Couma la mort Jésus kapav sauve ou
ENA preské 2,000 an, jour ki bann Juif ti pé celebré Pâque l’an 33 n.l., enn zom innocent ti mort pou ki lezot kapav vive. Ki sa zom-la sa? Jésus de Nazareth. Ek kisannla ki kapav tire profit grace a sa bon action-la? L’humanité entier. Enn verset la Bible ki nou konn bien faire enn resumé sa sacrifice ki sauve la vie-la: “En realité Bondié finn tellement content le monde ki Li finn donne so Sel Garson, pou ki tou seki croire en li pa mort, mais gagne la vie eternel.”—Jean 3:16, Osty.
Mem si beaucoup dimoune konn sa verset-la, bien tigit vrai-mem comprend so signification. Zot demandé: ‘Kifer nou bizin sacrifice Christ? Couma la mort enn dimoune kapav sauve l’humanité ar la mort eternel ki pé attann nou?’ La Bible donne bann bon reponse ki clair pou sa bann question-la.
Couma la mort inn arrivé domine lor l’humanité
Certain dimoune croire ki Bondié ti crée bann humain pou ki zot vive enn tipé lé-temps lor la terre, passe par bann l’epreuve, konn certain la-joie, ek apré mort ek al dan enn lot place ki pli bon. Dapré sa raisonnement-la, la mort faire partie dan projet Bondié pou l’humanité. Mais la Bible donne enn lot raison kifer bann dimoune mort. Li dire: “Par enn sel zom, peché finn rente dan le monde ek peché finn amenn la mort, ek coumsa tou dimoune passe par la mort parski zot tou ti’nn faire peché.” (Romains 5:12) Sa verset-la montré ki bann dimoune mort a cause peché. Mais kisannla sa “sel zom” ki’nn faire ki bann consequence peché contamine tou dimoune ek faire zot trouve la mort?
Dapré enn encyclopedie (The World Book Encyclopedia), la plupart scientifik croire ki tou dimoune ena enn sel l’origine, ek la Bible dire dan enn fason bien clair ki sa l’origine-la c’est sa ‘sel zom-la.’ Nou lire dan Genèse 1:27: “Bondié ti crée zom dan so ressemblance, dan ressemblance Bondié Li ti crée li; Li ti crée zot male ek femelle.” Oui la Bible dire ki premier couple humain, sa-mem ti kitsoz pli extraordinaire ki Bondié Tout-Puissant ti crée lor la terre.
Livre Genèse donne bann lezot detail encore lor la vie bann dimoune apré ki Jéhovah ti crée premier zom. Seki interessant, c’est ki dan sa recit-la entier Bondié pa koz lor la mort ditou excepté couma enn consequence desobeissance. (Genèse 2:16, 17) Li ti envie ki bann humain vive heureux ek en bonne santé dan enn joli paradi lor la terre pou touletan. Li pa ti envie ki zot konn bann l’effet la vieillesse ek ki finalement zot mort. Alors, couma la mort inn gagne pouvoir lor l’humanité entier?
Dan Genèse chapitre 3, nou trouvé couma premier couple humain ti decide pou desobeir volontairement sa Kikenn ki ti donne zot la vie-la, setadir Jéhovah. A cause sa, Bondié ti amenn sa jugement ki Li ti’nn faire zot koné a l’avance-la. Li ti dire Adam: “To finn faire avek la poussiere ek to pou revinn la poussiere.” (Genèse 3:19) Pareil couma Bondié ti dire, sa deux dimoune desobeissant-la finalement ti mort.
Mais di-tort ki sa ti faire, pa ti affecté zis premier couple humain. Zot desobeissance ti detruire l’espoir ki zot descendant ti pou kapav ena pou vive enn la-vie parfait. Jéhovah ti pense aussi bann dimoune ki pa ti encore né dan so projet kan Li ti dire Adam ek Ève: “Gagne beaucoup zenfant, multiplié, rempli la terre ek ena control lor li; ena control lor bann poisson dan la mer, lor bann creature ki envolé dan le ciel, ek lor tou creature vivant ki bougé lor la terre.” (Genèse 1:28) Avek le temps, bann humain ti pou rempli la terre ek ti pou konn enn la-vie bien heureux sans ki zot konn la mort. Mais zot ancetre Adam, sa ‘sel zom-la,’ ti vann zot couma bann esclave ar peché, ek a la fin zot ti pou konn la mort, enn sort ki zot pa ti pou kapav evité. L’apotre Paul, enn descendant premier zom, ti ecrire: “Moi, mo charnel, ek finn vann moi pou vinn esclave peché.”—Romains 7:14.
