Eski ou enn l’encouragement pou lezot?

MONT Hermôn trouve dan sud bann montagne Anti-Liban. Li arrive ziska enn hauteur 2,814 metre. Pendant preské toute longue l’année li couvert ar la neige net la-haut, ek kan l’air chaud ki ena a-soir passe lor li, sa transformé ek vinn la rosée. Sa la-rosée-la desann lor bann sapin ek bann pié fruit ki ena pli bas lor la pente montagne ek aussi lor bann pié raisin ki ena pli bas. Longtemps dan Israël pendant bann longue periode kot pa ti gagne la pluie, sa la-rosée ki ti rafraichi bann plante-la, ti zot source principal l’humidité.

Dan enn chanté ki inspiré par Bondié, enn psalmiste compare l’unité ki rafraichi ki existé parmi bann adorateur Jéhovah ar “la rosée Hermôn ki pé desann lor bann montagne Sion.” (Psaume 133:​1, 3) Pareil couma mont Hermôn donne bann plante la rosée ki rafraichi zot, nou aussi nou kapav donne l’encouragement tou bann ki autour nou. Couma nou kapav faire sa?

L’exemple Jésus

Jésus Christ ti ena enn grand l’effet lor bann dimoune. Mem si zot ti joinde li pou enn ti moment mem, sa ti donne zot enn grand l’encouragement. Par exemple, dan so l’Evangile, Marc dire: “[Jésus] ti prend bann zenfant dan so lé-bras, li ti pose so la-main lor zot, ek li ti commence beni zot.” (Marc 10:⁠16) Surement sa ti faire di-bien sa bann zenfant-la, pa vrai?

Dernier soir ki li ti passé lor la terre en tant ki enn humain, Jésus ti lave lipié so bann disciple. So l’humilité ti surement touche zot leker. Lerla Jésus ti dire zot: “Mo finn donne zot l’exemple, pou ki, pareil couma mo finn faire pou zot, zot aussi zot faire pareil.” (Jean 13:​1-​17) Oui, zot aussi zot ti bizin ena l’humilité. Mem si bann zapotre pa ti comprend dé-suite sa leson ki Jésus ti donne zot-la, ek plitar sa soir-la zot ti commence discuté entre zot pou koné kisannla pli grand, Jésus pa ti en colere. Au contraire, avek patience li ti raisonne avek zot. (Luc 22:​24-⁠27) Mem “kan dimoune ti insulté li, [Jésus] pa ti insulté zot pareil.” En realité, “kan li ti souffert, li pa ti reponn par bann menace, mais li ti contigne mette tou dan la main celui ki juge avek justice.” Eski nou pa bizin suive sa joli l’exemple ki Jésus inn laissé pou nou-la?​​—⁠1 Pierre 2:​21, 23.

Jésus ti dire: “Prend mo joug lor zot ek aprann ar moi, parski mo ena enn caractere doux ek enn leker humble, ek zot pou gagne reconfort pou zot nâme.” (Matthieu 11:​29) Mazinn privilege pou ecoute Jésus li-mem enseigné. Apré ki zot ti’nn tann li enseigné dan zot synagogue, bann ki ti reste dan so prop l’endroit ti etonné ek ti dire: “Kot-sa sa zom-la inn gagne sa sagesse-la ek puissance pou faire sa bann mirak-la?” (Matthieu 13:⁠54) Kan nou lire lor la vie ek ministere Jésus, nou kapav aprann beaucoup lor fason ki nou kapav vinn enn l’encouragement pou lezot. Anou guetté couma Jésus inn laisse enn l’exemple extraordinaire dan deux domaine: kan nou koz dan enn fason pou encourage lezot ek kan nou disposé pou aide lezot.

Ena toujours bann parole ki pou encourage lezot

Li pli facile pou crase enn batiment ki pou construire enn lot. Sa mem principe-la applik ar bann parole ki nou dire. En tant ki bann dimoune imparfait, nou tou nou faire erreur ek nou ena nou bann defaut. Le roi Salomon ti dire: “Lor sa la-terre-la, pena enn zom ki juste, ki faire touletan seki bien ek pa faire peché.” (Ecclésiaste 7:​20) Li facile pou trouve erreur enn lot dimoune ek crase so la-tête avek bann parole blessant. (Psaume 64:​2-4) Parkont, nou bizin faire zeffort ek reflechi pou dire touletan bann parole ki encourage lezot.

