Parole Jéhovah vivant

NOU en 520 a.n.l. Seize an inn passé depuis ki bann Juif ki’nn sorti en exil dan Babylone inn pose fondation temple Jéhovah dan Jérusalem. Pourtant zot pankor fini construction temple, ek travail construction inn interdit. Jéhovah nomme prophete Haggaï ek deux mois plitar prophete Zekaria, pou annonce So parole.

Haggaï ek Zekaria ena enn sel l’objectif: motive le peuple pou recommence construction temple. Zot bann zeffort rapporte fruit, ek cinq an plitar reussi fini construction temple. Nou lire message ki Haggaï ek Zekaria ti proclamé dan livre la Bible ki porte zot nom. Haggaï ti termine so livre en 520 a.n.l., ek Zekaria ti termine pou li en 518 a.n.l. Pareil couma sa bann prophete-la, nou aussi nou ena pou faire enn travail ki Bondié inn donne nou, ek ki bizin terminé avant la fin sa systeme-la. Sa travail-la c’est preche Royaume Bondié ek faire bann disciple. Anou guetté ki l’encouragement nou kapav gagné dan livre Haggaï ek Zekaria.

“FIXÉ ZOT LEKER LOR SEKI ZOT PÉ FAIRE”

(Haggaï 1:1–2:23)

Dan enn periode 112 jour, Haggaï annonce quatre message ki pousse le peuple pou agir. Premier message c’est: “Jéhovah . . . finn dire: ‘Fixé zot leker lor seki zot pé faire.  . . Monte lor montagne, ek fodé zot amenn di-bois. Ek construire mo lakaz, pou ki sa faire moi plaisir ek ki mo gagne la gloire.’ ” (Haggaï 1:7, 8) Le peuple obeir. Dan deuxieme message, ena sa promesse-la: “Mo [Jéhovah] pou rempli sa lakaz-la ar la gloire.”—Haggaï 2:7.

Dapré troisieme message Haggaï, parski zot inn neglige travail reconstruction temple, ‘le peuple ek tou travail ki zot inn faire ar zot la-main’ li impur devant Jéhovah. Mais, a partir jour ki zot commence travail reparation, Jéhovah ‘pou donne zot so benediction.’ Pareil couma quatrieme message dire, Jéhovah pou “detruire la force bann royaume tou bann nation” ek Li pou etabli gouverneur Zorobabel couma enn “bague ki servi pou mette scellé.”—Haggaï 2:14, 19, 22, 23.

Reponse pou bann question biblik:

1:6—Ki vedir “zot boire, mais pa assez pou zot sou”? Sa vedir ki pou mank di-vin. Parski pena benediction Jéhovah, production di-vin limité—li pa assez pou ki le peuple sou.

2:6, 7, 21, 22—Kisannla ou-soit ki kitsoz ki pé sakouye bann nation, ek avek ki resultat? Jéhovah pé “sakouye tou bann nation” par moyen predication so Royaume ki pé faire dan le monde entier. Sa travail predication-la pé aussi permette bann “kitsoz desirable dan tou bann nation” pou rente dan lakaz Jéhovah, ek lerla rempli so lakaz ar la gloire. Avek le temps, “Jéhovah, Chef bann l’armée” pou sakouye “le ciel, ek la terre, ek la mer ek la terre ferme,” ek sa pou amenn destruction pou sa systeme mauvais-la.—Hébreux 12:26, 27.

2:9—Dan ki fason ‘la gloire sa lakaz-la ti kapav vinn pli grand ki la gloire sa lakaz ki ti ena avant-la’? Sa ti pou arrivé dan au moins trois fason: quantité le temps ki temple-la ti pou existé, kisannla ki ti pou enseigné ladan, ek kisannla ti pou rassemblé ladan pou adore Jéhovah. Mem si temple Salomon ti existé pendant 420 an, depuis 1027 a.n.l. ziska 607 a.n.l., ‘sa lakaz ki ti pé construire-la’ ti existé pendant plus ki 580 an, depuis ki ti fini so construction en 515 a.n.l. ziska so destruction en 70 n.l. En plus, Messie, setadir Jésus Christ, ti enseigné dan “sa lakaz-la” ek pli beaucoup dimoune ti vinn dan sa temple-la, ki dan seki “ti ena avant-la,” pou zot adore Jéhovah.—Actes 2:1-11.

