30, 31) Dan lepok Darius, kan Daniel ena plus ki 90 an, bann fonctionnaire ki jaloux, comploté pou faire touye li. Mais Jéhovah sap li “dan la patte bann lion.”—Daniel 6:27.

Reponse pou bann question biblik:

1:11-15—Eski c’est parski zot ti mange zis legume ki sa quatre jeune Juif-la ti parette pli bien? Non. Okenn regime pa kapav faire sa qualité changement-la dan zis dix jour. C’est Jéhovah ki ti faire sa. Li ti beni zot pou confiance ki zot ti ena dan Li.—Proverbes 10:22.

2:1—Kan eski Neboukadnetsar ti gagne sa rêve kot li ti trouve sa extra grand zimage-la? Livre Daniel dire ki sa ti arrivé “dan deuxieme l’année règne Neboukadnetsar.” Neboukadnetsar ti vinn le roi en 624 a.n.l. Alors deuxieme l’année so règne inn commencé en 623 a.n.l.—longtemps avant ki li attak Juda. Dan sa lepok-la, Daniel pa ti dan Babylone pou explik so rêve. Li parette ki bizin compte “deuxieme l’année” a partir 607 a.n.l., kan le roi Babylone ti detruire Jérusalem ek ti vinn enn dirigeant mondial.

2:32, 39—Couma royaume ki representé par partie en l’argent dan sa statue-la, ti pli faible ki royaume ki representé par la tête en l’or, ek couma royaume ki representé par partie en cuivre ti pli faible ki royaume ki representé par partie en l’argent? Royaume médo-perse, ki representé par partie en l’argent sa statue-la, ti inferieur ar Babylone, la tête en l’or, parski pa li ki ti reussi renverse Juda. La Grèce, puissance ki ti vinn apré Babylone ti representé par partie en cuivre. Mais pareil couma cuivre pli inferieur ki l’argent, royaume la Grèce ti pli faible ki royaume médo-perse. Mem si royaume la Grèce ti ena enn pli grand territoire, li pa ti gagne sa privilege pou libere peuple Bondié couma royaume médo-perse ti reussi faire.

4:8, 9—Eski Daniel ti vinn enn pretre ki ti pratik magik? Non. Servi sa l’expression “chef bann pretre ki ti pratik magik” zis pou koz lor position ki Daniel ti ena en tant ki “pli grand chef lor bann zom sage ki ti ena dan Babylone.”—Daniel 2:48.

4:10, 11, 20-22—Ki sa extra grand pié ki Neboukadnetsar ti trouvé dan so rêve-la ti representé? En premier sa pié-la ti represente Neboukadnetsar en tant ki dirigeant enn puissance mondial. Mais parski sa domination-la ti al “ziska dan boute la terre,” pié-la bizin represente enn kitsoz ki pli grand. Daniel 4:17 montré ki rapport ena entre sa rêve-la ek domination “sa Kikenn ki Pli Grand-la” lor bann humain. Alors pié-la, li represente aussi droit ki Jéhovah ena pou dirigé dan l’univers, surtout par rapport avek la terre. Alors sa rêve-la ena deux l’accomplissement—enn ki concerne règne Neboukadnetsar ek lot ki concerne droit ki Jéhovah ena pou dirigé.

4:16, 23, 25, 32, 33—Ki quantité lé-temps sa ‘sept lé-temps-la’ representé? Sa ‘sept lé-temps-la’ ti bizin plus ki sept jour vingt-quatre heure, parski ti bizin le temps pou ki l’apparence le roi Neboukadnetsar changé. Dan so cas, sa sept lé-temps-la ti vedir sept l’année 360 jour sakenn, setadir 2,520 jour. Dan pli grand l’accomplissement sa rêve-la, sa ‘sept lé-temps-la,’ zot 2,520 an. (Ézékiel 4:6, 7) Zot ti commencé kan Jérusalem ti detruire en 607 a.n.l. ek zot ti fini kan Jésus ti vinn le Roi dan le ciel en 1914 n.l.—Luc 21:24.

6:6-10—Nou pa bizin prend okenn position special pou prié Jéhovah. Alors eski li pa ti pou pli bon ki Daniel prié en secret pendant sa period 30 jour-la? Tou dimoune ti koné ki Daniel ti prié trois fois par jour. A cause sa-mem bann ki ti comploté kont li ti faire plan pou faire passe enn la-loi ki ti dire ki pa ti gagne droit adresse okenn la-priere a part ar le roi tousel. Si Daniel ti change fason ki li ti habitué prié, lezot ti kapav considere sa coumadir li pa ti pé respecté so bann principe ek sa ti kapav faire zot pensé ki li pa ti reussi donne Jéhovah l’adoration ki zis Li tousel merité.

