Juge zot digne pou gagne enn royaume

“Sa c’est enn preuve ki jugement Bondié li juste, ek grace a sa, juge zot digne pou gagne royaume Bondié.”—2 THESS. 1:5.

1, 2. Ki projet Bondié par rapport ar jugement, ek kisannla ki pou faire sa jugement-la?

VERS l’an 50 n.l., l’apotre Paul ti dan la ville Athènes. Li ti agacé kan li ti trouvé couma l’idolatrie ti fané partout, ek sa ti pousse li pou rann enn grand temoignage. Li ti termine so discours par bann parole bien fort ki ti surement attire l’attention so l’auditoire ki ti bann païen. Li ti dire: “Asterla [Bondié] pé dire tou dimoune, n’importe kot-sa zot été, ki zot bizin repenti, parski Li finn fixé enn jour kot Li pou juge bann habitant la terre avek la justice par enn zom ki Li finn choisir, ek Li finn donne tou dimoune enn garantie, kan Li finn ressuscite li parmi bann mort.”—Actes 17:30, 31.

² Li vrai-mem bien important ki nou reflechi ki Bondié inn fixé enn jour kot li pou juge bann dimoune! Dan so discours ki li ti faire dan la ville Athènes, Paul pa ti donne nom sa kikenn ki pou faire sa jugement-la, mais nou koné ki c’est Jésus Christ ki’nn fini ressuscité ki pou faire sa. Sa jugement-la pou amenn soit la vie, soit la mort.

3. Kifer Jéhovah ti faire enn l’alliance avek Abraham, ek kisannla ki joué enn role special dan so realisation?

³ Sa Jour Jugement-la pou dure 1,000 an. C’est Jésus ki pou dirige sa au nom Jéhovah, en tant ki lé-Roi dan Royaume Bondié, mais li pa pou tousel. Parmi bann dimoune lor la terre, Jéhovah inn choisir certain pou regné avek Jésus ek pou jugé pendant sa jour ki pou dure mille an-la. (Compare avek Luc 22:29, 30.) Ena preské 4,000 an, Jéhovah ti pose base pou sa Jour Jugement-la kan Li ti faire enn l’alliance avek so serviteur fidele Abraham. (Lire Genèse 22:17, 18.) Li parette ki sa l’alliance-la ti prend l’effet en 1943 a.n.l. Bien sur, Abraham pa ti kapav comprend net signification ki sa l’alliance-la ti pou ena pou bann dimoune. Mais zordi nou kapav trouvé ki pareil couma ti mentionné dan sa l’alliance-la, descendance Abraham joué enn role special dan realisation projet Bondié pou juge bann dimoune.

4, 5. (a) Kisannla partie principal descendance Abraham, ek ki li ti dire lor Royaume Bondié? (b) Kan eski l’esperance pou forme partie dan Royaume Bondié ti vinn possible?

⁴ C’est Jésus ki partie principal sa descendance-la. L’esprit saint ti vinn lor li en l’an 29 n.l. ek li ti vinn Messie—Christ—ki Bondié ti’nn promette. (Gal. 3:16) Jésus ti passe prochain trois an et demi pou preche la bonne nouvelle lor Royaume Bondié ar bann Juif. Apré ki ti’nn arrete Jean le Baptiste, Jésus ti montré ki lezot ti kapav ena l’espoir pou forme partie dan sa Royaume-la kan li ti dire: “Depuis lepok Jean le Baptiste ziska zordi, c’est vers royaume ki dan le ciel ki bann dimoune pé faire grand zeffort pou arrivé, ek bann ki pé faire zeffort, pé reussi gagne sa.”—Mat. 11:12.

⁵ Li interessant pou noté ki desuite apré ki li’nn koz lor bann ki pou “reussi gagne” Royaume ki dan le ciel, Jésus ti dire: “Vrai-mem mo dire zot: Parmi bann ki’nn né lor la terre, pa finn ena enn ki pli grand ki Jean le Baptiste; mais enn dimoune ki pli tipti dan royaume ki dan le ciel, pli grand ki li.” (Mat. 11:11) Kifer li ti dire sa? Parski ti bizin attann la Pentecôte l’an 33 n.l., kan bann disciple ti gagne l’esprit saint, pou ki l’esperance pou forme partie dan Royaume Bondié vinn possible. Mais sa lepok-la, Jean le Baptiste ti fini mort.—Actes 2: 1-4.

