Trouve la joie dan ou mariage
“Par la sagesse enn famille pou fortifié, ek grace a enn bon jugement li pou vinn solide.”—PROV. 24:3.
1. Couma Bondié ti montré so sagesse concernant premier zom?
NOU Papa ki dan le ciel ena enn grand sagesse ek Li koné ki bon pou nou. Par exemple, Bondié ti reconette ki, pou ki so projet accompli, li pa ti “bon ki zom reste tousel” dan jardin Éden. Enn l’aspect principal dan sa projet-la c’est ki bann dimoune marié gagne bann zenfant ek “rempli la terre.”—Gen. 1:28; 2:18.
2. Ki disposition Jéhovah ti prend ki ti pou permette bann dimoune gagne bann bienfait?
2 Jéhovah ti dire: “Mo pou faire enn l’aide pou li, enn kikenn ki al bien ar li.” Bondié ti faire premier zom gagne enn sommeil bien profond, Li ti tire enn cote dan so lekor parfait ek Li ti faire enn femme ar sa cote-la. Kan Jéhovah ti amenn Ève ki ti enn femme parfait, kot Adam, Adam ti dire: “Enfin, sannla li lezo mo lezo ek la chair mo la-chair. Pou appel li Femme, parski finn tire li ar enn zom.” Ève ti vrai-mem enn kikenn ki ti al bien ar Adam. Mem si sakenn pa ti pou pareil ek ti pou manifesté different qualité, toulé-deux ti parfait ek ti crée dan ressemblance Bondié. C’est coumsa ki Jéhovah ti faire premier mariage. Adam ek Ève pa ti ena okenn probleme pou accepté sa disposition ki Bondié ti prend-la, kot sakenn ti pou aide ek soutenir so camarade.—Gen. 1:27; 2:21-23.
3. Couma beaucoup considere mariage, ek ki bann question sa faire nou posé?
3 Malheureusement, zordi partout dan le monde ena enn l’esprit rebellion. C’est pa Bondié ki responsable bann probleme ki sa inn crée. Beaucoup dimoune meprise mariage, sa don ki Bondié inn faire-la. Zot considere mariage couma enn kitsoz ki nepli la mode, ki pa donne zot okenn satisfaction, ki faire zot frustré ou-soit ki faire zot gagne la guerre entre zot. Parmi bann ki marié, beaucoup divorcé apré. Kitfois, bann zenfant pa gagne l’affection naturel ek parfois bann parent servi zot pou faire chantage avek zot conjoint kan zot gagne la guerre. Mem si la paix ek l’unité zot famille en danger, beaucoup parent refuse pou cedé. (2 Tim. 3:3) Alors, couma eski bann couple kapav garde la joie dan zot mariage dan sa lepok critik-la? Couma, kan bann couple disposé pou cedé, sa kapav aide zot pou faire tou pou ki zot mariage pa cassé? Ki nou kapav aprann ar bann couple ki finn garde la joie dan zot mariage, zordi?
Soumette ar direction Jéhovah
4. (a) Ki commandement Paul ti donné concernant mariage? (b) Couma bann chretien obeissant suive sa commandement-la?
4 L’apotre Paul ti inspiré pou donne sa commandement-la bann veuve: si zot envie remarié, zot bizin faire sa “selman dan le Seigneur.” (1 Cor. 7:39) Sa pa ti enn kitsoz nouveau pou bann chretien ki ti Juif avant. La Loi ki Bondié ti donne bann Israélite ti bien clair kan Li ti dire ki “fodé pa ki [zot] faire enn l’alliance . . . par mariage” avek n’importe kisannla dan bann nation païen ki ti entoure zot. Jéhovah ti ajoute enn l’explication ki montré danger ki ti ena si zot pa ti prend compte sa principe-la. Li ti dire: “Parski [enn kikenn ki pa Israélite] pou faire to garson arrete suive moi, ek pena doute ki zot pou servi lezot bondié; ek vrai-mem colere Jéhovah pou enflammé kont zot, ek vrai-mem Li pou detruire toi bien vite.” (Deut. 7:3, 4) Ki conduite Jéhovah attann ki so bann serviteur ena zordi dan sa domaine-la? Li clair ki Jéhovah attann ki enn serviteur Bondié ki envie marié, choisir enn kikenn “dan le Seigneur,” setadir enn dimoune ki voué ek baptisé, enn Témoin de Jéhovah pareil couma li. Li sage ki nou soumette-nou ar direction Jéhovah kan nou bizin prend enn decision coumsa.
