Contigne faire seki bien
“Contigne . . . faire seki bien.”—LUC 6:35.
1, 2. Kifer li pa toujours facile pou faire di-bien envers lezot?
LI PA toujours facile pou faire di-bien nou prochain. Kitfois bann dimoune pou ki nou montré nou l’amour, pa faire pareil envers nou. Mem si nou envie aide bann dimoune lor plan spirituel kan nou faire zeffort pou partage avek zot “sa bon nouvelle ki rempli ar la gloire ki concerne nou Bondié heureux” ek so Garson, li possible ki zot indifferent ek pa reconnaissant pou nou bann zeffort. (1 Tim. 1:11) Ena lezot ki montré vrai-mem ki zot “bann l’ennemi poteau souffrance Christ.” (Phil. 3:18) En tant ki chretien, couma nou bizin agir envers zot?
2 Jésus Christ ti dire so bann disciple: “Contigne content zot bann l’ennemi ek faire seki bien.” (Luc 6:35) Anou examine sa conseil-la. Nou pou guetté aussi couma nou kapav tire profit ar bann lezot kitsoz ki Jésus ti dire concernant faire di-bien envers lezot.
“Content zot bann l’ennemi”
3. (a) Faire enn resumé dan ou prop mot lor seki Jésus ti dire dan Matthieu 5:43-45. (b) Ki l’attitude ti’nn commence developpé parmi bann chef religieux juif dan premier siecle lor bann Juif ek bann non-Juif ?
3 Dan so Sermon ki beaucoup dimoune koné, Jésus ti dire bann dimoune ki ti pé ecoute li pou content zot bann l’ennemi ek pou prié pou bann ki ti persecute zot. (Lire Matthieu 5:43-45.) Bann ki ti present sa jour-la ti bann Juif ek zot ti konn sa commandement Bondié-la: “Fodé pa to tire vengeance ni garde rancune kont bann garson to peuple; ek to bizin content to prochain couma to-mem.” (Lév. 19:18) Bann chef religieux juif dan premier siecle ti pensé ki l’expression “bann garson to peuple” ek “to prochain” ti applik zis ar bann Juif. La Loi mosaïk ti donne l’ordre bann Israélite pou reste separé ar bann lezot nation, mais bann Juif zot, tigit par tigit zot ti’nn commence considere tou bann non-Juif couma bann l’ennemi, ek dapré zot, ti bizin ena la haine pou sa bann dimoune-la.
4. Couma bann disciple Jésus ti bizin agir envers zot l’ennemi?
4 Parkont Jésus li, li ti dire: “Contigne content zot bann l’ennemi ek prié pou bann ki persecute zot.” (Mat. 5:44) So bann disciple ti bizin agir avek amour ar bann ki ti mauvais envers zot. Dapré l’Evangile Luc, Jésus ti dire: “Mo dire zot ki pé ecouté: Contigne content zot bann l’ennemi, faire seki bien envers bann ki ena la haine pou zot, beni bann ki maudit zot, prié pou bann ki insulté zot.” (Luc 6:27, 28) Pareil couma bann chretien premier siecle ki ti prend serieux bann l’enseignement Jésus, nou aussi nou “faire seki bien envers bann ki ena la haine” pou nou kan nou faire bann bon action envers zot, mem si zot mauvais ar nou. Nou “beni bann ki maudit” nou kan nou koz ar zot avek bonté. Ek nou “prié pou bann ki persecute” nou par bann violence physik ou-soit par bann lezot mauvais traitement ki abaisse nou. Nou bann la-priere montré ki nou content nou bann l’ennemi parski nou prié Jéhovah pou ki sa bann persecuteur-la change zot l’attitude ek faire kitsoz ki pou faire zot gagne faveur Jéhovah.
5, 6. Kifer nou bizin content nou bann l’ennemi?
5 Kifer nou bizin content nou bann l’ennemi? Jésus ti dire: “Pou ki zot kapav montré ki zot bann garson zot Papa ki dan le ciel.” (Mat. 5:45) Si nou suive sa conseil-la, nou vinn “bann garson” Bondié dan sens ki nou imite Jéhovah ki “faire so soleil levé lor mauvais dimoune ek lor bon dimoune, ek Li faire la pluie tombé lor dimoune juste ek injuste.” Couma l’Evangile Luc dire, Bondié “Li bon envers bann ki pena reconnaissance ek ki mauvais.”—Luc 6:35.
