Eski ou ti koné?

Kifer sa de l’huile ki Marie ti servi-la ti cher coumsa?

Deux-trois jour avant la mort Jésus, Marie, soeur Lazare, “ti vini avek enn recipient en albatre rempli ar de l’huile parfumé, enn l’essence nard ki ti pur, ki ti coute bien cher,” ek li ti verse sa de l’huile-la lor Jésus. (Marc 14:3-5; Matthieu 26:6, 7; Jean 12:3-5) Marc ek Jean raconté ki sa parfum-la ti coute 300 denier, apepré salaire ki enn simple travailleur ti gagné dan enn an.

Kot-sa, sa de l’huile cher-la ti sorti? En general bann dimoune pensé ki sa nard ki mentionné dan la Bible-la sorti dan enn ti plante ki senti bon (Nardostachys jatamansi) ek ki poussé dan bann montagne Himalaya. Souvent bann dimoune ti coupe sa nard ki coute cher-la avek enn lot de l’huile moins cher ek parfois zot ti mem remplace li par bann imitation. Mais Marc ek Jean toulé-deux servi l’expression “nard ki ti pur.” Si sa de l’huile-la ti aussi cher ki sa, sa faire nou comprend ki kitfois li ti sorti l’Inde.

Kan Marc raconte so recit, dan l’original en grec li dire ki Marie ti casse sa recipient en albatre-la. Kifer? En principe bann recipient en albatre ti ena enn longue licou ki ti kapav scellé pou empeche sa parfum ki ena beaucoup valeur-la evaporé. Dan so livre Découvertes du temps de Jésus (en anglais), Alan Millard dire: “Li facile pou comprend couma sa femme ki ti bien excité-la, pa ti prend le temps pou decacheté sa recipient-la mais li ti casse [licou recipient-la] ek ti laisse tou so parfum fané.” Sa faire nou comprend kifer “lakaz-la ti rempli avek l’odeur sa de l’huile parfumé-la.” (Jean 12:3) Oui, sa ti enn cadeau bien cher, mais li ti bien approprié. Kifer? Par sa cadeau-la, Marie ti montré so reconnaissance envers Jésus ki ti’nn fek ressuscite Lazare, so frere ki li ti bien content.—Jean 11:32-45.

Eski ti ena deux la ville ki ti appel Jéricho?

Matthieu, Marc ek Luc toulé-trois raconte enn mirak ki ti arrivé pré ar Jéricho. (Matthieu 20:29-34; Marc 10:46-52; Luc 18:35-43) Matthieu ek Marc toulé-deux dire ki c’est kan Jésus ti pé “quitte” Jéricho ki li ti faire sa mirak-la. Mais Luc dire ki sa ti arrivé kan Jésus ti “pré pou arrive” Jéricho.

Dan lepok Jésus, eski ti ena enn sel la ville Jéricho ou-soit ti ena deux la ville? Livre Bible d’alors et d’aujourd’hui (en anglais) donne sa reponse-la: “Dan lepok Nouveau Testament, ti’nn reconstruire Jéricho apepré 1.6 kilometre dan sud ancien la ville. Hérode le Grand ti construire enn chateau pou l’hiver la-bas.” Livre Archéologie et histoire biblique (en anglais), confirme sa kan li dire: “Dan lepok Jésus, Jéricho ti enn double la ville. . . . Ancien la ville juif ti apepré 1.6 kilometre ar la ville romain.”

Alors kitfois Jésus ti faire sa mirak-la alors ki li ti pé quitte la ville juif ek li ti pré pou arrive la ville romain ou-soit le contraire. Li clair ki kan nou koné couma la vie ti été dan lepok kot ti ecrire sa bann parole-la, sa aide nou pou comprend seki kapav parette enn contradiction.

[Zimage lor page 10]

Enn bouteille parfum en albatre

[Remerciement photo page 10]