Bann leson pou nou:

1:2-4. Kan bann dimoune opposé ar nou predication, fodé pa nou laisse sa faire nou change nou bann priorité ek nou arrete ‘rod le royaume avant tou kitsoz’ pou rod nou bann prop l’interet.—Matthieu 6:33.

1:5, 7. Li bon ki nou ‘fixé nou leker lor seki nou pé faire’ ek reflechi couma fason ki nou pé vive ena enn l’effet lor nou relation avek Bondié.

1:6, 9-11; 2:14-17. Bann Juif dan lepok Haggaï ti pé travail dur pou zot prop l’interet mais zot pa ti pé profite resultat zot travail. Parski zot ti pé neglige temple, zot pa ti ena benediction Bondié. Nou bizin faire nou bann activité spirituel passe avant dan nou la-vie ek servi Bondié avek tou nou leker, ek pa blié ki c’est “benediction Jéhovah . . . ki faire vinn riche,” ki nou ena tigit ou-soit beaucoup lor plan materiel.—Proverbes 10:22.

2:15, 18. Jéhovah ti encourage bann Juif pou fixé zot leker a partir sa jour-la, pa lor zot negligence, mais lor travail reconstruction. Nou aussi pareil. Nou bizin faire tou nou possible pou fixé nou leker ek nou l’esprit lor l’adoration Jéhovah a partir zordi.

‘PA PAR LA FORCE, MAIS PAR MO L’ESPRIT’

(Zekaria 1:1–14:21)

Zekaria commence so l’activité en tant ki prophete avek enn l’invitation pou bann Juif. Li invite zot pou ‘ré-vinn vers Jéhovah.’ (Zekaria 1:3) Sa huit vision ki li gagné apré-la donne zot l’assurance ki Jéhovah pé soutenir zot dan travail reconstruction temple. (Guette l’encadré “Huit vision symbolik ki Zekaria ti gagné.”) Sa travail reconstruction-la pou terminé “ni par la force bann l’armée, ni par puissance, mais par l’esprit [Jéhovah].” (Zekaria 4:6) Enn dimoune ki appel Germe “pou construire temple Jéhovah” ek “li pou bizin vinn enn pretre lor so trone.”—Zekaria 6:12, 13.

Béthel envoye so bann representant pou demann bann pretre renseignement lor sa quatre careme ki bizin faire en souvenir destruction Jérusalem-la. Jéhovah dire Zekaria ki sa quatre jour careme en souvenir sa malheur ki ti abatte lor Jérusalem-la pou changé ek pou vinn “la-joie ek bann bon lepok fête.” (Zekaria 7:2; 8:19) Dan sa deux message ki vini apré-la, ena bann jugement kont bann nation ek bann fausse prophete, bann prophetie messianik, ek enn message lor retablissement peuple Bondié.—Zekaria 9:1; 12:1.

Reponse pou bann question biblik:

2:1—Kifer enn zom ti pé mesure Jérusalem avek enn la-corde? Apparemment, sa faire nou comprend ki pé construire enn muraille tout autour la ville pou protege li. Ange Jéhovah informe sa zom-la ki Jérusalem pou vinn pli grand ek li pou gagne protection Jéhovah.—Zekaria 2:3-5.