Bondié considere descendance Abraham couma bann dimoune juste

6, 7. (a) Dan ki fason eski descendance Abraham ti pou vinn “couma bann zetoile ki dan le ciel”? (b) Ki benediction Abraham ti gagné, ek ki benediction bann ki forme partie dan so descendance gagné zot aussi?

⁶ Bondié ti dire Abraham ki so descendance pou vinn beaucoup ek zot pou vinn “couma bann zetoile ki dan le ciel” ek bann la-grain di-sable ki dan bord la mer. (Gen. 13:16; 22:17) Sa vedir ki dan lepok Abraham, bann dimoune pa ti kapav koné ki quantité dimoune ti pou forme partie dan sa descendance-la. Mais, finalement Bondié ti faire koné exactement ki quantité dimoune ti pou faire partie dan sa descendance spirituel-la. A part Jésus, ti pou ena 144,000. —Rév. 7:4; 14:1.

⁷ Concernant la foi Abraham, Parole Bondié dire: “[Abraham] ti ena la foi dan Jéhovah; alors Li ti compte sa la-foi-la couma justice.” (Gen. 15:5, 6) Li vrai ki okenn dimoune pa cent pour cent juste. (Jacq. 3:2) Malgré sa, a cause la foi extraordinaire ki Abraham ti ena, Jéhovah ti agir envers li coumadir li ti juste, ek Li ti mem appel li So camarade. (Is. 41:8) Bondié considere aussi bann ki forme partie dan descendance Abraham ensam avek Jésus couma bann dimoune juste, ek sa faire zot gagne bann pli grand benediction ki Abraham.

8. Ki bann benediction pé attann bann ki forme partie dan descendance Abraham?

⁸ Bondié considere bann chretien oint couma bann dimoune juste parski zot ena la foi dan sacrifice Jésus ki couvert bann peché. (Rom. 3:24, 28) Devant lizié Jéhovah zot finn quitte ar zot peché ek zot kapav gagne l’esprit saint pou vinn bann garson spirituel Bondié, bann frere Jésus Christ. (Jean 1:12, 13) Zot rente dan nouveau l’alliance ek zot forme enn nouveau nation, “Israël Bondié.” (Gal. 6:16; Luc 22:20) Tousala represente enn grand privilege, pa vrai? Parski Jéhovah inn faire tou sa bann kitsoz-la pou zot, bann chretien oint pena l’esperance pou vive lor la terre pou touletan. Zot sacrifié sa l’esperance-la pou konn enn la-joie ki pa kapav expliké—la joie pou associé ensam avek Jésus pendant Jour Jugement ek pou regné ensam avek li dan le ciel.—Lire Romains 8:17.

9, 10. (a) Kan eski bann chretien ti gagne l’esprit saint pou premier fois, ek ki ti pé attann zot? (b) Ki l’aide bann chretien oint ti gagné?

⁹ En l’an 33 n.l., jour la Pentecôte, enn groupe dimoune fidele ti gagne privilege pou forme partie parmi bann ki pou regné avek Jésus pendant Jour Jugement. Apepré 120 disciple Jésus ti baptisé ar l’esprit saint ek lerla zot ti vinn bann premier chretien oint. Mais pou zot, sa ti zis enn commencement. A partir sa moment-la, zot ti bizin montré zot fidelité envers Jéhovah malgré tou bann l’epreuve ki Satan ti pou faire zot gagné. Zot ti bizin reste fidele ziska la mort pou zot kapav gagne couronne la vie dan le ciel.—Rév. 2:10.

¹⁰ Pou zot kapav faire sa, Jéhovah inn donne bann chretien oint conseil ek l’encouragement ki zot bizin a travers so Parole ek par moyen congregation chretien. Par exemple, l’apotre Paul ti ecrire bann chretien oint ki ti reste Thessalonique: “Pareil couma enn papa faire pou so bann zenfant, nou pa finn arrete encourage sakenn parmi zot, console zot, ek rann zot temoignage, pou ki zot contigne marche dan enn fason ki digne devant Bondié ki pé choisir zot pou so royaume ek pou so la-gloire.”—1 Thess. 2: 11, 12.