Bann leson pou nou:

1:3-8. Fason ki Daniel ek so bann compagnon ti determiné pou reste fidel ar Jéhovah montré bien valeur formation ki zot bann parent ti’nn bizin donne zot. Kan bann parent ki ena la crainte pou Jéhovah mette bann l’interet spirituel en premier dan zot la-vie ek montré zot bann zenfant pou faire pareil, ena plus chance ki sa bann zenfant-la resisté kont bann tentation ek bann pression ki zot kapav gagné dan lekol ou-soit dan lezot place.

1:10-12. Daniel ti comprend kifer “fonctionnaire principal dan la cour” le roi ti peur le roi ek li pa ti mette pression lor li. Mais plitar Daniel ti koz avek “gardien” ki kitfois ti pli kapav comprend li ek faire kitsoz pou li. Kan nou faire face ar bann situation difficile, nou bizin nou aussi konn servi nou l’intelligence ek nou sagesse pou nou agir.

2:29, 30. Grace a bann disposition spirituel ki Jéhovah prend, nou gagne la connaissance ek nou developpe bann qualité ek bann capacité. Pareil couma Daniel, nou bizin donne Jéhovah tou merite pou sa.

3:16-18. Sa trois hébreux-la pa ti pou reponn avek enn conviction ferme coumsa si depuis avant-mem zot pa ti fini decidé pou pa casse contour ar la loi Bondié concernant mangé. Nou aussi nou bizin faire tou seki nou kapav pou “fidel dan tou kitsoz.”—1 Timothée 3:11.

4:24-27. Daniel ti bizin la foi ek courage pou faire Neboukadnetsar koné ki ti pou arrive li ek ki li ti bizin faire pou ‘li kapav contigne prosperé.’ Nou aussi nou bizin sa mem la-foi ek courage-la pou annonce message Royaume Bondié kot ena aussi bann message condamnation ki sorti kot Bondié.

5:30, 31. ‘Sa proverbe kont le roi Babylone-la’ ti realisé. (Isaïe 14:3, 4, 12-15) Satan ki ena l’orgueil pareil couma bann lé-roi Babylone, pou mal fini li aussi.—Daniel 4:30; 5:2-4, 23.

KI BANN VISION DANIEL FAIRE NOU KONÉ?

(Daniel 7:1–12:13)

Kan Daniel gagne so premier vision dan enn rêve en 553 a.n.l, li ena plus ki 70 an. Li trouve quatre gros zanimo ki represente bann puissance mondial ki, enn apré lot, inn existé depuis so lepok ziska nou lepok. Dan enn vision kot li trouve enn scene dan le ciel, li trouve “enn kikenn ki ressemblé garson enn zom” ki gagne “enn domination ki pou duré pou touletan.” (Daniel 7:13, 14) Deux an plitar, Daniel gagne enn vision kot li trouve puissance médo-perse, puissance la Grèce ek enn lot puissance ki ti vinn “enn lé-roi ki ti ena enn l’aspect feroce.”—Daniel 8:23.

Asterla nou en 539 a.n.l. Babylone inn tombé, ek Darius le Mède inn vinn le roi dan royaume bann Chaldéen. Daniel prié Jéhovah concernant retablissement so pays. Alors ki li encore pé prié, Jéhovah envoye ange Gabriel pou donne li ‘l’intelligence pou li comprend’ prophetie concernant Messie, kan li pou vini. (Daniel 9:20-25) Nou’nn arrive vers 536/535 a.n.l. Enn ti group Israélite inn retourne Jérusalem. Mais zot pa pé reussi construire temple parski ena l’opposition. Sa faire Daniel gagne tracas. Li contigne koz sa avek Jéhovah dan so la-priere, ek Jéhovah envoye enn ange ki ena enn grand position kot Daniel. Apré ki sa ange-la inn fortifié ek encourage Daniel, li donne enn prophetie ki koz lor enn la-lutte pou gagne pouvoir entre le roi le nord ek le roi le sud. La lutte entre sa deux lé-roi-la commence depuis lepok kot royaume Alexandre le Grand inn divisé entre so quatre general ziska lepok kot Grand Prince Mikaël “pou levé.”—Daniel 12:1.