6 Pou montré so bann disciple ki quantité li ti important ki zot “contigne content zot bann l’ennemi,” Jésus ti dire zot: “Si zot content bann ki content zot, ki recompense zot ena? Eski bann ki ramasse taxe pa faire pareil zot aussi? Ek si zot dire bonjour zis zot bann frere, ki kitsoz extraordinaire zot pé faire? Eski bann dimoune dan bann nation pa faire pareil zot aussi?” (Mat. 5:46, 47) Si nou montré nou l’amour zis envers bann ki content nou, nou pa merite okenn “recompense” ou-soit okenn faveur ar Bondié. Mem bann dimoune ki ramasse taxe, ki en general lezot ti meprisé, ti montré l’amour pou bann dimoune ki ti content zot.—Luc 5:30; 7:34.
7. Kifer li pa pou enn kitsoz extraordinaire si nou dire bonjour zis nou “bann frere”?
7 Kan bann Juif ti dire bonjour, parmi bann mot ki zot ti servi ti ena mot “la paix.” (Juges 19:20; Jean 20:19) Zot ti pé rod dire enn dimoune ki zot ti souhaite li enn bon la-santé, tou seki bon dan so la-vie, ek prosperité. Nou pa pou faire enn “kitsoz extraordinaire” si nou dire bonjour zis bann ki nou considere couma nou “bann frere.” Pareil couma Jésus ti dire, mem bann “dimoune dan bann nation” faire sa.
8. Ki Jésus ti pé encourage bann dimoune ki ti pé ecoute li pou faire kan li ti dire: “Zot bizin parfait”?
8 A cause l’imperfection ki zot inn herité, li impossible ki bann disciple Christ pena okenn defaut, setadir ki zot parfait. (Rom. 5:12) Pourtant, Jésus ti termine sa partie so discours-la kan li ti dire: “Zot bizin parfait, pareil couma zot Papa ki dan le ciel Li parfait.” (Mat. 5:48) Li ti pé encourage bann dimoune ki ti pé ecoute li pou imite Jéhovah, zot “Papa ki dan le ciel.” Couma? Kan zot faire zot l’amour vinn parfait, setadir faire li vinn complet kan zot content zot bann l’ennemi. Sa l’ordre-la applik ar nou aussi.
Kifer nou bizin pardonné?
9. Ki sa vedir: “Pardonne-nou nou bann dette”?
9 Nou contigne faire di-bien kan nou pardonne bann dimoune ki faire peché kont nou avek misericorde. En realité, dan la priere Notre Père, nou trouve sa bann parole-la: “Pardonne-nou nou bann dette, pareil couma nou finn pardonne bann ki doit nou.” (Mat. 6:12) Bien sur, ici Jésus pa ti pé koz lor bann dette l’argent. L’Evangile Luc montré ki sa bann dette ki Jésus ti pé kozé-la ti bann peché, parski Luc dire: “Pardonne-nou nou bann peché, parski nou aussi nou pardonne tou bann ki doit nou.”—Luc 11:4.
10. Couma nou kapav pardonné pareil couma Jéhovah?
10 Nou bizin imite Bondié ki pardonne volontairement bann dimoune ki faire peché mais ki repenti. L’apotre Paul ti ecrire: “Montré-zot bon sakenn envers so prochain, ena enn grand compassion, sakenn bizin pardonne so prochain avek tou so leker pareil couma Bondié aussi finn pardonne zot avek tou so leker par Christ.” (Éph. 4:32) David ti chanté dan enn psaume: “Jéhovah ena misericorde ek compassion, Li pa en colere vite ek Li ena l’amour fidele en abondance. . . . Li pa finn agir avek nou dapré nou bann peché; ek Li pa finn faire nou gagne seki nou merité a cause nou bann peché. . . . Pareil couma l’endroit kot soleil levé li bien loin ar l’endroit kot soleil couché, pareil aussi Li finn mette nou bann peché bien loin ar nou. Pareil couma enn papa montré misericorde envers so bann garson, Jéhovah aussi finn montré misericorde envers bann ki ena la crainte pou Li. Parski Li konn bien couma nou finn formé, Li rappel ki nou finn faire ar la poussiere.”—Ps. 103:8-14.
11. Kisannla Bondié pardonné?
11 C’est zis si nou’nn fini pardonne bann dimoune ki’nn faire peché kont nou ki nou pou kapav gagne pardon Bondié. (Marc 11:25) Pou mette l’accent lor sa point-la, Jésus ti ajouté: “Parski si zot pardonne bann dimoune zot peché, zot Papa ki dan le ciel aussi pou pardonne zot; mais si zot pa pardonne bann dimoune zot peché, zot Papa aussi pa pou pardonne zot.” (Mat. 6:14, 15) Oui, Bondié pardonne zis bann dimoune ki pardonne lezot avek tou zot leker. Ek enn fason pou contigne faire le bien envers lezot c’est kan nou suive sa conseil Paul-la: “Pareil couma Jéhovah inn pardonne zot avek tou so leker, faire pareil zot aussi.”—Col. 3:13.