11. Ki Jéhovah inn faire ecrire pou bann membre “Israël Bondié”?

¹¹ Pendant bann dizaine l’année ki ti suive apré ki Jéhovah ti’nn choisir bann premier chretien oint, Li ti trouve bon pou faire ecrire recit lor ministere Jésus lor la terre. Li ti aussi faire ecrire fason ki Li ti agir avek bann premier chretien oint, ek bann conseil ki Li ti donne zot. Alors Jéhovah ti ajoute bann l’Écritures grecques chrétiennes avek bann l’Écritures hébraïques ki ti deja existé. En premier, Bondié ti’nn faire ecrire bann l’Écritures hébraïques pou nation Israël charnel kan zot ti ena enn relation special avek Li. Li ti faire ecrire bann l’Écritures grecques chrétiennes avant tou pou “Israël Bondié,” bann ki Li ti’nn choisir pou vinn bann frere Christ ek So bann garson spirituel. Bien sur, sa pa vedir ki bann non-Israélite pa ti pou kapav tire profit ar l’etude bann l’Écritures hébraïques. Li pareil avek bann chretien ki pa oint. Zot aussi zot tire profit kan zot etudié bann l’Écritures grecques chrétiennes ek kan zot vive en accord avek bann conseil ki ecrire ladan.—Lire 2 Timothée 3:15-17.

12. Ki rappel Paul ti donne bann chretien oint?

¹² Bondié ti considere bann chretien dan premier siecle couma bann dimoune juste ek Li ti donne zot l’esprit saint pou ki zot kapav gagne zot l’heritage celeste. Mem si zot ti’nn gagne l’esprit saint, tant ki zot ti lor la terre, sa pa ti faire zot vinn bann lé-roi lor zot bann compagnon chretien ki zot aussi, ti’nn gagne l’esprit saint. Li parette ki certain parmi sa bann premier chretien-la ti blié sa ek zot ti commence rod grandeur ki zot pa ti supposé gagné parmi zot bann frere dan congregation. Sa situation-la ti pousse Paul pou demann zot: “Alors zot inn fini gagne assez? Zot inn fini vinn riche? Zot inn fini commence regné sans nou? Vrai-mem mo souhaité ki zot ti’nn fini commence regné, coumsa nou aussi nou ti kapav regné avek zot.” (1 Cor. 4:8) Alors, Paul ti rappel bann chretien oint dan so lepok: “Pa parski nou domine lor zot la-foi, mais nou travail ensam avek zot pou zot la-joie.”—2 Cor. 1:24.

Reussi rassemblé quantité ki ti annoncé

13. Couma eski Jéhovah inn contigne choisir bann chretien oint apré 33 n.l.?

¹³ Dan premier siecle, Jéhovah pa ti choisir tou bann 144,000 chretien oint. Li ti contigne faire sa pendant lepok bann zapotre ek apparemment pendant bann siecle ki ti suive apré Li pa ti choisir beaucoup. Mais, a travers tou sa bann l’année-la ziska nou lepok, Li’nn contigné choisir zot. (Mat. 28:20) Finalement, apré ki Jésus inn commence regné en 1914, bann l’evenement inn developpe pli vite.

14, 15. Ki finn arrivé dan nou lepok concernant bann chretien oint?

¹⁴ En premier, Jésus inn tire tou trace l’opposition ki ti ena dan le ciel kont domination Bondié. (Lire Révélation 12:10, 12.) Apré li ti dirige so l’attention lor rassemblement le reste bann futur membre so Royaume ziska ki zot arrive 144,000. Vers 1935, li ti clair ki sa travail-la ti’nn preské fini ek beaucoup parmi bann ki ti pé ecouté kan ti pé faire travail predication, pa ti ena desir pou al dan le ciel. L’esprit saint pa ti pé rann temoignage ar zot ki zot ti bann garson Bondié. (Compare avek Romains 8:16.) Zot ti plutot reconette ki zot ti forme partie dan “lezot brebis,” ki ena l’espoir pou vive pou touletan lor enn la-terre ki pou vinn enn paradi. (Jean 10:16) Alors, apré 1935, ti pé faire travail predication surtout pou kapav rassemblé ‘la grande foule,’ bann ki l’apotre Jean ti trouvé en vision ek ki ti pou survive “la grande tribulation.”—Rév.7:9, 10, 14.