Pa trop longtemps, bann voyou inn endommage travail ki ena enn grand valeur ki enn artiste inn faire. Adam aussi pareil, kan li’nn peché, li’nn bien endommage creation Bondié ki extraordinaire, setadir l’humanité. Bann zenfant Adam ti gagne zot prop zenfant, apré zot ti gagne bann ti-zenfant, ek sa ti contigné coumsa. Enn generation apré lot ti né, ti grandi, ti gagne bann zenfant, ek apré sa zot ti mort. Kifer zot tou ti mort? Parski zot tou ti descendant Adam. La Bible dire: “A cause faute enn sel zom beaucoup finn mort.” (Romains 5:15) Adam inn trahir so prop famille ek a cause sa finn ena bann consequence couma maladie, vieillesse, tendance pou faire seki mauvais ek la mort. Ek nou tou nou forme partie dan sa famille-la.
Dan so lettre ki li ti envoye bann chretien dan Rome, l’apotre Paul ti ecrire dan ki condition bien triste bann dimoune imparfait ti été, parmi ena li aussi, ek lor la lutte fatigant ki nou bizin amené kont bann l’effet peché. Li ti dire: “Mo enn dimoune desesperé! Kisannla pou delivré moi ar sa lekor ki pé al mort-la?” Enn question important, pa vrai? Kisannla ki ti pou donne Paul—ek tou lezot ki pé attann avek impatience—enn delivrance ar l’esclavage peché ek la mort? Paul li-mem reponn: “Merci Bondié par Jésus Christ nou Seigneur!” (Romains 7:14-25) Oui, nou Createur inn prend bann disposition pou libere nou par moyen so Garson, Jésus Christ.
Role Jésus dan disposition ki Bondié inn prend pou sauve l’humanité
Jésus ti decrire role ki li ena pou delivré l’humanité ar l’esclavage peché ki amenn vers la mort. Li ti dire: “Fils de l’homme inn vini . . . pou . . . donne so la-vie couma ranson pou beaucoup.” (Matthieu 20:28, Bible Segond) Couma la vie Jésus ti pou servi couma enn ranson? Couma eski so la-mort amenn bann bienfait pou nou?
La Bible decrire Jésus couma enn kikenn ki ‘pena okenn peché’ ek ki “separé ar bann dimoune ki faire peché.” Pendant toute longue so la-vie, Jésus ti obeir la Loi Bondié dan enn fason parfait. (Hébreux 4:15; 7:26) Alors la mort Jésus pa ti consequence peché ek desobeissance pareil couma la mort Adam. (Ézékiel 18:4) Avredir, Jésus ti accepté enn la-mort ki li pa ti merité pou ki li kapav accompli volonté so Papa pou sauve l’humanité ar peché ek la mort. Pareil couma inn dire avant, Jésus ti vini volontairement “pou donne so la-vie couma ranson.” Parski Jésus ti ena enn l’amour ki okenn humain jamais pa ti ena ek ki apré personne pa’nn ena enn l’amour coumsa, li ti accepté volontairement pou “goutte la mort pou tou dimoune.”—Hébreux 2:9.
La vie ki Jésus ti sacrifié ti ena exactement mem valeur ki la vie ki Adam ti perdi kan li ti peché. Ki la mort Jésus finn permette? Jéhovah ti accepté sacrifice Jésus couma “enn ranson ki corresponn pou sauve tou dimoune.” (1 Timothée 2:6) En realité, Bondié ti servi valeur la vie Jésus pou reacheté, ou-soit delivré l’humanité ar l’esclavage peché ek la mort.
Plusieurs fois la Bible koz lor sa pli grand action ki nou Createur finn faire parski Li content nou. Paul ti rappel bann chretien ki Bondié “finn paye enn prix pou acheté zot.” (1 Corinthiens 6:20; 7:23) Pierre ti ecrire ki Bondié pa ti servi l’or ou-soit l’argent, mais di-sang so Garson pou delivré bann chretien ar enn la-vie ki amenn vers la mort. (1 Pierre 1:18, 19) Grace a sacrifice Jésus Christ, Jéhovah ti prend bann disposition pou sauve bann dimoune ar la mort eternel ki zot pa ti pou kapav evité.