Jésus ti ena bann parole pou encourage bann dimoune. Li ti encourage zot lor plan spirituel kan li ti annonce zot la bonne nouvelle lor Royaume Bondié. (Luc 8:⁠1) Jésus ti aussi encourage bann ki ti vinn so bann disciple kan li ti faire zot konn so Papa ki dan le ciel. (Matthieu 11:​25-​27) Li pa etonnant ki sa ti attire bann dimoune vers li!

Parkont, bann scribe ek bann Pharisien pa ti prend compte besoin lezot. Jésus ti dire: “Zot content bann place important a table pendant bann repas ek bann premier place dan bann synagogue.” (Matthieu 23:⁠6) En realité zot ti meprise bann ti-dimoune ek zot ti dire: “Sa la-foule ki pa konn la Loi-la, zot bann dimoune maudit.” (Jean 7:​49) Sa l’attitude ki zot ti ena-la pa ti encourageant ditou!

Nou bann parole reflete souvent ki qualité dimoune nou été nou-mem ek couma nou considere lezot. Jésus ti dire: “Enn bon dimoune tire seki bon dan bann bon kitsoz ki li’nn ramassé dan so leker, mais enn mauvais dimoune tire seki mauvais dan bann mauvais kitsoz ki li’nn ramassé dan so leker; parski seki enn dimoune ena en abondance dan so leker, c’est sa-mem ki li dire.” (Luc 6:⁠45) Alors ki nou bizin faire pou ki nou sur ki nou bann parole encourage lezot?

D’abord, nou kapav prend le temps pou reflechi avant nou kozé. Proverbes 15:⁠28 dire: “Leker enn dimoune juste, medité pou li kapav reponn.” Li pa necessaire ki nou prend beaucoup lé-temps pou medité. Si nou prend zis enn tigit lé-temps pou reflechi avant, en general nou kapav koné ki l’effet nou bann parole pou ena lor bann ki pou ecoute nou. Nou kapav demann nou-mem: ‘Eski seki mo pou dire montré mo l’amour? Eski li vrai, ou-soit eski li zis enn rumeur? Eski sa li “enn parole ki tombe dan l’heure ki bizin”? Eski sa pou encourage ek fortifié bann ki pé ecoute moi?’ (Proverbes 15:⁠23) Si nou trouvé ki seki nou envie dire, li negatif ek pa l’heure pou dire sa, anou vrai-mem faire enn zeffort pou blié sa. Pli bon encore, anou essaye remplace sa avek kitsoz ki pli positif ek approprié. Bann parole ki nou dire sans reflechi, zot couma “bann coute l’epée,” alors ki bann remark positif zot “enn guerison.”​​—⁠Proverbes 12:⁠18.

Enn lot kitsoz ki pou aide nou, c’est kan nou reflechi lor seki faire nou bann compagnon ena valeur devant lizié Bondié. Jésus ti dire: “Personne pa kapav vinn vers moi si mo Papa, ki finn envoye moi, pa attire li.” (Jean 6:⁠44) Jéhovah trouve bann qualité dan sakenn parmi so bann serviteur fidele​​—⁠mem parmi bann ki, dapré nou, ena enn personnalité difficile. Si nou faire bann zeffort pou trouve zot bann qualité, nou pou ena bann bon raison pou ena bann parole positif kan nou koz lor zot.