6:11-13—Eski kan ti mette couronne lor la tête grand pretre Yoshoua, sa ti faire li vinn le roi ek pretre en mem temps? Non, Yoshoua pa ti enn descendant le roi David. Mais kan ti mette sa couronne-la lor so la-tête, li ti represente le Messie. (Hébreux 6:20) Prophetie concernant “Germe” realisé lor Jésus ki le Roi ek Pretre en mem temps dan le ciel. (Jérémie 23:5) Pareil couma Yoshoua ti servi couma grand pretre dan temple ki ti reconstruire, Jésus Christ, li Grand Pretre pou vrai l’adoration dan temple spirituel Jéhovah.

8:1-23—Kan eski sa dix declaration ki mentionné dan sa bann verset-la, ti realisé? Apré chaque declaration nou trouve l’expression: “Ala seki Jéhovah, Chef bann l’armée inn dire,” ek sa li enn promesse ki Bondié faire pou amenn la paix pou so peuple. Certain ladan ti realisé dan sixieme siecle a.n.l., mais zot tou finn soit realisé depuis 1919 n.l., ou-soit zot pé realisé asterla.a

8:3—Kifer appel Jérusalem “la ville fidelité”? Avant ki Jérusalem detruire en 607 a.n.l., li ti “la ville ki faire dominere,” kot ti ena bann prophete ek bann pretre ki ti malhonnete ek bann dimoune infidele. (Tsephania 3:1; Jérémie 6:13; 7:29-34) Mais asterla ki temple inn reconstruire ek ki bann dimoune ti’nn bien attaché ar l’adoration Jéhovah, zot ti pou koz bann verité ki forme partie dan vrai l’adoration, ek ti pou bizin appel Jérusalem “la ville fidelité.”

11:7-14—Zekaria ti casse enn baton ki ti appel “Charme” ek enn lot ki ti appel “Union.” Ki sa vedir? Sa bann verset-la presente Zekaria couma enn kikenn ki’nn envoyé pou “prend soin troupeau ki bann dimoune supposé touyé”—zot couma bann brebis avek ki bann dirigeant ti pé faire dominere. Dan so role en tant ki berger, Zekaria ti represente Jésus, ki Bondié ti envoye vers sa peuple avek ki Li ti’nn faire l’alliance-la, mais zot ti rejette Jésus. Kan li ti casse baton ki appel “Charme,” sa li ti enn symbol ki ti montré ki Bondié ti pou mette enn la-fin ar l’alliance la Loi avek bann Juif ek Li ti pou arrete agir bien envers zot. Kan li ti casse baton ki appel “Union,” sa ti vedir ki relation ki ti ena entre Juda ek Israël [ki ti couma deux frere a cause zot ti pé adore Jéhovah] ti cassé.

12:11—Ki été “bann lamentation Hadadrimmôn dan vallée Meguiddo”? Yoshiya ki ti le roi Juda, ti trouve la mort dan enn la-guerre kont Pharaon Néko, le roi l’Égypte, dan “vallée Meguiddo.” Lerla le peuple ti plore so la-mort dan “bann chanté deuil” pendant plusieurs l’année. (2 Chroniques 35:25) Alors kan Zekaria koz lor “bann lamentation Hadadrimmôn,” kitfois li pé koz lor sa deuil ki ti ena kan Yoshiya ti mort.

Bann leson pou nou:

1:2-6; 7:11-14. Jéhovah content ek Li ré-vinn vers bann ki accepté discipline, repenti ek ré-vinn vers Li kan zot donne Li enn l’adoration avek tou zot leker. Parkont, Li pa ecoute bann ki demann Li l’aide mais ki ‘refuse pou ecouté, ki rebelle, ek ki bouche zot zoreille pou zot pa tann’ so message.

4:6, 7. Nanyin pa ti kapav empeche l’esprit Jéhovah agir pou kapav reussi termine travail reconstruction temple. Nou kapav faire face ar n’importe ki probleme ki nou gagné dan nou service pou Bondié si nou ena la foi en Jéhovah.—Matthieu 17:20.