“Arrete jugé”
12. Ki conseil Jésus ti donné concernant juge lezot?
12 Dan so Sermon lor montagne, Jésus ti dire bann dimoune ki enn lot fason pou faire seki bien c’est kan zot arrete juge lezot. Li ti servi enn l’exemple bien puissant pou montré sa. (Lire Matthieu 7:1-5.) Anou guetté seki Jésus ti envie dire par: “Arrete jugé.”
13. Couma bann ki ti pé ecoute Jésus ti kapav “contigne liberé”?
13 Dapré l’Evangile Matthieu, Jésus ti dire: “Arrete jugé pou ki pa juge zot.” (Mat. 7:1) Dapré Luc, Jésus ti dire: “Arrete jugé, ek pa pou juge zot ditou; arrete condamné, ek pa pou condamne zot ditou. Contigne liberé, ek pou libere zot.” (Luc 6:37) Dan premier siecle, bann Pharisien ki ti pé suive bann tradition ki pa ti basé lor bann l’Ecriture sacré ti pé juge lezot dan enn fason bien dur. N’importe kisannla ki ti pé ecoute Jésus ek ki ti pé faire sa, ti bizin “arrete jugé.” Zot ti bizin plutot “contigne liberé” setadir pardonne peché lezot. L’apotre Paul ti donne mem conseil concernant pardon.—Lire Éphésiens 4:32.
14. Kan bann disciple Jésus pardonné avek tou zot leker, ki zot ti pou pousse lezot pou faire?
14 Kan bann disciple Jésus ti pou pardonné avek tou zot leker, sa ti pou pousse lezot pou faire pareil. Jésus ti dire: “C’est avek jugement ki zot jugé ki pou juge zot; ek c’est avek mesure ki zot mesuré ki pou mesure pou zot.” (Mat. 7:2) En rapport avek fason ki nou traite lezot, nou recolté seki nou semé.—Gal. 6:7.
15. Couma Jésus ti montré ki li mauvais ki nou ena tendance pou trop critiké?
15 Rappel ki Jésus ti pose sa question-la pou montré ki quantité li mauvais ki nou ena tendance pou trop critiké: “Alors, kifer to guette la paille ki dan lizié to frere, mais to pa prend compte poteau ki to ena dan to prop lizié? Ou-soit couma to kapav dire to frere: ‘Laisse moi tire la paille ki dan to lizié’; alors ki ena enn poteau dan to prop lizié?” (Mat. 7:3, 4) Enn dimoune ki ena tendance pou critiké, remark mem enn ti defaut dan “lizié” so frere. Sa dimoune ki critiké-la pé rod dire ki so frere pa trouve bann kitsoz bien, ki li ena enn mauvais jugement. Mem si sa defaut-la bien tipti—pareil couma enn la-paille—sa dimoune ki critiké-la propose pou ‘tire la paille-la.’ Dan enn fason hypocrite, li propose so frere pou aide li pou trouve bann kitsoz pli bien.
16. Kifer nou kapav dire ki bann Pharisien ti ena “enn poteau” dan zot lizié?
16 Bann chef religieux juif surtout ti bien critik lezot. Par exemple, kan enn aveugle ki Jésus ti gueri ti dire ki Jésus inn bizin sorti kot Bondié, bann Pharisien ti en colere ek ti reponn li: “To’nn né net dan bann peché, ek pourtant to pé enseigne nou?” (Jean 9:30-34) En rapport avek enn bon vision spirituel ek capacité pou bien jugé, bann Pharisien ti ena “enn poteau” dan zot lizié ek zot ti aveugle net. Alors Jésus ti dire bien fort: “Hypocrite! Tire poteau ki dan to prop lizié avant, lerla to pou trouve bien couma pou tire la paille ki dan lizié to frere.” (Mat. 7:5; Luc 6:42) Si nou bien decidé pou faire di-bien ek pou traite lezot couma bizin, nou pa pou passe nou lé-temps pou critik lezot, coumadir touletan nou pé rod enn la-paille dan zot lizié. Au contraire, nou pou reconette ki nou imparfait ek ki nou bizin pa juge ek critik nou bann frere.
Couma nou bizin traite lezot?
17. Dapré Matthieu 7:12, couma nou bizin traite lezot?
17 Dan so Sermon lor montagne, Jésus ti attire l’attention ki Bondié agir couma enn papa envers so bann serviteur kan Li reponn zot la-priere. (Lire Matthieu 7:7-12.) Li interessant pou remarké ki Jésus ti donne enn principe ki bizin guide nou dan nou conduite avek lezot: “Alors, tou kitsoz ki zot envie bann dimoune faire pou zot, zot aussi, zot bizin faire pareil pou bannla.” (Mat. 7:12) C’est zis si nou traite nou prochain dan sa fason-la ki nou pou montré ki nou bann vrai disciple Jésus Christ.
