Bann zetoile faire nou konn puissance Bondié

“Leve zot lizié la-haut ek guetté. Kisannla ki finn crée sa bann kitsoz-la? C’est sa Kikenn ki faire zot l’armée sorti dapré zot quantité; Li appel zot tou par zot nom. A cause l’abondance l’energie actif, parski Li puissant par la force, pena enn parmi zot ki manké.”—ISAÏE 40:26.

SOLEIL li zis enn zetoile ki enn grandeur moyen. Mais mem-sa, so volume 330,000 fois pli grand ki la terre. Majorité zetoile ki pré ar la terre pli tipti ki soleil. Mais lezot zetoile, couma par exemple sa zetoile ki appel V 382 Cygni, so volume au moins 27 fois pli grand ki nou soleil.

Ki quantité l’energie sorti dan soleil? Maziné ki quantité fort enn difé bizin été pou ki mem si ou 15 kilometre pli loin ar li, ou encore kapav senti so chaleur. En moyenne, ena enn distance apepré 150 million kilometre entre soleil ek la terre. Pourtant, kan soleil fort, so chaleur kapav brule nou la peau! Sa li bien etonnant, parski zis apepré 0.000,000,000,5 pour cent l’energie soleil ki arrive ziska la terre. Pourtant sa ti pourcentage l’energie-la, li assez pou ki la vie contigné lor la terre.

En realité, bann scientifik inn calculé ki total l’energie ki sorti zis dan nou soleil, li assez pou ki ena la vie lor 31,000 milliard planete ki pareil couma la terre. Nou kapav aussi calcule sa quantité l’energie-la dan enn lot fason. Si ti kapav ramasse l’energie soleil zis pou enn seconde, dapré site Internet Space Weather Prediction Center (SWPC), l’Amérique ti pou kapav gagne assez l’energie pou sa prochain 9,000,000 l’année-la, si li contigne servi mem quantité l’energie ki li pé servi asterla.

L’energie soleil sorti dan so centre ki couma enn machine ki produire l’energie nucleaire en abondance. Soleil tellement grand ek dan so centre ena tellement l’energie ki sa l’energie-la prend bann million l’année pou arrivé sorti en dehors. Site Internet SWPC dire: “Si soleil arrete produire l’energie zordi, sa pou prend 50,000,000 l’année pou nou commence vrai-mem senti bann l’effet lor la terre!”

Asterla anou guette enn lot kitsoz: Kan ou guette la-haut a-soir kan le ciel bien clair, ou trouve bann millier zetoile; sakenn sa bann zetoile-la donne bann grand quantité l’energie pareil couma soleil. Ek bann scientifik estimé ki dan l’univers, ena par milliard zetoile!

Kot tou sa bann zetoile-la inn sorti? Zordi, la plupart scientifik croire pou bann raison ki zot pankor comprend, ki l’univers inn zis commence existé enn coute coumsa ena apepré 14 milliard l’année. La Bible zis dire: “Au commencement Bondié ti crée le ciel ek la terre.” (Genèse 1:1) Pena doute ki kapav dire ki Createur bann zetoile, sa bann extra grand machine ki fabrik l’energie-la, Li “puissant par la force.”—Isaïe 40:26.

Couma Bondié servi so puissance

Jéhovah servi so puissance pou soutenir bann ki faire so volonté. Par exemple, l’apotre Paul ti depense so l’energie pou enseigne lezot concernant Bondié. Paul pa ti enn superman, mais li ti kapav faire beaucoup bon kitsoz malgré enn grand l’opposition? Couma? Li ti reconette ki li ti gagne “puissance ki plus ki seki normal” avek Bondié.—2 Corinthiens 4:7-9.

Jéhovah ti servi so puissance aussi pou detruire bann ki ti desobeir so bann principe moral volontairement. Jésus Christ ti cite destruction Sodome ek Gomorrhe ek deluge dan lepok Noé couma bann l’exemple pou montré ki Jéhovah servi so puissance pou detruire zis bann mauvais dimoune. Jésus ti annoncé ki bientot Jéhovah pou reservi so puissance pou detruire bann ki pa prend compte So bann la loi.—Matthieu 24:3, 37-39; Luc 17:26-30.

Ki l’effet sa ena lor ou?

Apré ki ou finn medite lor puissance Bondié ki ou trouvé kan ou guette bann zetoile, ou kapav ena mem sentiment ki le roi David ki ti dire: “Kan mo guette le ciel ek bann travail ki to finn faire avek to la main, la lune ek bann zetoile ki to finn preparé, ki été enn dimoune mortel, pou ki to pense li, ek ki été dimoune ki’nn faire ar la poussiere, pou ki to prend li compte?”—Psaume 8:3, 4.

Oui, nou gagne enn leson l’humilité kan nou realisé ki quantité nou tipti comparé ar l’univers ki extra grand. Pourtant, fodé pa nou senti-nou trop crasé par puissance Bondié. Jéhovah inn inspire prophete Isaïe pou ecrire sa bann parole rassurant-la: “Li [Bondié] donne la force seki fatigué; ek enn kikenn ki pena okenn l’energie actif, Li faire li gagne la force en abondance. Bann garson pou fatigué ek zot pou nepli ena la force, ek bann jeune homme vrai-mem pou riské tombé, mais bann ki ena l’espoir en Jéhovah pou regagne la force. Zot pou monte dan l’air avek bann lezel couma bann l’aigle. Zot pou galopé ek zot pa pou perdi zot la force; zot pou marché ek zot pa pou fatigué.”—Isaïe 40:29-31.

Si ou envie faire volonté Bondié, ou kapav sur ki Li pou donne ou so l’esprit saint pou soutenir ou. Mais ou bizin demann Li. (Luc 11:13) Avek l’aide Bondié, ou kapav endure n’importe ki l’epreuve ek gagne la force pou faire seki droite.—Philippiens 4:13.

[L’encadré lor page 7]

Avek l’aide Bondié, ou kapav gagne la force pou faire seki droite

[Zimage lor page 7]

Dan sens zaiguille enn montre a partir la-haut dan coté gauche: galaxie Whirlpool, bann groupe zetoile Pléiades, nébuleuse Orion, galaxie Andromède

[Zimage lor page 7]

Volume soleil 330,000 fois plus ki volume la terre

[Remerciement photo page 7]

Pléiades: NASA, ESA ek AURA/Caltech; tou lezot photo la-haut: National Optical Astronomy Observatories