Noé ek deluge—Enn realité, pa enn zistoire ki’nn inventé
ESKI ou envie enn meilleur le monde—enn le monde kot bann dimoune vive en paix avek zot camarade? Enn le monde kot pena ni la guerre, ni crime, ni dimoune ki faire dominere? Si c’est sa ki ou envie, ou kapav gagne l’encouragement grace a enn recit historik ki kitfois ou bien koné. C’est recit Noé, enn zom ki ti vrai-mem bon ek ki ti construire enn arche ki ti sauve li ek so famille dan enn deluge ki ti arrivé partout lor la terre ek kot bann mauvais dimoune ti detruire.
Sa recit-la, li enn parmi bann zistoire ki bann dimoune pli koné dan le monde. Nou trouve sa dan la Bible dan livre Genèse, chapitre 6 ziska 9, ek nou aussi retrouve sa dan Coran ek dan bann zistoire enn quantité peuple partout lor la terre. Eski deluge ti arrivé vrai-mem, ou-soit eski li zis enn zistoire ki’nn inventé pou encourage bann dimoune faire seki bien? Bann ki etudié la religion ek bann scientifik inn debatte lor sa sujet-la pendant bann siecle. Pourtant, dan la Bible, Parole Bondié, pena okenn doute lor la—sa recit-la li enn realité, li pa enn zistoire ki’nn inventé. Guette bann raison kifer nou sur ki sa recit-la li vrai:
Recit Genèse donne bann detail exact lor l’année, mois ek jour ki deluge ti commencé, kan ek kot-sa l’arche ti arreté, ek kan la terre ti sec. Bann detail concernant l’arche zot exact zot aussi—couma li ti été, so bann mesure, ek bann materiaux ki ti servi pou construire li. Parkont, bann zistoire ki bann dimoune inventé souvent donne bann description bien vague.
Deux la liste ancetre ek descendant ki ena dan la Bible confirmé ki Noé ti vrai-mem existé. (1 Chroniques 1:4; Luc 3:36) C’est Ezra ek Luc ki ti etabli sa bann la liste-la, ek toulé-deux ti bann dimoune ki ti faire bann recherche avek beaucoup soin. Luc ti etabli la liste bann ancetre Jésus Christ ziska Noé.
Bann prophete Isaïe ek Ézékiel ek dan lepok bann chretien, l’apotre Paul ek l’apotre Pierre, ti mentionne Noé ek deluge.—Isaïe 54:9; Ézékiel 14:14, 20; Hébreux 11:7; 1 Pierre 3:19, 20; 2 Pierre 2:5.
Jésus Christ ti faire reference ar deluge kan li ti dire: “Pareil couma sa ti été dan lepok Noé, coumsa-mem sa pou été dan lepok Fils de l’homme: zot ti pé mangé, zot ti pé boire, bann missié ti pé marié, ti pé donne bann femme en mariage, ziska jour ki Noé ti rente dan l’arche, ek deluge ti vini ek ti detruire zot tou.” (Luc 17:26, 27) Si deluge pa ti’nn arrivé, seki Jésus ti dire lor “lepok Fils de l’homme” pa ti pou ena okenn signification.
L’apotre Pierre ti annoncé ki ti pou ena “bann moqueur” ki ti pou bouffonne seki la Bible dire. Li ti ecrire: “Pareil couma zot envie, zot blié ki . . . le monde dan lepok [Noé] ti detruire kan li ti couvert ar de l’eau.” Eski nou bizin blié seki ti arrivé? Pa ditou! Pierre ajouté: “Bondié finn reserve le ciel ek la terre ki existé zordi, pou brulé par difé, ek pou jour jugement ek destruction bann mauvais dimoune.”—2 Pierre 3:3-7.
Encore enn fois, Bondié pou detruire bann mauvais dimoune, ek encore enn fois, pou ena bann dimoune ki pou sapé. Si nou imite l’exemple Noé, kitfois nou pou parmi bann dimoune juste ki pou delivré pou vive dan enn meilleur le monde.