Aide lezot

Jésus ti bien comprend misere bann dimoune ar ki lezot ti pé faire dominere. Oui, “kan li ti trouve bann la-foule, li ti ena pitié pou zot, parski zot ti gagne maltraité ek zot ti senti-zot perdi pareil couma bann mouton ki pena berger.” (Matthieu 9:⁠36) Mais Jésus ti faire plus ki zis trouve zot condition ki ti faire pitié; li ti faire kitsoz pou zot. Li ti donne zot sa l’invitation-la: “Vinn vers moi, zot tou ki pé rinté ek ki ena fardeau lor zot, ek moi mo pou reconforte zot.” Li ti aussi donne zot sa l’assurance-la: “Mo joug, li doux ek mo charge, li leger.”​​—⁠Matthieu 11:⁠28, 30.

Zordi, nou pé vive “bann lepok critik ki difficile pou supporté.” (2 Timothée 3:⁠1) Beaucoup dimoune senti-zot crasé par poids “bann tracas ki ena dan sa systeme-la.” (Matthieu 13:⁠22) Ena lezot ki accablé par bann situation personnel ki difficile. (1 Thessaloniciens 5:⁠14) Couma nou kapav redonne la force bann ki decouragé? Pareil couma Christ, nou kapav aide zot pou diminué zot fardeau.

Certain dimoune senti-zot soulagé kan zot raconte enn lot dimoune zot probleme. Si enn kikenn ki senti-li abatte vinn vers nou pou nou aide li, eski nou prend le temps ki bizin pou ecoute li avek attention? Pou nou kapav ecoute enn dimoune ek en mem temps comprend so bann sentiment, nou bizin discipline nou-mem. Nou bizin reste concentré lor seki sa dimoune-la pé dire nou, au lieu ki nou maziné couma nou pou reponn li, ou-soit couma nou pou trouve enn solution pou so probleme. Nou pou montré ki nou vrai-mem interessé ar li, si nou ecoute li avek attention, nou guette li dan so figure, ek nou faire enn sourire kan sa approprié.

Dan la congregation, nou ena enn quantité l’occasion pou encourage nou bann compagnon. Par exemple, kan nou al reunion, nou kapav interesse-nou ar bann ki pé bizin lutté avek bann probleme la santé. Parfois nou bizin zis prend dé-trois minute avant ou-soit apré reunion pou fortifié zot avek dé-trois parole l’encouragement. Nou kapav aussi remark bann ki pa’nn vinn l’etude de livre, ek kitfois telephone zot pou prend zot nouvel ou-soit pou offert nou l’aide.​​—⁠Philippiens 2:⁠4.

Bann ancien ena pou sarié bann responsabilité ki bien lourd dan congregation. Nou kapav faire beaucoup pou diminué zot charge kan nou coopere avek zot ek kan avek humilité, nou faire n’importe ki travail ki zot donne nou. Parole Bondié donne nou sa conseil-la: “Obeir bann ki pé dirige zot ek soumette ar zot, parski bannla pé veille lor zot nâme couma bann ki pou rann compte; pou ki zot kapav faire sa avek la joie ek sans plaigné, sinon sa pou faire zot-mem di-tort.” (Hébreux 13:⁠17) Kan nou disposé pou aidé, nou pou vinn enn l’encouragement pou bann “ki dirige dan enn bon fason.”​​—⁠1 Timothée 5:⁠17.

Ena toujours bann parole ek bann action ki encourage lezot

C’est bann millier ti goutte de l’eau ki pa koné kot sorti ek ki desann doucement, ki vinn la rosée ki rafraichi partout. Dan nou cas aussi, li pareil. Nou pa pou kapav vinn enn l’encouragement pou lezot zis par enn sel action remarquable. Non! Mais c’est resultat ki nou gagné avek le temps grace a tou seki nou dire ek faire pou manifesté bann qualité chretien.

L’apotre Paul ti ecrire: “Dan l’amour fraternel, ena enn tendre affection sakenn pou so camarade. Zot bizin toujours premier pou honore sakenn so camarade.” (Romains 12:⁠10) Anou mette en pratik sa conseil Paul-la. Par nou parole ek nou bann action, anou vinn enn l’encouragement pou lezot.

[Zimage, page 31]

Enn dimoune ki comprend sentiment lezot kan li ecoute zot, li enn l’encouragement

[Zimage, page 32]

La rosée mont Hermôn​—⁠enn source l’humidité ki rafraichi bann plante