5. Couma Jéhovah ek bann chretien marié considere bann voeu ki zot faire jour zot mariage?
5 Bann voeu ki nou faire kan nou marié, zot sacré devant lizié Bondié. Kan li ti pé kozé, Jésus, Garson Bondié ti dire concernant premier mariage: “Seki Bondié finn mette enba enn sel joug, fodé ki personne pa separe sa.” (Mat. 19:6) Enn psalmiste ti rappel nou ki quantité enn voeu li serieux: “Offert bann remerciement couma to sacrifice pou Bondié, ek tini bann promesse ki to faire ar sa Kikenn ki Pli Grand-la.” (Ps. 50:14) Mem si enn couple kapav attann pou konn enn grand la-joie, bann voeu ki zot faire jour zot mariage, zot bien serieux ek sa amenn bann responsabilité.—Deut. 23:21.
6. Ki nou kapav aprann ar l’exemple Yiphtah?
6 Anou prend l’exemple Yiphtah ki ti enn juge en Israël dan 12eme siecle a.n.l. Li ti faire sa promesse-la ar Jéhovah: “Si vrai-mem to livré bann descendant Ammôn dan mo la-main, ala seki pou arrivé: sa kikenn ki sorti par la porte mo lakaz pou vinn joinde moi kan mo pou retourne en paix letan mo sorti kot bann descendant Ammôn, sa kikenn-la pou bizin vinn pou Jéhovah, ek mo pou bizin offert li couma enn sacrifice ki brule net.” Kan Yiphtah ti trouvé ki c’est so tifi, sel zenfant ki li ti ena, ki ti vinn joinde li kan li ti rente kot li dan Mitspa, eski li ti rod casse so promesse? Non. Li ti dire: “Mo’nn ouvert mo la-bouche pou Jéhovah; mo pa pou kapav revinn en arriere.” (Juges 11:30, 31, 35) Yiphtah ti tini promesse ki li ti faire ar Jéhovah, mem si sa ti vedir ki li pa ti pou ena bann descendant pou contigne porte so nom. Promesse ki Yiphtah ti faire ti different ar promesse ki bann ki marié faire, mais parski li’nn tini so promesse, li enn bon l’exemple pou bann couple marié.
Ki kitsoz faire enn mariage reussi?
7. Ki changement bann ki fek marié bizin faire?
7 Beaucoup couple rappel avek plaisir periode kot zot ti pé frequenté. Zot ti bien content pou aprann konn zot futur conjoint! Plus zot ti passe le temps ensam, plus zot ti vinn proche ar zot camarade. Mais, ki enn mariage inn arrangé par bann parent sans ki’nn ena bann frequentation, ou-soit ki enn couple inn passe le temps ensam pou frequenté, dan toulé-deux cas, enn fois ki zot inn marié, li ti important ki couple-la faire bann changement. Enn mari reconette: “Pli grand difficulté ki nou ti gagné kan nou ti fek marié, c’est pou realisé ki nou ti nepli bann celibataire. Pendant enn temps, nou ti trouve sa difficile pou laisse nou bann camarade ek nou famille dan place ki bizin.” Enn lot chretien ki marié depuis 30 an, ti comprend bien vite ki, li ti bizin “pense pou deux dimoune au lieu enn sel dimoune” pou ki so couple heureux. Avant ki li accepté enn l’invitation ou-soit prend enn l’engagement, li guetté seki so femme pensé ek li prend compte l’interet toulé-deux kan li prend enn decision. Dan enn situation coumsa, li important ki bann conjoint disposé pou cedé.—Prov. 13:10.
8, 9. (a) Kifer li important pou ena enn bon communication entre mari ek femme? (b) Dan ki domaine li bon ki enn couple montré-li souple, ek kifer?
8 Parfois deux dimoune ki ena bann culture different, marié. Dan sa situation-la surtout, li important ki ena enn communication franc entre zot. Bann fason pou communiké pa pareil partout. Kan ou observé couma ou conjoint koz avek so famille sa kapav aide ou pou comprend li pli bien. Parfois, c’est pa seki enn dimoune dire, mais couma li dire sa ki montré seki li pensé au fond. Ek nou kapav aprann beaucoup par seki li pa dire. (Prov. 16:24; Col. 4:6) Pou nou heureux li bien important ki nou ena discernement.—Lire Proverbes 24:3.