18. Couma “la Loi” ti montré ki nou bizin traite lezot couma nou envie zot traite nou?
18 Kan Jésus ti fini dire ki nou bizin traite lezot couma nou envie ki lezot traite nou, li ti ajouté: “Parski en realité, sa-mem ki la Loi ek bann Prophete vedir.” Kan nou traite lezot dan fason ki Jésus ti dire, nou pé agir en accord avek l’esprit ki ena derriere “la Loi,” setadir bann livre biblik depuis Genèse ziska Deutéronome. Sa bann livre-la pa zis faire nou konn projet Jéhovah pou produire enn descendance ki pou tire le mal net lor la terre. Ladan ena aussi la Loi ki Bondié ti donne nation Israël par Moïse en 1513 a.n.l. (Gen. 3:15) Parmi bann commandement ki bann Israélite ti bizin suive, la Loi ti demann zot pou manifesté la justice, pou pa faire preference, ek pou faire di-bien envers bann ki dan difficulté ek envers bann etranger ki ti dan zot pays.—Lév. 19:9, 10, 15, 34.
19. Couma “bann Prophete” montré ki nou bizin faire di-bien envers lezot?
19 Kan Jésus ti mentionne “bann Prophete,” li ti pé pense bann livre prophetik ki ena dan bann l’Écritures hébraïques. Dan sa bann livre-la ena bann prophetie messianik ki finn realisé lor Jésus Christ. Zot montré aussi ki Bondié beni so bann serviteur kan zot faire seki bon devant so lizié ek kan zot traite lezot couma bizin. Par exemple, prophetie Isaïe ti donne bann Israélite sa conseil-la: “Ala seki Jéhovah inn dire: ‘Garde la justice, faire seki droite. . . . Heureux enn dimoune mortel ki faire sa, ek garson bann humain ki trap sa fort, . . . ki faire attention ar so la-main pou ki li pa faire okenn kitsoz ki mauvais.’ ” (Is. 56:1, 2) Oui, Bondié attann ki so peuple contigne faire di-bien envers lezot.
Faire toujours di-bien envers lezot
20, 21. Couma bann la-foule ti reagir kan Jésus ti fini faire so Sermon lor montagne, ek kifer ou bizin medite lor sa Sermon-la?
20 Nou finn examine zis deux-trois parmi bann pensée bien important ki Jésus ti dire dan so Sermon lor montagne, enn discours ki pena so deuxieme. Mais mem si nou pa finn examine tou seki li’nn dire, nou kapav bien comprend reaction bann ki ti ecoute li sa jour-la. La Bible dire: “Alors, kan Jésus ti fini dire sa bann parole-la, l’effet ki sa ti ena c’est ki bann la-foule ti impressionné par so fason enseigné; parski li ti pé enseigne zot couma enn dimoune ki ena l’autorité, pa couma zot bann scribe.”—Mat. 7:28, 29.
21 Pena okenn doute lor la: Jésus ti montré ki li-mem sa “Conseiller extraordinaire” ki prophete Isaïe ti annoncé-la. (Is. 9:6) Sa sermon ki Jésus ti faire lor montagne-la montré bien ki Jésus konn fason pensé so Papa. En plus bann pensée ki nou finn examiné, sa discours-la aprann nou beaucoup kitsoz concernant vrai bonheur, couma pou rejette l’immoralité, fason ki nou bizin pratik la justice, seki nou bizin faire pou konn enn l’avenir sur ek joyeux, ek beaucoup lezot kitsoz encore. Kifer ou pa relire bien Matthieu chapitre 5 ziska 7 ek reflechi lor la dan ou la-priere? Medite lor bann conseil extraordinaire ki Jésus ti donné. Mette en pratik dan ou la-vie seki Jésus Christ ti dire dan sa Sermon-la. Lerla, ou pou kapav faire Jéhovah plus plaisir, traite lezot couma bizin, ek contigne faire seki bien.
Couma ou pou reponn?
• Couma nou bizin traite nou bann l’ennemi?
• Kifer nou bizin pardonné?
• Ki Jésus ti dire concernant juge lezot?
• Dapré Matthieu 7:12, couma nou bizin traite lezot?
[L’encadré lor page 14]
Eski ou koné kifer Jésus ti dire: “Arrete jugé”?
[Zimage lor page 12]
Kifer nou bizin prié pou bann ki persecute nou?
[Zimage lor page 15]
Eski touletan ou traite lezot pareil couma ou ti pou envie ki zot traite ou?