Reponse pou bann question biblik:

8:9—Ki “la Parure” representé? Ici, “la Parure” represente condition bann chrétien oint kan zot lor la terre dan lepok kot Puissance anglo-américain pé dirigé.

8:25—Kisannla ki “Prince bann prince”? Mot hébreu sar, ki traduire par “prince,” vedir en premier “chef” ou-soit “ki a la tête.” Titre “Prince bann prince” applik zis pou Jéhovah—Chef bann ange ki prince, parmi “Mikaël, enn parmi bann pli grand prince.”—Daniel 10:13.

9:21—Kifer Daniel appel ange Gabriel ‘sa zom-la’? Li appel li coumsa parski Gabriel ti prend forme enn dimoune pou apparette ar li, pareil couma li ti deja parette ar li dan enn vision avant.—Daniel 8:15-17.

9:27—Ki l’alliance Jéhovah ti ‘garde en vigueur pou sa quantité dimoune-la’ ziska la fin soixante-dixieme semaine l’année, setadir ziska 36 n.l.? L’alliance la Loi ti fini en 33 n.l. kan Jésus ti mort lor poteau. Mais kan Jéhovah ti garde l’alliance ki Li ti faire avek Abraham en vigueur pou nation Israël ziska 36 n.l., Li ti donne bann Juif encore enn period faveur special, parski zot ti bann descendant Abraham. L’alliance avek Abraham, li contigne reste en vigueur pou “Israël Bondié.”—Galates 3:7-9, 14-18, 29; 6:16.

Bann leson pou nou:

9:1-23; 10:11. Daniel ti ena l’humilité, li ti attaché ar Bondié, li ti content etudié, ek li ti perseveré dan la priere. A cause sa, li ti “enn dimoune bien desirable.” Sa bann kitsoz-la ti aussi aide li pou reste fidel ar Bondié ziska la fin so la-vie. Anou determiné pou suive so l’exemple.

9:17-19. Nou prié pou ki le monde nouveau ki Bondié pou etabli, ek kot “pou ena la justice” vini. Mais mem kan nou faire sa, nou bizin surtout rappel ki seki pli important, c’est sanctification nom Jéhovah ek justification so souveraineté plutot ki la fin nou souffrance ek nou bann difficulté personnel, pa vrai?—2 Pierre 3:13.

10:9-11, 18, 19. Nou bizin faire pareil couma sa ange ki ti vinn kot Daniel-la, setadir encourage ek fortifié sakenn nou camarade kan nou offert nou l’aide ek nou ena bann parole ki reconforte lezot.

12:3. Dan bann dernier jour, “bann ki ena l’intelligence,” setadir bann chrétien oint, finn contigne “brillé couma bann la-lumiere ki eclaire lezot” ek finn amenn “enn quantité dimoune vers la justice,” parmi ena ‘la grande foule’ “bann lezot brebis.” (Philippiens 2:15; Révélation 7:9; Jean 10:16) Bann chrétien oint pou vrai-mem ‘brillé couma bann zetoile’ pendant Règne mille an Jésus, kan zot pou participe ensam avek li pou applik tou bann bienfait so sacrifice ar bann dimoune obeissant ki lor la terre. Bann “lezot brebis” bizin reste attaché avek fidelité ar bann chrétien oint, ek donne zot tou zot soutien dan tou fason ki kapav.

Jéhovah ‘beni seki ena la crainte pou Li’

Ki livre Daniel enseigne nou lor Bondié ki nou adoré? Prend bann prophetie ki ena dan sa livre-la—bann ki’nn fini realisé ek bann ki resté pou realisé. Zot montré nou dan enn fason bien clair ki Jéhovah Li sa Kikenn ki realise so parole, pa vrai?—Isaïe 55:11.

Ki sa recit ki nou lire dan livre Daniel-la montré nou concernant nou Bondié? Sa quatre jeune Hébreux ki pa ti oulé faire partie ensam avek lezot dan la vie ki ti deroulé dan la cour le roi Babylone-la, ti gagne ‘connaissance, l’intelligence pou comprend, ek la sagesse.’ (Daniel 1:17) Vrai Bondié ti envoye so ange pou sap Shadrak, Méshak ek Abed-Négo dan four difé. Li ti sap Daniel dan fosse au lion. Jéhovah ‘Li enn secours ek enn bouclier pou bann ki mette zot confiance dan Li’ ek ‘Li beni bann ki ena la crainte pou Li.’—Psaume 115:9, 13.

[Note]

[Zimage, page 10]

Kifer Daniel ti “enn dimoune bien desirable”?