¹⁵ Mais mem sa, depuis 1930, Jéhovah inn choisir certain dimoune pou zot al vive dan le ciel. Kifer? Dan certain cas, kitfois pou remplace certain ki Li ti’nn fini choisir mais ki ti’nn vinn infidele. (Compare avek Révélation 3:16.) Paul ti mem koz lor certain dimoune ki li ti koné personnellement ek ki ti’nn quitte la verité. (Phil. 3:17- 19) Kisannla Jéhovah ti pou choisir pou remplace sa bann dimoune-la? Bien sur, c’est Li ki decidé. Mais li parette raisonnable ki Li pa pou choisir bann ki fek baptisé, mais bann ki’nn deja prouvé ki zot fidele dan enn certaine mesure —pareil couma bann disciple avek ki Jésus ti kozé kan li ti etabli Mémorial.a—Luc 22:28.

16. En seki concerne bann chretien oint, pou ki kitsoz eski nou reconnaissant, ek ki nou kapav croire avek confiance?

¹⁶ Mais li parette ki pa tou seki Jéhovah inn choisir pou al vive dan le ciel depuis bann l’année 1930, ki’nn remplace bann ki’nn vinn infidele. Li clair ki Jéhovah inn faire sur ki nou pou ena bann chretien oint parmi nou pendant bann dernier jour sa systeme-la ziska ki Li detruire “Babylone la Grande.”b (Rév. 17:5) Ek nou kapav sur ki Jéhovah pou reussi rassemblé tou bann membre 144,000 dan l’heure ki Li’nn fixé ek ki finalement zot tou pou prend zot place pou dirigé dan so Royaume. Nou kapav croire aussi Parole prophetik ki la grande foule ki pa pé arrete augmenté pou contigne montré zot fidelité en tant ki groupe. Bientot, zot pou ‘traverse la grande tribulation’ ki pou vinn lor le monde Satan ek zot pou rente avek joie dan le monde nouveau ki Bondié inn promette.

Inn rassemblé preské tou bann membre Royaume Bondié ki dan le ciel!

17. Dapré 1 Thessaloniciens 4:15-17 ek Révélation 6:9-11, ki’nn arrive bann chretien oint ki’nn mort fidele?

¹⁷ Depuis l’an 33n.l., plusieurs dizaine millier chretien oint inn manifesté enn la-foi solide ek inn reste fidele ziska la mort. Jéhovah inn fini juge zot digne pou gagne so Royaume ek—surement depuis commencement presence Jésus—zot finn gagne zot recompense couma zot ti pé attann.—Lire 1 Thessaloniciens 4:15-17; Révélation 6:9-11.

18. (a) Ki confiance bann membre oint ki encore lor la terre, ena? (b) Couma eski bann lezot brebis considere zot bann frere oint?

¹⁸ Bann chretien oint ki encore lor la terre ena l’assurance ki si zot reste fidele, bientot zot aussi, zot pou gagne zot recompense. Kan sa bann million lezot brebis-la reflechi lor la foi zot bann frere oint, zot d’accord avek bann parole ki l’apotre Paul ti dire concernant bann frere oint dan Thessalonique: “Zot faire nou-mem fiere parmi bann congregation Bondié a cause zot l’endurance ek zot la-foi dan tou zot bann persecution ek bann difficulté ki zot pé supporté. Sa c’est enn preuve ki jugement Bondié li juste, ek grace a sa, juge zot digne pou gagne royaume Bondié, royaume pou ki zot pé vrai-mem souffert.” (2 Thess. 1: 3-5) Kan dernier membre oint mort lor la terre —n’importe kan sa arrivé —Royaume Bondié ki dan le ciel pou vinn complet. Sa pou vrai-mem donne nou enn raison pou ena la joie —dan le ciel ek lor la terre toulé-deux!

[Note]

Eski ou kapav expliké?

• Ki kitsoz ki ena enn rapport avek Jour Jugement, Bondié ti faire Abraham koné?

• Kifer Bondié ti considere Abraham couma enn dimoune juste?

• Parski Bondié considere bann ki dan descendance Abraham couma bann dimoune juste, ki sa pou amené pou zot?

• Ki confiance tou bann chretien ena?

[Zimage, page 24]

Jésus ti encourage so bann disciple pou faire bann grand zeffort pou zot kapav gagne Royaume Bondié

[Zimage, page 25]

Jour la Pentecôte l’an 33n.l., Jéhovah ti commence choisir partie secondaire descendance Abraham

[Zimage, page 26]

Bann lezot brebis reconnaissant ki bann chretien oint avek zot lor la terre pendant sa bann dernier jour-la