9 Concernant bann passe-temps ek divertissement, beaucoup finn trouvé ki li important ki zot montré-zot souple. Kitfois avant mariage, ou conjoint ti habitué passe le temps pou faire sport ou-soit lezot divertissement. Eski ena bann changement ki pou bizin faire? (1 Tim. 4:8) Nou kapav pose mem question concernant le temps ki ti habitué passé avek la famille. Nou koné ki enn couple bizin le temps pou faire bann kitsoz spirituel ek lezot activité ensam.—Mat. 6:33.
10. Couma kan enn dimoune disposé pou cedé, sa permette ki ena bann bon relation entre bann parent ek zot zenfant ki’nn marié?
10 Kan enn zom marié, li quitte so papa ek so mama, sa li applik aussi pou enn femme. (Lire Genèse 2:24.) Selman, sa l’ordre ki la Bible donné pou honore so papa ek so mama-la, li pa arreté mem apré ki enn dimoune li’nn marié. Alors, mem apré zot mariage, couple-la surement pou passe le temps avek zot parent ek zot bann beau-parent. Enn chretien ki marié depuis 25 an faire sa remark-la: “Parfois, li difficile pou garde l’equilibre entre bann desir ek bann besoin nou conjoint ek bann desir ek besoin nou parent, nou frere ek soeur ek nou beau-parent. Pou koné ki pli bon fason mo bizin agir, Genèse 2:24 inn aide moi beaucoup. Li vrai ki enn dimoune bizin attaché ar so famille ek li ena bann responsabilité envers zot, selman, sa verset-la finn montré moi ki c’est envers mo femme ki mo bizin attaché en premier.” Alors, bann parent chretien ki disposé pou cedé, pou comprend ki asterla zot bann zenfant ki’nn marié ena zot prop famille ek c’est mari-la ki responsable en premier pou dirige so famille.
11, 12. Kifer l’etude en famille ek la priere zot important pou bann couple?
11 Pou ki enn mariage reussi, fodé ki regulierement ena enn l’etude la Bible en famille. L’experience ki beaucoup famille chretien inn faire, montré sa. Kitfois li pa facile pou etabli enn l’etude coumsa ek pou faire li regulierement. Enn chef famille dire: “Si nou ti kapav retourne en arriere pou change au moins enn kitsoz, nou ti pou faire en sorte ki nou respecté enn bon programme l’etude la Bible en famille au commencement-mem nou mariage.” Li ti ajouté: “Li vrai-mem enn plaisir pou trouve la joie ki mo femme ena kan nou decouvert ensam bann verité interessant lor la Bible pendant nou l’etude.”
12 Enn lot kitsoz ki aide enn mariage pou reussi c’est kan enn couple faire la priere ensam. (Rom. 12:12) Kan enn couple uni dan l’adoration Jéhovah, bann bon relation ki zot ena avek Bondié kapav fortifié l’attachement ki ena entre zot. (Jacq. 4:8) Enn mari chretien expliké: “Kan nou demann pardon desuite pou nou bann erreur ek nou mentionne sa bann erreur-la dan nou la-priere, c’est enn fason pou montré ki nou vrai-mem regrette seki nou’nn faire, mem si nou finn faire enn ti kitsoz ki finn agace nou conjoint.”—Éph. 6:18.
Cedé dan ou mariage
13. Ki conseil Paul ti donné concernant bann relation sexuel dan mariage?
13 Bann chretien marié bizin rejette bann pratik ki mine zot mariage, couma par exemple bann pratik ki ena dan sa lé-monde kot tou tourne autour sexe. Lor sa sujet-la, Paul ti donne sa conseil-la: “Ki enn mari donne so femme seki li doit li; mais ki femme-la aussi faire pareil envers so mari. Enn femme pena pouvoir lor so prop lekor, mais c’est so mari; pareil aussi, enn mari pena pouvoir lor so prop lekor, mais c’est so femme.” Apré sa, Paul ti donne sa conseil bien clair-la: “Pa prive zot camarade, excepté si toulé-deux tombe d’accord pou enn lé-temps fixé.” Kifer? “Pou ki zot kapav consacré le temps pou la priere ek revinn ensam encore, attention ki Satan contigne tente zot a cause zot pena assez control.” (1 Cor. 7:3-5) Kan Paul ti mentionne la priere, li ti montré bann priorité ki enn chretien bizin ena. Mais li ti faire bien comprend aussi ki enn chretien marié bizin prend compte besoin physik ek affectif so conjoint.