4:10. Enba surveillance Jéhovah ek en accord avek so bann principe bien elevé, Zorobabel ek peuple Jéhovah ti termine construction temple. Li pa trop difficile pou bann humain imparfait vive dapré seki Jéhovah demandé.

7:8-10; 8:16, 17. Pou nou gagne faveur Jéhovah, nou bizin pratik la justice, ena l’amour fidele ek misericorde, ek koz la verité sakenn avek nou camarade.

8:9-13. Kan ‘nou la-main vinn fort’ dan travail ki Jéhovah donne nou, nou gagne so benediction. Parmi sa bann benediction-la ena la paix, la securité, ek progré spirituel.

12:6. Bann ki ena responsabilité parmi peuple Jéhovah bizin “couma enn flambeau difé,” setadir zot bizin ena enn zele remarquable.

13:3. Nou fidelité envers vrai Bondié ek envers so l’organisation bizin pli grand ki nou fidelité envers n’importe ki dimoune, mem ki quantité nou proche avek sa dimoune-la.

13:8, 9. Jéhovah ti rejette enn bon quantité apostat, deux tiers parmi le peuple. Zis enn tiers ti affiné coumadir par difé. Zordi dan la chretienté, Jéhovah inn rejette la majorité bann ki dire ki zot chretien. Zis enn ti quantité, setadir bann chretien oint, inn ‘invok nom Jéhovah’ ek inn laisse Jéhovah affine zot. Sa bann chretien oint-la ek zot bann compagnon pa zis dire ki zot bann Témoins de Jéhovah.

Nou bizin motivé pou agir avek zele

Ki l’effet seki Haggaï ek Zekaria ti annoncé, ena lor nou zordi? Kan nou reflechi lor fason ki zot message ti motive bann Juif pou donne l’attention travail reconstruction temple, eski nou pa motivé pou participe avek zele dan travail predication ek faire bann disciple?

Zekaria ti annoncé ki Messie ti pou vinn “lor enn bourrik,” ki ti pou vann li pou “trente piece l’argent,” ki li ti pou gagne batté, ek ki ‘bann brebis dan troupeau ti pou dispersé.’ (Zekaria 9:9; 11:12; 13:7) Kan nou medite lor realisation sa bann prophetie messianik ki ena dan livre Zekaria-la, sa ena enn grand l’effet lor nou la-foi! (Matthieu 21:1-9; 26:31, 56; 27:3-10) Sa fortifié nou confiance dan Parole Jéhovah ek dan bann disposition ki Li’nn prend pou nou gagne la vie sauve.—Hébreux 4:12.

[Note]

[L’encadré, page 19]

HUIT VISION SYMBOLIK KI ZEKARIA TI GAGNÉ

1:8-17: Donne garantie ki pou fini construire temple ek annoncé ki Jérusalem ek lezot la-ville dan Juda pou gagne bann benediction.

1:18-21: Promette la fin ‘quatre corne ki’nn disperse Juda,’ setadir la fin tou bann gouvernement ki’nn opposé ar l’adoration Jéhovah.

2:1-13: Montré ki Jérusalem pou agrandi ek ki Jéhovah pou vinn “enn muraille difé tout autour” pou li—enn protection.

3:1-10: Montré ki Satan responsable l’opposition ki gagné pendant construction temple, ek grand pretre Yoshoua liberé ek purifié ar so bann peché.

4:1-14: Donne l’assurance ki bann l’obstacle ki couma bann montagne pou disparette ek ki gouverneur Zorobabel pou termine construction temple.

5:1-4: Koz lor enn malediction kont bann ki faire seki mauvais mais ki pa finn gagne okenn punition.

5:5-11: Annonce la fin la mechanceté.

6:1-8: Promette direction ek protection bann ange.

[Zimage, page 16]

Ki ti l’objectif bann message Haggaï ek Zekaria?

[Zimage, page 18]

Dan ki sens bann ki ena bann responsabilité, zot “couma enn flambeau difé”?