Eski ou pou gagne bann bienfait grace a ranson Jésus Christ?
Ziska ki point bann bienfait ranson Jésus Christ touche bann dimoune? L’apotre Jean ti ecrire: “[Jésus Christ] li enn sacrifice ki couvert nou bann peché, selman pa zis nou bann peché mais aussi peché le monde entier.” (1 Jean 2:2) Oui, tou dimoune kapav profite ransom Christ. Eski sa vedir ki li automatik ki tou dimoune gagne bann bienfait grace a ranson Jésus ki ena grand valeur? Non. Rappel sa l’exemple ki ti mentionné dan lartik avant. Bann dimoune ki ti pé essaye sauve bann travailleur dan mine, ti envoye enn casier enba kot zot ti coincé, mais sakenn parmi sa bann zom-la ti bizin rente dan sa casier-la. Pareil, bann ki envie gagne bann bienfait ar sacrifice Jésus Christ zot pa kapav zis attann ki Bondié pou beni zot. Zot bizin faire kitsoz.
Ki kitsoz Bondié demann zot faire? Jean 3:36 dire nou: “Kikenn ki ena la foi dan Garson Bondié ena la vie pou touletan; mais kikenn ki desobeir Garson Bondié pa pou trouve la vie, mais colere Bondié reste lor li.” Bondié attann ki nou ena la foi dan sacrifice Jésus Christ. Ena encore lezot kitsoz ki nou bizin faire. “Par sa nou koné ki nou’nn aprann konn [Jésus], setadir si nou contigne suive so bann commandement.” (1 Jean 2:3) Alors, li clair ki la foi dan sacrifice Jésus ek obeir so bann commandement, li enn kitsoz bien important pou nou kapav sap dan peché ek la mort.
Enn fason important pou montré nou la-foi dan ranson Jésus c’est kan nou montré nou reconnaissance pou so la-mort. Nou faire sa kan nou commemore sa l’evenement-la, pareil couma li ti donne l’ordre pou faire. Avant li mort, Jésus ti etabli enn repas symbolik avek so bann zapotre fidele ek li ti dire zot: “Contigne faire sa en mo memoire.” (Luc 22:19) Bann Témoins de Jéhovah bien apprecié l’amitié ki zot ena avek Garson Bondié, ek zot obeir sa commandement-la. Sa l’année-la, date kan pé celebré Mémorial la mort Jésus Christ c’est samedi, le 22 mars apré coucher soleil. Nou content pou invite ou vinn assisté sa reunion special-la, coumsa ou pou obeir commandement ki Jésus ti donné. Bann Témoins de Jéhovah dan ou region pou kapav dire ou l’heure ek l’endroit kot pou celebré sa l’evenement-la. Pendant sa reunion-la ou pou aprann plus lor seki ou bizin faire pou ki sacrifice Christ kapav libere ou ar bann consequence mortel ki peché Adam finn amené.
Bien tigit dimoune zordi ena reconnaissance ek vrai-mem comprend grand sacrifice ki zot Createur ek so Garson finn faire pou sauve zot ar destruction. Bann ki ena la foi dan sa sacrifice-la konn enn grand bonheur. L’apotre Paul ti ecrire concernant bann chretien: “Zot ena la foi en [Jésus] ek zot dan enn grand la joie, enn la-joie ki pa kapav exprimé ek ki rempli ar la gloire, parski zot gagne la fin zot la-foi, [setadir] delivrance pou zot nâme.” (1 Pierre 1:8, 9) Si ou developpe l’amour pou Jésus Christ ek si ou ena la foi dan so sacrifice, ou pou kapav rempli ou la-vie avek la joie asterla ek attann avek impatience pou ou kapav delivré ar peché ek la mort.
[Zimage lor page 6]
Jésus ti offert so la-vie pou compense bann l’effet ki peché Adam finn amené
[Zimage lor page 7]
Sa l’année-la, date kan pé celebré Mémorial la mort Jésus Christ c’est samedi, le 22 mars apré coucher soleil