14. Ki bann principe biblik appliké concernant bann relation intime dan mariage?
14 Bann mari ek bann femme bizin kapav koz franc sakenn avek so camarade ek realisé ki si zot mank consideration pou zot conjoint dan sa domaine bien intime-la, sa kapav faire zot gagne probleme. (Lire Philippiens 2:3, 4; compare avek Matthieu 7:12.) Sa finn marché dan certain mariage kot enn parmi bann conjoint pa servi Jéhovah. Mem kan ena bann desaccord, en general sa conjoint ki servi Jéhovah-la kapav ameliore situation par so bon conduite, so bonté ek kan li cooperé. (Lire 1 Pierre 3:1, 2.) Kan enn kikenn ena l’amour pou Jéhovah ek pou so conjoint, ek kan li disposé pou cedé, sa pou aide so couple dan sa domaine-la.
15. Ki role respé ena pou ki enn mariage reussi?
15 Enn bon mari pou traite so femme avek respé dan lezot domaine aussi. Par exemple, li pou prend compte so sentiment mem dan bann ti kitsoz. Enn mari ki marié depuis 47 an reconette: “Mo encore pé aprann dan sa domaine-la.” La Bible conseil bann femme chretien pou ena enn profond respé pou zot mari. (Éph. 5:33) Zot pa pou montré respé si zot critik zot mari ou-soit si zot devoile so bann defaut devant tou dimoune. Proverbes 14:1 rappel nou: “Enn femme ki vrai-mem sage inn construire so lakaz, mais enn femme ki bete crase li ar so prop la-main.”
Pa cedé devant Satan le Diable
16. Couma bann couple kapav applik Éphésiens 4:26, 27 dan zot mariage?
16 “Zot kapav en colere, mais pa faire peché; pa laisse soleil couché alors ki zot encore en colere, ek pa donne Satan okenn l’occasion.” (Éph. 4:26, 27) Kan nou mette sa bann parole-la en pratik, sa kapav aide nou pou reglé bann probleme ek pou evite bann desaccord dan nou couple. Enn soeur dire: “Mo pa rappel si finn deja ena enn desaccord ki moi ek mo mari nou pa finn reussi reglé par enn bon dialogue, mem si nou finn prend beaucoup lé-temps pou reglé sa.” Au commencement zot mariage, li ek so mari ti bien decidé ki zot pa pou laisse enn la-journée passé sans ki zot reglé zot probleme. “Nou ti decidé ki, n’importe ki probleme nou pou gagné, nou pou pardonné, nou pou blié ek ki chaque jour, nou pou prend enn nouveau depart.” C’est coumsa ki zot pa’nn “donne Satan okenn l’occasion.”
17. Mem si deux conjoint pa parette al bien ensam, ki kapav aide zot?
17 Mais ki ou pou faire si ou finn mank sagesse kan ou finn choisir ou conjoint? Kitfois ou trouvé ki ou la-vie mariage pa aussi romantik ki la vie mariage bann lezot couple. Mais kan-mem, si ou rappel couma nou Createur considere mariage, sa pou aide ou. Paul ti inspiré pou donne bann chretien sa conseil-la: “Fodé ki mariage ena valeur pou tou dimoune, ek ki lili enn couple marié reste pur, parski Bondié pou juge bann fornicateur ek bann adultere.” (Héb. 13:4) Nou bizin rappel aussi sa bann parole-la: “Enn la-corde trois tresse pa casse vite.” (Eccl. 4:12) Kan mari ek femme toulé-deux ena enn grand desir pou sanctifié nom Jéhovah, zot reste attaché sakenn ar so camarade ek ar Bondié. Zot bizin travail pou zot faire zot mariage reussi, parski zot koné ki sa pou reflete lor nom Jéhovah, Celui ki finn crée mariage.—1 Pierre 3:11.
18. Ki ou kapav sur concernant mariage?
18 Oui, li possible pou bann chretien trouve la joie dan zot mariage. Mais pou sa, zot bizin faire zeffort ek manifesté bann qualité chretien, parmi, zot bizin montré ki zot disposé pou cedé. Zordi dan tou congregation bann Témoins de Jéhovah dan le monde entier, nou trouve enn quantité couple ki prouvé ki sa li possible.
Couma ou pou reponn?
• Kifer li pa enn kitsoz impossible pou trouve la joie dan mariage?
• Ki kapav aide enn mariage pou reussi?
• Ki bann qualité bann conjoint bizin developpé?
[Zimage lor page 15]
Enn couple montré ki zot sage kan zot communiké avant ki zot accepté enn l’invitation ou-soit prend enn rendez-vous
[Zimage lor page 16]
Faire zeffort pou reglé bann probleme mem jour pou pa “donne Satan okenn l’occasion”